1 ⴰⵥⴻⵀⵀⵉⴷ. ⵉⵊⵊ ⵏ ⵉⵥⵍⵉ ⵉ ⵡⴰⵙⵙ ⵏ ⵙⵙⴻⴱⵜ.

2 ⵎⴰⵎⵎⴻⵛ ⵉⵚⴱⴻⵃ ⵎⴰⵃⴻⵏⴷ ⴰⴷ ⵏⵇⴰⴷⴰ ⵙⵉⴷⵉ,

ⴰⴷ ⵏⵥⴻⵀⵀⴻⴷ ⵉ ⵢⵉⵙⴻⵎ ⵏⵏⴻⴽ,

ⴰ ⴰⵎⵄⵓⴵⵉ ⵅ ⴽⵓⵍⵛⵉ,

3 ⵎⴰⵃⴻⵏⴷ ⴰⴷ ⵏⴱⴰⵔⵔⴻⵃ ⵖⴰⵔ ⵜⵓⴼⴼⵓⵜ ⵙ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,

ⵍⴰⵎⴰⵏ ⵏⵏⴻⴽ ⴷⵉ ⴵⵢⴰⵍⵉ,

4 ⴷⵉ ⵍⵄⵓⴷ ⵙ ⵄⴻⵛⵔⴰ ⵏ ⵉⴼⵉⵍⴰⵏ ⵓ ⴷⵉ ⵍⵀⴰⵔⴱⴰ,

ⵙ ⵜⵉⵔⴰⵔⵜ ⵅ ⵉⴼⵉⵍⴰⵏ ⵏ ⵍⴳⴰⵎⴱⵔⵉ.

5 ⵎⴰⵖⴰⵔ ⵛⴻⴽ ⵜⴻⵙⵙⴼⴰⵔⵃⴻⴷ ⴰⵢⵉ, ⴰ ⵙⵉⴷⵉ, ⵙ ⵜⵎⴻⴳⴳⴰ ⵏⵏⴻⴽ,

ⵏⴻⵛⵛ ⴰⴷ ⵙⵍⵉⵡⴻⵍⵡⴻⵖ ⵅ ⵍⴻⴼⵄⴰⵢⴻⵍ ⵏ ⵉⴼⴰⵙⵙⴻⵏ ⵏⵏⴻⴽ.

6 ⵎⴰⵎⵎⴻⵛ ⵎⵖⴰⵔⴻⵏⵜ ⵜⵎⴻⴳⴳⴰ ⵏⵏⴻⴽ, ⴰ ⵙⵉⴷⵉ,

ⵎⴰⵎⵎⴻⵛ ⵓⴵⵖⴻⵏ ⵉⵅⴰⵔⵔⵉⵚⴻⵏ ⵏⵏⴻⴽ!

7 ⵉⵊⵊ ⵏ ⵓⵇⴻⴼⴼⵓⵃ ⵡⴰⵔ ⵖⴰⵔⴻⵙ ⵎⵉⵏ ⵖⴰ ⵉⵄⴰⵡⴻⴷ,

ⵓ ⵉⵊⵊ ⵏ ⵓⴱⵓⵀⴰⵍⵉ ⵡⴰⵔ ⵉⴼⴻⵀⵀⴻⵎ ⵎⴰⵏ ⴰⵢⴰ.

8 ⵎⴰⵍⴰ ⵉⵄⴻⴼⴼⴰⵏⴻⵏ ⵖⴻⵎⵎⵢⴻⵏ ⴰⵎ ⴰⵔⵔⴱⵉⵄ,

ⵓ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ ⵏⴻⵡⵡⴰⵔⴻⵏ,

ⴰⵇⴰ ⴰⵢⴰ ⴰⴷ ⵉⵙⵙⵉⵡⴻⴹ ⴰⵜⴻⵃⵃⵉ ⵏⵙⴻⵏ ⵉ ⵍⴻⴱⴷⴰ ⵇⴰⵄ.

9 ⵛⴻⴽ ⴷ ⴰⵎⵄⵓⴵⵉ ⵅ ⴽⵓⵍⵛⵉ ⵉ ⵍⴻⴱⴷⴰ, ⴰ ⵙⵉⴷⵉ!

10 ⵎⴰⵖⴰⵔ ⵅⵥⴰⵔ, ⵍⵄⴻⴷⵢⴰⵏ ⵏⵏⴻⴽ, ⵙⵉⴷⵉ,

ⵍⵄⴻⴷⵢⴰⵏ ⵏⵏⴻⴽ ⴰⴷ ⴼⵏⴰⵏ,

ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ ⴰⴷ ⵜⵜⵡⴰⵥⴻⴵⵄⴻⵏ.

11 ⵛⴻⴽ ⴰⴷ ⵜⴻⵙⵙⴳⴻⵄⵄⴷⴻⴷ ⴰⵛⵛⴰⵡ ⵉⵏⵓ ⴰⵎ ⵡⴻⵏⵏⵉ ⵏ ⵓⴼⵓⵏⴰⵙ ⵏ ⵍⴻⵅⵍⴰ,

ⵜⵜⵡⴰⴷⴻⵀⵏⴻⵖ ⵙ ⵥⵥⴻⵛⵜ ⵏ ⵟⵔⵉ.

12 ⵜⵉⵟⵟ ⵉⵏⵓ ⴰⴷ ⵜⵥⴰⵔ ⵉⵏⵏⵉ ⵅⴰⴼⵉ ⵉⵜⵜⵛⴻⴽⴽⵎⴻⵏ,

ⵉⵎⴻⵥⵥⵓⵖⴻⵏ ⵉⵏⵓ ⴰⴷ ⵙⵍⴻⵏ ⵉ ⵉⵖⵔⵉⵎⴻⵏ ⵉⵏⵓ ⵉⵏⵏⵉ ⵅⴰⴼⵉ ⴷⴷ-ⵉⴽⴽⴰⵔⴻⵏ.

13 ⴰⵎⵙⴻⴳⴳⴻⴷ ⴰⴷ ⵉⵏⴻⵡⵡⴰⵔ ⴰⵎ ⵜⵛⴻⵊⵊⴰⵔⵜ ⵏ ⵜⵉⵏⵉ,

ⴰⴷ ⵉⵖⵎⵉ ⴰⵎ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ ⵅ ⵉⴷⵓⵔⴰⵔ ⵏ ⵍⵓⴱⵏⴰⵏ, ^■  

14 ⵉⵏⵏⵉ ⵉⵜⵜⵡⴰⵥⵥⵓⵏ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ,

ⴰⴷ ⵏⵏⵓⵡⴰⵔⴻⵏ ⴷⵉ ⵍⴻⵎⵔⴰⵃⴰⵜ ⵏ ⴰⵔⴻⴱⴱⵉ ⵏⵏⴻⵖ.

15 ⵏⵉⵜⵏⵉ ⴰⴷ ⵡⵛⴻⵏ ⵍⵖⵉⴵⴻⵜ ⴷⵉ ⵜⴻⵡⵙⴰⵔ,

ⴰⴷ ⵇⵇⵉⵎⴻⵏ ⵚⴻⵃⵃⴻⵏ ⵓ ⴷ ⵟⵔⵉ.

16 ⵎⴰⵃⴻⵏⴷ ⴰⴷ ⴱⴰⵔⵔⵃⴻⵏ, ⴱⴻⵍⵍⵉ ⵙⵉⴷⵉ ⴰⵇⴰ-ⵜ ⵏⵉⵛⴰⵏ.

ⵏⴻⵜⵜⴰ ⴷ ⵜⴰⵚⴹⴰⵔⵜ ⵉⵏⵓ ⵓ ⵡⴰⵔ ⴷⴰⵢⴻⵙ ⴱⵓ ⵍⵖⴻⵛⵛ.