1 ⵡⴻⵏⵏⵉ ⵉⵥⴻⴷⴷⵖⴻⵏ ⴷⴻⴳ ⵓⴷⵓⵔⵔⵉ ⵏ ⵓⵎⵄⵓⴵⵉ ⵅ ⴽⵓⵍⵛⵉ,

ⴰⵇⴰ ⵏⴻⵜⵜⴰ ⴰⴷ ⵉⵙⵙⴻⵏⵙ ⴷⵉ ⵜⵉⵍⵉ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ.

2 ⴰⴷ ⵉⵏⵉⵖ ⵉ ⵙⵉⴷⵉ: ⵛⴻⴽ ⴷ ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ ⴷ ⵍⴱⵓⵔⵊ ⵉⵏⵓ,

ⴰⵔⴻⴱⴱⵉ ⵉⵏⵓ, ⵡⴻⵏⵏⵉ ⵅ ⵜⵜⴻⵛⵍⴻⵖ!

3 ⵎⴰⵖⴰⵔ ⵏⴻⵜⵜⴰ ⴰⴷ ⵛⴻⴽ ⵉⴼⴻⴽⴽ ⵥⵉ ⵜⴻⵅⵛⴻⴼⵜ ⵏ ⵉⵏⴻⵢⵎⴰⵔⴻⵏ ⵏ ⵉⵊⴹⴰⴹ,

ⵥⵉ ⵟⵟⴰⵄⵓⵏ ⵢⴰⵔⴻⴷⴷⴵⴻⵏ. ^■  

4 ⵙ ⴰⵔⵔⵉⵛ ⵏⵏⴻⵙ ⴰⴷ ⵛⴻⴽ ⵉⴷⴻⵍ,

ⵙⴰⴷⵓ ⵡⴰⴼⵔⵉⵡⴻⵏ ⵏⵏⴻⵙ ⴰⴷ ⵜⴰⴼⴻⴷ ⴰⴷⵓⵔⵔⵉ.

ⵍⵎⴰⵏⴻⵜ ⵏⵏⴻⵙ ⴷ ⵜⴰⵙⴻⴷⴷⴰⵔⵜ ⵜⴰⵎⴻⵇⵇⵔⴰⵏⵜ ⴷ ⴰⵔⵔⵓⴹ ⵏ ⵡⵓⵥⵥⴰⵍ. ^■  

5 ⵡⴰⵔ ⵜᵉⵜⵜⴻⴳⴳⵯⴻⴷⴻⴷ ⵛⴰ ⵥⴻⴳ ⵓⵏⴻⵅⵍⵉⵄ ⵏ ⴵⵉⵍⴻⵜ,

ⵥⵉ ⴼⵍⵉⵜⵛⴰ ⵏ ⵍⵇⴻⵡⵙ ⵉ ⴷⵉⵏ ⵉⵟⵟⴰⵡⴻⵏ ⵙ ⵡⴰⵙⵙ, ^■  

6 ⵓⵍⴰ ⵥⵉ ⵟⵟⴰⵄⵓⵏ ⵉ ⴷⴷ-ⵉⵜⵜⴻⵏⵏⴹⴻⵏ ⴷⵉ ⵜⴰⴵⴻⵙⵜ,

ⵥⵉ ⵍⵀⴰⵍⴰⴽ ⵉ ⵢⴰⵔⴻⴷⴷⴵⴻⵏ ⵙ ⵓⵥⵉⵍ.

7 ⵡⴰⵅⵅⴰ ⴰⴷ ⵡⴹⴰⵏ ⴰⵍⴻⴼ ⵖⴰⵔ ⵓⵖⴻⵥⴷⵉⵙ ⵏⵏⴻⴽ,

ⵓ ⵄⴻⵛⵔⴰ ⴰⵍⴻⴼ ⵖⴰⵔ ⴰⴼⵓⵙ ⴰⴼⵓⵙⵉ ⵏⵏⴻⴽ,

ⵡⴰⵅⵅⴰ ⴰⵎⴻⵏⵏⵉ ⵡⴰⵔ ⵛⴻⴽ ⴷⴷ-ⵉⵜⵜⵉⴽⴽⵯⵉⴹ.

8 ⴰⴷ ⵜⵡⴰⵍⵉⴷ ⴰⵢⴰ ⵙ ⵜⵉⵟⵟⴰⵡⵉⵏ ⵏⵏⴻⴽ ⵡⴰⵀⴰ,

ⴰⴷ ⵜⵥⴰⵔⴻⴷ ⵎⴰⵎⵎⴻⵛ ⵉ ⵖⴰ ⵉⵜⵜⵡⴰⵅⵍⴻⴼ ⵥⴻⴳ ⵉⵄⴻⴼⴼⴰⵏⴻⵏ.

9 ⵎⴰⵖⴰⵔ ⵅⴰⴽ: ‘ⵛⴻⴽ ⴰ ⵙⵉⴷⵉ, ⴰⵇⴰ ⵛⴻⴽ ⴷ ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ!’

ⴰⵇⴰ ⵛⴻⴽ ⵜⴻⴳⴳⵉⴷ ⴰⵎⵄⵓⴵⵉ ⵅ ⴽⵓⵍⵛⵉ ⴷ ⵜⴰⵥⴻⴷⴷⵉⵖⵜ ⵉ ⵢⵉⵅⴻⴼ ⵏⵏⴻⴽ,

10 ⵡⴰⵔ ⴷⴰⵢⴻⴽ ⵜⵏⴻⵟⵟⴻⵃ ⵜⵓⵄⴻⴼⴼⵏⴰ,

ⵓⵍⴰ ⴷ ⵉⵛⵜ ⵏ ⵊⵊⵔⵉⵃⴻⵛⵜ ⵡⴰⵔ ⴷⴷ-ⵜⵇⴰⵔⵔⴰⴱ ⵛⴰ ⵖⴰⵔ ⵓⵇⵉⴹⵓⵏ ⵏⵏⴻⴽ,

11 ⵎⴰⵖⴰⵔ ⵏⴻⵜⵜⴰ ⴰⴷ ⵅⴰⴽ ⵢⵓⵎⵓⵔ ⵍⵎⴰⵍⴰⴽⴰⵜ ⵏⵏⴻⵙ,

ⵎⴰⵃⴻⵏⴷ ⴰⴷ ⵛⴻⴽ ⵃⴹⴰⵏⵜ ⴷⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⴽ. ^■  

12 ⴰⴷ ⵛⴻⴽ ⴽⵙⵉⵏ ⵅ ⵉⴼⴰⵙⵙⴻⵏ ⵏⵙⴻⵏⵜ,

ⵃⵉⵎⴰ ⴰⴹⴰⵔ ⵏⵏⴻⴽ ⵡⴰⵔ ⵉⵏⴻⴳⴳⴻⵃ ⴰⵥⵔⵓ. ^■  

13 ⴰⴷ ⵜⵄⴻⴼⵙⴻⴷ ⵅ ⵡⴻⵢⵔⴰⴷ ⵉⵥⴻⵀⵀⴰⵔⴻⵏ ⵓ ⵅ ⵜⵍⴻⴼⵙⴰ,

ⴰⴷ ⵜⵄⴻⵊⵏⴻⴷ ⵅ ⵡⴻⵢⵔⴰⴷ ⴰⵎⴻⵥⵢⴰⵏ ⴷ ⵍⵀⴰⵢⵛⴻⵜ ⵏ ⵍⴻⴱⵃⴰⵔ. ^■  

14 ⵓⵎⵉ ⴷⴷ-ⵉⵇⵇⴻⵏ ⵏⴻⵜⵜⴰ ⵖⴰⵔⵉ,

ⵏⴻⵛⵛ ⴰⴷ ⵜ ⵙⵙⵏⴻⵊⵎⴻⵖ.

ⵏⴻⵛⵛ ⴰⴷ ⵜ ⵙⵙⴳⴻⵄⵄⴷⴻⵖ,

ⵎⴰⵖⴰⵔ ⵏⴻⵜⵜⴰ ⵉⵙⵙⴻⵏ ⵉⵙⴻⵎ ⵉⵏⵓ.

15 ⵏⴻⵜⵜⴰ ⴰⴷ ⴰⵢⵉ ⵉⵍⴰⵖⴰ ⵓ ⵏⴻⵛⵛ ⴰⴷ ⵅⴰⵙ ⴷⴷ-ⴰⵔⵔⴻⵖ.

ⴷⵉ ⵍⴻⵃⵚⴰⵔⴻⵜ ⴰⵇⴰ ⴰⵢⵉ ⵖⴰⵔⴻⵙ.

ⵏⴻⵛⵛ ⴰⴷ ⵜ ⴼⴻⴽⴽⴻⵖ, ⴰⴷ ⴰⵙ ⵙⵙⵄⵓⴵⴻⵖ.

16 ⵏⴻⵛⵛ ⴰⴷ ⵜ ⵙⵙⵊⵊⵉⵡⵏⴻⵖ ⴰⴽ-ⴷ ⵜⵓⵥⵥⴻⴳⴳⴰⵔⵜ ⵏ ⵡⵓⵙⵙⴰⵏ,

ⵏⴻⵛⵛ ⴰⴷ ⴰⵙ ⵙⵙⴻⵛⵏⴻⵖ ⴰⵙⴻⵏⵊⴻⵎ ⵉⵏⵓ.