75
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ‘ⵡⴰⵔ ⵜⵜⴰⵔⴻⴷⴷⴻⴵ!’ ⴰⵥⴻⵀⵀⴻⴷ ⵏ ⴰⵙⴰⴼ. ⵉⵥⵍⵉ. 2 ⵏⴻⵛⵛⵉⵏ ⵏⴻⵜⵜⵇⴰⴷⴰ ⵛⴻⴽ, ⴰ ⴰⵔⴻⴱⴱⵉ, ⵏⴻⵜⵜⵇⴰⴷⴰ!
ⴰⵇⴰ ⵉⵙⴻⵎ ⵏⵏⴻⴽ ⵢⵓⴷⴻⵙ, ⴰⵇⴰ ⵍⵎⵓⵄⵊⵉⵥⴰⵜ ⵏⵏⴻⴽ ⵙⵙⴰⵡⴰⵍⴻⵏ ⵅ ⵎⴰⵏ ⴰⵢⴰ.
3 ⵎⴰⵖⴰⵔ ⵏⴻⵛⵛ ⴰⴷ ⵟⵟⴼⴻⵖ ⵍⵃⴰⵍ ⵉⵜⵜⵡⴰⴳⴳⴻⵏ,
ⴰⴷ ⴳⴳⴻⵖ ⵛⵛⵔⴻⵄ ⵙ ⵍⵃⴻⵇⵇ.
4 ⵜⴰⵎⵎⵓⵔⵜ ⴰⴽ-ⴷ ⵎⴰⵔⵔⴰ ⵉⵎⴻⵥⴷⴰⵖ ⵏⵏⴻⵙ ⴼⴻⵙⵢⴻⵏ,
ⵎⴰⵛⴰ ⵏⴻⵛⵛ ⵙⵙⵎⴻⵜⵜⵏⴻⵖ ⵉⴱⵉⵍⴰⵔⴻⵏ ⵏⵏⴻⵙ. ⵙⵉⵍⴰⵀ.
5 ⵏⴻⵛⵛ ⵏⵏⵉⵖ ⵉ ⵉⴱⵓⵀⴰⵍⵉⵢⵢⴻⵏ: “ⵡⴰⵔ ⵜⵜⴻⴳⴳⵯⴻⴷⴻⵎ ⵛⴰ!”,
ⵉ ⵉⵄⴻⴼⴼⴰⵏⴻⵏ: “ⵡⴰⵔ ⵙⵙⴳⴻⵄⵄⴰⴷⴻⵎ ⵉⵛⵛ ⵏⵡⴻⵎ!
6 ⵡⴰⵔ ⵙⵙⴳⴻⵄⵄⴰⴷⴻⵎ ⵉⵛⵛ ⵏⵡⴻⵎ ⴰⵎⵎⵓ ⵙⴻⵏⵏⴻⵊ,
ⵡⴰⵔ ⵙⵙⴰⵡⴰⵍⴻⵎ ⵙ ⵏⵏⴼⴰⵅⴻⵜ!”
7 ⵎⴰⵖⴰⵔ ⴰⵙⴳⴻⵄⵄⴻⴷ ⵡⴰⵔ ⴷⴷ-ⵉⵜⵜⴰⵙ ⵥⵉ ⵛⵛⴰⵔⵇ,
ⵏⵉⵖ ⵥⵉ ⵍⵖⴰⵔⴱ ⵓⵍⴰ ⵥⵉ ⵍⴻⵅⵍⴰ. □
8 ⵎⴰⵖⴰⵔ ⴰⵔⴻⴱⴱⵉ ⴷ ⵍⵇⴰⴹⵉ.
ⵏⴻⵜⵜⴰ ⵉⵙⵙⴻⵀⴻⴽⴽⵯⴰ ⵉⵊⵊⴻⵏ ⵓ ⵉⵙⵙⴳⴻⵄⵄⴰⴷ ⵡⴻⵏⵏⴻⵖⵏⵉ.
9 ⵎⴰⵖⴰⵔ ⴰⵇⴰ ⴷⵉⵏ ⵉⵊⵊ ⵏ ⵍⴽⴰⵙ ⴷⴻⴳ ⵓⴼⵓⵙ ⵏ ⵙⵉⴷⵉ,
ⴱⵉⵏⵓ ⵉⵜⵜⴻⴳⴳ ⴽⵓⴼⴼⵓ, ⵉⵜⵜⵡⴰⵅⴻⴵⴰⴹ ⵎⴰⵔⵔⴰ.
ⵏⴻⵜⵜⴰ ⵉⵜⵜⴽⴻⴱⴱⴰ ⵥⵥⴰⵢⴻⵙ.
ⵎⴰⵔⵔⴰ ⵉⵄⴻⴼⴼⴰⵏⴻⵏ ⵏ ⵜⴻⵎⵎⵓⵔⵜ ⴰⴷ ⵥⴻⵎⵎⴻⵏ ⵓⵍⴰ ⴷ ⵍⴻⵅⵎⵉⵔⴰ ⵏⵏⴻⵙ ⵓⵎⵉ ⵥⵥⴰⵢⴻⵙ ⵉ ⵖⴰ ⵙⵡⴻⵏ.
10 ⵏⴻⵛⵛ ⴰⴷ ⵜ ⴱⴰⵔⵔⵃⴻⵖ ⵉ ⵍⴻⴱⴷⴰ ⵇⴰⵄ,
ⴰⴷ ⵥⴻⵀⵀⴷⴻⵖ ⵉ ⴰⵔⴻⴱⴱⵉ ⵏ ⵢⴰⵄⵇⵓⴱ.
11 ⵏⴻⵛⵛ ⴰⴷ ⵥⴻⴷⵎⴻⵖ ⵎⴰⵔⵔⴰ ⴰⵛⵛⴰⵡⴻⵏ ⵏ ⵉⵄⴻⴼⴼⴰⵏⴻⵏ,
ⴰⵛⵛⴰⵡⴻⵏ ⵏ ⵉⵎⵙⴻⴳⴳⴰⴷⴻⵏ ⴰⴷ ⵜⵜⵡⴰⵙⴳⴻⵄⵄⴷⴻⵏ.