1 ⴰⵥⴻⵀⵀⴻⴷ ⵏ ⴰⵙⴰⴼ.

ⴰ ⴰⵔⴻⴱⴱⵉ, ⵍⴻⴳⵏⵓⵙ ⵓⴷⴼⴻⵏ ⵖⴰⵔ ⵍⵡⴰⵔⵜ ⵏⵏⴻⴽ.

ⵏⵉⵜⵏⵉ ⵙⵙⵅⴻⵎⵊⴻⵏ ⵣⵥⴰⵡⴻⵛⵜ ⵏⵏⴻⴽ ⵜⴰⵎⴻⵇⵇⵔⴰⵏⵜ ⵉⵇⴻⴷⴷⵙⴻⵏ,

ⴰⵔⵔⵉⵏ ⵓⵔⵛⴰⵍⵉⵎ ⴷ ⵍⵅⵉⵔⴱⴰⵜ.

2 ⵍⵅⴻⵛⴱⴰⵜ ⵏ ⵉⵎⵙⴻⵅⵅⴰⵔⴻⵏ ⵏⵏⴻⴽ ⵡⵛⵉⵏ ⵜⴻⵏⵜ ⴷ ⵎⴰⵛⵛⴰ ⵉ ⵉⵊⴹⴰⴹ ⵏ ⵓⵊⴻⵏⵏⴰ,

ⴰⵢⵙⵓⵎ ⵏ ⵉⵎⵜⵉⵇⵇⴰⵏ ⵏⵏⴻⴽ ⵉ ⵍⴻⵡⵃⵓⵛ ⵏ ⵜⴻⵎⵎⵓⵔⵜ.

3 ⵉⴷⴰⵎⵎⴻⵏ ⵏⵙⴻⵏ ⵥⴻⴵⵄⴻⵏ ⵜⴻⵏ ⴰⵎ ⵡⴰⵎⴰⵏ ⵖⴰⵔ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵏ ⵓⵔⵛⴰⵍⵉⵎ,

ⵓⵍⴰ ⴷ ⵉⵊⵊ ⵡⴰⵔ ⵜⴻⵏ ⵉⵏⴹⵉⵍ.

4 ⵏⴻⴷⵡⴻⵍ ⴷ ⵍⴻⴼⴷⵉⵃⴻⵜ ⵉ ⵊⵊⵉⵔⴰⵏ ⵏⵏⴻⵖ,

ⴷ ⵓⵙⵜⴻⵀⵥⵉ ⴷ ⵓⵙⴻⵃⵇⴰⵔ ⵉ ⵎⴰⵔⵔⴰ ⵉⵏⵏⵉ ⴷ ⴰⵏⴻⵖ ⴷⴷ-ⵉⵏⵏⴹⴻⵏ. ^■  

5 ⴰⵔ ⵎⴻⵍⵎⵉ, ⴰ ⵙⵉⴷⵉ? ⵎⴰ ⵅⴻⵏⵏⵉ ⴰⴷ ⵜⴻⵇⵇⵉⵎⴻⴷ ⵜⵙⴻⵄⵄⴰⵔⴻⴷ ⵉ ⵍⴻⴱⴷⴰ?

ⵎⴰ ⴰⴷ ⴰⵔⴻⵖ ⵡⴰⵙⴰⵎ ⵏⵏⴻⴽ ⴰⵎ ⵜⵎⴻⵙⵙⵉ ⵉ ⵍⴻⴱⴷⴰ? ^■  

6 ⴼⴰⵔⵔⴻⵖ ⴰⵙⵄⴰⵔ ⵏⵏⴻⴽ ⵅ ⵍⴻⴳⵏⵓⵙ ⵉⵏⵏⵉ ⵡⴰⵔ ⵛⴻⴽ ⵉⵙⵙⵉⵏⴻⵏ,

ⵅ ⵜⵉⴳⴻⵍⴷⵉⵡⵉⵏ ⵏⵏⵉ ⵡⴰⵔ ⵉⵜⵜⵍⵉⵖⵉⵏ ⵅ ⵢⵉⵙⴻⵎ ⵏⵏⴻⴽ. ^■  

7 ⵎⴰⵖⴰⵔ ⵏⵉⵜⵏⵉ ⵛⵛⵉⵏ ⵢⴰⵄⵇⵓⴱ,

ⴰⵔⴻⴷⴷⴵⴻⵏ ⵜⴰⵥⴻⴷⴷⵉⵖⵜ ⵏⵏⴻⵙ.

8 ⵡⴰⵔ ⵅⴰⵏⴻⵖ ⵄⴻⵇⵇⴻⵍ ⵄⵍⴰⵃⵙⴰⴱ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵏ ⵥⵉⵛ.

ⵇⴻⴵⴻⵇ, ⴻⵊⵊ ⴰⵔⵔⴻⵃⵎⴻⵜ ⵏⵏⴻⴽ ⴰⴷ ⴽⵉⴷⵏⴻⵖ ⵜⴻⵎⵙⴰⴳⴰⵔ,

ⵎⴰⵖⴰⵔ ⵏⴻⴹⵄⴻⴼ ⴰⵟⵟⴰⵙ. ^■  

9 ⴻⵡⵛ ⴰⵏⴻⵖ ⴰⴼⵓⵙ ⵏⵏⴻⴽ, ⴰ ⴰⵔⴻⴱⴱⵉ, ⴷⵉ ⵟⵟⵡⴻⵄ ⵏ ⵓⵄⵓⴵⵉ ⵏ ⵢⵉⵙⴻⵎ ⵏⵏⴻⴽ,

ⵙⴻⵏⵊⴻⵎ ⴰⵏⴻⵖ ⵓ ⵙⴻⵚⵍⴻⵃ ⴷⴷⵏⵓⴱ ⵏⵏⴻⵖ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⴽ.

10 ⵎⴰⵢⴻⵎⵎⵉ ⵉ ⵖⴰ ⵉⵏⵉⵏ ⵍⴻⴳⵏⵓⵙ: “ⵎⴰⵏⵉ ⵉⴵⴰ ⴰⵔⴻⴱⴱⵉ ⵏⵙⴻⵏ?” ⴻⵊⵊ ⴰⵏⵜⴰⵇⴻⵎ ⵏ ⵉⴷⴰⵎⵎⴻⵏ ⵉⵜⵜⵡⴰⵙⵙⵉⵥⵍⴻⵏ ⵏ ⵍⴳⴻⵏⵙ ⵏⵏⴻⴽ

ⴰⴷ ⵉⴷⵡⴻⵍ ⵉⵜⵜⵡⴰⵙⵙⴻⵏ ⵊⴰⵔ ⵍⴻⴳⵏⵓⵙ ⵊⴰⵔ ⵜⵉⵟⵟⴰⵡⵉⵏ ⵏⵏⴻⵖ.

11 ⴻⵊⵊ ⴰⵥⴻⵀⵀⴰⵔ ⵏ ⵓⵎⴻⵃⴱⵓⵙ ⴰⴷ ⴷⴷ-ⵢⴰⵙ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ,

ⵃⴹⴰ ⵉⵃⴻⵏⵊⵉⵔⴻⵏ ⵏ ⵍⵎⴻⵡⵜ ⵄⵍⴰⵃⵙⴰⴱ ⵍⴻⵎⵖⴰⵔⴻⵜ ⵏ ⵓⵖⵉⵍ ⵏⵏⴻⴽ.

12 ⴰⵔⵔ ⴰⵙⴻⵏ ⵉ ⵊⵊⵉⵔⴰⵏ ⵏⵏⴻⵖ ⴰⴱⴻⵀⴷⴻⵍ ⵏⵙⴻⵏ ⵙⴻⴱⵄⴰ ⵏ ⵜⵙⴻⵇⵇⴰⵔ ⵖⴰⵔ ⵡⴻⵃⵙⵉⵏ ⵏⵙⴻⵏ,

ⴰⴱⴻⵀⴷⴻⵍ ⵏⵙⴻⵏ ⵉ ⵥⵉ ⵛⴻⴽ ⴼⴻⴹⵃⴻⵏ, ⴰ ⵙⵉⴷⵉ ⵉⵏⵓ.

13 ⵏⴻⵛⵛⵉⵏ ⴷ ⵍⴳⴻⵏⵙ ⵏⵏⴻⴽ ⴷ ⵡⵓⴵⵉ ⵏ ⴷⴷⵎⴰⵏⵉ ⵏ ⵜⴰⵔⴻⵡⵙⴰ ⵏⵏⴻⴽ.

ⵏⴻⵜⵜⵇⴰⴷⴰ ⵛⴻⴽ ⵉ ⵍⴻⴱⴷⴰ, ⵥⵉ ⵊⵊⵉⵍ ⴰⵍ ⵊⵊⵉⵍ.

ⵏⴻⵛⵛⵉⵏ ⴰⴷ ⵏⴱⴰⵔⵔⴻⵃ ⵛⵛⴰⵏ ⵏⵏⴻⴽ.