69
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ‘ⵜⵍⵉⵍⵍⵉⵛⵉⵏ’. ⵏ ⴷⴰⵡⵓⴷ. □ 2 ⵙⴻⵏⵊⴻⵎ ⴰⵢⵉ, ⴰ ⴰⵔⴻⴱⴱⵉ, ⵎⴰⵖⴰⵔ ⴰⵎⴰⵏ ⵉⵡⴹⴻⵏ ⴰⵢⵉ ⵖⴰⵔ ⵍⴻⵄⵎⴰⵔ ⵉⵏⵓ.
3 ⵏⴻⵛⵛ ⵖⴻⴱⴱⵉⵖ ⴷⴻⴳ ⵓⴱⴰⵔⵢⵓⴹ ⵢⵓⴵⴻⵖ, ⵡⴰⵔ ⴷⵉⵏ ⵎⴰⵏⵉ ⵉ ⵖⴰ ⴱⴻⴷⴷⴻⵖ.
ⴰⵇⴰ-ⵢⵉ ⴷⴻⴳ ⵡⴰⵎⴰⵏ ⵢⵓⴵⵖⴻⵏ ⵓ ⵍⵃⴻⵎⵍⴻⵜ ⵜᵉⵜⵜⴰⵥⵥⴻⵍ ⵅⴰⴼⵉ.
4 ⵏⴻⵛⵛ ⵓⵃⵍⴻⵖ ⵙ ⵉⵖⵓⵢⵢⴰⵏ, ⵜⵎⵉⵊⵊⴰ ⵉⵏⵓ ⵜⴻⴱⴱⵓⵢⴱⴻⵃ,
ⵜⵉⵟⵟⴰⵡⵉⵏ ⵉⵏⵓ ⵇⴹⴰⵏⵜ ⵥⴻⴳ ⵓⵔⴰⵊⵉ ⵅ ⴰⵔⴻⴱⴱⵉ ⵉⵏⵓ.
5 ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⵅ ⵡⴰⵍⵓ ⵜⵜⵡⴻⵙⵄⴻⵏ ⵅ ⵓⵛⴻⵡⵡⴰⴼ ⵉ ⵉⴵⴰⵏ ⵅ ⵓⵥⴻⴵⵉⴼ ⵉⵏⵓ.
ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴰⵢⵉ ⴰⵔⴻⴷⴷⴵⴻⵏ, ⵍⵄⴻⴷⵢⴰⵏ ⵉⵏⵓ ⵉ ⵅⴰⴼⵉ ⵉⵙⵙⵅⴰⵔⵔⵉⵇⴻⵏ, ⴷⴻⵡⵍⴻⵏ ⵊⴻⵀⵀⴷⴻⵏ.
ⵎⵉⵏ ⵡⴰⵔ ⵓⵛⴰⵔⴻⵖ, ⵉⵜⵜⵅⴻⵚⵚⴰ ⴰⵢⵉ ⴰⴷ ⵜⵜ-ⵉ-ⴷⴷ ⴰⵔⵔⴻⵖ ⵄⴰⴷ.
6 ⴰ ⴰⵔⴻⴱⴱⵉ, ⵛⴻⴽ ⵜⴻⵙⵙⵏⴻⴷ ⵜⵓⴱⴱⵓⵀⴻⵍⵢⴰ ⵉⵏⵓ,
ⵉⵎⴻⵔⵡⵓⵙⴰ ⵏ ⴷⴷⵏⵓⴱ ⵉⵏⵓ ⵡⴰⵔ ⵅⴰⴽ ⴼⴼⴰⵔⴻⵏ.
7 ⴻⵊⵊ ⵉⵏⵏⵉ ⵅⴰⴽ ⵉⵙⵙⵉⵜⵉⵎⴻⵏ, ⵡⴰⵔ ⵜⵜⵙⴻⴹⵃⵉⵏ,
ⴰ ⵙⵉⴷⵉ ⵉⵏⵓ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ,
ⴻⵊⵊ ⵉⵏⵏⵉ ⵅⴰⴽ ⵢⴰⵔⴻⵥⵥⵓⵏ, ⵡⴰⵔ ⵥⵥⴰⵢⵉ ⵜⵜⵡⴰⴼⴻⵟⵟⵃⴻⵏ,
ⴰ ⴰⵔⴻⴱⴱⵉ ⵏ ⵉⵙⵔⴰⵉⵍ.
8 ⵎⴰⵖⴰⵔ ⴷⵉ ⵟⵟⵡⴻⵄ ⵏⵏⴻⴽ ⵉ ⴽⴻⵙⵙⵉⵖ ⴰⵙⴻⵃⵇⴰⵔ,
ⴰⵙⴻⴹⵃⵉ ⵉⵍⴻⵃⵃⴻⴼ ⵉ ⵓⵖⴻⵎⴱⵓⴱ ⵉⵏⵓ.
9 ⴷⴻⵡⵍⴻⵖ ⴷ ⴰⵖⵔⵉⴱ ⵖⴰⵔ ⴰⵢⵜⵎⴰ,
ⵉ ⵉⵃⴻⵏⵊⵉⵔⴻⵏ ⵏ ⵢⴻⵎⵎⴰ ⴷⴻⵡⵍⴻⵖ ⴷ ⴰⴱⴰⵔⵔⴰⵏⵉ.
10 ⵎⴰⵖⴰⵔ ⵛⴹⴰⵔⴻⵜ ⵉ ⵜⴰⴷⴷⴰⵔⵜ ⵏⵏⴻⴽ ⵜⴻⵛⵛⴰ ⴰⵢⵉ,
ⴰⵙⴻⵃⵇⴰⵔ ⵏ ⵢⵉⵏⵏⵉ ⵛⴻⴽ ⵉⵙⵙⴻⵃⵇⴰⵔⴰⵏ ⵉⵡⴹⴰ-ⴷⴷ ⵅⴰⴼⵉ. ■
11 ⵏⴻⵛⵛ ⵔⵓⵖ ⵖⴰⵔ ⵓⵥⵓⵎⵎⵉ ⵏ ⵍⴻⵄⵎⴰⵔ ⵉⵏⵓ,
ⵎⴰⵛⴰ ⴰⵢⴰ ⵢⵉⵡⵉ ⴰⵢⵉ-ⴷⴷ ⵄⵍⴰⵎ ⴽⵓⵍ ⴰⵙⴻⵃⵇⴰⵔ.
12 ⵏⴻⵛⵛ ⵢⴰⵔⴹⴻⵖ ⵉⵛⵜ ⵏ ⵜⵅⴰⵏⵛⴻⵜ ⵏ ⵡⴻⵛⴹⴰⵏ,
ⵎⴰⵛⴰ ⴷⴻⵡⵍⴻⵖ ⴰⵙⴻⵏ ⴷ ⵉⵊⵊ ⵏ ⵍⵎⴰⵜⴰⵍ.
13 ⵉⵏⵏⵉ ⵉⵇⵇⵉⵎⴻⵏ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⵙⵙⴰⵡⴰⵍⴻⵏ ⵅⴰⴼⵉ,
ⵓⵍⴰ ⴷ ⵉⵥⵍⴰⵏ ⵏ ⵢⵉⵏⵏⵉ ⵉⵙⵙⴻⵙⵙⴻⵏ ⵛⵛⵔⴰⴱ.
14 ⵏⴻⵛⵛ ⵎⴰⵛⴰ ⵜⵜᵉⵜⵜⴰⵔⵖ ⵖⴰⵔⴻⴽ, ⴰ ⵙⵉⴷⵉ!
ⴰⵇⴰ ⴷⵉⵏ ⵉⵊⵊ ⵏ ⵍⵡⴻⵇⵜ ⵏ ⵓⵃⵉⵏⵏⵉ, ⴰ ⴰⵔⴻⴱⴱⵉ,
ⵙ ⵍⴻⵎⵖⴰⵔⴻⵜ ⵏ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ.
ⴰⵔⵔ-ⴷⴷ ⵅⴰⴼⵉ ⵙ ⵓⵙⴻⵏⵊⴻⵎ ⵏⵏⴻⴽ ⵉ ⴷⴷ-ⵉⴼⴼⵖⴻⵏ ⵥⵉ ⵍⵎⴰⵏⴻⵜ ⵏⵏⴻⴽ.
15 ⵊⴱⴻⴷ ⴰⵢⵉ-ⴷⴷ ⵥⴻⴳ ⵓⴱⴰⵔⵢⵓⴹ ⵓ ⴻⵊⵊ ⴰⵢⵉ ⵡⴰⵔ ⵜⵜⵖⴻⴱⴱⵉⵖ,
ⵃⵉⵎⴰ ⴰⴷ ⵜⵜⵡⴰⴼⴻⴽⴽⴻⵖ ⵥⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⵓ ⵥⴻⴳ ⵡⴰⵎⴰⵏ ⵢⵓⴵⵖⴻⵏ.
16 ⵡⴰⵔ ⵜⵜⴻⵊⵊⵉ ⴰⴷ ⴰⵢⵉ ⵜⴰⵡⵉ ⵍⵃⴻⵎⵍⴻⵜ,
ⵡⴰⵔ ⵜⵜⴻⵊⵊⵉ ⵍⴰⴵⴰⵖ ⴰⴷ ⴰⵢⵉ ⵉⵙⴰⵔⴹ,
ⵓⵛⴰ ⴰⵏⵓ ⴰⴷ ⵅⴰⴼⵉ ⵉⴱⴻⵍⵍⴻⵄ ⴰⵇⴻⵎⵎⵓⵎ ⵏⵏⴻⵙ.
17 ⴰⵔⵔ ⴰⵢⵉ-ⴷⴷ, ⴰ ⵙⵉⴷⵉ, ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⵜⴻⵚⴱⴻⵃ.
ⵇⵍⴻⴱ ⵖⴰⵔⵉ ⵄⵍⴰⵃⵚⴰⴱ ⴰⵔⵔⴻⵃⵎⴻⵜ ⵏⵏⴻⴽ ⵉⴼⴻⵢⵢⴹⴻⵏ.
18 ⵡⴰⵔ ⵜⵜⴻⴼⴼⴰⵔ ⵛⴰ ⵓⴷⴻⵎ ⵏⵏⴻⴽ ⵅ ⵓⵎⵙⴻⵅⵅⴰⵔ ⵏⵏⴻⴽ,
ⵎⴰⵖⴰⵔ ⵜⵜⵡⴰⵃⵚⴰⵔⴻⵖ.
ⴰⵔⵔ ⴰⵢⵉ-ⴷⴷ ⴷⴰⵡⴻⵃⴷⴰ.
19 ⴰⴷⴻⵙ ⴰⵢⵉ-ⴷⴷ ⵖⴰⵔ ⵍⴻⵄⵎⴰⵔ ⵉⵏⵓ, ⴼⴻⴽⴽ ⵉ-ⵜ.
ⴼⴷⵉ ⴰⵢⵉ ⴷⵉ ⵙⵙⵉⴱⴱⴻⵜ ⵏ ⵍⵄⴻⴷⵢⴰⵏ ⵉⵏⵓ.
20 ⵛⴻⴽ ⵜⴻⵙⵙⵏⴻⴷ ⵍⵄⴰⵔ ⵉⵏⵓ ⴷ ⵓⵙⴻⴹⵃⵉ ⵉⵏⵓ ⴷ ⵍⴻⴼⴹⵉⵃⴻⵜ ⵉⵏⵓ,
ⴰⵇⴰ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⴱⴻⴷⴷⴻⵏ ⵥⵥⴰⵜⴻⴽ.
21 ⴰⵙⴻⵃⵇⴰⵔ ⵢⴰⵔⵥ ⴰⵢⵉ ⵓⵍ ⵓ ⵏⴻⵛⵛ ⵇⴻⵏⴹⴻⵖ ⴰⵟⵟⴰⵙ.
ⵏⴻⵛⵛ ⵔⴰⵊⵉⵖ ⴰⵥⵉⴵⴻⵥ, ⵎⴰⵛⴰ ⵡⴰⵍⵓ, ⵓ ⵔⴰⵊⵉⵖ ⵉⵏⵏⵉ ⴷ ⴰⵢⵉ ⵖⴰ ⵉⵄⴻⵥⵥⴰⵏ,
ⵎⴰⵛⴰ ⵡⴰⵔ ⵓⴼⵉⵖ ⵓⵍⴰ ⴷ ⵉⵊⵊⴻⵏ.
22 ⵏⵉⵜⵏⵉ ⴳⴳⵉⵏ ⵙⵙⴻⵎ ⴷⵉ ⵎⴰⵛⵛⴰ ⵉⵏⵓ,
ⵓ ⵉ ⵓⴼⴰⴷⵉ ⵉⵏⵓ ⴳⴳⵉⵏ ⴰⵢⵉ ⴰⴷ ⵙⵡⴻⵖ ⵍⵅⴻⴵ. ■
23 ⴻⵊⵊ ⵟⵟⴰⴱⵍⴰ ⵏⵙⴻⵏ ⴰⴷ ⵜⴻⴷⵡⴻⵍ ⴷ ⵍⴼⴻⵅ,
ⵓⵍⴰ ⴷ ⵜⴰⵅⵛⴻⴼⵜ ⵉ ⵢⴻⵏⵏⵉ ⴰⴽⵉⴷⵙⴻⵏ ⵉⴱⴻⴷⴷⴻⵏ. ■
24 ⵙⴷⴰⵔⵖⴻⵍ ⵜⵉⵟⵟⴰⵡⵉⵏ ⵏⵙⴻⵏ ⵃⵉⵎⴰ ⵡⴰⵔ ⵜⵜⵡⵉⵍⵉⵏ ⵄⴰⴷ,
ⴰⵔⵔ ⵜⵉⵊⵄⵉⵏⵏⴰⵜⵉⵏ ⵏⵙⴻⵏ ⴰⴷ ⵜⵜⴻⵏⵀⴻⵥⵥⴰⵏⵜ ⵍⴻⴱⴷⴰ.■
25 ⵣⴻⴵⴻⵄ ⵅⴰⵙⴻⵏ ⴰⵙⵅⴻⴹ ⵏⵏⴻⴽ,
ⴻⵊⵊ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⴽ ⴰⴷ ⵜⴻⵏ ⵉⵍⵇⴻⴼ.
26 ⴻⵊⵊ ⵍⵎⴰⵔⴳⴻⵃ ⵏ ⵜⵥⴻⴷⴷⵉⵖⵜ ⵏⵙⴻⵏ ⴰⴷ ⵉⴷⵡⴻⵍ ⴷ ⵍⵅⴰⵔⴱⴻⵜ,
ⵎⴰⵃⴻⵏⴷ ⵡⴰⵔ ⴷⴰⵢⴻⵙ ⵉⵥⴻⴷⴷⴻⵖ ⵄⴰⴷ ⵓⵍⴰ ⴷ ⵉⵊⵊⴻⵏ. ■
27 ⵎⴰⵖⴰⵔ ⵏⵉⵜⵏⵉ ⴷⴰⵔⵔⴰⵛⴻⵏ ⵅ ⵡⴻⵔⵢⴰⵥ ⵏⵏⵉ ⵜⵓⵖⴰ ⵜⴻⵡⵜⵉⴷ ⵛⴻⴽ,
ⵓ ⵙ ⵍⵀⴰⵔⴷ ⵏⵙⴻⵏ ⴰⵔⵏⵉⵏ ⵉ ⵍⴻⵃⵔⵉⵇ ⵏ ⵢⵉⵏⵏⵉ ⵥⵥⴰⵢⴻⴽ ⵉⵜⵜⵡⴰⵍⴻⵇⵇⴼⴻⵏ.
28 ⴰⵔⵔ ⴷⴷⴻⵏⴱ ⵅ ⴷⴷⴻⵏⴱ ⵏⵙⴻⵏ,
ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⴷⴷ-ⴰⴷⴼⴻⵏ ⵖⴰⵔ ⵜⵙⴻⴳⴷⴰ ⵏⵏⴻⴽ.
29 ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵎⵃⴰⵏ ⵥⴻⴳ ⵡⴻⴷⵍⵉⵙ ⵏ ⵜⵓⴷⴰⵔⵜ,
ⵓ ⵡⴰⵔ ⵜⵜⵡⴰⵥⴻⵎⵎⴻⵎⴻⵏ ⵛⴰ ⵖⴰⵔ ⵉⵎⵙⴻⴳⴳⴰⴷⴻⵏ.
30 ⵎⴰⵛⴰ ⵏⴻⵛⵛ ⴰⵇⴰ ⴰⵢⵉ ⴷⵉ ⵍⴻⵖⴱⴻⵏ ⵓ ⵇⴻⵏⴹⴻⵖ.
ⵉⵍⵉ ⴰⵙⴻⵏⵊⴻⵎ ⵏⵏⴻⴽ, ⴰ ⴰⵔⴻⴱⴱⵉ, ⴰⴷ ⴰⵢⵉ ⵉⵙⵙⴳⴻⵄⵄⴻⴷ ⵙⴻⵏⵏⴻⵊ.
31 ⵏⴻⵛⵛ ⴰⴷ ⵚⴻⴱⴱⵃⴻⵖ ⵉⵙⴻⵎ ⵏ ⴰⵔⴻⴱⴱⵉ ⵙ ⵢⵉⵊⵊ ⵏ ⵢⴻⵥⵍⵉ,
ⵙ ⵓⵇⴰⴷⵉ ⴰⴷ ⴰⵙ ⵙⵙⴻⵎⵖⴰⵔⴻⵖ.
32 ⴰⵢⴰ ⴰⴷ ⵢⴰⵔⴹⴰ ⵙⵉⴷⵉ ⴽⵜⴰⵔ ⵥⴻⴳ ⵉⵊⵊ ⵏ ⵓⴼⵓⵏⴰⵙ,
ⵥⴻⴳ ⵉⵊⵊ ⵏ ⵓⵢⴻⵏⴷⵓⵥ ⵙ ⵡⴰⵛⵛⴰⵡⴻⵏ ⴷ ⵜⴻⵛⴹⴻⵛⵜ ⵉⵎⵎⵙⴻⴱⴹⴰⵏ.
33 ⵉⵎⵀⵉⵏⴻⵏ ⵉⵏⵏⵉ ⵜⵜ ⵉⵥⵔⵉⵏ, ⴰⴷ ⴼⴰⵔⵃⴻⵏ,
ⵓ ⵉⵏⵏⵉ ⵢⴰⵔⴻⵥⵥⵓⵏ ⵅ ⴰⵔⴻⴱⴱⵉ,
ⴰⵇⴰ ⵓⵍ ⵏⵡⴻⵎ ⴰⴷ ⵉⴷⴷⴰⵔ.
34 ⵎⴰⵖⴰⵔ ⵙⵉⴷⵉ ⵉⵜⵜⴻⵙⵍⴰ ⵖⴰⵔ ⵉⵎⴻⵥⵍⴰⴹ,
ⵡⴰⵔ ⵉⵙⵙⴻⵃⵇⵉⵔⵉ ⵛⴰ ⵉⵎⴻⵃⴱⴰⵙ ⵏⵏⴻⵙ.
35 ⴻⵊⵊ ⵉⵊⴻⵏⵡⴰⵏ ⴷ ⵜⴻⵎⵎⵓⵔⵜ ⴰⴷ ⵜ ⵙⵙⴻⵎⵖⴰⵔⴻⵏ,
ⵍⴻⴱⵃⵓⵔ ⴷ ⵎⴰⵔⵔⴰ ⵎⵉⵏ ⴷⴰⵢⵙⴻⵏ ⵉⵜⵜⴻⵏⵀⴻⵥⵥⴰⵏ.
36 ⵎⴰⵖⴰⵔ ⴰⵔⴻⴱⴱⵉ ⴰⴷ ⵉⵙⵙⴻⵏⵊⴻⵎ ⵚⵉⵀⵢⵓⵏ,
ⴰⴷ ⵉⴱⵏⴰ ⵄⴰⵡⴻⴷ ⵜⵉⵏⴻⴷⴷⴰⵎ ⵏ ⵢⴰⵀⵓⴷⴰ,
ⵓ ⵏⵉⵜⵏⵉ ⴰⴷ ⴷⵉⵏ ⵥⴻⴷⵖⴻⵏ ⵓ ⴰⴷ ⵜⵜ ⵟⵟⴼⴻⵏ ⴷ ⵍⵡⴰⵔⵜ.
37 ⵣⵥⴰⵔⵉⵄⴻⵜ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴰⴷ ⵜⵜ ⵜᵉⵟⵟⴻⴼ ⴷ ⵜⴰⵙⵖⴰⵔⵜ,
ⵉⵏⵏⵉ ⵉⵜⵜⴻⵅⵙⴻⵏ ⵉⵙⴻⵎ ⵏⵏⴻⵙ ⴰⴷ ⴷⴰⵢⴻⵙ ⵥⴻⴷⵖⴻⵏ.