78
1 ⴰⵅⴻⵎⵎⵉ ⵏ ⴰⵙⴰⴼ. ⴰ ⵍⴳⴻⵏⵙ ⵉⵏⵓ, ⴻⵡⵛ ⴰⵎⴻⵥⵥⵓⵖ ⵉ ⵛⵛⴰⵔⵉⵄⴰ ⵉⵏⵓ!
ⵎⴻⵢⵢⵍⴻⵎ ⴰⵎⴻⵥⵥⵓⵖ ⵏⵡⴻⵎ ⵖⴰⵔ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ.
2 ⵏⴻⵛⵛ ⴰⴷ ⴰⵔⵥⵎⴻⵖ ⴰⵇⴻⵎⵎⵓⵏ ⵉⵏⵓ ⵙ ⵡⴰⵡⴰⵍ ⵉⵡⴻⵥⵏⴻⵏ,
ⴰⴷ ⴱⴰⵔⵔⵃⴻⵖ ⵍⴻⵎⵄⴰⵏⵉ ⵉⵏⵏⵓⴼⴼⴰⵔⴻⵏ ⵥⴻⴳ ⵡⴻⵛⵃⴰⵍ ⵓⵢⴰ, ■
3 ⵉⵏⵏⵉ ⵏⴻⵙⵍⴰ ⵓ ⵏⴻⵙⵙⴻⵏ,
ⵉⵏⵏⵉ ⴷ ⴰⵏⴻⵖ ⵃⴰⵊⴰⵏ ⵉⴱⴰⴱⴰⵜⴻⵏ ⵏⵏⴻⵖ.
4 ⵡⴰⵔ ⵜⴻⵏ ⵏⴻⵜⵜⴻⴼⴼⴰⵔ ⵥⴻⴳ ⵉⵃⴻⵏⵊⵉⵔⴻⵏ ⵏⵙⴻⵏ,
ⵥⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ.
ⴰⴷ ⵏⴱⴰⵔⵔⴻⵃ ⵙ ⵜⵎⴻⴳⴳⴰ ⵉⵚⴻⴱⴱⵃⴻⵏ ⵏ ⵙⵉⴷⵉ,
ⵓ ⵙ ⵜⵎⴻⴳⴳⴰ ⵉⵊⴻⵀⴷⴻⵏ ⴷ ⵍⵎⵓⵄⵊⵉⵥⴰⵜ ⵏⵏⵉ ⵜⵓⵖⴰ ⵉⴳⴳⴰ.
5 ⵎⴰⵖⴰⵔ ⵏⴻⵜⵜⴰ ⵉⴳⴳⴰ ⵉⵛⵜ ⵏ ⵛⵛⵀⴰⴷⴻⵜ ⴷⵉ ⵢⴰⵄⵇⵓⴱ,
ⵓⵍⴰ ⴷ ⵉⵛⵜ ⵏ ⵛⵛⴰⵔⵉⵄⴰ ⴷⵉ ⵉⵙⵔⴰⵉⵍ,
ⵏⵏⵉ ⵜⵓⵖⴰ ⵢⵓⵎⵓⵔ ⵉ ⵉⴱⴰⴱⴰⵜⴻⵏ ⵏⵏⴻⵖ,
ⵎⴰⵃⴻⵏⴷ ⴰⴷ ⵜⵜ ⵙⵙⵖⴰⵔⴻⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ, ■
6 ⵎⴰⵃⴻⵏⴷ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ ⴰⴷ ⵉⵙⵙⴻⵏ,
ⵉⵃⴻⵏⵊⵉⵔⴻⵏ ⵏⵏⵉ ⴷⴷ ⵖⴰ ⵉⵜⵜⵡⴰⵅⴻⵍⵇⴻⵏ ⴰⵡⴰⵔⵏⵉ ⴰⵙⴻⵏ,
ⵓ ⵅⴻⵏⵏⵉ ⵓⵍⴰ ⴷ ⵏⵉⵜⵏⵉ ⴰⴷ ⴽⴽⴰⵔⴻⵏ ⴰⴷ ⵜⵜ ⵙⵙⴻⵄⴷⵓⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ,
7 ⵎⴰⵃⴻⵏⴷ ⵏⵉⵜⵏⵉ ⴰⴷ ⵙⵙⴰⵔⵙⴻⵏ ⵍⴰⵎⴰⵏ ⵏⵙⴻⵏ ⵅ ⴰⵔⴻⴱⴱⵉ,
ⵡⴰⵔ ⵜⵜᵉⵜⵜⵓⵏ ⵛⴰ ⵜⵉⵎⴻⴳⴳⴰ ⵏ ⴰⵔⴻⴱⴱⵉ,
ⵎⴰⵛⴰ ⴰⴷ ⵃⴹⴰⵏ ⵜⵉⵡⴻⵚⵚⴰ ⵏⵏⴻⵙ,
8 ⵡⴰⵔ ⵜⵜⵉⵍⵉⵏ ⴰⵎⴻⵛⵏⴰⵡ ⵉⴱⴰⴱⴰⵜⴻⵏ ⵏⵙⴻⵏ,
ⵉⵊⵊ ⵏ ⵊⵊⵉⵍ ⴰⵖⴻⵏⵏⴰⵏ ⵓ ⵉⵖⴻⵡⵡⵖⴻⵏ,
ⵉⵊⵊ ⵏ ⵊⵊⵉⵍ ⵙ ⵡⵓⵍ ⵡⴰⵔ ⵉⵎⵜⴻⵏ ⵓ ⵙ ⴰⵔⵔⵓⵃ ⵉⵖⴷⴰⵔⴻⵏ ⴰⵔⴻⴱⴱⵉ. ■
9 ⴰⵢⵜ ⵏ ⵉⴼⵔⴰⵢⵉⵎ, ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ,
ⵄⴻⵇⴱⴻⵏ ⴷⴻⴳ ⵡⴰⵙⵙ ⵏ ⵓⵎⴻⵏⵖⵉ.
10 ⵡⴰⵔ ⵃⴹⴰⵏ ⵍⵄⴰⵀⴷ ⴰⴽ-ⴷ ⴰⵔⴻⴱⴱⵉ,
ⵓⴳⵉⵏ ⴰⴷ ⵓⵢⵓⵔⴻⵏ ⴷⵉ ⵛⵛⴰⵔⵉⵄⴰ ⵏⵏⴻⵙ.
11 ⵜⵜⵓⵏ ⵜⵉⵎⴻⴳⴳⴰ ⵏⵏⴻⵙ ⴷ ⵍⵎⵓⵄⵊⵉⵥⴰⵜ,
ⵜⵉⵏⵏⵉ ⵉ ⴷ ⴰⵙⴻⵏ ⵉⵙⵙⵛⴻⵏ.
12 ⵣⵥⴰⵜ ⵉ ⵜⵉⵟⵟⴰⵡⵉⵏ ⵏ ⵉⴱⴰⴱⴰⵜⴻⵏ ⵏⵙⴻⵏ ⵉⴳⴳⴰ ⵏⴻⵜⵜⴰ ⵉⵛⵜ ⵏ ⵍⵎⵓⵄⵊⵉⵥⴰ,
ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⴷⴻⴳ ⵉⵢⵢⴰⵔ ⵏ ⵚⵓⵄⴰⵏ.
13 ⵏⴻⵜⵜⴰ ⵉⴱⴹⴰ ⵍⴻⴱⵃⴰⵔ ⵓⵛⴰ ⵉⵙⵙⴻⵥⵡⴰ ⵜⴻⵏ ⵥⵥⴰⵢⴻⵙ,
ⵉⵊⵊⴰ ⴰⵎⴰⵏ ⴰⴷ ⴱⴻⴷⴷⴻⵏ ⴰⵎ ⵡⴻⵖⴱⴰⵔ. ■
14 ⵏⴻⵜⵜⴰ ⵉⵙⵙⵇⴻⴱⴱⴻⴹ ⵉ-ⵜⴻⵏ ⵙ ⵡⴰⵙⵙ ⵙ ⵓⵙⴻⵢⵏⵓ,
ⵙ ⴵⵉⵍⴻⵜ ⵎⴰⵔⵔⴰ ⵙ ⵜⴼⴰⵡⵜ ⵏ ⵜⵎⴻⵙⵙⵉ. ■
15 ⵏⴻⵜⵜⴰ ⵉⴱⴹⴰ ⵍⴻⵊⵔⵓⴼ ⴷⵉ ⵍⴻⵅⵍⴰ,
ⵓⵛⴰ ⵉⵡⵛⴰ ⵉ ⵍⴳⴻⵏⵙ ⴰⴷ ⵉⵙⵓ ⵙ ⵓⴼⴻⵢⵢⴻⴹ,
ⴰⵎⴻⵛⵏⴰⵡ ⵥⴻⴳ ⵡⴰⵎⴰⵏ ⵢⵓⴵⵖⴻⵏ. ■
16 ⵏⴻⵜⵜⴰ ⵉⵊⵊⴰ ⵍⵄⵓⵏⵚⴰⵔⴰⵜ ⴰⴷ ⴼⴻⵢⵢⴹⴻⵏⵜ ⵥⵉ ⵙⵙⴻⴵⴰⵃ,
ⵏⴻⵜⵜⴰ ⵉⵊⵊⴰ ⴰⵎⴰⵏ ⴰⴷ ⵀⵡⴰⵏ ⴰⵎ ⵉⵖⴻⵥⵔⴰⵏ.
17 ⵎⴰⵛⴰ ⵏⵉⵜⵏⵉ ⴰⵔⵏⵉⵏ ⴷⵉ ⴷⴷⵏⵓⴱ ⵏⵙⴻⵏ ⵅⴰⵙ,
ⴰⵔⵏⵉⵏ ⴷⴻⴳ ⵡⴻⵙⵄⴰⵔ ⴷⴻⴳ ⵓⵎⵄⵓⴵⵉ ⵅ ⴽⵓⵍⵛⵉ
ⵓⵎⵉ ⵜⵓⵖⴰ ⴰⵜⴻⵏ ⴷⵉ ⵜⵏⴻⵥⵔⵓⴼⵜ ⵢⵓⵥⵖⴻⵏ.
18 ⵏⵉⵜⵏⵉ ⵊⴰⵔⵔⴱⴻⵏ ⴰⵔⴻⴱⴱⵉ ⴷⴻⴳ ⵡⵓⵍ ⵏⵙⴻⵏ,
ⵓⵎⵉ ⵜⵜⴰⵔⴻⵏ ⵎⴰⵛⵛⴰ ⵖⴰⵔ ⵎⴻⵥⵔⵉ ⵏ ⵍⴻⵄⵎⴰⵔ ⵏⵙⴻⵏ.
19 ⵙⵙⵉⵡⵍⴻⵏ ⴹⵉⴷⴷ ⵉ ⴰⵔⴻⴱⴱⵉ, ⵏⵏⴰⵏ:
“ⵎⴰ ⵉⵥⴻⵎⵎⴰⵔ ⴰⵔⴻⴱⴱⵉ ⴰⴷ ⵉⵙⵙⴻⵡⵊⴻⴷ ⵟⵟⴰⴱⵍⴰ ⴷⵉ ⵍⴻⵅⵍⴰ? ■
20 ⵅⵥⴰⵔ, ⵏⴻⵜⵜⴰ ⵉⵡⵜⴰ ⴷⵉ ⵜⴻⵚⴹⴰⵔⵜ,
ⴰⵍⴰⵎⵉ ⴷⴷ-ⵓⵥⵥⵍⴻⵏ ⵥⵥⴰⵢⴻⵙ ⵡⴰⵎⴰⵏ ⴷ ⵉⵖⴻⵥⵔⴰⵏ.
ⵎⴰ ⵉⵥⴻⵎⵎⴰⵔ ⵏⴻⵜⵜⴰ ⴰⴷ ⵉⵡⵛ ⴰⵖⵔⵓⵎ,
ⵏⵉⵖ ⵉⵙⵙⴻⵡⵊⴻⴷ ⴰⵢⵙⵓⵎ ⵉ ⵍⴳⴻⵏⵙ ⵏⵏⴻⵙ?” ■
21 ⵙ ⵓⵢⴻⵏⵏⵉ ⵉⵙⵍⴰ ⵙⵉⴷⵉ ⵓⵛⴰ ⵉⴼⴼⵓⴳⴻⵎ.
ⵜⵉⵎⴻⵙⵙⵉ ⵜⴰⵔⵖⴰ ⴹⵉⴷⴷ ⵉ ⵢⴰⵄⵇⵓⴱ,
ⵉⴽⴽⴰⵔ-ⴷⴷ ⵡⴻⵖⴹⴰⴱ ⵏⵏⴻⵙ ⴹⵉⴷⴷ ⵉ ⵉⵙⵔⴰⵉⵍ, ■
22 ⵎⴰⵖⴰⵔ ⵡⴰⵔ ⵜⵜⵛⵉⵍⵉⵏ ⵛⴰ ⵅ ⴰⵔⴻⴱⴱⵉ,
ⵡⴰⵔ ⵓⵎⵉⵏⴻⵏ ⴷⴻⴳ ⵓⵙⴻⵏⵊⴻⵎ ⵏⵏⴻⵙ.
23 ⵏⴻⵜⵜⴰ ⵢⵓⵎⵓⵔ ⵉⵙⴻⵢⵏⵓⵜⴻⵏ ⵙⴻⵏⵏⴻⵊ,
ⵓ ⵢⴰⵔⵥⴻⵎ ⵜⵉⵡⵡⵓⵔⴰ ⵏ ⵓⵊⴻⵏⵏⴰ.
24 ⵉⴼⴰⵔⵔⴻⵖ-ⴷⴷ ⵅⴰⵙⴻⵏ ‘ⵎⴰⵏⵏⴰ’,
ⵉⵡⵛⴰ ⴰⵙⴻⵏ ⵉⵎⴻⵏⴷⵉ ⵥⴻⴳ ⵓⵊⴻⵏⵏⴰ. ■
25 ⵎⴰⵔⵔⴰ ⵛⵛⵉⵏ ⴰⵖⵔⵓⵎ ⵏ ⵢⵉⵏⵏⵉ ⴷⴰⵢⵙⴻⵏ ⵍⵄⴻⵥⵥ.
ⵉⵙⵙⴻⴽⴽ ⴰⵙⴻⵏ ⵎⴰⵛⵛⴰ ⵏⵙⴻⵏ ⵖⴰⵔ ⵡⴻⴱⵔⵉⴷ ⴰⵍⴰⵎⵉ ⵊⵊⵉⵡⵏⴻⵏ. □ ■
26 ⵏⴻⵜⵜⴰ ⵉⴳⴳⴰ ⴰⵙⴻⵎⵎⵉⴹ ⵏ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ ⴰⴷ ⵉⴽⴽⴰⵔ ⴷⴻⴳ ⵓⵊⴻⵏⵏⴰ,
ⵙ ⵜⵥⴻⵎⵎⴰⵔ ⵏⵏⴻⵙ ⵉⵙⵙⴻⴽⴽ-ⴷⴷ ⴰⵙⴻⵎⵎⵉⴹ ⵏ ⵍⵊⴰⵏⵓⴱ. ■
27 ⵉⵊⵊⴰ ⴰⵢⵙⵓⵎ ⴰⴷ ⵅⴰⵙⴻⵏ ⴷⴷ-ⵉⵡⴹⴰ ⴰⵎ ⵡⴻⵏⵥⴰⵔ ⵏ ⵜⵄⴻⵊⵊⴰⵊⵜ,
ⵉⵊⴹⴰⴹ ⵙ ⵡⴰⴼⵔⵉⵡⴻⵏ ⴰⵎ ⵉⵊⴷⵉ ⵏ ⵍⴻⴱⵃⵓⵔ.
28 ⵏⴻⵜⵜⴰ ⵉⵊⵊⴰ ⵉ-ⵜⴻⵏ ⴰⴷ ⵡⴹⴰⵏ ⴷⵉ ⵍⵡⴻⵙⵜ ⵏ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ,
ⵖⴰⵔ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵏ ⵜⵥⴻⴷⴷⵉⵖⵉⵏ ⵏⵙⴻⵏ.
29 ⵏⵉⵜⵏⵉ ⵛⵛⵉⵏ ⵓ ⵊⵊⵉⵡⵏⴻⵏ ⵇⴰⵄ,
ⴽⵙⵉⵏ ⵎⵉⵏ ⴷⵉ ⵜⵓⵖⴰ ⴹⴻⵎⵄⴻⵏ.
30 ⵏⵉⵜⵏⵉ ⵜⵓⵖⴰ ⵄⴰⴷ ⵡⴰⵔ ⵜⵜⵡⴰⴼⴻⴽⴽⴻⵏ ⵥⴻⴳ ⵡⴻⴹⵎⴰⵄ ⵏⵙⴻⵏ,
ⵎⴰⵛⵛⴰ ⵜⵓⵖⴰ ⵄⴰⴷ ⴷⴻⴳ ⵓⵇⴻⵎⵎⵓⵎ ⵏⵙⴻⵏ,
31 ⵓⵎⵉ ⵅⴰⵙⴻⵏ ⵉⴽⴽⴰⵔ ⵡⴻⵖⴹⴰⴱ ⵏ ⴰⵔⴻⴱⴱⵉ.
ⵏⴻⵜⵜⴰ ⵉⵏⵖⴰ ⵥⴻⴳ ⵉⵏⵏⵉ ⵉⴵⴰⵏ ⴷ ⵉⵎⵛⴻⵏⵏⵄⴻⵏ ⵇⴰⵄ ⵊⴰⵔ ⴰⵙⴻⵏ,
ⵢⴰⵔⵔⴰ-ⴷⴷ ⵉⵏⵏⵉ ⵉⵜⵜⵡⴰⴼⴰⵔⵥⴻⵏ ⵥⵉ ⵉⵙⵔⴰⵉⵍ
ⴰⴷ ⴰⴹⴰⵔⴻⵏ ⵖⴰⵔ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ. ■
32 ⵎⴰⵛⴰ ⵇⴰⵄ ⴰⵎⴻⵏⵏⵉ ⴰⵔⵏⵉⵏ ⴳⴳⵉⵏ ⴷⴷⵏⵓⴱ,
ⵡⴰⵔ ⵓⵎⵉⵏⴻⵏ ⴷⵉ ⵍⵎⵓⵄⵊⵉⵥⴰⵜ ⵏⵏⴻⵙ.
33 ⵏⴻⵜⵜⴰ ⵉⵊⵊⴰ ⵓⵙⵙⴰⵏ ⵏⵙⴻⵏ ⴰⴷ ⵄⴷⵓⵏ ⴰⵎ ⵉⵊⵊ ⵏ ⵍⴻⴼⵡⴰⵔ,
ⵉⵙⴻⴳⴳⵯⵓⵙⴰ ⵏⵙⴻⵏ ⴰⵎ ⵉⵛⵜ ⵏ ⵍⵄⵓⵔⵔⴻⵜ.
34 ⵅⵎⵉ ⵜⴻⵏ ⵉ ⵖⴰ ⵉⵏⴻⵖ, ⴰⵔⵥⵓⵏ ⵅ ⴰⵔⴻⴱⴱⵉ,
ⴷⴻⵡⵍⴻⵏ-ⴷⴷ ⵖⴰⵔⴻⵙ, ⴰⵔⵥⵓⵏ ⵅⴰⵙ ⵙ ⵛⴹⴰⵔⴻⵜ.
35 ⵏⵉⵜⵏⵉ ⵄⴻⵇⵍⴻⵏ ⴰⵇⴰ ⴰⵔⴻⴱⴱⵉ ⴷ ⵜⴰⵚⴹⴰⵔⵜ ⵏⵙⴻⵏ,
ⵓ ⴰⵔⴻⴱⴱⵉ, ⴰⵎⵄⵓⴵⵉ ⵅ ⴽⵓⵍⵛⵉ, ⴰⵎⴻⴼⴷⵉ ⵏⵙⴻⵏ. □
36 ⵎⴰⵛⴰ ⵏⵉⵜⵏⵉ ⵙⵙⵏⵉⵄⵎⵉⵍⴻⵏ ⵥⵥⴰⵜⴻⵙ ⵙ ⵓⵇⴻⵎⵎⵓⵎ ⵏⵙⴻⵏ,
ⵙ ⵢⵉⵍⴻⵙ ⵏⵙⴻⵏ ⵙⵙⵅⴰⵔⵔⵉⵇⴻⵏ ⵅⴰⵙ.
37 ⵡⴰⵔ ⵜⵓⵖⵉ ⵓⵍ ⵏⵙⴻⵏ ⵉⵎⵜⴻⵏ ⴰⴽⵉⴷⴻⵙ,
ⵡⴰⵔ ⵓⵢⵓⵔⴻⵏ ⵙ ⵍⵎⴰⵏⴻⵜ ⴰⴽ-ⴷ ⵍⵄⴰⵀⴷ ⵏⵏⴻⵙ.
38 ⵏⴻⵜⵜⴰ ⵎⴰⵛⴰ ⵜⵓⵖⴰ ⵢⴰⵔⴻⵃⵃⴻⵎ ⴷⴰⵢⵙⴻⵏ ⵓ ⵉⴼⴷⴰ ⵍⵎⵓⵄⵚⵉⵢⵢⴻⵜ,
ⵡⴰⵔ ⵢⴰⵔⴻⴷⴷⴻⴵ, ⵎⴰⵛⴰ ⴰⵟⵟⴰⵙ ⵏ ⵜⵡⴰⵍⴰⵡⵉⵏ ⵉⵊⵊⴰ ⵥⴻⴳ ⵡⴻⵖⴹⴰⴱ ⵏⵏⴻⵙ,
ⵓ ⵡⴰⵔ ⵉⵙⵙⴻⴽⴽⴰⵔ ⵎⴰⵔⵔⴰ ⴰⵙⵄⴰⵔ ⵏⵏⴻⵙ.
39 ⵏⴻⵜⵜⴰ ⵉⵄⵇⴻⵍ ⴰⵇⴰ ⵏⵉⵜⵏⵉ ⵎⵖⵉⵔ ⴷ ⴰⵢⵙⵓⵎ ⵡⴰⵀⴰ,
ⴷ ⵉⵊⵊ ⵏ ⵓⵙⴻⵎⵎⵉⴹ ⵉⵄⴻⴷⴷⵓ ⵡⴰⵔ ⴷⴷ-ⵉⵜⵜⵄⵉⵇⵇⵉⴱ.
40 ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ ⵙⵄⴰⵔⴻⵏ ⵜ ⴷⵉ ⵍⴻⵅⵍⴰ,
ⴳⴳⵉⵏ ⴰⵙ ⵍⴻⵃⵔⵉⵇ ⴷⵉ ⵜⵏⴻⵥⵔⵓⴼⵜ!
41 ⵜⵡⴰⵍⴰ ⴰⵡⴰⵔⵏⵉ ⵜⴻⵏⵏⴻⵖⵏⵉⵜ ⵇⴻⴵⴱⴻⵏ ⴰⵔⴻⴱⴱⵉ,
ⴳⴳⵉⵏ ⵍⴻⵃⵔⵉⵇ ⵉ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ.
42 ⵡⴰⵔ ⵅⴰⵔⵔⵚⴻⵏ ⵛⴰ ⵄⴰⴷ ⴷⴻⴳ ⵓⴼⵓⵙ ⵏⵏⴻⵙ,
ⴷⴻⴳ ⵡⴰⵙⵙ ⵏⵏⵉ ⵍⴰⵎⵉ ⵜⴻⵏ ⵉⴼⴷⴰ ⵥⴻⴳ ⵓⴼⵓⵙ ⵏ ⵢⵉⵊⵊⴻⵏ ⵉ-ⵜⴻⵏ ⵉⵃⵚⴰⵔⴻⵏ, □
43 ⴰⵍⴰⵎⵉ ⵉⴳⴳⴰ ⵍⴻⵄⵍⴰⵎⴰⵜ ⴷⵉ ⵎⵉⵚⵔⴰ ,
ⵓⵍⴰ ⴷ ⵍⵎⵓⵄⵊⵉⵥⴰⵜ ⵏⵏⴻⵙ ⴷⴻⴳ ⵉⵢⵢⴰⵔ ⵏ ⵚⵓⵄⴰⵏ,
44 ⴰⵍⴰⵎⵉ ⵉⴳⴳⴰ ⵉⵖⴻⵥⵔⴰⵏ ⵏⵙⴻⵏ ⴰⴷ ⴷⴻⵡⵍⴻⵏ ⴷ ⵉⴷⴰⵎⵎⴻⵏ,
ⵓⵍⴰ ⴷ ⵎⴰⵔⵔⴰ ⵍⵄⵓⵏⵚⴰⵔⴰⵜ ⵏⵙⴻⵏ,
ⵃⵉⵎⴰ ⵏⵉⵜⵏⵉ ⵡⴰⵔ ⵥⴻⵎⵎⴰⵔⴻⵏ ⴰⴷ ⵥⵥⴰⵢⵙⴻⵏ ⵙⵡⴻⵏ ⵄⴰⴷ. ■
45 ⵉⵙⵙⴻⴽⴽ ⵊⴰⵔ ⴰⵙⴻⵏ ⵉⵊⵊ ⵏ ⵡⴻⵢⵍⴰⴼ ⵏ ⵉⴱⴻⵄⵄⴰⵛ ⵉ ⵜⴻⵏ ⵉⵛⵛⴻⵏ,
ⵓⵍⴰ ⴷ ⵉⵇⴰⵔⵇⵔⵉⵡⴻⵏ ⵏⵏⵉ ⵜⴻⵏ ⵉⵜⴻⵃⵃⴰⵏ. ■
46 ⵏⴻⵜⵜⴰ ⵉⵡⵛⴰ ⵍⵖⵉⴵⴻⵜ ⵏⵙⴻⵏ ⵉ ⵜⵎⵓⵖⵔⵉ ⵉⵚⴰⵔⵔⴹⴻⵏ,
ⵓⵍⴰ ⴷ ⵚⵚⴰⴱⴻⵜ ⵏⵙⴻⵏ ⵉ ⵜⵎⵓⵖⵔⵉ. ■
47 ⵉⵏⵖⴰ ⵜⴰⵥⴰⵢⴰⵔⵜ ⵏⵙⴻⵏ ⵙ ⵜⴻⴱⵔⵓⵔⵔⵉ,
ⵓⵍⴰ ⴷ ⵉⵥⴻⵎⵎⵓⵔⴻⵏ ⵏⵙⴻⵏ ⵙ ⵉⴱⵇⵓⵇⴻⵏ ⵉⵎⴻⵇⵇⵔⴰⵏⴻⵏ ⵏ ⵜⴻⴱⵔⵓⵔⵉ. ■
48 ⵏⴻⵜⵜⴰ ⵉⵊⵊⴰ ⵍⵎⴰⵍ ⵏⵙⴻⵏ ⵉ ⵓⴱⵔⵓⵔⵉ,
ⵜⵉⵃⵉⵎⵔⵉⵡⵉⵏ ⵏⵙⴻⵏ ⵉ ⵡⴰⵙⵙⴰⵎⴻⵏ.
49 ⵏⴻⵜⵜⴰ ⵉⵙⵙⴻⴽⴽ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ ⵊⴰⵔ ⴰⵙⴻⵏ,
ⴰⵎⵓⵥⵥⴰⵔ ⴷ ⵜⴻⴼⵇⴻⵃⵜ ⴷ ⵍⵃⴻⵚⵔⴰⵏ,
ⵓⵎⵉ ⴷⴷ-ⵉⵙⵙⴻⴽⴽ ⵍⵎⴰⵍⴰⴽⴰⵜ ⵙ ⵊⵊⵔⴰⵢⴻⵃ.
50 ⵏⴻⵜⵜⴰ ⵉⵙⴻⴳⴳⴻⵎ ⵉⵊⵊ ⵏ ⵓⵎⴻⵙⵔⴰⵇ ⵉ ⵡⴻⵖⴹⴰⴱ ⵏⵏⴻⵙ,
ⵡⴰⵔ ⵉⵙⵙⵄⵉⵥⵥ ⵅ ⵍⴻⵄⵎⴰⵔ ⵏⵙⴻⵏ ⵥⵉ ⵍⵎⴻⵡⵜ,
ⵉⵙⵙⴻⵄⴷⵓ ⵍⵎⴰⵍ ⵏⵙⴻⵏ ⵉ ⵟⵟⴰⵄⵓⵏ. ■
51 ⵏⴻⵜⵜⴰ ⵉⵏⵖⴰ ⵎⴰⵔⵔⴰ ⵉⵎⴻⵏⵥⴰ ⴷⵉ ⵎⵉⵚⵔⴰ,
ⴰⵎⴻⵥⵡⴰⵔⵓ ⵏ ⵜⵥⴻⵎⵎⴰⵔ ⵏ ⵜⴻⵔⵢⴰⵙⵜ ⴷⴻⴳ ⵉⵇⵉⴹⴰⵏ ⵏ ⵃⴰⵎ. ■
52 ⵉⴳⴳⴰ ⵍⴳⴻⵏⵙ ⵏⵏⴻⵙ ⴰⴷ ⵉⵙⵙⴳⴻⵄⵄⴻⴷ ⴰⵎ ⵡⵓⴵⵉ,
ⵉⵙⵙⵇⴻⴱⴱⴻⴹ ⵉ-ⵜⴻⵏ ⴰⵎ ⵉⵛⵜ ⵏ ⵜⵃⵉⵎⴰⵔⵜ ⴷⵉ ⵍⴻⵅⵍⴰ.
53 ⵉⵏⴷⴻⵀ ⵉ-ⵜⴻⵏ ⴷⵉ ⵍⴰⵎⴰⵏ, ⵡⴰⵔ ⴳⴳⵯⵉⴷⴻⵏ ⵡⴰⵍⵓ,
ⵎⴰⵖⴰⵔ ⵍⴻⴱⵃⴰⵔ ⵉⴷⵍⴰ ⵍⵄⴻⴷⵢⴰⵏ ⵏⵙⴻⵏ. ■
54 ⵉⵡⵢⵉ ⵜⴻⵏ ⵖⴰⵔ ⵜⴻⵎⵎⵓⵔⵜ ⵏ ⵣⵥⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ,
ⵖⴰⵔ ⵡⴻⴷⵔⴰⵔ-ⴰ ⵏⵏⵉ ⴷ ⵉⴽⵙⴻⴱ ⵓⴼⵓⵙ ⴰⴼⵓⵙⵉ ⵏⵏⴻⵙ.
55 ⵉⵙⵙⵓⴼⴼⴻⵖ ⵍⴻⴳⵏⵓⵙ ⵥⵥⴰⵜ ⵉ ⵡⵓⴷⴻⵎ ⵏⵙⴻⵏ,
ⵓ ⵉⴳⴳⴰ ⴰⴷ ⴰⵙⴻⵏ ⴷⴷ-ⵜⴻⴽⴽⴰⵔ ⵜⴻⵙⵖⴰⵔⵜ ⵏⵙⴻⵏ ⵙ ⵓⴼⵉⵍⵓ ⵏ ⵍⴻⵄⴱⴰⵔ,
ⵓ ⵉⵙⵙⴻⵥⴷⴻⵖ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ ⴷⴻⴳ ⵉⵇⵉⴹⴰⵏ ⵏⵙⴻⵏ. ■
56 ⵎⴰⵛⴰ ⵏⵉⵜⵏⵉ ⵇⴻⴵⴱⴻⵏ ⵜ ⵓ ⵙⵄⴰⵔⴻⵏ ⴰⵔⴻⴱⴱⵉ, ⴰⵎⵄⵓⴵⵉ ⵅ ⴽⵓⵍⵛⵉ,
ⵡⴰⵔ ⵀⴹⵉⵏ ⵛⵛⵀⴰⴷⴰⵜ ⵏⵏⴻⵙ.
57 ⵏⵉⵜⵏⵉ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ,
ⴳⴳⵉⵏ ⵙ ⵍⴻⵖⴷⴰⵔ ⴰⵎ ⵉⴱⴰⴱⴰⵜⴻⵏ ⵏⵙⴻⵏ.
ⵏⵉⵜⵏⵉ ⵡⴻⴷⴷⴰⵔⴻⵏ ⴰⵎ ⵉⵛⵜ ⵏ ⴼⵍⵉⵜⵛⴰ ⵏ ⵍⵇⴻⵡⵙ ⵉ ⵉⵜⴻⴼⴼⵖⴻⵏ ⵙ ⵍⴻⵅⴷⴻⵄ.
58 ⵙⵄⴰⵔⴻⵏ ⵜ ⵙ ⵍⴻⴳⵄⵓⴷⵉ ⵏⵙⴻⵏ ⵉ ⵅ ⵡⴻⵀⵀⴱⴻⵏ ⵜⵉⵖⴰⵔⵚⴰ,
ⴰⵔⵔⵉⵏ ⵜ ⴰⴷ ⵢⴰⵙⴻⵎ ⵙ ⵍⴻⵅⵢⴰⵍⴰⵜ ⵏⵙⴻⵏ ⵉⵏⴻⵇⵛⴻⵏ ■
59 ⴰⵔⴻⴱⴱⵉ ⵉⵙⵍⴰ ⵎⴰⵏ ⴰⵢⴰ ⵓⵛⴰ ⵉⵜⵜⵡⴰⵙⴰⵔⵖ ⵡⴻⵖⴹⴰⴱ ⵏⵏⴻⵙ,
ⵉⴷⵡⴻⵍ ⵉⵄⵉⴼⴼ ⴰⵟⵟⴰⵙ ⵥⵉ ⵉⵙⵔⴰⵉⵍ.
60 ⵏⴻⵜⵜⴰ ⵉⵊⵊⴰ ⵜⴰⵥⴻⴷⴷⵉⵖⵜ ⵏⵏⴻⵙ ⴷⵉ ⵛⵉⵍⵓ,
ⴰⵇⵉⴹⵓⵏ ⵎⴰⵏⵉ ⵜⵓⵖⴰ ⵉⵥⴻⴷⴷⴻⵖ ⵊⴰⵔ ⵉⵡⴷⴰⵏ.
61 ⵏⴻⵜⵜⴰ ⵢⴰⵔⵔⴰ ⵊⵊⴻⵀⴷ ⵏⵏⴻⵙ ⵖⴰⵔ ⵜⵎⴻⵃⴱⴰⵙⵜ,
ⵓⵍⴰ ⴷ ⵜⴰⵍⵡⵉⵥⵜ ⵏⵏⴻⵙ ⵖⴰⵔ ⵓⴼⵓⵙ ⵏ ⵡⴻⵏⵏⵉ ⵜ ⵉⵃⴻⵚⵚⴰⵔⴻⵏ. ■
62 ⵏⴻⵜⵜⴰ ⵉⵙⴻⵍⵍⴻⵎ ⵍⴳⴻⵏⵙ ⵏⵏⴻⵙ ⵉ ⵙⵙⵉⴼ,
ⵢⴰⵔⵖⴰ ⵡⴻⵖⴹⴰⴱ ⵏⵏⴻⵙ ⵅ ⵜⴻⵙⵖⴰⵔⵜ ⵏⵏⴻⵙ.
63 ⵜⵉⵎⴻⵙⵙⵉ ⵜⴻⵛⵛⴰ ⵉⵃⵓⴷⵔⵉⵢⵢⴻⵏ ⵏⵙⴻⵏ,
ⵜⵉⵄⵥⴰⵔⵉⵢⵢⵉⵏ ⵏⵙⴻⵏ ⵡⴰⵔ ⵅⴰⵙⴻⵏⵜ ⴷⴷ-ⵉⵡⵢⴻⵏ ⵉⵖⴻⵏⵏⵉⵊⴻⵏ.
64 ⵉⴽⴻⵀⵀⴰⵏⴻⵏ ⵏⵙⴻⵏ ⵡⴹⴰⵏ ⵙ ⵙⵙⵉⴼ,
ⵓ ⵜⵉⵊⵊⴰⵍ ⵏⵙⴻⵏ ⵡⴰⵔ ⵔⵓⵏⵜ ⵛⴰ. ■
65 ⵅⴻⵏⵏⵉ ⵉⴼⴰⵇ-ⴷⴷ ⵙⵉⴷⵉ ⵉⵏⵓ ⴰⵎⴻⵛⵏⴰⵡ ⵛⴰ ⵏ ⵉⵊⵊ ⵉ ⵜⵓⵖⴰ ⵉⵟⵟⵚⴻⵏ,
ⴰⵎⴻⵛⵏⴰⵡ ⵉⵊⵊ ⵏ ⴱⵓ-ⵜⴻⵖⵔⵓⴹⵜ ⵏⵏⵉ ⵉⵙⵖⵓⵢⵢⵓ ⵥⵉ ⴱⵉⵏⵓ.
66 ⵏⴻⵜⵜⴰ ⵉⵡⵜⴰ ⵡⴻⵏⵏⵉ ⵜ ⵉⵃⴻⵚⵚⴰⵔⴻⵏ ⵖⴰⵔ ⴹⴻⴼⴼⴰⵔ,
ⵉⴳⴳⴰ ⴷⴰⵢⵙⴻⵏ ⵍⴻⴼⴹⵉⵃⴻⵜ ⵉ ⵍⴻⴱⴷⴰ. ■
67 ⴰⵇⵉⴹⵓⵏ ⵏ ⵢⵓⵙⵓⴼ ⵉⵏⴹⴰⵔ ⵉ-ⵜ,
ⵜⴰⵇⴱⵉⵞ ⵏ ⵉⴼⵔⴰⵢⵉⵎ ⵡⴰⵔ ⵜⵜ ⵉⴼⴰⵔⵥ.
68 ⵉⴼⴰⵔⵥ ⵜⴰⵇⴱⵉⵞ ⵏ ⵢⴰⵀⵓⴷⴰ,
ⴰⴷⵔⴰⵔ ⵏ ⵚⵉⵀⵢⵓⵏ ⵡⴻⵏⵏⵉ ⵜⵓⵖⴰ ⵉⵜⵜⴻⵅⵙ.
69 ⵉⴱⵏⴰ ⵣⵥⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ ⴰⵎ ⵉⵊⴻⵏⵡⴰⵏ ⵢⵓⵄⵍⴰⵏ,
ⴰⵎ ⵜⴻⵎⵎⵓⵔⵜ ⵏⵏⵉ ⵉⵙⵙⴻⵎⵜⴻⵏ ⵉ ⵍⴻⴱⴷⴰ.
70 ⵉⴼⴰⵔⵥ ⴰⵎⵙⴻⵅⵅⴰⵔ ⵏⵏⴻⵙ ⴷⴰⵡⵓⴷ,
ⵉⴽⵙⵉ ⵜ ⵥⵉ ⵍⴽⵓⵔⵉⵜ ⵏ ⵡⵓⴵⵉ. ■
71 ⵉⵊⵊⴰ ⵉ-ⵜ ⴰⴷ ⴷⴷ-ⵢⴰⵙ ⵥⵉ ⵖⴰⵔ ⴹⴻⴼⴼⴰⵔ ⵏ ⵡⵓⴵⵉ,
ⵎⴰⵃⴻⵏⴷ ⴰⴷ ⵢⴰⵔⵡⴻⵙ ⵢⴰⵄⵇⵓⴱ, ⵍⴳⴻⵏⵙ ⵏⵏⴻⵙ,
ⵓⵍⴰ ⴷ ⵉⵙⵔⴰⵉⵍ, ⵍⵡⴰⵔⵜ ⵏⵏⴻⵙ. ■
72 ⵏⴻⵜⵜⴰ ⵢⴰⵔⵡⴻⵙ ⵉ-ⵜⴻⵏ ⵄⵍⴰⵃⵙⴰⴱ ⵍⴻⵚⴼⴰⵢⴻⵜ ⵏ ⵡⵓⵍ ⵏⵏⴻⵙ,
ⵉⴳⴻⵡⵡⴻⴷ ⵉ-ⵜⴻⵏ ⵙ ⵓⴼⵓⵙ ⵉⵥⴻⵎⵎⴰⵔⴻⵏ.