89
1 ⴰⵅⴻⵎⵎⵉ ⵏ ⵉⵜⴰⵏ, ⴰⵥⵔⴰⵃⵉ. 2 ⴰⴷ ⵖⴻⵏⵏⵊⴻⵖ ⵅ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⵙⵉⴷⵉ ⵉ ⵍⴻⴱⴷⴰ,
ⴰⴷ ⴱⴰⵔⵔⵃⴻⵖ ⵍⴰⵎⴰⵏ ⵏⵏⴻⴽ ⵙ ⵓⵇⴻⵎⵎⵓⵎ ⵉⵏⵓ ⵥⵉ ⵊⵊⵉⵍ ⴰⵍ ⵊⵊⵉⵍ.
3 ⵎⴰⵖⴰⵔ ⵏⵏⵉⵖ: “ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵜᵉⵜⵜⵡⴰⴱⵏⴰ ⵉ ⵍⴻⴱⴷⴰ,
ⴰⵇⴰ ⵜⴹⴻⵎⵏⴻⴷ ⵍⴰⵎⴰⵏ ⵏⵏⴻⴽ ⴷⴻⴳ ⵉⵊⴻⵏⵡⴰⵏ.”
4 “ⵏⴻⵛⵛ ⴳⴳⵉⵖ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⵡⴻⵏⵏⵉ ⵥⵥⴰⵢⵉ ⵉⵜⵜⵡⴰⴼⴰⵔⵥⴻⵏ,
ⵊⵊⵓⴵⴻⵖ ⵉ ⵓⵎⵙⴻⵅⵅⴰⵔ ⵉⵏⵓ ⴷⴰⵡⵓⴷ:
5 ‘ⵏⴻⵛⵛ ⴰⴷ ⴹⴻⵎⵏⴻⵖ ⵥⵥⴰⵔⵉⵄⴻⵜ ⵏⵏⴻⴽ ⵉ ⵍⴻⴱⴷⴰ,
ⵓ ⴰⴷ ⴱⵏⵉⵖ ⵍⵄⴰⵔⵛ ⵏⵏⴻⴽ ⵥⵉ ⵊⵊⵉⵍ ⴰⵍ ⵊⵊⵉⵍ.’ ” ⵙⵉⵍⴰⵀ.
6 ⵉⵊⴻⵏⵡⴰⵏ ⵜⵜⵇⴰⴷⴰⵏ ⵛⴻⴽ ⵅ ⵍⵎⵓⵄⵊⵉⵥⴰ ⵏⵏⴻⴽ, ⴰ ⵙⵉⴷⵉ,
ⵓⵍⴰ ⴷⴻⴳ ⵡⴻⴳⵔⴰⵡ ⵏ ⵉⵎⵇⴻⴷⴷⴰⵙⴻⵏ ⵜⵜⵇⴰⴷⴰⵏ ⵛⴻⴽ ⵅ ⵍⴰⵎⴰⵏ ⵏⵏⴻⴽ. ■
7 ⵎⴰⵖⴰⵔ ⵎⴰⵏ ⵡⴻⵏ ⴷⴻⴳ ⵉⵙⴻⵢⵏⵓⵜⴻⵏ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵇⴻⴷⴷ ⴰⴽ-ⴷ ⵙⵉⴷⵉ,
ⵎⴰⵏ ⵡⴻⵏ ⵉ ⵉⴵⴰⵏ ⵊⴰⵔ ⵡⴰⵔⵔⴰⵡⴻⵏ ⵏ ⴰⵔⴻⴱⴱⵉ ⵉⵥⴻⵎⵎⴰⵔ ⴰⴷ ⵉⵎⵇⵓⴷⴷⴰ ⴰⴽ-ⴷ ⵙⵉⴷⵉ?
8 ⴰⵔⴻⴱⴱⵉ ⵉⵡⵄⴰⵔ ⴰⵟⵟⴰⵙ ⴷⴻⴳ ⵡⴻⴳⵔⴰⵡ ⵏ ⵉⵎⵇⴻⴷⴷⴰⵙⴻⵏ,
ⵎⴰⵔⵔⴰ ⵉⵏⵏⵉ ⴷ ⴰⵙ ⴷⴷ-ⵉⵏⵏⴹⴻⵏ ⵜⵜⴻⴳⴳⵯⴻⴷⴻⵏ ⵥⵥⴰⵢⴻⵙ.
9 ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ,
ⵎⴰⵏ ⵡⴻⵏ ⵖⴰⵔ ⵉⴵⴰ ⵜⵉⵥⴻⵎⵎⴰⵔ ⴰⵎ ⵛⴻⴽ, ⴰ ⵙⵉⴷⵉ!
ⵍⴰⵎⴰⵏ ⵏⵏⴻⴽ ⵉⵜⵜⴻⵏⵏⴻⴹ ⵉ ⵛⴻⴽ.
10 ⵛⴻⴽ ⵜⵃⴻⴽⴽⵎⴻⴷ ⵅ ⵏⵏⴼⴰⵅⴻⵜ ⵏ ⵍⴻⴱⵃⴰⵔ.
ⵅⵎⵉ ⴷⴷ-ⵜⵜⵏⴻⴽⴽⴰⵔⴻⵏ ⵍⴻⵎⵡⴰⵊ ⵏⵏⴻⵙ, ⴰⵇⴰ ⵛⴻⴽ ⵜⴰⵔⴻⵙⵙⵉⴷ ⵉ-ⵜⴻⵏ.
11 ⴰⵇⴰ ⵜⵍⴻⴱⵥⴻⴷ ⵔⴰⵀⴰⴱ ⴰⵎ ⵢⵉⵊⵊⴻⵏ ⵡⴻⵏⵏⵉ ⵉⵙⵙⵏⵓⵇⵇⴱⴻⵏ,
ⵜⵥⴻⴵⵄⴻⴷ ⵍⵄⴻⴷⵢⴰⵏ ⵏⵏⴻⴽ ⵙ ⵓⵖⵉⵍ ⵏⵏⴻⴽ ⵉⵊⴻⵀⴷⴻⵏ.
12 ⵏⵏⴻⴽ ⵉⵊⴻⵏⵡⴰⵏ, ⵏⵏⴻⴽ ⵓⵍⴰ ⴷ ⵜⴰⵎⵎⵓⵔⵜ.
ⴷⴷⵓⵏⵉⵜ ⴷ ⵓⵄⴻⵎⵎⴰⵔ ⵏⵏⴻⵙ ⵜⴻⴳⴳⵉⴷ ⴰⵙⴻⵏ ⴷⵙⴰⵙ. ■
13 ⵛⴻⴽ ⵜⵅⴻⵍⵇⴻⴷ-ⴷⴷ ⵛⵛⴰⵎⴰⵍ ⴷ ⵍⵊⴰⵏⵓⴱ,
ⵜⴰⴱⵓⵔ ⴷ ⵀⵉⵔⵎⵓⵏ ⵙⵍⵉⵡⵍⵉⵡⴻⵏ ⵙ ⵢⵉⵙⴻⵎ ⵏⵏⴻⴽ.
14 ⴰⵇⴰ ⵖⴰⵔⴻⴽ ⴰⵖⵉⵍ ⵉ ⴷⵉ ⵜⴻⴳⴳⵉⴷ ⵜⴰⵔⵢⴰⵙⵜ,
ⴰⴼⵓⵙ ⵏⵏⴻⴽ ⵉⵊⵀⴻⴷ, ⴰⴼⵓⵙ ⴰⴼⵓⵙⵉ ⵏⵏⴻⴽ ⵉⵜⵜⵡⴰⵙⴳⴻⵄⵄⴰⴷ.
15 ⵜⴰⵙⴻⴳⴷⴰ ⴷ ⵍⵃⴻⵇⵇ ⴰⵇⴰ ⴰⵜⴻⵏ ⴷ ⴷⵙⴰⵙ ⵏ ⵍⵄⴰⵔⵛ ⵏⵏⴻⴽ,
ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵉⵜⵜⵉⵥⵡⴰⵔⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ. ■
16 ⵙⵙⴻⵄⴷ ⵏ ⵍⴳⴻⵏⵙ ⵉ ⵉⵙⵙⵏⴻⵏ ⴰⴷ ⵎⴻⵢⵢⵥⴻⵏ ⴰⵚⵓⴹⵉ ⵙ ⵡⴻⵙⵔⵓⴷⴷⴻⵃ ⵏ ⵍⴱⵓⵇ, ⴰ ⵙⵉⴷⵉ,
ⵏⵉⵜⵏⵉ ⴰⴷ ⵓⵢⵓⵔⴻⵏ ⴷⵉ ⵜⴼⴰⵡⵜ ⵏ ⵡⵓⴷⴻⵎ ⵏⵏⴻⴽ.
17 ⵏⵉⵜⵏⵉ ⴰⴷ ⴼⴰⵔⵃⴻⵏ ⴰⵙⵙ ⵎⴰⵔⵔⴰ ⵙ ⵢⵉⵙⴻⵎ ⵏⵏⴻⴽ,
ⵓⵛⴰ ⴰⴷ ⴷⴷ-ⵜⵜⵡⴰⵙⴳⴻⵄⵄⴷⴻⵏ ⵙ ⵜⵙⴻⴳⴷⴰ ⵏⵏⴻⴽ,
18 ⵎⴰⵖⴰⵔ ⵛⴻⴽ ⴷ ⵍⴻⵎⵍⴰⵃⴻⵜ ⵏ ⵊⵊⴻⵀⴷ ⵏⵙⴻⵏ,
ⵉⵛⵛ ⵏⵏⴻⵖ ⴰⴷ ⵉⵜⵜⵡⴰⵙⴳⴻⵄⵄⴻⴷ ⵙ ⵍⵅⴰⴹⴰⵔ ⵏⵏⴻⴽ.
19 ⵜⴰⵙⴻⴷⴷⴰⵔⵜ ⵏⵏⴻⵖ ⵏ ⵓⵙⴻⵍⵇⵉ ⵏ ⵙⵉⴷⵉ,
ⴰⵊⴻⴵⵉⴷ ⵏⵏⴻⵖ ⴰⵇⴰ-ⵜ ⵏ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ.
20 ⵉⵛⵜ ⵏ ⵜⵡⴰⵍⴰ ⵜⵓⵖⴰ ⵜⴻⵙⵙⵉⵡⵍⴻⴷ ⴷⵉ ⵜⵎⴻⵥⵔⵉⵡⵜ ⵅ ⵓⵎⵜⵉⵇⵇⵉ ⵏⵏⴻⴽ, ⵜⴻⵏⵏⵉⴷ:
“ⵙ ⵓⴼⵓⵙ ⵏ ⵉⵊⵊ ⵏ ⴱⵓ-ⵜⴻⵖⵔⵓⴹⵜ ⴳⴳⵉⵖ ⵜⵡⵉⵥⴰ,
ⵉⵊⵊ ⵡⴻⵏⵏⵉ ⵉⵜⵜⵡⴰⴼⴰⵔⵥⴻⵏ ⵥⵉ ⵍⴳⴻⵏⵙ ⵙⵙⴳⴻⵄⵄⴷⴻⵖ-ⵜ.
21 ⵏⴻⵛⵛ ⵓⴼⵉⵖ ⴷⴰⵡⵓⴷ, ⴰⵎⵙⴻⵅⵅⴰⵔ ⵉⵏⵓ,
ⴷⴻⵀⵏⴻⵖ ⵜ ⵙ ⵥⵥⴻⵛⵜ ⵉⵇⴻⴷⴷⵙⴻⵏ, ■
22 ⵎⴰⵃⴻⵏⴷ ⴰⴼⵓⵙ ⵉⵏⵓ ⴳⴳⵓⵔ ⴰⴷ ⵢⵉⵍⵉ ⵉⵎⵜⴻⵏ ⴰⴽⵉⴷⴻⵙ,
ⵡⴰⵀ ⴰⵖⵉⵍ ⵉⵏⵓ ⴰⴷ ⵜ ⵉⵙⵙⴻⵎⵃⴻⴷ.
23 ⵍⴻⵄⴷⵓ ⵡⴰⵔ ⵜ ⵉⵙⵙⴰⴳⴳⵯⴰⴷ,
ⵓ ⵎⵎⵉⵙ ⵏ ⵍⵎⵓⵄⵚⵉⵢⵢⴻⵜ ⵡⴰⵔ ⵜ ⵉⵃⴻⵚⵚⴰⵔ. ■
24 ⵉⵏⵏⵉ ⵜ ⵉⵃⴻⵚⵚⴰⵔⴻⵏ ⴰⴷ ⵜⴻⵏ ⵍⴻⴱⵥⴻⵖ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ,
ⵉⵏⵏⵉ ⵜ ⵉⵛⴰⵔⵔⵀⴻⵏ ⴰⴷ ⵜⴻⵏ ⵡⵜⴻⵖ.
25 ⵍⴰⵎⴰⵏ ⵉⵏⵓ ⴷ ⵜⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ, ⴰⵇⴰ ⴰⵜⴻⵏ ⴰⴽⵉⴷⴻⵙ ⵉ ⵖⴰ ⵢⵉⵍⵉⵏ,
ⴰⴷ ⵉⵜⵜⵡⴰⵙⴳⴻⵄⵄⴻⴷ ⵢⵉⵛⵛ ⵏⵏⴻⵙ ⵙ ⵢⵉⵙⴻⵎ ⵉⵏⵓ.
26 ⴰⴷ ⵙⵙⴰⵔⵙⴻⵖ ⴰⴼⵓⵙ ⵏⵏⴻⵙ ⵅ ⵍⴻⴱⵃⴰⵔ,
ⴰⴼⵓⵙ ⵏⵏⴻⵙ ⴰⴼⵓⵙⵉ ⵅ ⵉⵖⴻⵥⵔⴰⵏ.
27 ⵏⴻⵜⵜⴰ ⴰⴷ ⵅⴰⴼⵉ ⴷⴷ-ⵉⵍⴰⵖⴰ:
‘ⴰⵇⴰ ⵛⴻⴽ ⴷ ⴱⴰⴱⴰ ⵉⵏⵓ, ⴰⵔⴻⴱⴱⵉ ⵉⵏⵓ, ⴷ ⵜⴰⵚⴹⴰⵔⵜ ⵏ ⵓⵙⴻⵏⵊⴻⵎ ⵉⵏⵓ!’ ■
28 ⵏⴻⵛⵛ ⴰⴷ ⵜ ⴳⴳⴻⵖ ⴷ ⴰⵎⴻⵏⵥⵓ ⵉⵏⵓ,
ⴰⵎⵄⵓⴵⵉ ⵅ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ.
29 ⵉ ⵍⴻⴱⴷⴰ ⴰⴷ ⵃⴹⵉⵖ ⵜⴰⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ ⵥⵥⴰⵜⴻⵙ,
ⵓ ⴰⴷ ⵇⵇⵉⵎⴻⵖ ⵜⵜᵉⵟⵟⴼⴻⵖ ⵙ ⵍⵎⴰⵏⴻⵜ ⴷⵉ ⵍⵄⴰⵀⴷ ⵉⵏⵓ ⴰⴽⵉⴷⴻⵙ.
30 ⴰⴷ ⵥⵥⵓⵖ ⵥⵥⴰⵔⵉⵄⴻⵜ ⵏⵏⴻⵙ ⵉ ⵍⴻⴱⴷⴰ,
ⵓ ⵍⵄⴰⵔⵛ ⵏⵏⴻⵙ ⵎⵉⵏ ⵖⴰ ⴽⴽⴻⵏ ⵓⵙⵙⴰⵏ ⵏ ⵓⵊⴻⵏⵏⴰ ⴵⴰⵏ.
31 ⵎⴰⵍⴰ ⵉⵃⴻⵏⵊⵉⵔⴻⵏ ⵏⵏⴻⵙ ⵃⴻⵢⵢⴷⴻⵏ ⵅ ⵛⵛⴰⵔⵉⵄⴰ ⵉⵏⵓ,
ⵡⴰⵔ ⴳⴳⵓⵔⴻⵏ ⴰⴽ-ⴷ ⵍⴼⴰⵔⴰⵢⵉⴹ ⵉⵏⵓ, ■
32 ⵎⴰⵍⴰ ⵙⵙⴼⴻⵙⴷⴻⵏ ⵜⵉⵡⴻⵚⵚⴰ ⵉⵏⵓ,
ⵡⴰⵔ ⵃⴻⵟⵟⵉⵏ ⵍⵓⵎⵓⵔⴰⵜ ⵉⵏⵓ,
33 ⵅⴻⵏⵏⵉ ⴰⴷ ⵅⴻⴵⵚⴻⵖ ⴰⵄⴻⴷⴷⵓ ⵏⵙⴻⵏ ⵙ ⵡⴻⵄⵎⵓⴷ,
ⵍⵎⵓⵄⵚⵉⵢⵢⴻⵜ ⵏⵙⴻⵏ ⵙ ⵜⴻⵢⵢⵉⵜⴰ.
34 ⵎⴰⵛⴰ ⵡⴰⵔ ⵅⴰⵙⴻⵏ ⵜⵜⴻⴽⴽⵙⴻⵖ ⵜⴰⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ,
ⵡⴰⵔ ⵏⴻⴽⴽⴰⵔⴻⵖ ⵍⵎⴰⵏⴻⵜ ⵉⵏⵓ.
35 ⵡⴰⵔ ⵜⵜⵖⴻⵚⵚⴰⴱⴻⵖ ⵍⵄⴰⵀⴷ ⵉⵏⵓ,
ⵎⵉⵏ ⴷⴷ-ⵉⴼⴼⵖⴻⵏ ⵥⴻⴳ ⵉⵢⴻⵏⵛⵉⵛⴻⵏ ⵉⵏⵓ,
ⵡⴰⵔ ⵜ ⵜⵜⴱⴻⴷⴷⵉⵍⴻⵖ.
36 ⵏⴻⵛⵛ ⵊⵊⵓⴵⴻⵖ ⵉⵛⵜ ⵏ ⵜⵡⴰⵍⴰ ⵖⴰⵔ ⵜⵇⴻⴷⴷⴰⵙⵜ ⵉⵏⵓ:
’ⵡⴰⵔ ⴳⴳⵓⵔ ⴰⴷ ⵙⵙⵅⴰⵔⵔⵇⴻⵖ ⵄⴻⵎⵎⴰⵔⵚ ⵅ ⴷⴰⵡⵓⴷ!’ ■
37 ⵣⵥⴰⵔⵉⵄⴻⵜ ⵏⵏⴻⵙ ⴰⴷ ⵜⴻⵇⵇⵉⵎ ⵉ ⵍⴻⴱⴷⴰ,
ⵓ ⵍⵄⴰⵔⵛ ⵏⵏⴻⵙ ⴰⴷ ⴷⵉⵏ ⵉⴱⴻⴷⴷ ⵥⵥⴰⵜⵉ ⴰⵎ ⵜⴼⵓⵛⵜ.
38 ⵏⴻⵜⵜⴰ ⴰⴷ ⵉⵇⵇⵉⵎ ⵉⴱⴻⴷⴷ ⵉ ⵍⴻⴱⴷⴰ ⴰⵎ ⵜⵥⵉⵔⵉ,
ⵓ ⴰⵛⴻⵀⵀⴰⴷ ⴷⴻⴳ ⵉⵙⴻⵢⵏⵓⵜⴻⵏ ⴰⵇⴰ-ⵜ ⴷ ⴰⵎⵜⵉⵇⵇⵉ.” ⵙⵉⵍⴰⵀ.
39 ⵎⴰⵛⴰ ⵛⴻⴽ ⵜⵄⴰⵔⵔⵏⴻⴷ ⵜ ⵖⴰⵔ ⵓⵖⴻⵥⴷⵉⵙ, ⵜⴻⵏⴹⴰⵔⴻⴷ ⵜ,
ⵛⴻⴽ ⵜⴼⵓⴳⴳⵎⴻⴷ ⵅ ⵓⵎⴻⴷⵀⵓⵏ ⵏⵏⴻⴽ.
40 ⵛⴻⴽ ⵜⴻⵏⴹⴰⵔⴻⴷ ⵍⵄⴰⵀⴷ ⴰⴽ-ⴷ ⵓⵎⵙⴻⵅⵅⴰⵔ ⵏⵏⴻⴽ,
ⵜⴼⴻⵙⴷⴻⴷ ⵜⴰⵎⵔⵉⵙⵜ ⵏ ⵡⴻⵄⵥⴰⵍ ⵏⵏⴻⵙ ⵙ ⵓⴱⴻⴵⴰⵄ ⵏ ⵜⴻⵎⵎⵓⵔⵜ.
41 ⵜⵖⴻⴹⵍⴻⴷ ⵎⴰⵔⵔⴰ ⵍⴻⵃⵢⵓⴷ ⵏⵏⴻⵙ,
ⵜⵀⴻⴷⵎⴻⴷ ⵜⵉⵏⴻⴷⴷⴰⵎ ⵏⵙⴻⵏ ⵉⴼⴰⵔⵢⴻⵏ ⵙ ⵉⵖⴻⴱⵔⴰⵡⴻⵏ.
42 ⵎⴰⵔⵔⴰ ⵉⵏⵏⵉ ⴷⴷ-ⵉⴽⴽⵉⵏ ⴰⴱⵔⵉⴷ ⴽⴻⵛⵛⴹⴻⵏ ⵜ,
ⵏⴻⵜⵜⴰ ⵉⴷⵡⴻⵍ ⴷ ⴰⵙⴻⵃⵇⴰⵔ ⵉ ⵊⵊⵉⵔⴰⵏ ⵏⵏⴻⵙ. ■
43 ⵛⴻⴽ ⵜⴻⵙⵙⴳⴻⵄⵄⴷⴻⴷ ⴰⴼⵓⵙ ⴰⴼⵓⵙⵉ ⵏ ⵢⵉⵏⵏⵉ ⵜ ⵉⵃⴻⵚⵚⴰⵔⴻⵏ,
ⵜⴻⵙⵙⴼⴰⵔⵔⵃⴻⴷ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ.
44 ⵛⴻⴽ ⵜⴻⵙⵙⴻⵏⵇⴻⵍⴱⴻⴷ ⵍⴻⵇⴹⴻⵄ ⵏ ⵙⵙⵉⴼ ⵏⵏⴻⵙ,
ⵛⴻⴽ ⵜⴻⵊⵊⵉⴷ ⵜ ⵡⴰⵔ ⵉⵜⵜⵖⵉⵎⵉ ⵉⴱⴻⴷⴷ ⴷⴻⴳ ⵓⵎⴻⵏⵖⵉ.
45 ⵛⴻⴽ ⵜⴻⵙⵙⴱⴻⴷⴷⴻⴷ ⴰⵥⵔⵉ ⵏⵏⴻⵙ,
ⵍⴽⵓⵔⵙⵉ ⵏⵏⴻⵙ ⵉⴳⴻⵍⵍⴷⴻⵏ ⵜⴻⵏⴹⴰⵔⴻⴷ ⵜ ⵖⴰⵔ ⵜⴻⵎⵎⵓⵔⵜ.
46 ⵛⴻⴽ ⵜⴻⵙⵙⴻⵎⵥⵉⴷ ⴰⵙ ⵓⵙⵙⴰⵏ ⵏ ⵜⴻⵎⵥⵉ ⵏⵏⴻⵙ,
ⵜⴻⴷⵍⵉⴷ ⵜ ⵙ ⵍⴻⴼⴹⵉⵃⴻⵜ. ⵙⵉⵍⴰⵀ.
47 ⵖⴰⵔⴻⵙ ⴰⵍ ⵎⴻⵍⵎⵉ ⵄⴰⴷ, ⴰ ⵙⵉⴷⵉ, ⴰⴷ ⵜⴻⵙⵙⵏⵓⴼⴼⴰⵔⴻⴷ ⵉⵅⴻⴼ ⵏⵏⴻⴽ ⴱⵍⴰ ⵇⴻⵟⵟⵓ,
ⴰⴷ ⵢⴰⵔⵖ ⵡⴻⵙⵄⴰⵔ ⵏⵏⴻⴽ ⴰⵎ ⵜⵎⴻⵙⵙⵉ?
48 ⵄⵇⴻⵍ ⵅ ⵍⵎⵉⵊⴰⵍ ⵏ ⵜⵓⴷⴰⵔⵜ ⵉⵏⵓ!
ⵎⴰⵢⴻⵎⵎⵉ ⴷⴷ-ⵜⵅⴻⵍⵇⴻⴷ ⵎⴰⵔⵔⴰ ⴰⵔⵔⴰⵡ ⵏ ⴱⵏⴰⴷⴻⵎ ⴰⵎⴻⵏⵏⵉ ⴱⴰⵟⴻⵍ?
49 ⵎⴰⵏ ⴰⵔⵢⴰⵥ ⵉⵊⴻⵀⴷⴻⵏ ⵡⴰⵔ ⵉⵜⵜⵡⵉⵍⵉ ⵍⵎⴻⵡⵜ,
ⵎⴰⵏ ⴰⵔⵢⴰⵥ ⵉ ⵖⴰ ⵉⴼⴻⴽⴽⴻⵏ ⵍⴻⵄⵎⴰⵔ ⵏⵏⴻⵙ ⵥⴻⴳ ⵓⴼⵓⵙ ⵏ ⵍⴰⵅⴰⵔⵜ? ⵙⵉⵍⴰⵀ. ■
50 ⴰ ⵙⵉⴷⵉ ⵉⵏⵓ, ⵎⴰⵏⵉ ⴵⴰⵏⵜ ⵜⵎⴻⴳⴳⴰ ⵏ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⵏ ⵥⵉⵛ,
ⵜⵉⵏⵏⵉ ⵅ ⵜⵓⵖⴰ ⵜⴻⵊⵊⵓⴵⴻⴷ ⵉ ⴷⴰⵡⵓⴷ ⵙ ⵍⵎⴰⵏⴻⵜ ⵏⵏⴻⴽ? ■
51 ⴰ ⵙⵉⴷⵉ ⵉⵏⵓ, ⵄⵇⴻⵍ ⵅ ⵓⵙⴻⵃⵇⴰⵔ ⵏ ⵉⵎⵙⴻⵅⵅⴰⵔⴻⵏ ⵏⵏⴻⴽ,
ⵏⵏⵉ ⴰⵔⴻⴱⴱⵓⵖ ⴷⴻⴳ ⵡⴻⵃⵙⵉⵏ ⵉⵏⵓ ⵥⴻⴳ ⵓⴱⴰⵔⵔⵓ ⵏ ⵎⴰⵔⵔⴰ ⵍⴻⴳⵏⵓⵙ, □
52 ⵉ ⵥⵉ ⴷ ⴰⵢⵉ ⵙⵙⴻⵃⵇⴰⵔⴰⵏ ⵍⵄⴻⴷⵢⴰⵏ ⵏⵏⴻⴽ, ⴰ ⵙⵉⴷⵉ,
ⵉ ⵥⵉ ⵙⵙⴻⵃⵇⴰⵔⴰⵏ ⵉⵚⵓⵔⴰⴼ ⵏ ⵓⵎⴻⴷⵀⵓⵏ ⵏⵏⴻⴽ.
53 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵉ ⵍⴻⴱⴷⴰ ⵇⴰⵄ!
ⴰⵎⵉⵏ, ⵡⴰⵀ, ⴰⵎⵉⵏ!