81
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ⵓⵊⵉⵜⵜⵉ. ⵏ ⴰⵙⴰⴼ. 2 ⵙⵍⵉⵡⵍⴻⵎ ⵉ ⴰⵔⴻⴱⴱⵉ, ⵊⵊⴻⵀⴷ ⵏⵏⴻⵖ,
ⴷⵓⵇⵇⵥⴻⵎ ⵙ ⵍⴻⴼⵔⴰⵃⴻⵜ ⵉ ⴰⵔⴻⴱⴱⵉ ⵏ ⵢⴰⵄⵇⵓⴱ.
3 ⵙⴳⴻⵄⵄⴷⴻⵎ ⵉⵛⵜ ⵏ ⵢⴻⵥⵍⵉ ⵏ ⵓⵚⴻⴱⴱⴻⵃ, ⴰⵡⵉ ⴰⴱⴻⵏⴷⵉⵔ,
ⵍⴳⴰⵎⴱⵔⵉ ⵎⵉⵥⵉⴷ ⴷ ⵍⵀⴰⵔⴱⴰ.
4 ⵚⵓⴹⴻⵎ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⵖⴰⵔ ⵓⴱⴻⴷⴷⵉ ⵏ ⵓⵢⵓⵔ,
ⵖⴰⵔ ⵜⵥⵉⵔⵉ ⵉⵇⴻⴼⵍⴻⵏ, ⵖⴰⵔ ⵡⴰⵙⵙ ⵏ ⵍⵄⵉⴷ ⵏⵏⴻⵖ.
5 ⵎⴰⵖⴰⵔ ⵜⴰ ⴷ ⵜⴰⵡⵚⴻⵢⵢⴻⵜ ⵉ ⵉⵙⵔⴰⵉⵍ,
ⵉⵛⵜ ⵏ ⵍⴼⴰⵔⵉⴹⴰ ⵏ ⴰⵔⴻⴱⴱⵉ ⵏ ⵢⴰⵄⵇⵓⴱ.
6 ⵉⴳⴳⴰ ⵉ-ⵜⵜ ⴷ ⵛⵛⵀⴰⴷⴻⵜ ⴷⵉ ⵢⵓⵙⵓⴼ,
ⵍⴰⵎⵉ ⴷⴷ-ⵉⴼⴼⴻⵖ ⴹⵉⴷⴷ ⵉ ⵜⴻⵎⵎⵓⵔⵜ ⵏ ⵎⵉⵚⵔⴰ.
ⴰⵇⴰ ⵙⵍⵉⵖ ⵉⵊⵊ ⵏ ⵢⵉⵍⴻⵙ ⵡⴰⵔ ⴷ ⴰⵙ ⴼⴻⵀⵎⴻⵖ. □
7 ⵜⴰⵖⵔⵓⴹⵜ ⵏⵏⴻⵙ ⴼⴻⴽⴽⴻⵖ ⵜⵜ ⵥⵉ ⴷⴷⵇⴻⵍ,
ⵉⴼⴰⵙⵙⴻⵏ ⵏⵏⴻⵙ ⴰⵔⵅⵓⵏ ⵥⵉ ⵜⵙⵓⴵⴻⵜ ⵉ ⵜⵓⵖⴰ ⵢⴰⵔⴻⴱⴱⵓ.
8 ⵛⴻⴽ ⵜⵍⴰⵖⵉⴷ ⴷⵉ ⵍⴻⵃⵚⴰⵔⴻⵜ ⵓ ⵏⴻⵛⵛ ⴼⴻⴽⴽⴻⵖ ⵛⴻⴽ ⵥⵥⴰⵢⴻⵙ.
ⵏⴻⵛⵛ ⴰⵔⵔⵉⵖ-ⴷⴷ ⵅⴰⴽ ⵥⴻⴳ ⵡⴻⵅⵅⴰⵎ ⵉⵏⵏⵓⴼⴼⴰⵔⴻⵏ ⵏ ⵡⴰⵊⵊⴰⵊ,
ⵖⴰⵔ ⵡⴰⵎⴰⵏ ⵏ ⵎⴰⵔⵉⴱⴰ ⵇⴻⴵⴱⴻⵖ ⵛⴻⴽ. ⵙⵉⵍⴰⵀ.
9 ⵙⴻⵍ, ⵍⴳⴻⵏⵙ ⵉⵏⵓ, ⵅⴻⵏⵏⵉ ⵏⴻⵛⵛ ⴰⴷ ⵛⴻⵀⴷⴻⵖ ⴷⵉ ⵍⵡⴻⵙⵜ ⵏⵏⴻⴽ, ⴰ ⵉⵙⵔⴰⵉⵍ,
ⵎⴰⵍⴰ ⵅⴻⵏⵏⵉ ⵜⵓⵖⴰ ⵜⴻⵅⵙⴻⴷ ⴰⴷ ⵖⴰⵔⵉ ⴷⴷ-ⵜⴻⵙⵍⴻⴷ.
10 ⵡⴰⵔ ⵖⴰⵔⴻⴽ ⵉⵜⵜⵉⵍⵉ ⵉⵊⵊ ⵏ ⴰⵔⴻⴱⴱⵉ ⴷ ⴰⵖⵔⵉⴱ,
ⵡⴰⵔ ⵜⵜⴰⴹⴰⵔ ⵓⵍⴰ ⵉ ⵢⵉⵊⵊ ⵏ ⴰⵔⴻⴱⴱⵉ ⵉ ⵡⴰⵔ ⵜⴻⵙⵙⵉⵏⴻⴷ.
11 ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵡⴻⵏⵏⵉ ⵛⴻⴽ ⴷⴷ-ⵉⵙⵙⵓⴼⴼⵖⴻⵏ ⵥⵉ ⵎⵉⵚⵔⴰ.
ⴰⵔⵥⴻⵎ ⴰⵇⴻⵎⵎⵓⵏ ⵏⵏⴻⴽ ⵓ ⵏⴻⵛⵛ ⴰⴷ ⵜ ⵛⵛⵓⵔⴻⵖ.
12 ⵎⴰⵛⴰ ⵍⴳⴻⵏⵙ ⵉⵏⵓ ⵡⴰⵔ ⵉⵙⵍⵉ ⵛⴰ ⵖⴰⵔ ⵜⵎⵉⵊⵊⴰ ⵉⵏⵓ,
ⵉⵙⵔⴰⵢⵉⵍ ⵡⴰⵔ ⴷ ⴰⵢⵉ ⵉⵅⵙ.
13 ⵙ ⵓⵢⴻⵏⵏⵉ ⵊⵊⵉⵖ ⵜⴻⵏ ⵉ ⵡⵓⵍ ⵏⵙⴻⵏ ⵉⵇⴻⵙⵃⴻⵏ,
ⴰⵍⴰⵎⵉ ⵉ ⵖⴰ ⵓⵢⵓⵔⴻⵏ ⴷⵉ ⵍⴻⵛⵡⴰⵔ ⵏ ⵓⵥⴻⴵⵉⴼ ⵏⵙⴻⵏ.
14 ⵎⵍⵉ ⴷⴷ-ⵉⵙⵍⴰ ⵖⴰⵔⵉ ⵍⴳⴻⵏⵙ ⵉⵏⵓ,
ⵎⵍⵉ ⵉⵙⵔⴰⵉⵍ ⵉⵅⵙ ⴰⴷ ⵢⵓⵢⵓⵔ ⴷⴻⴳ ⵉⴱⵔⵉⴷⴻⵏ ⵉⵏⵓ!
15 ⵅⴻⵏⵏⵉ ⵎⴰⵎⵎⴻⵛ ⴷⴻⵖⵢⴰ ⵉⵍⵉ ⵇⴹⵉⵖ ⵅ ⵍⵄⴻⴷⵢⴰⵏ ⵏⵙⴻⵏ,
ⴰⵔⵔⵉⵖ ⴰⴼⵓⵙ ⵉⵏⵓ ⴹⵉⴷⴷ ⵉ ⵢⴻⵏⵏⵉ ⵜⴻⵏ ⵉⵃⴻⵚⵚⴰⵔⴻⵏ.
16 ⵉⵏⵏⵉ ⵉⵛⴰⵔⵔⵀⴻⵏ ⵙⵉⴷⵉ ⴰⴷ ⵖⴰⵔⴻⵙ ⴷⴷ-ⴷⴻⵡⵍⴻⵏ ⵜⵜⵎⵓⵔⵓⴷⴻⵏ ⴷⴻⴵⴻⵏ,
ⵍⵡⴻⵇⵜ ⵏ ⵓⵅⴻⴵⴻⵚ ⵏⵙⴻⵏ ⴰⴷ ⵢⵉⵍⵉ ⵉ ⵍⴻⴱⴷⴰ.
17 ⵉⵍⵉ ⴰⵇⴰ ⵉⵡⵛⴰ ⴰⵙ ⵎⴰⵛⵛⴰ ⵥⵉ ⵍⴻⵎⵍⵉⵃ ⵏ ⵢⵉⵔⴷⴻⵏ,
ⵡⴰⵀ, ⵉⵍⵉ ⵙ ⵜⴰⵎⵎⴻⵏⵜ ⵥⵉ ⵊⵊⴰⵔⴼ ⵙⵙⵊⵊⵉⵡⵏⴻⵖ ⵛⴻⴽ.