1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵣⴻⴳ ⴰⵢⵜ ⵏ ⵇⵓⵔⴰⵃ. ⴰⵥⴻⵀⵀⴻⴷ.

2 ⵛⴻⴽ ⵜⴰⵔⴹⵉⴷ ⵅ ⵜⴻⵎⵎⵓⵔⵜ, ⴰ ⵙⵉⴷⵉ,

ⵜⴻⵙⵙⴻⵏⵇⴻⵍⴱⴻⴷ ⵜⴰⵎⴻⵃⴱⴰⵙⵜ ⵏ ⵢⴰⵄⵇⵓⴱ.

3 ⵜⴻⴽⴽⵙⴻⴷ ⵍⵎⵓⵄⵚⵉⵢⵢⴻⵜ ⵅ ⵍⴳⴻⵏⵙ ⵏⵏⴻⴽ,

ⵜⴻⴷⵍⵉⴷ ⵎⴰⵔⵔⴰ ⴷⴷⵏⵓⴱ ⵏⵏⴻⵙ. ⵙⵉⵍⴰⵀ.

4 ⵛⴻⴽ ⵜⵎⴻⵏⵄⴻⴷ ⵎⴰⵔⵔⴰ ⴰⴷⵓⵇⵇⴻⵥ ⵏⵏⴻⴽ ⵏ ⵓⴼⵓⴳⴻⵎ,

ⵜⴻⵙⵙⵜⴻⵡⵡⵊⴻⴷ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⴽ.

5 ⴰⵔⵔ ⴰⵏⴻⵖ, ⴰ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵏⵏⴻⵖ,

ⵜⵜⵓ ⴰⵖⴹⴰⴱ ⵏⵏⴻⴽ ⵅⴰⵏⴻⵖ.

6 ⵎⴰ ⵜⴻⵅⵙⴻⴷ ⴰⴷ ⵅⴰⵏⴻⵖ ⵜⴻⵙⵄⴰⵔⴻⴷ ⵉ ⵍⴻⴱⴷⴰ?

ⵎⴰ ⴰⴷ ⵜⴻⴳⴳⴻⴷ ⴰⵖⴹⴰⴱ ⵏⵏⴻⴽ ⴰⴷ ⵉⵇⵇⵉⵎ ⵥⵉ ⵊⵊⵉⵍ ⴰⵍ ⵊⵊⵉⵍ?

7 ⵎⴰ ⵡⴰⵔ ⴷ ⴰⵏⴻⵖ ⵜⴻⵊⵊⵉⴷ ⴰⴷ ⵏⴻⴷⴷⴰⵔ ⵄⴰⵡⴻⴷ,

ⵃⵉⵎⴰ ⴰⴷ ⴰⵛ ⵉⴼⴰⵔⵃ ⵍⴳⴻⵏⵙ ⵏⵏⴻⴽ? ^■  

8 ⵙⵛⴻⵏ ⴰⵏⴻⵖ-ⴷⴷ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ,

ⴻⵡⵛ ⴰⵏⴻⵖ ⴰⵙⴻⵏⵊⴻⵎ ⵏⵏⴻⴽ.

9 ⵏⴻⵛⵛ ⵅⵙⴻⵖ ⴰⴷ ⵙⵍⴻⵖ ⵎⵉⵏ ⵖⴰ ⵉⵙⵙⵉⵡⴻⵍ ⴰⵔⴻⴱⴱⵉ, ⵙⵉⴷⵉ,

ⵎⴰⵖⴰⵔ ⵏⴻⵜⵜⴰ ⴰⴷ ⵉⵙⵙⵉⵡⴻⵍ ⴰⴽ-ⴷ ⵍⴳⴻⵏⵙ ⵏⵏⴻⵙ ⵓ ⴰⴽ-ⴷ ⵉⵎⵜⵉⵇⵇⴰⵏ ⵏⵏⴻⵙ ⵅ ⵍⴻⵀⵏⴰ.

ⵖⴰⵔⵡⴻⵎ, ⵎⴰⵍⴰ ⵏⵉⵜⵏⵉ ⴰⴷ ⴷⴷ-ⴷⴻⵡⵍⴻⵏ ⵜⵜⵛⴰⵍⴰⵏ ⵅ ⵢⵉⵅⴻⴼ ⵏⵙⴻⵏ.

10 ⵏⵉⵛⴰⵏ, ⴰⵇⴰ ⵢⵓⴷⴻⵙ-ⴷⴷ ⵓⵙⴻⵏⵊⴻⵎ ⵏⵏⴻⵙ ⵉ ⵢⴻⵏⵏⵉ ⵥⵥⴰⵢⴻⵙ ⵉⵜⵜⴻⴳⴳⵯⴻⴷⴻⵏ,

ⵃⵉⵎⴰ ⴰⵄⵓⴵⵉ ⵏⵏⴻⵙ ⴰⴷ ⵉⵥⴷⴻⵖ ⴷⵉ ⵜⴻⵎⵎⵓⵔⵜ ⵏⵏⴻⵖ.

11 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⴰⴷ ⵎⵎⵙⴰⴳⴰⵔⴻⵏ,

ⵜⴰⵙⴻⴳⴷⴰ ⴷ ⵍⴻⵀⵏⴰ ⴰⴷ ⵎⵙⵓⴷⵓⵎⴻⵏ. ^■  

12 ⵜⵉⴷⴻⵜⵜ ⴰⴷ ⵜⴻⵖⵎⵉ ⵥⵉ ⵜⴻⵎⵎⵓⵔⵜ,

ⵜⴰⵙⴻⴳⴷⴰ ⴰⴷ ⵜⴻⵙⵙⵉⵊⵊ ⵖⴰⵔ ⵙⵡⴰⴷⴷⴰⵢ ⵥⴻⴳ ⵓⵊⴻⵏⵏⴰ.

13 ⵙⵉⴷⵉ ⴰⴷ ⵉⵡⵛ ⵓⵍⴰ ⴷ ⵎⵉⵏ ⵉⵚⴻⴱⵃⴻⵏ,

ⵜⴰⵎⵎⵓⵔⵜ ⵏⵏⴻⵖ ⴰⴷ ⵜⴻⵡⵛ ⵍⵖⵉⴵⴻⵜ ⵏⵏⴻⵙ. ^■  

14 ⵜⴰⵙⴻⴳⴷⴰ ⴰⴷ ⴰⵙ ⵜⵉⵥⵡⴰⵔ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ,

ⴰⴷ ⵜⴻⵃⴹⴰ ⵊⵊⵓⵔⵔⴻⵜ ⵏ ⵉⵚⵓⵔⴰⴼ ⵏⵏⴻⵙ.