ⴰⴷⵍⵉⵙ ⵡⵉⵙⵙ ⵜⵍⴰⵜⴰ: ⵉⵣⴻⵀⵀⵉⴷⴻⵏ 73-89
73
1 ⴰⵥⴻⵀⵀⴻⴷ ⵏ ⴰⵙⴰⴼ. ⵡⴰⵀ, ⴰⵔⴻⴱⴱⵉ ⴷ ⴰⵚⴻⴱⵃⴰⵏ ⵉ ⵉⵙⵔⴰⵉⵍ, ⵉ ⵢⴻⵏⵏⵉ ⵙ ⵡⵓⵍ ⵉⵚⴼⴰⵏ.
2 ⵏⴻⵛⵛ ⵎⴰⵛⴰ, ⵄⵍⴰⵃⴰⵍ ⵜⵓⵖⴰ ⵉⴹⴰⵔⴻⵏ ⵉⵏⵓ ⴼⴼⵖⴻⵏ ⵥⴻⴳ ⵡⴻⴱⵔⵉⴷ,
ⵡⴰⵔ ⵉⵇⵇⵉⵎ ⵡⴰⵍⵓ ⴰⴷ ⵃⵍⵓⴵⴹⴻⵏ ⵉⵚⵓⵔⴰⴼ ⵉⵏⵓ.
3 ⵎⴰⵖⴰⵔ ⵜⵓⵖⴰ ⵓⵙⵎⴻⵖ ⵥⴻⴳ ⵉⴱⵓⵀⴰⵍⵉⵢⵢⴻⵏ,
ⵍⴰⵎⵉ ⵥⵔⵉⵖ ⴰⵇⴰ ⵉⵄⴻⴼⴼⴰⵏⴻⵏ ⵎⵍⵉⵃ ⵉ ⴵⴰⵏ. ■
4 ⵎⴰⵖⴰⵔ ⵡⴰⵔ ⴷⵉⵏ ⴱⵓ ⵉⵛⴻⴷⴷⵉⵢⴻⵏ ⵖⴰⵔ ⵍⵎⴻⵡⵜ ⵏⵙⴻⵏ,
ⵓ ⵚⵚⵓⵍⵟⴰ ⵏⵙⴻⵏ ⴰⵇⴰ ⵉⴱⴻⴷⴷ ⵏⵉⵛⴰⵏ.
5 ⵏⵉⵜⵏⵉ ⵡⴰⵔ ⵛⴰⵔⵔⵛⴻⵏ ⴷⴻⴳ ⵡⴰⵔⴱⴻⵔ ⵏ ⵉⵡⴷⴰⵏ,
ⵡⴰⵔ ⵜⵜⵡⴰⵍⴻⵇⵇⴼⴻⵏ ⴰⵎ ⵡⴻⵥⵢⴻⵏ ⴰⵎⴻⵇⵇⵔⴰⵏ ⵏ ⴱⵏⴰⴷⴻⵎ.
6 ⵙ ⵓⵢⴻⵏⵏⵉ ⵜᵉⵜⵜⴰⵢⴻⵍ ⴰⵙⴻⵏ-ⴷⴷ ⵏⵏⴼⴰⵅⴻⵜ ⴰⵎ ⵜⵙⴻⴷⴷⴻⵛⵜ ⵖⴰⵔ ⵢⵉⵔⵉ ⵏⵙⴻⵏ,
ⵓⵛⴰ ⵉⵍⴻⵃⵃⴻⴼ ⴰⵙⴻⵏ ⵍⵄⵓⵏⴼ ⴰⵎ ⵉⵊⵊ ⵏ ⵡⴰⵔⵔⵓⴹ.
7 ⵜⵉⵟⵟⴰⵡⵉⵏ ⵏⵙⴻⵏ ⵜⵜⵡⴰⴼⴼⵖⴻⵏⵜ ⵥⵉ ⵜⴰⴷⵓⵏⵜ,
ⵄⴻⴷⴷⵓⵏ ⵍⴻⵅⵢⴰⵍⴰⵜ ⵏ ⵡⵓⵍ ⵏⵙⴻⵏ.
8 ⵏⵉⵜⵏⵉ ⵙⵜⴻⵀⵥⴰⵏ ⵓ ⵙ ⴱⵟⴰⵢⵟⴰⵢ ⵙⵙⴰⵡⴰⵍⴻⵏ ⵅ ⵍⵖⴰⵔ, ⵅ ⴷⴷⴻⴵ,
ⴰⵇⴰ ⵙⵙⴰⵡⴰⵍⴻⵏ-ⴷⴷ ⵥⵉ ⵙⴻⵏⵏⴻⵊ.
9 ⵏⵉⵜⵏⵉ ⴰⵔⴻⵥⵥⵎⴻⵏ ⵓⵇⴻⵎⵎⵓⵎ ⵏⵙⴻⵏ ⵅ ⵓⵊⴻⵏⵏⴰ,
ⵍⵀⴰⵔⴷ ⵏⵙⴻⵏ ⵉⴳⴳⵓⵔ ⵅ ⵜⴻⵎⵎⵓⵔⵜ.
10 ⵙ ⵓⵢⴰ ⵉⵏⵏⴻⵇⵍⴻⴱ ⵍⴳⴻⵏⵙ ⵏⵙⴻⵏ ⵖⴰⵔ ⴷⴰ,
ⴰⵎⴰⵏ ⵉⴼⴻⵢⵢⴹⴻⵏ ⵜⵜⵙⴻⴽⴽⴰⴼⴻⵏ ⵜⴻⵏ ⵏⵉⵜⵏⵉ.
11 ⵇⵇⴰⵔⴻⵏ: “ⵎⴰⵎⵎⴻⵛ ⵉ ⵖⴰ ⵉⵙⵙⴻⵏ ⴰⵔⴻⴱⴱⵉ ⵎⴰⵏ ⴰⵢⴰ?”
“ⵎⴰ ⴰⵇⴰ ⴷⵉⵏ ⵜⵓⵙⵙⵏⴰ ⵅ ⵎⴰⵏ ⴰⵢⴰ ⵖⴰⵔ ⵓⵎⵄⵓⴵⵉ ⵅ ⴽⵓⵍⵛⵉ?”
12 ⵅⵥⴰⵔ, ⴰⵇⴰ ⴰⵜⴻⵏ ⴷ ⵉⵄⴻⴼⴼⴰⵏⴻⵏ!
ⵄⴰⴷ ⴷⴷⴰⵔⴻⵏ ⵍⴻⴱⴷⴰ ⴷⵉ ⵍⵀⵓⴷⵏⴻⵜ,
ⵓ ⵙⵙⵡⴻⵙⵄⴻⵏ ⴰⴳⵍⴰ ⵏⵙⴻⵏ.
13 ⵙ ⵜⵉⴷⴻⵜⵜ, ⴰⵎⴻⵏⵏⵉ ⵡⴰⵀⴰ ⵙⵙⵉⵥⴻⴷⴳⴻⵖ ⵓⵍ ⵉⵏⵓ,
ⵓ ⵙⵙⵉⵔⴷⴻⵖ ⵉⴼⴰⵙⵙⴻⵏ ⵉⵏⵓ ⴷⵉ ⵜⴰⵥⴷⵓⴳⵉ.
14 ⴰⵙⵙ ⴰⵎ ⵉⵎⵓⵏ ⵏⴻⵛⵛ ⵜⵉⵢⵢⵉⵜⴰ ⴷⴰⵢⵉ,
ⴽⵓⵍ ⵚⵚⴱⴻⵃ ⵜᵉⵜⵜⵡⴰⵔⴻⴱⴱⵉⵖ.
15 ⵎⴰⵍⴰ ⵏⵏⵉⵖ: “ⴰⴷ ⵙⵙⵉⵡⵍⴻⵖ ⵜⴰ ⴷ ⵜⴰ!”,
ⵅⵥⴰⵔ, ⵉⵍⵉ ⵖⴷⴰⵔⴻⵖ ⵊⵊⵉⵍ ⵏ ⵉⵃⴻⵏⵊⵉⵔⴻⵏ ⵏⵏⴻⴽ.
16 ⵉⵜⵜⵍⵉⵖ ⴰⵢⵉ ⵥⴻⵎⵎⴰⵔⴻⵖ ⴰⴷ ⴼⴻⵀⵎⴻⵖ ⴰⵢⴰ,
ⵎⴰⵛⴰ ⴷⵉ ⵜⵉⵟⵟⴰⵡⵉⵏ ⵉⵏⵓ ⵉⵜⵜⴰⵡⵉ-ⴷⴷ ⵎⵖⵉⵔ ⵜⴰⵎⴰⵔⴰ ⵉⴱⴻⵟⵟⵍⴻⵏ,
17 ⵖⴰⵔⴻⵙ ⴰⵍⴰⵎⵉ ⵓⴷⴼⴻⵖ ⵖⴰⵔ ⵜⵥⴰⵡⵉⵢⵢⵉⵏ ⵉⵇⴻⴷⴷⵙⴻⵏ ⵏ ⴰⵔⴻⴱⴱⵉ,
ⵓ ⴼⴻⵀⵎⴻⵖ ⵜⴰⵏⴻⴳⴳⴰⵔⵓⵜ ⵏⵙⴻⵏ.
18 ⵡⴰⵀ, ⵛⴻⴽ ⵜⴻⵙⵙⵔⵓⵙⵉⴷ ⵜⴻⵏ ⵅ ⵉⵎⵓⵛⴰⵏ ⵉⵜⵜⴻⵃⵔⵓⴵⵓⴹⴻⵏ,
ⵛⴻⴽ ⵜⵖⴻⵟⵟⵍⴻⴷ ⵜⴻⵏ ⴷ ⵍⵅⵉⵔⴱⴰⵜ.
19 ⵎⴰⵎⵎⴻⵛ ⴷⴻⵡⵍⴻⵏ ⵜⵜⵡⴰⵔⴻⴷⴷⴵⴻⵏ ⴷⴻⴳ ⵉⵛⵜ ⵏ ⵜⴻⵛⵜⵉ,
ⵜⵜⵡⴰⵎⵃⴰⵏ ⵓ ⵜⵜⵡⴰⵇⴹⴰⵏ ⵙ ⵉⵛⴻⵍⵡⴰⵡⴻⵏ ⵉⵙⵙⴰⴳⴳⵯⴰⴷⴻⵏ.
20 ⴰⵎ ⵜⴰⵔⵊⵉⵜ ⵖⴰⵔ ⵓⴼⴰⵇⵉ, ⴰ ⵙⵉⴷⵉ ⵉⵏⵓ,
ⴰⵎⵎⵓ ⵉ ⵖⴰ ⵜⴻⵙⵙⴻⵃⵇⴰⵔⴻⴷ ⴰⴱⴻⵢⵢⴻⵏ ⵏ ⵍⴻⵅⵢⴰⵍ ⵏⵙⴻⵏ ⵅⵎⵉ ⴷⴷ ⵖⴰ ⵜⴼⴰⵇⴻⴷ.
21 ⵎⴰⵖⴰⵔ ⵓⵍ ⵉⵏⵓ ⵜⵓⵖⴰ ⵉⵜⵜⵡⴰⵙⴰⵔⵥⴻⴳ ⴷⵉ ⵍⵡⴻⵇⵜ ⵏⵏⵉ,
ⵉⵜⵜⴻⵊⵊⵓ ⴰⵢⵉ ⵍⴻⵃⵔⵉⵇ ⴷⵉ ⵜⵉⵥⵥⴰⵍ ⵉⵏⵓ. □
22 ⵏⴻⵛⵛ ⵜⵓⵖⴰ ⴰⵢⵉ ⴷ ⴰⵇⴻⴼⴼⵓⵃ,
ⵜⵓⵖⴰ ⴰⵢⵉ ⴰⵎ ⵉⵊⵊ ⵏ ⵍⵡⴻⵃⵛ ⴰⵎⴻⵇⵇⵔⴰⵏ ⵖⴰⵔⴻⴽ.
23 ⵄⴰⴷ ⵎⴰⵛⴰ ⵍⴻⴱⴷⴰ ⴰⵇⴰ ⴰⵢⵉ ⵖⴰⵔⴻⴽ,
ⵛⴻⴽ ⵜᵉⵟⵟⴼⴻⴷ ⴰⵢⵉ ⵥⴻⴳ ⵓⴼⵓⵙ ⴰⴼⵓⵙⵉ ⵉⵏⵓ.
24 ⵛⴻⴽ ⴰⴷ ⴰⵢⵉ ⵜⴳⴻⵡⵡⴷⴻⴷ ⵙ ⵛⵛⵡⴰⵔ ⵏⵏⴻⴽ,
ⵓ ⴰⵡⴰⵔⵏⵉ ⵎⴰⵏ ⴰⵢⴰ ⴰⴷ ⴰⵢⵉ ⵜⴻⴽⵙⵉⴷ ⵖⴰⵔ ⵓⵄⵓⴵⵉ ⵏⵏⴻⴽ.
25 ⵎⴰⵏ ⵡⴻⵏ ⵉ ⵖⴰⵔⵉ ⴷⴻⴳ ⵓⵊⴻⵏⵏⴰ ⵃⴰⵛⴰ ⵛⴻⴽ?
ⴰⴽⵉⴷⴻⴽ ⵡⴰⵔ ⵜⵥⴻⵎⵎⴰⵔ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⴷⵉ ⵜⴻⵎⵎⵓⵔⵜ ⴰⴷ ⴰⵢⵉ ⵜⴰⵔⴹⴰ.
26 ⵎⴰⵍⴰ ⴰⵔⵔⵉⵎⴻⵜ ⴷ ⵡⵓⵍ ⵉⵏⵓ ⵙⴻⵎⵎⵃⴻⵏ ⴷⴰⵢⵉ,
ⵅⴻⵏⵏⵉ ⴰⵔⴻⴱⴱⵉ ⴷ ⵜⴰⵚⴹⴰⵔⵜ ⵏ ⵡⵓⵍ ⵉⵏⵓ ⴷ ⵜⴰⵙⵖⴰⵔⵜ ⵉⵏⵓ ⵉ ⵍⴻⴱⴷⴰ.
27 ⵎⴰⵖⴰⵔ ⵅⵥⴰⵔ, ⵉⵏⵏⵉ ⵥⵥⴰⵢⴻⴽ ⵉⵜⵜⴻⴳⴳⵯⴻⵊⴻⵏ, ⴰⴷ ⴼⵏⴰⵏ.
ⴽⵓⵍ ⵉⵊⵊ ⵡⴻⵏⵏⵉ ⵅⴰⴽ ⵉⵜⵜⵃⴻⵢⵢⴰⴷⴻⵏ ⴰⵎ ⵉ ⵖⴰ ⵉⵙⵙⴻⴼⵙⴻⴷ ⵉⵅⴻⴼ ⵏⵏⴻⵙ,
ⴰⴷ ⵜ ⵜⴽⴻⵃⵃⴻⴹⴻⴷ.
28 ⵏⴻⵛⵛ ⵎⴰⵛⴰ, ⵍⴷⴰⵙⴻⵜ ⵉ ⴰⵔⴻⴱⴱⵉ ⴷ ⵎⵍⵉⵃ ⵉ ⵏⴻⵛⵛ.
ⵏⴻⵛⵛ ⴳⴳⵉⵖ ⵙⵉⴷⵉ ⵉⵏⵓ, ⵙⵉⴷⵉ, ⴷ ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ,
ⵃⵉⵎⴰ ⴰⴷ ⴱⴰⵔⵔⵃⴻⵖ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⴽ.