1 ⵜⴰⵥⴰⴵⵉⵜ ⵏ ⵎⵓⵙⴰ, ⴰⵔⵢⴰⵥ ⵏ ⴰⵔⴻⴱⴱⵉ.

ⴰ ⵙⵉⴷⵉ ⵉⵏⵓ, ⵛⴻⴽ ⵜⵓⵖⴰ ⴷ ⵜⴰⵥⴻⴷⴷⵉⵖⵜ ⵏⵏⴻⵖ ⵥⵉ ⵊⵊⵉⵍ ⴰⵍ ⵊⵊⵉⵍ.

2 ⵇⴱⴻⵍ ⵎⴰ ⴰⴷ ⵉⵍⵉⵏ ⵉⴷⵓⵔⴰⵔ,

ⵇⴱⴻⵍ ⵎⴰ ⴰⴷ ⴷⴷ-ⵜⴻⵙⵙⵓⴼⴼⵖⴻⴷ ⵜⴰⵎⵎⵓⵔⵜ, ⴷⴷⵓⵏⴻⵛⵜ,

ⵡⴰⵀ ⴰⵇⴰ ⵛⴻⴽ ⴷ ⴰⵔⴻⴱⴱⵉ ⵥⵉ ⵍⴻⴱⴷⴰ ⴰⵍ ⵍⴻⴱⴷⴰ.

3 ⵛⴻⴽ ⵜⴻⵊⵊⵉⴷ ⴱⵏⴰⴷⴻⵎ ⴰⴷ ⵉⵄⵇⴻⴱ ⵖⴰⵔ ⵜⵄⴻⵊⵊⴰⵊⵜ.

ⵜⴻⵇⵇⴰⵔⴻⴷ: “ⵄⴻⵇⴱⴻⵜⵜⵉⵡ-ⴷⴷ ⵜⴰⵔⵡⴰ ⵏ ⴱⵏⴰⴷⴻⵎ!”

4 ⵎⴰⵖⴰⵔ ⴰⵍⴻⴼ ⵏ ⵉⵙⴻⴳⴳⵯⵓⵙⴰ ⴷⵉ ⵜⵉⵟⵟⴰⵡⵉⵏ ⵏⵏⴻⴽ ⴰⵎ ⵡⴰⵙⵙ ⵏ ⵉⴹⴻⵏⵏⴰⴹ,

ⵡⴻⵏⵏⵉ ⵉⵄⴷⵓⵏ ⴰⵎ ⵉⵛⵜ ⵏ ⵏⵏⵓⴱⴻⵜ ⵏ ⵜⵄⴻⵙⵙⴰⵙⵜ ⴷⵉ ⴵⵉⵍⴻⵜ.

5 ⵛⴻⴽ ⵜⴼⴰⵔⴹⴻⴷ ⵜⴻⵏ, ⴰⵇⴰ ⴰⵜⴻⵏ ⴰⵎ ⵢⵉⴹⴻⵙ.

Ƴⴰⵔ ⵜⵓⴼⴼⵓⵜ ⴳⴳⵉⵏ ⴰⵎ ⴰⵔⵔⴱⵉⵄ ⵉⵙⵍⴰⵡⴻⵏ.

6 ⵖⴰⵔ ⵜⵓⴼⴼⵓⵜ ⵉⵜⵜⵥᵉⵢⵥⵉⵡ ⴰⵔⵔⴱⵉⵄ ⵓⵛⴰ ⵅⴻⵏⵏⵉ ⵉⵜⵜⵉⵙⵍⴰⵡ,

ⵖⴰⵔ ⵜⵎⴻⴷⴷⵉⵜ ⵉⵜⵜⵡⴰⵎⵊⴰⵔ, ⵉⵜⵜⴰⵥⴻⵖ.

7 ⵎⴰⵖⴰⵔ ⵏⴻⵛⵛⵉⵏ ⵏⴻⴼⵏⴰ ⵙ ⵡⴻⵖⴹⴰⴱ ⵏⵏⴻⴽ,

ⵏⴻⵏⵏⴻⵅⵍⴻⵄ ⵥⴻⴳ ⵡⴻⵙⵄⴰⵔ ⵏⵏⴻⴽ.

8 ⵛⴻⴽ ⵜⴻⴳⴳⵉⴷ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵇⵉⴱⴰⵞ ⵏⵏⴻⴽ,

ⴷⴷⵏⵓⴱ ⵏⵏⴻⵖ ⵉⵏⵏⵓⴼⴼⴰⵔⴻⵏ ⴷⵉ ⵜⴼⴰⵡⵜ ⵏ ⵡⵓⴷⴻⵎ ⵏⵏⴻⴽ.

9 ⵎⴰⵖⴰⵔ ⵎⴰⵔⵔⴰ ⵓⵙⵙⴰⵏ ⵏⵏⴻⵖ ⴰⴷ ⵄⴷⵓⵏ ⴷⴻⴳ ⵓⴼⵓⴳⴻⵎ ⵏⵏⴻⴽ ⵉⵙⵙⴻⴳⴳⵯⴰⴷⴻⵏ.

ⵏⴻⵙⵙⴻⵄⴷⵓ ⵉⵙⴻⴳⴳⵯⵓⵙⴰ ⵏⵏⴻⵖ ⴰⵎ ⵉⵊⵊ ⵏ ⵓⵙⵇⵉⵏⴼⵉ.

10 ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵖ ⵜⵜⴻⴽⴽⴻⵏ ⵙⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ,

ⵏⵉⵖ ⵎⴻⵍⵎⵉ ⵉ ⵖⴰ ⵏⵉⵍⵉ ⵏⴻⵊⵀⴻⴷ, ⴰⵇⴰ ⵜⵎⴰⵏⵢⵉⵏ ⵏ ⵉⵙⴻⴳⴳⵯⵓⵙⴰ.

ⵎⵉⵏ ⴷⴰⵢⴻⵙ ⴷ ⴰⵄⵓⴵⵉ, ⵉⵜⵜⴰⵔⵓ-ⴷⴷ ⵜⴰⵎⴰⵔⴰ ⴷ ⵍⵡⴻⵃⵔⴰⵏ,

ⴷⴻⵖⵢⴰ ⵜᵉⵜⵜⴻⴽⴽ ⵜⵄⴻⴷⴷⵓ ⵓ ⵏⴻⵟⵟⴰⵡ ⵖⴰⵔ ⴷⵉⵏ.

11 ⵎⴰⵏ ⵡⴻⵏ ⵉⵙⵙⵏⴻⵏ ⵍⵇⴻⵙⵃⴰⵏ ⵏ ⵡⴻⵖⴹⴰⴱ ⵏⵏⴻⴽ,

ⵎⴻⵛⵃⴰⵍ ⵉⵙⵙⴰⴳⴳⵯⴰⴷ ⵓⴷⵓⵇⵇⴻⵥ ⵏⵏⴻⴽ ⵏ ⵓⴼⵓⴳⴻⵎ?

12 ⵙⴻⵍⵎⴻⴷ ⴰⵏⴻⵖ ⴰⴷ ⵏⵃⴻⵙⵙⴻⴱ ⵓⵙⵙⴰⵏ ⵏⵏⴻⵖ,

ⵃⵉⵎⴰ ⴰⴷ ⴷⴷ-ⵏⴰⵡⵉ ⵓⵍ ⵉⵛⵛⵓⵔⴻⵏ ⵙ ⵜⵉⵖⵉⵜ.

13 ⴷⵡⴻⵍ-ⴷⴷ, ⴰ ⵙⵉⴷⵉ, ⴰⵍ ⵎⴻⵍⵎⵉ?

ⵃⵉⵏⵏ ⵅ ⵉⵎⵙⴻⵅⵅⴰⵔⴻⵏ ⵏⵏⴻⴽ.

14 ⵙⵊⵊⵉⵡⴻⵏ ⴰⵏⴻⵖ ⵖⴰⵔ ⵓⵜⴻⴼⴼⵓ ⵙ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,

ⵅⴻⵏⵏⵉ ⴰⴷ ⵏⴻⵙⵍⵉⵡⵍⴻⵡ, ⴰⴷ ⵏⴼⴰⵔⵃ ⵎⴰⵔⵔⴰ ⵓⵙⵙⴰⵏ ⵏⵏⴻⵖ.

15 ⵙⴼⴰⵔⵃ ⴰⵏⴻⵖ ⴰⵏⴻⵛⵜ ⵏ ⵡⵓⵙⵙⴰⵏ ⵉ ⴷ ⴰⵏⴻⵖ ⵜⴻⵃⵚⴰⵔⴻⴷ,

ⴰⵏⴻⵛⵜ ⵏ ⵉⵙⴻⴳⴳⵯⵓⵙⴰ ⵉ ⴷⵉ ⵏⴻⵥⵔⴰ ⵍⵖⴰⵔ.

16 ⵙⵛⴻⵏ ⵍⵅⴻⴷⵎⴻⵜ ⵏⵏⴻⴽ ⵉ ⵉⵎⵙⴻⵅⵅⴰⵔⴻⵏ ⵏⵏⴻⴽ,

ⵍⵄⴻⵥⵥ ⵏⵏⴻⴽ ⵅ ⵉⵃⴻⵏⵊⵉⵔⴻⵏ ⵏⵙⴻⵏ.

17 ⴰⴷ ⵅⴰⵏⴻⵖ ⵜⴻⵀⵡⴰ ⵍⴻⴹⵔⴰⴼⴻⵜ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ,

ⵓ ⴹⵎⴻⵏ ⵛⴻⴽ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵖ,

ⵡⴰⵀ, ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵖ ⴹⵎⴻⵏ ⵉ-ⵜⵜ.