1 ⵖⴻⵏⵏⵊⴻⵎ ⵉ ⵙⵉⴷⵉ ⵉⵊⵊ ⵏ ⵢⴻⵥⵍⵉ ⴰⵎⴰⵢⵏⵓ,

ⵖⴻⵏⵏⵊⴻⵎ ⵉ ⵙⵉⴷⵉ, ⵎⴰⵔⵔⴰ ⵜⴰⵎⵎⵓⵔⵜ! ^■  

2 ⵖⴻⵏⵏⵊⴻⵎ ⵉ ⵙⵉⴷⵉ, ⴱⴰⵔⴽⴻⵎ ⵉⵙⴻⵎ ⵏⵏⴻⵙ,

ⴱⴻⵛⵛⴰⵔⴻⵎ ⵉ ⵓⵙⴻⵏⵊⴻⵎ ⵏⵏⴻⵙ ⴰⵙⵙ ⵅ ⵡⴰⵙⵙ.

3 ⴱⴰⵔⵔⵃⴻⵎ ⴰⵄⵓⴵⵉ ⵏⵏⴻⵙ ⵊⴰⵔ ⵍⴻⴳⵏⵓⵙ,

ⵍⴻⵄⵊⴰⵢⴻⴱ ⵏⵏⴻⵙ ⵊⴰⵔ ⵎⴰⵔⵔⴰ ⵍⴻⴳⵏⵓⵙ.

4 ⵎⴰⵖⴰⵔ ⵙⵉⴷⵉ ⴷ ⴰⵎⴻⵇⵇⵔⴰⵏ ⵓ ⵉⵙⵙⴷⴰⵃⴻⴵ ⴰⵙⴻⵎⵖⴰⵔ ⴰⵟⵟⴰⵙ,

ⵏⴻⵜⵜⴰ ⴷ ⴰⵎⵙⴰⴳⴳⵯⴻⴷ ⵎⴰⵀⵓ ⵎⴰⵔⵔⴰ ⵉⵔⴻⴱⴱⵉⵜⴻⵏ.

5 ⵎⵉⵏⵥⵉ ⵎⴰⵔⵔⴰ ⵉⵔⴻⴱⴱⵉⵜⴻⵏ ⵏ ⵍⴻⴳⵏⵓⵙ ⴰⵇⴰ ⴰⵜⴻⵏ ⴷ ⵍ’ⴰⵚⵏⴰⵎ,

ⵎⴰⵛⴰ ⵙⵉⴷⵉ ⵉⴳⴳⴰ ⵉⵊⴻⵏⵡⴰⵏ.

6 ⵜⵉⵙⵙⵉⵇⵜ ⴷ ⵍⵄⴻⵥⵥ ⴵⴰⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ,

ⵊⵊⴻⵀⴷ ⴷ ⵡⴰⵥⵔⵉ ⴰⵇⴰ ⴰⵜⴻⵏ ⴷⵉ ⵣⵥⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ.

7 ⵡⵛⴻⵎ ⵉ ⵙⵉⴷⵉ, ⴰ, ⵜⵉⵇⴻⴱⴱⴰⵍ ⵏ ⵍⴻⴳⵏⵓⵙ,

ⵡⵛⴻⵎ ⵉ ⵙⵉⴷⵉ ⴰⵄⵓⴵⵉ ⴷ ⵊⵊⴻⵀⴷ.

8 ⵡⵛⴻⵎ ⵉ ⵙⵉⴷⵉ ⴰⵄⵓⴵⵉ ⵏ ⵢⵉⵙⴻⵎ ⵏⵏⴻⵙ,

ⴰⵡⵢⴻⵎ-ⴷⴷ ⵜⴰⵡⵀⵉⴱⵜ ⵓ ⴰⵙⴻⵎ-ⴷⴷ ⵖⴰⵔ ⵍⴻⵎⵔⴰⵃⴰⵜ ⵏⵏⴻⵙ,

9 ⵙⴻⵊⴷⴻⵎ ⵉ ⵙⵉⴷⵉ ⵙ ⵓⵛⴻⵡⵡⴰⵔ ⵉⵇⴻⴷⴷⵙⴻⵏ,

ⴰⵔⵊⵉⵊⴻⵎ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ, ⴰ ⵎⴰⵔⵔⴰ ⵜⴰⵎⵎⵓⵔⵜ! ^■  

10 ⵉⵏⵉⵎ ⵊⴰⵔ ⵍⴻⴳⵏⵓⵙ: “ⵙⵉⴷⵉ ⵉⵃⴻⴽⴽⴻⵎ!”

ⵏⵉⵛⴰⵏ, ⵍⴻⵅⵅⵓ ⴷⴷⵓⵏⴻⵛⵜ ⵜⴱⴻⴷⴷ ⵜⴻⵎⵜⴻⵏ, ⵡⴰⵔ ⵜⵜⴻⵏⵀⴻⵥⵥⵉ ⵄⴰⴷ.

ⵏⴻⵜⵜⴰ ⴰⴷ ⵉⵃⴽⴻⵎ ⵍⴻⴳⵏⵓⵙ ⵙ ⵍⵃⴻⵇⵇ.

11 ⴻⵊⵊ ⴰⵊⴻⵏⵏⴰ ⴰⴷ ⵉⴼⴰⵔⵃ ⵓ ⵜⴰⵎⵎⵓⵔⵜ ⴰⴷ ⵜⴰⵔⵛⴻⵇ,

ⴻⵊⵊ ⴰⴷ ⵉⵥⵀⴰⵔ ⵍⴻⴱⵃⴰⵔ ⴷ ⵓⵄⴻⵎⵎⴰⵔ ⵏⵏⴻⵙ,

12 ⴻⵊⵊ ⴰⴷ ⵉⵙⵍⵉⵡⵍⵉⵡ ⵢⴻⵢⵢⴰⵔ ⵙ ⵍⴻⴼⵔⴰⵃⴻⵜ ⵙ ⵎⴰⵔⵔⴰ ⵎⵉⵏ ⴷⴰⵢⴻⵙ,

ⵅⴻⵏⵏⵉ ⴰⴷ ⵙⵍⵉⵡⵍⵉⵡⴻⵏⵜ ⵎⴰⵔⵔⴰ ⵜⵛⴻⵊⵊⵓⵔⴰ ⵏ ⵡⴻⵥⵖⴰⵔ ^□  

13 ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⴰⴷ ⴷⴷ-ⵢⴰⵙ,

ⵎⴰⵖⴰⵔ ⵏⴻⵜⵜⴰ ⴰⴷ ⴷⴷ-ⵢⴰⵙ ⵃⵉⵎⴰ ⴰⴷ ⵉⵛⴰⵔⵔⴻⵄ ⵜⴰⵎⵎⵓⵔⵜ.

ⵏⴻⵜⵜⴰ ⴰⴷ ⵉⵛⴰⵔⵔⴻⵄ ⴷⴷⵓⵏⴻⵛⵜ ⵙ ⵜⵙⴻⴳⴷⴰ,

ⵓ ⵍⴻⴳⵏⵓⵙ ⵙ ⵍⵃⴻⵇⵇ ⵏⵏⴻⵙ. ^■