1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ, ⵙ ⵜⴻⵖⵏⵉⵏⵜ ⵏ ⵓⵊⵉⵜⵜⵉ.

ⵣⴻⴳ ⴰⵢⵜ ⵏ ⵇⵓⵔⴰⵃ. ⴰⵥⴻⵀⵀⴻⴷ.

2 ⵎⴰⵎⵎⴻⵛ ⵜⵜⵄⵉⵥⵥⴻⵏⵜ ⵜⵥⴻⴷⴷⵉⵖⵉⵏ ⵏⵏⴻⴽ,

ⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ!

3 ⵍⴻⵄⵎⴰⵔ ⵉⵏⵓ ⴷⴰⵢⴻⵙ ⵎⴻⵥⵔⵉ, ⵡⴰⵀ ⵉⴼⴻⵏⵏⴰ ⵙ ⵓⵡⴻⵃⵃⴻⵛ

ⵅ ⵍⴻⵎⵔⴰⵃⴰⵜ ⵏ ⵙⵉⴷⵉ,

ⵓⵍ ⵉⵏⵓ ⴷ ⴷⴷⴰⵜ ⵉⵏⵓ ⵙⵍⵉⵡⵍⵉⵡⴻⵏ ⵉ ⴰⵔⴻⴱⴱⵉ ⵉⴷⴷⴰⵔⴻⵏ. ^■  

4 ⵓⵍⴰ ⴷ ⵥⵥⴰⵡⴻⵛ ⵉⵜⵜⴰⴼ ⵄⴰⴷ ⵉⵛⵜ ⵏ ⵜⴰⴷⴷⴰⵔⵜ,

ⵓ ⵜⴰⴼⴰⵔⴵⴻⵙⵜ ⵜⵓⴼⴰ ⵉⵊⵊ ⵏ ⵍⵄⵓⵛⵛ ⵉ ⵢⵉⵅⴻⴼ ⵏⵏⴻⵙ

ⵉ ⴷⵉ ⵜⴻⵙⵙⵔⵓⵙⵙⴰ ⵉⵙⵙⴹⴰⵡⴻⵏ ⵏⵏⴻⵙ,

ⵖⴰⵔ ⵉⵄⴰⵍⵟⴰⵔⴻⵏ ⵏⵏⴻⴽ, ⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⴰⵊⴻⴵⵉⴷ ⵉⵏⵓ ⴷ ⴰⵔⴻⴱⴱⵉ ⵉⵏⵓ!

5 ⵙⵙⴻⵄⴷ ⵏⵙⴻⵏ ⵉ ⵢⵉⵏⵏⵉ ⵉⵥⴻⴷⴷⵖⴻⵏ ⴷⵉ ⵜⴰⴷⴷⴰⵔⵜ ⵏⵏⴻⴽ,

ⴰⵇⴰ-ⵜⴻⵏ ⵜⵜⵚⴻⴱⴱⴰⵃⴻⵏ ⵉ ⵛⴻⴽ ⴱⵍⴰ ⵇⴻⵟⵟⵓ. ⵙⵉⵍⴰⵀ.

6 ⵙⵙⴻⵄⴷ ⵏ ⵉⵡⴷⴰⵏ ⵉⵏⵏⵉ ⵉⵜⵜⴰⴼⴻⵏ ⵊⵊⴻⵀⴷ ⵏⵙⴻⵏ ⴷⴰⵢⴻⴽ,

ⵉⵏⵏⵉ ⵉⵃⴻⵟⵟⴰⵏ ⵉⴱⵔⵉⴷⴻⵏ ⵉⴳⴻⵄⵄⴷⴻⵏ ⵖⴰⵔ ⵣⵥⴰⵡⴻⵛⵜ ⵏⵏⴻⴽ ⵜⴰⵎⴻⵇⵇⵔⴰⵏⵜ ⴷⴻⴳ ⵡⵓⵍ ⵏⵙⴻⵏ.

7 ⵅⵎⵉ ⵜⵜⵛⵓⵇⵇⴰⵏ ⴷⴻⴳ ⵉⵊⵊ ⵏ ⵍⴻⵡⴹⴰ ⵏ ⵜⴻⵖⵥⵓⵔⵜ ⵏ ⵜⵛⴻⵊⵊⵓⵔⴰ ⵏ ⵓⵎⴻⵜⵜⵉⵏ,

ⴰⵔⵔⵉⵏ ⵜ ⴷ ⵍⵄⵓⵏⵚⴰⵔ.

ⵓⵍⴰ ⴷ ⴰⵏⵥⴰⵔ ⴰⵎⴻⵥⵡⴰⵔⵓ ⴰⴷ ⵜⴻⵏ ⵉⵙⵙⴷⵓⵍⵉ ⵙ ⵍⴱⴰⵔⴰⴽⴰⵜ.

8 ⵏⵉⵜⵏⵉ ⴳⴳⵓⵔⴻⵏ ⵥⵉ ⵊⵊⴻⵀⴷ ⴰⵍ ⵊⵊⴻⵀⴷ,

ⴰⴷ ⴷⴷ-ⴱⴰⵏⴻⵏ ⵖⴰⵔ ⴰⵔⴻⴱⴱⵉ ⴷⵉ ⵚⵉⵀⵢⵓⵏ.

9 ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ, ⵙⴻⵍ ⵉ ⵜⵥⴰⴵⵉⵜ ⵉⵏⵓ,

ⵙⵃⴻⵙⵙ, ⴰ ⴰⵔⴻⴱⴱⵉ ⵏ ⵢⴰⵄⵇⵓⴱ! ⵙⵉⵍⴰⵀ.

10 ⴰ ⴰⵔⴻⴱⴱⵉ, ⵛⴻⴽ ⴷ ⵜⴰⵙⴻⴷⴷⴰⵔⵜ ⵏⵏⴻⵖ ⵏ ⵓⵙⴻⵍⵇⵉ,

ⴰⵇⴰ ⵅⵥⴰⵔ ⵖⴰⵔ ⵡⵓⴷⴻⵎ ⵏ ⵓⵎⴻⴷⵀⵓⵏ ⵏⵏⴻⴽ!

11 ⵎⴰⵖⴰⵔ ⵉⵊⵊ ⵏ ⵡⴰⵙⵙ ⴷⵉ ⵍⴻⵎⵔⴰⵃⴰⵜ ⵏⵏⴻⴽ ⵉⵃⵍⴰ ⵅ ⵡⴰⵍⴻⴼ ⵏ ⵡⵓⵙⵙⴰⵏ ⵏⵏⴻⵖⵏⵉ.

ⵎⴰⵄⵍⵉⴽ ⵓⴼⵉⵖ ⴰⴷ ⴱⴻⴷⴷⴻⵖ ⵅ ⵜⵏⴻⴱⴷⴰⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵉⵏⵓ,

ⵓⵍⴰ ⴷ ⴰⵜⵍⴰⵄ ⴷⴻⴳ ⵉⵇⵉⴹⴰⵏ ⵏ ⵜⵓⵄⴻⴼⴼⵏⴰ.

12 ⵎⴰⵖⴰⵔ ⵙⵉⴷⵉ ⴰⵔⴻⴱⴱⵉ ⴷ ⵜⴰⴼⵓⵛⵜ ⴷ ⵜⵙⴻⴷⴷⴰⵔⵜ ⵉ ⵓⵙⴻⵍⵇⵉ,

ⵙⵉⴷⵉ ⴰⴷ ⵉⵡⵛ ⴰⵃⵉⵏⵏⵉ ⴷ ⵓⵄⵓⴵⵉ.

ⵏⴻⵜⵜⴰ ⵡⴰⵔ ⵉⵙⵙⵄⵉⵥⵥⵉ ⵍⵅⴰⵔ ⴷⴻⴳ ⵉⵏⵏⵉ ⵉⴳⴳⵓⵔⴻⵏ ⵙ ⵍⴻⴽⵎⴰⵔⴻⵜ.

13 ⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ,

ⵙⵙⴻⵄⴷ ⵏ ⴱⵏⴰⴷⴻⵎ ⵏⵏⵉ ⴷⴰⵢⴻⴽ ⵉⵜⵜⵉⵇⵇⴰⵏ. ^■