71
1 ⵏⴻⵛⵛ ⵜⵜⵛⴰⵍⴻⵖ ⵅⴰⴽ, ⴰ ⵙⵉⴷⵉ, ⴻⵊⵊ ⴰⵢⵉ ⵄⴻⵎⵎⴰⵔⵚ ⵡⴰⵔ ⵜⵜⵙⴻⴹⵃⵉⵖ ⵉ ⵍⴻⴱⴷⴰ. ■
2 ⴼⴻⴽⴽ ⴰⵢⵉ ⵙ ⵜⵙⴻⴳⴷⴰ ⵏⵏⴻⴽ ⵓ ⴰⵔⵅⵓ ⴰⵢⵉ.
ⴰⵔⵔ-ⴷⴷ ⵖⴰⵔⵉ ⴰⵎⴻⵥⵥⵓⵖ ⵏⵏⴻⴽ ⵓ ⵙⴻⵏⵊⴻⵎ ⴰⵢⵉ.
3 ⵉⵍⵉ ⴷ ⵉⵛⵜ ⵏ ⵜⴻⵚⴹⴰⵔⵜ ⵉ ⵜⵥⴻⴷⴷⵉⵖⵜ ⵉ ⵏⴻⵛⵛ,
ⵃⵉⵎⴰ ⴰⴷ ⵖⴰⵔⴻⵙ ⴷⴷ-ⴰⵙⴻⵖ ⵍⴻⴱⴷⴰ.
ⵛⴻⴽ ⵜⵡⴻⵚⵚⵉⴷ ⵃⵉⵎⴰ ⴰⴷ ⵜⵜⵡⴰⵙⵏⴻⵊⵎⴻⵖ,
ⵎⴰⵖⴰⵔ ⵛⴻⴽ ⴷ ⵊⵊⴰⵔⴼ ⵉⵏⵓ ⴷ ⵍⴱⵓⵔⵊ ⵉⵏⵓ.
4 ⴰⵔⴻⴱⴱⵉ ⵉⵏⵓ, ⵙⴻⵏⵊⴻⵎ ⴰⵢⵉ ⵥⴻⴳ ⵓⴼⵓⵙ ⵏ ⵓⵄⴻⴼⴼⴰⵏ,
ⵥⴻⴳ ⵓⴼⵓⵙ ⵏ ⵎⵎⵉⵙ ⵏ ⵍⵎⵓⵄⵚⵉⵢⵢⴻⵜ ⵓ ⵥⵉ ⴱⵓ-ⵖⴻⵥⵥⵓ.
5 ⵎⴰⵖⴰⵔ ⵛⴻⴽ ⴷ ⴰⵙⵉⵜⴻⵎ ⵉⵏⵓ, ⵙⵉⴷⵉ ⵉⵏⵓ, ⵙⵉⴷⵉ,
ⵛⴻⴽ ⴷ ⴰⵜⴻⵛⵍⵉ ⵉⵏⵓ ⵥⵉ ⵜⴻⵎⵥⵉ ⵉⵏⵓ.
6 ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ, ⵜⵓⵖⴰ ⴰⵢⵉ ⵄⴻⵎⵎⴷⴻⵖ ⵅⴰⴽ,
ⵥⴻⴳ ⵡⴰⵎⵉ ⴷⴷ-ⴼⴼⵖⴻⵖ ⵥⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ,
ⴰⵇⴰ ⵛⴻⴽ ⴷ ⴰⵎⵄⴰⵡⴻⵏ ⵉⵏⵓ, ⵏⴻⵛⵛ ⵚⴻⴱⵃⴻⵖ ⵛⴻⴽ ⵍⴻⴱⴷⴰ.
7 ⵉ ⵡⴰⵟⵟⴰⵙ ⵏⴻⵛⵛ ⴰⵎ ⵉⵛⵜ ⵏ ⵍⴻⵄⵍⴰⵎⴻⵜ,
ⵎⴰⵛⴰ ⵛⴻⴽ ⴷ ⴰⵎⵛⴰⵏ ⵉⵏⵓ ⵉⵊⵀⴻⴷ ⵉ ⵜⴰⵔⴻⵡⵍⴰ.
8 ⴻⵊⵊ ⴰⵇⴻⵎⵎⵓⵎ ⵉⵏⵓ ⴰⴷ ⵉⵛⵛⵓⵔ ⵙ ⵓⵚⴻⴱⴱⴻⵃ ⵏⵏⴻⴽ,
ⴰⵙⵙ ⵉⵎⵓⵏ ⵙ ⵛⵛⴰⵏ ⵏⵏⴻⴽ.
9 ⵡⴰⵔ ⵅⴰⴼⵉ ⵜⵜⵎⴻⵏⴹⴰⵔ ⴷⴻⴳ ⵡⵓⵙⵙⴰⵏ ⵏ ⵜⴻⵡⵙⴰⵔ ⵉⵏⵓ,
ⵡⴰⵔ ⴷ ⴰⵢⵉ ⵙⴻⵎⵎⴻⵃ ⵎⴰⵍⴰ ⵊⵊⴻⵀⴷ ⵉⵏⵓ ⵉⵔⵓⵃ. □
10 ⵎⴰⵖⴰⵔ ⵍⵄⴻⴷⵢⴰⵏ ⵉⵏⵓ ⵙⵙⴰⵡⴰⵍⴻⵏ ⵅⴰⴼⵉ,
ⵉⵏⵏⵉ ⵢⴰⵔⴻⵥⵥⵓⵏ ⵍⴻⵄⵎⴰⵔ ⵉⵏⵓ, ⵎⵛⴰⵡⴰⵔⴻⵏ ⵊⵎⵉⵄ.
11 ⵏⵉⵜⵏⵉ ⵇⵇⴰⵔⴻⵏ: “ⴰⵔⴻⴱⴱⵉ ⵉⵙⵎⴻⵃ ⴷⴰⵢⴻⵙ.
ⴹⴼⴰⵔⴻⵎ ⵜ ⵓ ⵎⴻⵏⵄⴻⵎ ⵜ, ⵎⴰⵖⴰⵔ ⵡⴰⵔ ⴷⵉⵏ ⴱⵓ ⵓⵎⵙⴻⵏⵊⴻⵎ.”
12 ⴰ ⴰⵔⴻⴱⴱⵉ, ⵡⴰⵔ ⵜⵜⵖⵉⵎⵉ ⵜⵉⴳⴳⵯⴻⵊⴻⴷ ⵅⴰⴼⵉ,
ⴰ ⴰⵔⴻⴱⴱⵉ ⵉⵏⵓ, ⴻⵡⵛ ⴰⵢⵉ ⴷⴻⵖⵢⴰ ⴰⴼⵓⵙ.
13 ⴻⵊⵊ ⵉⵖⵔⵉⵎⴻⵏ ⵏ ⵜⵓⴷⴰⵔⵜ ⵉⵏⵓ ⴰⴷ ⵜⵜⵡⴰⵙⴻⴹⵃⴰⵏ ⵓ ⴰⴷ ⵜⵜⵡⴰⵛⵛⴻⵏ,
ⴻⵊⵊ ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴰⵢⵉ ⴳⴳⴻⵏ ⵍⵖⴰⵔ ⴰⴷ ⵜⵜⵡⴰⴷⵍⴻⵏ ⵙ ⵓⵙⴻⵃⵇⴰⵔ ⴷ ⵍⴻⴼⴹⵉⵃⴻⵜ. ■
14 ⵏⴻⵛⵛ ⵎⴰⵛⴰ ⴰⴷ ⵇⵇⵉⵎⴻⵖ ⵜⵜⵔⴰⵊⵉⵖ ⵍⴻⴱⴷⴰ,
ⵓ ⴰⴷ ⴰⵔⵏⵉⵖ ⵄⴰⴷ ⵖⴰⵔ ⵓⵚⴻⴱⴱⴻⵃ ⵏⵏⴻⴽ.
15 ⴰⵇⴻⵎⵎⵓⵎ ⵉⵏⵓ ⴰⴷ ⵉⴱⴰⵔⵔⴻⵃ ⵙ ⵜⵙⴻⴳⴷⴰ ⵏⵏⴻⴽ,
ⴰⵙⴻⵏⵊⴻⵎ ⵏⵏⴻⴽ, ⴰⵙⵙ ⵉⵎⵓⵏ,
ⵎⴰⵖⴰⵔ ⵡⴰⵔ ⵙⵙⵉⵏⴻⵖ ⵍⵇⴻⴷⴷ ⵏⵏⴻⵙ.
16 ⵏⴻⵛⵛ ⴰⴷ ⴷⴷ-ⴰⵙⴻⵖ ⵙ ⵜⵎⴻⴳⴳⴰ ⵜⵉⵎⴻⵇⵇⵔⴰⵏⵉⵏ ⵏ ⵙⵉⴷⵉ ⵉⵏⵓ, ⵙⵉⴷⵉ,
ⴰⴷ ⵉⴷⴰⵔⴻⵖ ⵜⴰⵙⴻⴳⴷⴰ ⵏⵏⴻⴽ, ⵎⵖⵉⵔ ⵜⴻⵏⵏⵉ ⵏⵏⴻⴽ ⵡⴰⵀⴰ.
17 ⴰ ⴰⵔⴻⴱⴱⵉ, ⵛⴻⴽ ⵜⵓⵖⴰ ⵜⴻⵙⵙⴻⵍⵎⴰⴷⴻⴷ ⴰⵢⵉ ⵥⵉ ⵜⴻⵎⵥⵉ ⵉⵏⵓ,
ⵓ ⵏⴻⵛⵛ ⵖⴰⵔⴻⵙ ⴰⵍ ⴰⵙⵙ-ⴰ ⵜⵜⴱⴰⵔⵔⵃⴻⵖ ⵙ ⵍⵎⵓⵄⵊⵉⵥⴰⵜ ⵏⵏⴻⴽ.
18 ⴰ ⴰⵔⴻⴱⴱⵉ, ⵡⴰⵔ ⴷ ⴰⵢⵉ ⵙⴻⵎⵎⴻⵃ ⵛⴰ, ⵡⴰⵅⵅⴰ ⵡⵙⴰⵔⴻⵖ ⵛⴰⴱⴻⵖ,
ⴰⵍ ⵉ ⵖⴰ ⵃⴰⵊⵉⵖ ⵉ ⵊⵊⵉⵍ-ⴰ ⵅ ⵜⵎⴻⴳⴳⴰ ⵏ ⵓⴼⵓⵙ ⵏⵏⴻⴽ ⵓⵍⴰ ⵅ ⵜⵎⴻⴳⴳⴰ ⵏⵏⴻⴽ ⵜⵉⵎⴻⵇⵇⵔⴰⵏⵉⵏ,
ⵉ ⵎⴰⵔⵔⴰ ⵎⵉⵏ ⵉ ⴷⴷ ⵖⴰ ⵢⴰⵙⴻⵏ.
19 ⴰ ⴰⵔⴻⴱⴱⵉ, ⵜⴰⵙⴻⴳⴷⴰ ⵏⵏⴻⴽ ⵜⵉⵡⴻⴹ ⵖⴰⵔⴻⵙ ⴰⵍ ⵙⴻⵏⵏⴻⵊ ⵇⴰⵄ,
ⵎⴰⵖⴰⵔ ⵛⴻⴽ ⵜⴻⴳⴳⵉⴷ ⵜⵉⵎⴻⴳⴳⴰ ⵜⵉⵎⴻⵇⵇⵔⴰⵏⵉⵏ!
ⴰ ⴰⵔⴻⴱⴱⵉ, ⵎⴰⵏ ⵡⴻⵏ ⵉⴵⴰⵏ ⴰⵎ ⵛⴻⴽ!
20 ⴰⵇⴰ ⵛⴻⴽ ⵜⴻⵊⵊⵉⴷ ⵜⴻⴽⴽⴰ ⵅⴰⴼⵉ ⴰⵟⵟⴰⵙ ⵏ ⵍⴻⵃⵚⴰⵔⴰⵜ ⴷ ⵍⵖⴰⵔ,
ⵡⴰⵅⵅⴰ ⴰⵎⴻⵏⵏⵉ ⵛⴻⴽ ⴰⴷ ⴰⵢⵉ ⵜⴻⵙⵙⴻⴷⴷⴰⵔⴻⴷ ⵄⴰⵡⴻⴷ,
ⵛⴻⴽ ⴰⴷ ⴰⵢⵉ ⵜⴻⵙⵙⵓⴼⴼⵖⴻⴷ ⵥⴻⴳ ⵡⴰⵎⴰⵏ ⵢⵓⴵⵖⴻⵏ ⵏ ⵜⴻⵎⵎⵓⵔⵜ.
21 ⵛⴻⴽ ⴰⴷ ⵜⴰⵔⵔⵉⴷ ⵍⴻⵎⵖⴰⵔⴻⵜ ⵉⵏⵓ ⴰⴷ ⵜⴻⵎⵖⴰⵔ,
ⴰⴷ ⴰⵢⵉ ⴷⴷ-ⵜⴻⵏⵏⴹⴻⴷ ⵙ ⵓⴼⴻⵡⵡⴻⵊ ⵏⵏⴻⴽ.
22 ⴰⴷ ⵛⴻⴽ ⵇⴰⴷⵉⵖ ⵄⴰⵡⴻⴷ ⵙ ⵍⵀⴰⵔⴱⴰ, ⵅ ⵍⴰⵎⴰⵏ ⵏⵏⴻⴽ, ⴰ ⴰⵔⴻⴱⴱⵉ.
ⴰⴷ ⵛⴻⴽ ⵥⴻⵀⵀⴷⴻⵖ ⵙ ⵍⴳⴰⵎⴱⵔⵉ, ⴰ ⴰⵎⵇⴻⴷⴷⴰⵙ ⵏ ⵉⵙⵔⴰⵉⵍ.
23 ⵉⵢⴻⵏⵛⵉⵛⴻⵏ ⵉⵏⵓ ⴰⴷ ⵙⵍⵉⵡⵍⴻⵡⴻⵏ, ⴰⵇⴰ ⴰⴷ ⵥⴻⵀⵀⴷⴻⵖ ⵉ ⵛⴻⴽ,
ⵓⵍⴰ ⴷ ⵍⴻⵄⵎⴰⵔ ⵉⵏⵓ ⵏⵏⵉ ⵜⴻⴼⴷⵉⴷ ⵛⴻⴽ.
24 ⵓⵍⴰ ⴷ ⵉⵍⴻⵙ ⵉⵏⵓ ⴰⴷ ⵉⵃⴰⵊⴰ ⵅ ⵜⵙⴻⴳⴷⴰ ⵏⵏⴻⴽ ⴰⵙⵙ ⵎⴰⵔⵔⴰ,
ⵎⴰⵖⴰⵔ ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴰⵢⵉ ⴳⴳⴻⵏ ⵍⵖⴰⵔ, ⵙⵙⵏⵓⴼⴰⵔⴻⵏ ⵉⵅⴻⴼ ⵏⵙⴻⵏ,
ⵉⵡⴰ, ⵜⵜⵡⴰⴼⴻⴹⵃⴻⵏ.