72
1 ⵉ ⵙⵓⵍⵉⵎⴰⵏ. ⴰ ⴰⵔⴻⴱⴱⵉ, ⴻⵡⵛ ⵉ ⵓⵊⴻⴵⵉⴷ ⵎⴰⵃⴻⵏⴷ ⴰⴷ ⵉⵃⴽⴻⵎ ⵄⵍⴰⵃⵙⴰⴱ ⵍⵃⴻⵇⵇ ⵏⵏⴻⴽ,
ⵓ ⴻⵡⵛ ⵜⴰⵙⴻⴳⴷⴰ ⵏⵏⴻⴽ ⵉ ⵎⵎⵉⵙ ⵏ ⵓⵊⴻⴵⵉⴷ.
2 ⵅⴻⵏⵏⵉ ⵏⴻⵜⵜⴰ ⴰⴷ ⵉⵃⴰⴽⴻⵎ ⵍⴳⴻⵏⵙ ⵏⵏⴻⴽ ⵙ ⵜⵙⴻⴳⴷⴰ,
ⵍⵎⵓⵙⴰⴽⵉⵏ ⵏⵏⴻⴽ ⵙ ⵍⵃⴻⵇⵇ.
3 ⵉⴷⵓⵔⴰⵔ ⴰⴷ ⵉⵡⵢⴻⵏ ⵍⴻⵀⵏⴰ ⵉ ⵍⴳⴻⵏⵙ,
ⵓⵍⴰ ⴷ ⵜⵉⵡⵔⵉⵔⵉⵏ ⵙ ⵜⵙⴻⴳⴷⴰ.
4 ⵏⴻⵜⵜⴰ ⴰⴷ ⵢⴰⵖ ⵉ ⵜⴻⵙⵖⴰⵔⵜ ⵏ ⵍⵎⵓⵙⴰⴽⵉⵏ ⵏ ⵍⴳⴻⵏⵙ,
ⴰⴷ ⵉⵙⵙⴻⵏⵊⴻⵎ ⵜⴰⵔⵡⴰ ⵏ ⵉⵎⴻⵥⵍⴰⴹ,
ⵓ ⴰⴷ ⵉⵍⴱⴻⵥ ⵡⴻⵏⵏⵉ ⵜⴻⵏ ⵉⵃⴻⵚⵚⴰⵔⴻⵏ.
5 ⵏⵉⵜⵏⵉ ⴰⴷ ⵥⵥⴰⵢⴻⴽ ⴳⴳⵯⴻⴷⴻⵏ ⵎⵉⵏ ⵖⴰ ⵜⴻⴽⴽ ⵜⴼⵓⵛⵜ ⵜⴻⴵⴰ,
ⵓ ⵜⴰⵥⵉⵔⵉ ⴰⴷ ⵜⴻⵙⵙⵛⴻⵏ ⵓⴷⴻⵎ ⵏⵏⴻⵙ, ⵥⵉ ⵊⵊⵉⵍ ⴰⵍ ⵊⵊⵉⵍ. ■
6 ⵏⴻⵜⵜⴰ ⴰⴷ ⴷⴷ-ⵉⵀⵡⴰ ⵅ ⴰⵔⵔⴱⵉⵄ ⵉⵡⴻⵊⴷⴻⵏ ⵉ ⵡⴻⵃⵜⴰⵛ,
ⴰⵎ ⵜⵉⵏⴻⵛⵏⴰⵛⵉⵏ ⵉⵙⵙⴰⵔⴹⴰⴱⴻⵏ ⵜⴰⵎⵎⵓⵔⵜ. ■
7 ⴷⴻⴳ ⵡⵓⵙⵙⴰⵏ ⵏⵏⴻⵙ ⴰⴷ ⵉⵏⵏⵓⵡⴰⵔ ⵓⵎⵙⴻⴳⴳⴻⴷ,
ⴰⴷ ⴷⵉⵏ ⵢⵉⵍⵉ ⵍⴻⵀⵏⴰ ⵉⴼⴻⵢⵢⴹⴻⵏ ⴰⵍ ⵖⴰ ⵜⴰⴼⴻⴷ ⵜⴰⵥⵉⵔⵉ ⵡⴰⵔ ⵜⴻⴵⵉ ⵄⴰⴷ.
8 ⵏⴻⵜⵜⴰ ⴰⴷ ⵉⵃⴽⴻⵎ ⵥⵉ ⵍⴻⴱⵃⴰⵔ ⴰⵍ ⵍⴻⴱⵃⴰⵔ,
ⵥⴻⴳ ⵉⵖⵥⴰⵔ ⵏ ⵍⴼⵓⵔⴰⵟ ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ.
9 ⵉⵎⴻⵥⴷⴰⵖ ⵏ ⵍⴻⵅⵍⴰ ⴰⴷ ⵇⵇⵓⵏⵊⴻⵍⴻⵏ ⵥⵥⴰⵜⴻⵙ,
ⵎⴰⵛⴰ ⵍⵄⴻⴷⵢⴰⵏ ⵏⵏⴻⵙ ⴰⴷ ⵍⴻⵙⵃⴻⵏ ⵓⵛⴰⵍ.
10 ⵉⵊⴻⴵⵉⴷⴻⵏ ⵏ ⵜⴰⵔⵛⵉⵛ ⴰⴷ ⴷⴷ-ⵉⵡⵢⴻⵏ ⵉⵛⵜ ⵏ ⵜⴻⵡⵀⵉⴱⵜ,
ⵉⵊⴻⴵⵉⴷⴻⵏ ⵏ ⵛⴰⴱⴰ ⴷ ⵙⴰⴱⴰ ⴰⴷ ⴷⴷ-ⵇⴰⵔⵔⴱⴻⵏ ⵜⴰⵔⵥⴻⴼⵉⵏ.
11 ⵎⴰⵔⵔⴰ ⵉⵊⴻⴵⵉⴷⴻⵏ ⴰⴷ ⴰⵙ ⴰⴹⴰⵔⴻⵏ,
ⵎⴰⵔⵔⴰ ⵍⴻⴳⵏⵓⵙ ⴰⴷ ⴰⵙ ⵙⴻⵅⵅⴰⵔⴻⵏ.
12 ⵎⴰⵖⴰⵔ ⵏⴻⵜⵜⴰ ⴰⴷ ⵉⴼⴻⴽⴽ ⴰⵎⴻⵥⵍⵓⴹ ⵡⴻⵏⵏⵉ ⵖⴰⵔⴻⵙ ⵉⵜⵜⵍⴰⵖⴰⵏ,
ⵓⵍⴰ ⴷ ⵍⵎⴻⵙⴽⵉⵏ ⴷ ⵡⴻⵏⵏⵉ ⵡⴰⵔ ⵖⴰⵔⴻⵙ ⴰⵎⵄⴰⵡⴻⵏ. ■
13 ⵏⴻⵜⵜⴰ ⴰⴷ ⵉⵄⵜⴻⵇ ⴰⵎⴰⵔⵅⵓ ⴷ ⵓⵎⴻⵥⵍⵓⴹ,
ⵏⴻⵜⵜⴰ ⴰⴷ ⵉⵙⵙⴻⵏⵊⴻⵎ ⵍⴻⵄⵎⴰⵔ ⵏ ⵉⵎⴻⵥⵍⴰⴹ. □
14 ⵏⴻⵜⵜⴰ ⴰⴷ ⵉⴼⴻⴽⴽ ⵍⴻⵄⵎⵓⵔ ⵏⵙⴻⵏ ⵥⵉ ⴷⴷⴻⴵ ⴷ ⵍⵄⵓⵏⴼ,
ⵉⴷⴰⵎⵎⴻⵏ ⵏⵙⴻⵏ ⴰⴷ ⵙⴻⴽⴽⵡⴰⵏ ⴰⵟⵟⴰⵙ ⴷⵉ ⵜⵉⵟⵟⴰⵡⵉⵏ ⵏⵏⴻⵙ.
15 ⵏⴻⵜⵜⴰ ⴰⴷ ⵉⴷⴷⴰⵔ ⵓ ⴰⴷ ⴰⵙ ⵉⵎⵎⴻⵡⵛ ⵡⵓⵔⴻⵖ ⵥⵉ ⵛⴰⴱⴰ.
ⵓ ⵡⴰⵏⵉⵜⴰ ⴰⴷ ⵉⵥⵥⴰⴵ ⵍⴻⴱⴷⴰ ⴷⵉ ⵟⵟⵡⴻⵄ ⵏⵏⴻⵙ,
ⴰⵙⵙ ⵎⴰⵔⵔⴰ ⴰⴷ ⵜ ⵉⴱⴰⵔⴻⴽ.
16 ⴰⴷ ⵢⵉⵍⵉ ⵉⵊⵊ ⵏ ⵓⴼⴻⵢⵢⴻⴹ ⵏ ⵉⵎⴻⵏⴷⵉ ⴷⵉ ⵜⴻⵎⵎⵓⵔⵜ ⵅ ⵜⵇⵉⵛⵛⴰⵜ ⵏ ⵉⴷⵓⵔⴰⵔ,
ⵍⵖⵉⴵⴻⵜ ⵏⵏⴻⵙ ⴰⴷ ⵜⴻⵏⵀⴻⵥⵥ ⴰⵎ ⵜⵛⴻⵊⵊⵓⵔⴰ ⵏ ⵍⵓⴱⵏⴰⵏ,
ⵓ ⵉⵏⵏⵉ ⵥⵉ ⵜⴻⵏⴷⵉⵏⵜ ⴰⴷ ⵏⵏⵓⵡⴰⵔⴻⵏ ⴰⵎ ⴰⵖⴻⵎⵎⵓⵢ ⴰⵥⵉⵥⴰ ⴷⵉ ⵜⴻⵎⵎⵓⵔⵜ.
17 ⵉⵙⴻⵎ ⵏⵏⴻⵙ ⴰⴷ ⵉⵇⵇⵉⵎ ⵉ ⵍⴻⴱⴷⴰ,
ⵉⵍⵉ ⴰⴷ ⵉⵏⵏⵓⵡⴰⵔ ⵉⵙⴻⵎ ⵏⵏⴻⵙ ⵥⵥⴰⵜ ⵉ ⵡⵓⴷⴻⵎ ⵏ ⵜⴼⵓⵛⵜ.
ⴰⴷ ⴷⴰⵢⴻⵙ ⵜⵜⵡⴰⴱⴰⵔⴽⴻⵏ ⵏⵉⵜⵏⵉ,
ⵎⴰⵔⵔⴰ ⵍⴻⴳⵏⵓⵙ ⴰⴷ ⵜ ⵙⵙⴻⵎⵖⴰⵔⴻⵏ.
18 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⴰⵔⴻⴱⴱⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ.
ⵏⴻⵜⵜⴰ ⵉⵜⵜⴻⴳⴳ ⵍⵎⵓⵄⵊⵉⵥⴰⵜ, ⵏⴻⵜⵜⴰ ⵡⴰⵀⴰ.
19 ⴰⴷ ⵉⵜⵜⵡⴰⴱⴰⵔⴻⴽ ⵉⵙⴻⵎ ⵏ ⵓⵄⵓⴵⵉ ⵏⵏⴻⵙ ⵉ ⵍⴻⴱⴷⴰ.
ⴰⴷ ⵜᵉⵜⵜⵡⴰⵛⵛⵓⵔ ⵎⴰⵔⵔⴰ ⵜⴰⵎⵎⵓⵔⵜ ⵙ ⵓⵄⵓⴵⵉ ⵏⵏⴻⵙ. ⴰⵎⵉⵏ, ⵡⴰⵀ, ⴰⵎⵉⵏ.
20 ⵜⵉⵥⵉⴵⴰⵜⵉⵏ ⵏ ⴷⴰⵡⵓⴷ, ⵎⵎⵉⵙ ⵏ ⵢⴰⵙⵙⴰ, ⴰⵇⴰ ⴽⴻⵎⵎⵍⴻⵏⵜ.