88
1 ⵉⵥⵍⵉ, ⴰⵥⴻⵀⵀⴻⴷ ⵏ ⴰⵢⵜ ⵏ ⵇⵓⵔⴰⵃ. ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ,
ⵙ ⵜⴻⵖⵏⵉⵏⵜ ⵏ ‘ⵉⵥⵍⵉ ⵏ ⵡⴻⵛⴹⴰⵏ’ ⵖⴰⵔ ⵍⴻⵃⵚⴰⵔⴰⵜ.
ⴰⵅⴻⵎⵎⵉ ⵏ ⵀⴰⵢⵎⴰⵏ, ⴰⵥⵔⴰⵃⵉ.
2 ⴰ ⵙⵉⴷⵉ, ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ,
ⴷⴻⴳ ⵡⴰⵙⵙ ⵉ ⴷⵉ ⴷⴷ ⵖⴰ ⵙⵖⵓⵢⵢⴻⵖ ⵖⴰⵔⴻⴽ ⵙ ⴵⵉⵍⴻⵜ,
3 ⴻⵊⵊ ⵅⴻⵏⵏⵉ ⴰⴷ ⴷⴷ-ⵜⴰⵙ ⵜⵥⴰⴵⵉⵜ ⵉⵏⵓ ⵥⵥⴰⵜⴻⴽ,
ⴻⵡⵛ ⴰⵎⴻⵥⵥⵓⵖ ⵏⵏⴻⴽ ⵉ ⵓⵍⴰⵖⵉ ⵉⵏⵓ.
4 ⵎⴰⵖⴰⵔ ⵍⴻⵄⵎⴰⵔ ⵉⵏⵓ ⵉⵊⵊⵉⵡⴻⵏ ⵙ ⵍⵎⵓⵚⵉⴱⴰⵜ,
ⵜⵓⴷⴰⵔⵜ ⵉⵏⵓ ⵜⵓⴷⴻⵙ-ⴷⴷ ⵍⴰⵅⴰⵔⵜ.
5 ⵏⴻⵛⵛ ⵜⵜⵡⴰⵃⴻⵙⵙⴰⴱⴻⵖ ⴰⵎ ⵢⴻⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ ⵏ ⵡⴻⵏⴹⴻⵍ,
ⴰⵎ ⵉⵊⵊ ⵏ ⵡⴻⵔⵢⴰⵥ ⵓⵎⵉ ⵡⴰⵔ ⴷⴰⵢⴻⵙ ⵊⵊⵀⴻⴷ ⵄⴰⴷ.
6 ⴰⵇⴰ ⵜⵜⵡⴰⵃⵓⵥⴻⵖ ⵊⴰⵔ ⵉⵎⴻⵜⵜⴰⵏ,
ⴰⵎ ⵢⴻⵏⵏⵉ ⵉⵜⵜⵡⴰⵏⵖⴻⵏ ⵉⵏⵏⵉ ⵉⵥⵥⵍⴻⵏ ⴷⴻⴳ ⵡⴻⵏⴹⴻⵍ,
ⵉⵏⵏⵉ ⵡⴰⵔ ⵜⴻⵏ ⵜᵉⵜⵜⵉⴷⴰⵔⴻⴷ ⵄⴰⴷ,
ⵜⵜⵡⴰⵇⴻⴹⵄⴻⵏ ⵥⴻⴳ ⵓⴼⵓⵙ ⵏⵏⴻⴽ.
7 ⵛⴻⴽ ⵜⴻⴳⴳⵉⴷ ⴰⵢⵉ ⴷⴻⴳ ⵡⴻⵏⴹⴻⵍ ⵢⵓⴵⵖⴻⵏ ⵇⴰⵄ,
ⴷⵉ ⵜⴰⴵⴻⵙⵜ, ⴷⵉ ⵍⴰⴵⴰⵖ.
8 ⴰⵙⵄⴰⵔ ⵏⵏⴻⴽ ⵉⴷⵇⴻⵍ ⵅⴰⴼⵉ ⴰⵟⵟⴰⵙ,
ⵙ ⵎⴰⵔⵔⴰ ⵍⴻⵎⵡⴰⵊ ⵏ ⵍⵖⴰⴹⴰⴱ ⵏⵏⴻⴽ ⵜⴻⵙⵙⴷⴻⴵⴻⴷ ⴰⵢⵉ. ⵙⵉⵍⴰⵀ.
9 ⵉⵎⵇⴰⵔⵔⴰⴱⴻⵏ ⵉⵏⵓ ⵜⴻⵙⵙⵉⴳⴳⵯⴻⵊⴻⴷ ⵉ-ⵜⴻⵏ ⵅⴰⴼⵉ,
ⵜⴰⵔⵔⵉⴷ ⴰⵢⵉ ⴷ ⵏⵏⵄⵉ ⵉ ⵏⵉⵜⵏⵉ.
ⵉⵜⵜⵡⴰⴱⴻⵍⵍⴻⵄ ⵅⴰⴼⵉ, ⵡⴰⵔ ⵥⴻⵎⵎⴰⵔⴻⵖ ⴰⴷ ⴷⴷ-ⴼⴼⵖⴻⵖ.
10 ⵜⵉⵟⵟ ⵉⵏⵓ ⵜⴻⵄⵎⴻⵛ ⵙ ⵍⴻⵖⴱⴻⵏ.
ⴰ ⵙⵉⴷⵉ, ⴰⵙⵙ ⵎⴰⵔⵔⴰ ⵜⵜⵍⴰⵖⵉⵖ ⵖⴰⵔⴻⴽ,
ⵏⴻⵛⵛ ⵙⵙⵡⵉⵥⵥⴹⴻⵖ ⵉⴼⴰⵙⵙⴻⵏ ⵉⵏⵓ ⵖⴰⵔⴻⴽ.
11 ⵎⴰ ⴰⴷ ⵜⴻⴳⴳⴻⴷ ⵉⵛⵜ ⵏ ⵍⵎⵓⵄⵊⵉⵥⴰ ⴷⴻⴳ ⵉⵎⴻⵜⵜⴰⵏ?
ⵏⵉⵖ ⴰⴷ ⴷⴷ-ⴽⴽⴰⵔⴻⵏ ⵍⴻⵅⵢⴰⵍⴰⵜ ⵏ ⵉⵎⴻⵜⵜⴰⵏ, ⵎⴰ ⴰⴷ ⵛⴻⴽ ⵇⴰⴷⴰⵏ? ⵙⵉⵍⴰⵀ.
12 ⵎⴰ ⴰⴷ ⴱⴰⵔⵔⵃⴻⵏ ⵙ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴷⴻⴳ ⵡⴻⵏⴹⴻⵍ,
ⵙ ⵍⴰⵎⴰⵏ ⵏⵏⴻⴽ ⴷⴻⴳ ⵓⵀⴻⵍⵍⴻⴽ?
13 ⵎⴰ ⴰⴷ ⵜⵜⵡⴰⵙⵙⵏⴻⵏⵜ ⵍⵎⵓⵄⵊⵉⵥⴰⵜ ⵏⵏⴻⴽ ⴷⵉ ⵜⴰⴵⴻⵙⵜ,
ⵜⴰⵙⴻⴳⴷⴰ ⵏⵏⴻⴽ ⴷⵉ ⵜⴻⵎⵎⵓⵔⵜ ⵏ ⵜⴰⵜⵜⵓⵜ?
14 ⴰ ⵙⵉⴷⵉ, ⵏⴻⵛⵛ ⵜⵜⵍⴰⵖⵉⵖ ⵛⴻⴽ,
ⵜⴰⵥⴰⴵⵉⵜ ⵉⵏⵓ ⵜᵉⵜⵜⴰⵙ-ⴷⴷ ⵥⵥⴰⵜⴻⴽ ⵖⴰⵔ ⵓⵜⴻⴼⴼⵓ.
15 ⵎⴰⵢⴻⵎⵎⵉ, ⴰ ⵙⵉⴷⵉ, ⵜⵏⴻⵟⵟⴰⵔⴻⴷ ⵍⴻⵄⵎⴰⵔ ⵉⵏⵓ,
ⵎⴰⵢⴻⵎⵎⵉ ⵜᵉⵜⵜⵡⴰⵙⵏⵓⴼⴼⴰⵔⴻⴷ ⵓⴷⴻⵎ ⵏⵏⴻⴽ ⵥⵥⴰⵢⵉ?
16 ⵣⵉ ⵜⴻⵎⵥⵉ ⵉⵏⵓ ⵏⴻⵛⵛ ⴷⵉ ⵍⴻⵖⴱⴻⵏ ⵓ ⴳⴳⵓⵔⴻⵖ ⵖⴰⵔ ⵓⵏⵓⵔⵉ,
ⵜⴻⴽⴽⵙⴻⵖ ⵉⵙⵏⴻⵅⵔⵉⵄⴻⵏ ⵏⵏⴻⴽ ⴹⵉⴷⴷ ⵉⵏⵓ,
ⵜⵜⵡⴰⵃⵚⴰⵔⴻⵖ ⵥⵥⴰⵢⵙⴻⵏ.
17 ⵜⴻⵜⵜⴻⴽⴽ ⵅⴰⴼⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⴽ,
ⵉⵜⵜⴻⵃⵃⴰ ⴰⵢⵉ ⵓⵙⴻⴳⴳⵯⵉⴷ ⵏⵏⴻⴽ.
18 ⴰⵙⵙ ⵎⴰⵔⵔⴰ ⵉⵜⵜⴻⵏⵏⴻⴹ ⴰⵢⵉ-ⴷⴷ ⴰⵎⴻⵛⵏⴰⵡ ⴰⵎⴰⵏ,
ⵉⵜⵜⵇⵓⵡⵡⴰⵔ ⴰⵢⵉ-ⴷⴷ ⵎⴰⵔⵔⴰ.
19 ⴰⵎⵄⵉⵥⵥ ⵉⵏⵓ ⴷ ⴰⵎⴻⴷⴷⵓⴽⴽⴻⵍ ⵉⵏⵓ ⵜⴻⵙⵙⵉⴳⴳⵯⴻⵊⴻⴷ ⵉ-ⵜⴻⵏ ⵅⴰⴼⵉ,
ⵉⵄⵛⵉⵔⴻⵏ ⵉⵏⵓ ⴰⵇⴰ ⴰⵜⴻⵏ ⵜⵜⵡⴰⵍⴻⵃⵃⴼⴻⵏ ⵙ ⵜⴰⴵⴻⵙⵜ.