1 ⵉⵥⵍⵉ. ⴰⵥⴻⵀⵀⴻⴷ ⵏ ⴰⵙⴰⴼ.

2 ⴰ ⴰⵔⴻⴱⴱⵉ, ⵡⴰⵔ ⵙⵙⴻⵖⴷ,

ⵡⴰⵔ ⵜⵜⴻⴳⴳ ⵉⵅⴻⴼ ⵏⵏⴻⴽ ⴷ ⴰⴷⴻⵀⵛⵓⵔ,

ⵡⴰⵔ ⵙⴻⵇⵇⴰⵔ ⵛⴰ, ⴰ ⴰⵔⴻⴱⴱⵉ.

3 ⵎⴰⵖⴰⵔ ⵅⵥⴰⵔ, ⵍⵄⴻⴷⵢⴰⵏ ⵏⵏⴻⴽ ⵜⵜⴰⵔⵔⵓⴵⵓⴷⴻⵏ,

ⵉⵏⵏⵉ ⵛⴻⴽ ⵉⵛⴰⵔⵔⵀⴻⵏ ⵙⵙⴳⴻⵄⵄⴷⴻⵏ ⴰⵥⴻⴵⵉⴼ.

4 ⵜⵜⵅⴰⵔⵔⵚⴻⵏ ⴷⴻⴳ ⵉⵛⵜ ⵏ ⵜⵎⴻⵄⵎⵓⵞ ⴷⵉ ⵜⵏⵓⴼⴼⴰⵔ ⴹⵉⴷⴷ ⵉ ⵍⴳⴻⵏⵙ ⵏⵏⴻⴽ,

ⵜⵜⴻⵎⵛⴰⵡⴰⵔⴻⵏ ⵅ ⵢⴻⵏⵏⵉ ⵉⵜⵜⵡⴰⵃⴻⵟⵟⴰⵏ ⵥⵥⴰⵢⴻⴽ.

5 ⵇⵇⴰⵔⴻⵏ: “ⴰⵙⴻⵎ-ⴷⴷ, ⴻⵊⵊ ⴰⵏⴻⵖ ⴰⴷ ⵜⴻⵏ ⵏⵜⴻⵃⵃⴰ ⴰⵎ ⵍⴳⴻⵏⵙ,

ⴰⵍⴰⵎⵉ ⵡⴰⵔ ⵉⵜⵜⵉⴷⴰⵔ ⵄⴰⴷ ⴷⴻⴳ ⵢⵉⵙⴻⵎ ⵏ ⵉⵙⵔⴰⵉⵍ.”

6 ⵎⴰⵖⴰⵔ ⵜⵜⴻⵎⵛⴰⵡⴰⵔⴻⵏ ⵙ ⵡⵓⵍ ⴷ ⵉⵊⵊ,

ⴰⵇⴰ ⵜⵜⴻⴳⴳⴻⵏ ⵉⵊⵊ ⵏ ⵍⵄⴰⵀⴷ ⴹⵉⴷⴷ ⵉ ⵛⴻⴽ:

7 ⵉⵇⵉⴹⴰⵏ ⵏ ⵉⴷⵓⵎ ⴷ ⴰⵢⵜ ⵏ ⵉⵙⵎⴰⵄⵉⵍ,

ⵎⵓ’ⴰⴱ ⴷ ⴰⵢⵜ ⵏ ⵀⴰⵊⴰⵔ,

8 ⵊⴰⴱⴰⵍ ⴷ ⵄⴰⵎⵎⵓⵏ ⴷ ⵄⴰⵎⴰⵍⵉⵇ,

ⴼⵉⵍⵉⵛⵉⵜ ⴷ ⵉⵎⴻⵥⴷⴰⵖ ⵏ ⵚⵓⵔ.

9 ⵓⵍⴰ ⴷ ⴰⵛⵛⵓⵔ ⵉⵎⵎⴰⵔⵏⵉ ⵖⴰⵔⵙⴻⵏ.

ⵏⵉⵜⵏⵉ ⵜⵓⵖⴰ ⴰⵜⴻⵏ ⴷ ⴰⴼⵓⵙ ⵉⵊⵀⴻⴷ ⵉ ⴰⵢⵜ ⵏ ⵍⵓⵟ. ⵙⵉⵍⴰⵀ.

10 ⴻⴳⴳ ⴰⵙⴻⵏ ⴰⵎ ⵎⵉⴷⵢⴰⵏ ⴷ ⵙⵉⵙⴰⵔⴰ,

ⴰⵎ ⵢⴰⴱⵉⵏ ⵖⴰⵔ ⵢⴻⵖⵥⴰⵔ ⵏ ⵇⵉⵛⵓⵏ.

11 ⵏⵉⵜⵏⵉ ⵜⵜⵡⴰⵜⴻⵃⵃⴰⵏ ⵖⴰⵔ ⵄⴰⵢⵏ-ⴷⵓⵔ,

ⴷⴻⵡⵍⴻⵏ ⴷ ⵍⴻⵖⴱⴰⵔ ⵅ ⵜⴻⵎⵎⵓⵔⵜ.

12 ⴻⴳⴳ ⵉ-ⵜⴻⵏ ⴷ ⵜⴰⵔⵡⴰ ⵏ ⵜⴰⵚⵉⵍⴻⵜ ⵏⵙⴻⵏ ⴰⵎ ⵖⵓⵔⴰⴱ ⴷ ⴷⵉ’ⴱ,

ⵎⴰⵔⵔⴰ ⴰⵢⵜ ⵏ ⵊⵊⴻⵀⴷ ⵏⵙⴻⵏ ⴰⵎ ⵣⴰⴱⴰⵃ ⴷ ⵚⴰⵍⵎⵓⵏⴰⵄ,

13 ⵉⵏⵏⵉ ⵉⵇⵇⴰⵔⴻⵏ:

“ⴻⵊⵊ ⴰⵏⴻⵖ ⴰⴷ ⵏⴻⵟⵟⴻⴼ ⵜⵉⵥⴻⴷⴷⵉⵖⵉⵏ ⵏ ⴰⵔⴻⴱⴱⵉ ⵉ ⵢⵉⵅⴻⴼ ⵏⵏⴻⵖ ⴷ ⵍⵡⴰⵔⵜ.”

14 ⴰ ⴰⵔⴻⴱⴱⵉ ⵉⵏⵓ, ⴻⴳⴳ ⵉ-ⵜⴻⵏ ⴰⵎ ⵢⵉⵊⵊ ⵏ ⵓⵇⴻⵍⵍⵉⵊ ⵉⵜⵜⴻⵏⵏⴹⴻⵏ ⴷⵉ ⵍⴻⵄⵡⵉⵏ,

ⴰⵎ ⵓⵍⵓⵎ ⵥⵥⴰⵜ ⵉ ⵡⵓⴷⴻⵎ ⵏ ⵓⵙⴻⵎⵎⵉⴹ.

15 ⴰⵎⴻⵛⵏⴰⵡ ⵜⵉⵎⴻⵙⵙⵉ ⵜⴻⵙⵙⵔⴻⵇⵇⴰ ⴰⵥⵖⴰⵔ,

ⴰⵎⴻⵛⵏⴰⵡ ⴰⵛⴻⵄⵄⴰⵍ ⵉⵜⵜⴻⵜⵜ ⵉⴷⵓⵔⴰⵔ, ^□  

16 ⴰⵥⵥⴻⵍ ⴰⵎⵎⵓ ⵅⴰⵙⴻⵏ ⵙ ⵓⵙⴻⵎⵎⵉⴹ ⵏⵏⴻⴽ,

ⵙⵏⴻⵅⵍⴻⵄ ⵉ-ⵜⴻⵏ ⵙ ⵜⵃⴰⵔⵢⴰⴹⵜ ⵏⵏⴻⴽ.

17 ⵍⴻⵃⵃⴻⴼ ⵓⴷⴻⵎ ⵏⵙⴻⵏ ⵙ ⵍⴻⵃⵢⴰ,

ⵎⴰⵃⴻⵏⴷ ⵏⵉⵜⵏⵉ, ⴰ ⵙⵉⴷⵉ, ⴰⴷ ⴰⵔⵥⵓⵏ ⵅ ⵢⵉⵙⴻⵎ ⵏⵏⴻⴽ.

18 ⴻⵊⵊ ⵉ-ⵜⴻⵏ ⴰⴷ ⴱⴰⵔⵔⵇⴻⵏ ⵓ ⴰⴷ ⴰⵔⴻⵊⴼⴻⵏ ⵉ ⵍⴻⴱⴷⴰ,

ⴻⵊⵊ ⵉ-ⵜⴻⵏ ⴰⴷ ⵙⵙⴻⴹⵃⴰⵏ ⵓⵛⴰ ⴰⴷ ⵜⵜⵡⴰⵀⴻⵍⵍⴽⴻⵏ,

19 ⵃⵉⵎⴰ ⴰⴷ ⵙⵙⵏⴻⵏ, ⴰⵇⴰ ⵛⴻⴽ ⵡⴰⵀⴰ ⵉ ⵖⴰⵔ ⵉⴵⴰ ⵢⵉⵙⴻⵎ ‘ⵙⵉⴷⵉ’,

ⴰⵎⵄⵓⴵⵉ ⵅ ⵎⴰⵔⵔⴰ ⵜⴰⵎⵎⵓⵔⵜ.