1 ⵜⴰⵥⴰⴵⵉⵜ ⵏ ⴷⴰⵡⵓⴷ.

ⴰ ⵙⵉⴷⵉ, ⴰⵔⵔ-ⴷⴷ ⴰⵎⴻⵥⵥⵓⵖ ⵏⵏⴻⴽ ⵖⴰⵔⵉ, ⵙⴻⵍ ⴰⵢⵉ,

ⵎⴰⵖⴰⵔ ⵏⴻⵛⵛ ⴷⵉ ⵍⴻⵖⴱⴻⵏ ⵓ ⵥⴻⵍⴹⴻⵖ.

2 ⵃⴹⴰ ⵅ ⵍⴻⵄⵎⴰⵔ ⵉⵏⵓ, ⵎⴰⵖⴰⵔ ⵏⴻⵛⵛ ⴷ ⴰⵎⵜⵉⵇⵇⵉ,

ⴰ ⴰⵔⴻⴱⴱⵉ ⵉⵏⵓ, ⵙⴻⵏⵊⴻⵎ ⴰⵎⵙⴻⵅⵅⴰⵔ ⵏⵏⴻⴽ, ⵡⴻⵏⵏⵉ ⵅⴰⴽ ⵉⵜⵜⵛⴰⵍⴰⵏ.

3 ⵃⵉⵏⵏ ⵅⴰⴼⵉ, ⴰ ⵙⵉⴷⵉ ⵉⵏⵓ,

ⵎⴰⵖⴰⵔ ⵜⵜⵍⴰⵖⵉⵖ-ⴷⴷ ⵅⴰⴽ ⴰⵙⵙ ⴰⵎ ⵉⴽⵎⴻⵍ.

4 ⵙⴼⴰⵔⵃ ⵍⴻⵄⵎⴰⵔ ⵏ ⵓⵎⵙⴻⵅⵅⴰⵔ ⵏⵏⴻⴽ,

ⵎⴰⵖⴰⵔ ⵉ ⵛⴻⴽ, ⴰ ⵙⵉⴷⵉ ⵉⵏⵓ, ⵙⵙⴳⴻⵄⵄⴰⴷⴻⵖ ⵍⴻⵄⵎⴰⵔ ⵉⵏⵓ.

5 ⵎⴰⵖⴰⵔ ⵛⴻⴽ, ⴰ ⵙⵉⴷⵉ ⵉⵏⵓ, ⴷ ⴰⵚⴻⴱⵃⴰⵏ ⵓ ⴷ ⴰⵎⵙⴰⵎⴻⵃ,

ⵖⴰⵔⴻⴽ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵉ ⵎⴰⵔⵔⴰ ⵉⵏⵏⵉ ⵖⴰⵔⴻⴽ ⴷⴷ-ⵉⵜⵜⵍⴰⵖⴰⵏ.

6 ⴰ ⵙⵉⴷⵉ, ⵙⴻⵍ ⵉ ⵜⵥⴰⴵⵉⵜ ⵉⵏⵓ,

ⵃⴻⴽⴽⴰⵔ ⵉ ⵜⵎⵉⵊⵊⴰ ⵏ ⵓⵃⴻⵛⵛⴻⵎ ⵉⵏⵓ.

7 ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ ⵉⵏⵓ ⵜⵜⵍⴰⵖⵉⵖ-ⴷⴷ ⵖⴰⵔⴻⴽ,

ⵎⴰⵖⴰⵔ ⵛⴻⴽ ⴰⴷ ⵅⴰⴼⵉ ⴷⴷ-ⵜⴰⵔⵔⴻⴷ. ^■  

8 ⵊⴰⵔ ⵉⵔⴻⴱⴱⵉⵜⴻⵏ ⵡⴰⵔ ⵉⴵⵉ ⵓⵍⴰ ⴷ ⵉⵊⵊⴻⵏ ⴰⵎⴻⵛⵏⴰⵡ ⵛⴻⴽ, ⴰ ⵙⵉⴷⵉ ⵉⵏⵓ,

ⵓ ⵡⴰⵔ ⴷⵉⵏ ⵎⵉⵏ ⵢⴰⵔⵡⴻⵙⴻⵏ ⴷⵉ ⵜⵎⴻⴳⴳⴰ ⵏⵏⵉ ⵜⴻⴳⴳⵉⴷ. ^■  

9 ⵎⴰⵔⵔⴰ ⵍⴻⴳⵏⵓⵙ ⵉ ⵜⴻⴳⴳⵉⴷ, ⴰⴷ ⴷⴷ-ⴰⵙⴻⵏ,

ⴰⴷ ⴰⴹⴰⵔⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ, ⴰ ⵙⵉⴷⵉ ⵉⵏⵓ,

ⴰⴷ ⵙⵙⵄⵓⴵⴻⵏ ⵉⵙⴻⵎ ⵏⵏⴻⴽ.

10 ⵎⴰⵖⴰⵔ ⵛⴻⴽ ⴷ ⴰⵎⴻⵇⵇⵔⴰⵏ ⵓ ⵛⴻⴽ ⴷ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵊⵉⵥⴰⵜ,

ⵛⴻⴽ ⵡⴻⵃⵃⴷⴻⴽ ⴷ ⴰⵔⴻⴱⴱⵉ ⵉ ⵜⴻⴵⵉⴷ.

11 ⵙⵛⴻⵏ ⴰⵢⵉ ⴰⴱⵔⵉⴷ ⵏⵏⴻⴽ, ⴰ ⵙⵉⴷⵉ, ⵃⵉⵎⴰ ⴰⴷ ⵓⵢⵓⵔⴻⵖ ⴷⵉ ⵜⵉⴷⴻⵜⵜ ⵏⵏⴻⴽ,

ⵙⵎⵓⵏ ⵓⵍ ⵉⵏⵓ ⵎⴰⵃⴻⵏⴷ ⴰⴷ ⴳⴳⵯⴻⴷⴻⵖ ⵉⵙⴻⵎ ⵏⵏⴻⴽ. ^■  

12 ⴰ ⵙⵉⴷⵉ ⵉⵏⵓ, ⴰⵔⴻⴱⴱⵉ ⵉⵏⵓ, ⵅⵙⴻⵖ ⴰⴷ ⵛⴻⴽ ⵇⴰⴷⵉⵖ ⵙ ⵎⴰⵔⵔⴰ ⵡⵓⵍ ⵉⵏⵓ,

ⴰⴷ ⵛⴻⵏⵏⵄⴻⵖ ⵉⵙⴻⵎ ⵏⵏⴻⴽ ⵉ ⵍⴻⴱⴷⴰ ⵇⴰⵄ.

13 ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⵜⴻⵎⵖⴰⵔ ⵅⴰⴼⵉ,

ⵛⴻⴽ ⵜⴻⵙⵙⵏⴻⵊⵎⴻⴷ ⵍⴻⵄⵎⴰⵔ ⵉⵏⵓ ⵥⵉ ⵍⴰⴵⴰⵖ ⵏ ⵍⴰⵅⴰⵔⵜ.

14 ⴰ ⴰⵔⴻⴱⴱⵉ, ⵉⵎⵄⴻⴼⴼⴰⵔⴻⵏ ⴽⴽⴰⵔⴻⵏ-ⴷⴷ ⴰⴽⵉⴷⵉ,

ⵓ ⴱⴰⵏⴷⵉⵢⵢⴰⵜ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⴰⵔⴻⵥⵥⵓⵏ ⴰⴷ ⵏⵖⴻⵏ ⵍⴻⵄⵎⴰⵔ ⵉⵏⵓ.

ⵛⴻⴽ ⵡⴰⵔ ⵖⴰⵔⵙⴻⵏ ⵜⴻⴵⵉⴷ ⵇⵉⴱⴰⵞ ⵉ ⵜⵉⵟⵟⴰⵡⵉⵏ ⵏⵙⴻⵏ. ^■  

15 ⵎⴰⵛⴰ ⵛⴻⴽ, ⴰ ⵙⵉⴷⵉ ⵉⵏⵓ, ⴷ ⴰⵔⴻⴱⴱⵉ ⴷ ⴰⵔⵃⵉⵎ ⴷ ⵓⵃⵏⵉⵏ,

ⵖⴰⵔⴻⴽ ⵜⵜⴰⵙⵉⵄ ⵏ ⵍⵅⴰⴹⴰⵔ ⵓⵍⴰ ⴷ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵎⵖⴰⵔⴻⵏ. ^■  

16 ⵅⵥⴰⵔ-ⴷⴷ ⵖⴰⵔⵉ ⵓ ⵃⵉⵏⵏ ⵅⴰⴼⵉ,

ⴻⴳⴳ ⵊⵊⴻⵀⴷ ⵏⵏⴻⴽ ⴷⴻⴳ ⵓⵎⵙⴻⵅⵅⴰⵔ ⵏⵏⴻⴽ,

ⵓⵛⴰ ⵙⴻⵏⵊⴻⵎ ⵎⵎⵉⵙ ⵏ ⵜⴰⵢⵢⴰ ⵏⵏⴻⴽ.

17 ⴻⴳⴳ ⵉⵛⵜ ⵏ ⵍⴻⵄⵍⴰⵎⴻⵜ ⴷⵉ ⵟⵟⵡⴻⵄ ⵉⵏⵓ,

ⵃⵉⵎⴰ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⴰⴷ ⵜ ⵥⴰⵔⴻⵏ ⴰⴷ ⵙⵙⴻⴹⵃⴰⵏ,

ⵎⴰⵖⴰⵔ ⵛⴻⴽ, ⴰ ⵙⵉⴷⵉ, ⵜⴻⵡⵛⵉⴷ ⴰⵢⵉ ⴰⴼⵓⵙ ⵓ ⵜⴻⵙⵙⴼⴻⵡⵡⵊⴻⴷ ⵅⴰⴼⵉ.