68
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵏ ⴷⴰⵡⵓⴷ. ⴰⵥⴻⵀⵀⴻⴷ. ⵉⵥⵍⵉ. 2 ⴰⵔⴻⴱⴱⵉ ⴰⴷ ⵉⴽⴽⴰⵔ, ⵍⵄⴻⴷⵢⴰⵏ ⵏⵏⴻⵙ ⴰⴷ ⵜⵜⵡⴰⵔⴻⵢⵢⵛⴻⵏ,
ⵉⵏⵏⵉ ⵜ ⵉⵛⴰⵔⵔⵀⴻⵏ ⴰⴷ ⴰⵔⴻⵡⵍⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ. ■
3 ⵛⴻⴽ ⴰⴷ ⵜⴻⵏ ⵜⴻⵙⵙⵉⴳⴳⵯⴻⵊⴻⴷ ⴰⵎ ⴷⴷⴻⵅⵅⴰⵏ ⵉⵟⵟⴰⵡ,
ⴰⵎ ⵛⵛⵎⴻⵄ ⵉⴼⴻⵙⵙⵉ ⴷⵉ ⵜⵎⴻⵙⵙⵉ,
ⴰⵎⵎⵓ ⵉ ⵖⴰ ⴼⵏⴰⵏ ⵉⵄⴻⴼⴼⴰⵏⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ.
4 ⵎⴰⵛⴰ ⵉⵎⵙⴻⴳⴳⴰⴷⴻⵏ ⴰⴷ ⴼⴰⵔⵃⴻⵏ,
ⴰⴷ ⵙⵍⵉⵡⵍⵉⵡⴻⵏ ⵙ ⵍⴻⴼⵔⴰⵃⴻⵜ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ,
ⵓ ⴰⴷ ⵖⴻⴱⴱⴰⵏ ⵍⴻⴼⵔⴰⵃⴻⵜ.
5 ⵖⴻⵏⵏⵊⴻⵎ ⵉ ⴰⵔⴻⴱⴱⵉ, ⵥⴻⵀⵀⴷⴻⵎ ⵉ ⵢⵉⵙⴻⵎ ⵏⵏⴻⵙ,
ⴳⴳⴻⵎ ⵉⵊⵊ ⵏ ⵡⴻⴱⵔⵉⴷ ⵢⵓⵄⵍⴰⵏ ⵉ ⵡⴻⵏⵏⵉ ⵉⵏⴻⴷⴷⵀⴻⵏ ⴷⵉ ⵍⴻⵡⴹⴰ.
ⵙⵉⴷⵉ ⴷ ⵉⵙⴻⵎ ⵏⵏⴻⵙ.
ⵏⴻⴳⵥⴻⵎ ⵙ ⵍⴻⴼⵔⴰⵃⴻⵜ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ.
6 ⴱⴰⴱⴰⵜⵙⴻⵏ ⵏ ⵉⵢⵓⵊⵉⵍⴻⵏ ⴷ ⵍⵇⴰⴹⵉ ⵏ ⵜⵉⵊⵊⴰⵍ,
ⴰⵎⵎⵓ ⵉ ⵢⴻⴵⴰ ⴰⵔⴻⴱⴱⵉ ⴷⵉ ⵜⵥⴻⴷⴷⵉⵖⵜ ⵏⵏⴻⵙ ⵉⵇⴻⴷⴷⵙⴻⵏ, □
7 ⴰⵎⵎⵓ ⵉ ⵢⴻⴵⴰ ⴰⵔⴻⴱⴱⵉ ⵡⴻⵏⵏⵉ ⵉⵙⵙⴻⵥⴷⵖⴻⵏ ⵉⵏⵏⵉ ⵡⴻⵃⵃⴻⴷⵙⴻⵏ
ⴷⴻⴳ ⵉⵛⵜ ⵏ ⵜⵡⴰⵛⵓⵏⵜ,
ⵡⴻⵏⵏⵉ ⵉⵙⵙⵓⴼⴼⵓⵖⴻⵏ ⵉⵎⴻⵃⴱⴰⵙ ⵙ ⵓⴼⵍⴰⵃ,
ⵎⴰⵛⴰ ⵉⵎⵖⴻⵡⵡⴰⵖⴻⵏ ⴰⴷ ⵥⴻⴷⵖⴻⵏ
ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵉⵜⵜⵡⴰⵙⵛⴻⵎⴹⴻⵏ ⵥⵉ ⵜⴼⵓⵛⵜ.
8 ⴰ ⴰⵔⴻⴱⴱⵉ, ⴰⵍⴰⵎⵉ ⵜⵉⵥⵥⴰⵔⴻⴷ ⵥⵥⴰⵜ ⵉ ⵡⵓⴷⴻⵎ ⵏ ⵍⴳⴻⵏⵙ ⵏⵏⴻⴽ,
ⴰⵍⴰⵎⵉ ⵜⵓⵖⴰ ⵜⴻⴳⴳⵓⵔⴻⴷ ⴷⵉ ⵜⵏⴻⵥⵔⵓⴼⵜ, - ⵙⵉⵍⴰⵀ - ,
9 ⵜⴻⵏⵀⴻⵥⵥ ⵜⴻⵎⵎⵓⵔⵜ ⵓⵛⴰ ⵓⵛⵔⵓⵔⴻⵏ ⵉⵊⴻⵏⵡⴰⵏ, ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ,
ⵓⵍⴰ ⴷ ⴰⴷⵔⴰⵔ ⵏ ⵙⵉⵏⴰ ⵉⵏⵀⴻⵥⵥ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ. □ ■
10 ⴰⴽ-ⴷ ⵡⴻⵏⵥⴰⵔ ⵉⴼⵙⵓⵙⴻⵏ, ⵜⵔⵓⵛⵛⴻⴷ ⵜⴰⵎⵎⵓⵔⵜ, ⴰⵢⴰ, ⴰⵔⴻⴱⴱⵉ,
ⵅⵎⵉ ⵉ ⵖⴰ ⵉⵙⵍⴰⵡ ⵍⵡⴰⵔⵜ ⵏⵏⴻⴽ, ⵜⴻⵡⵛⵉⴷ ⴰⵙ ⵛⴻⴽ ⵄⴰⵡⴻⴷ ⵊⵊⴻⵀⴷ.
11 ⵜⴰⵃⵉⵎⴰⵔⵜ ⵏⵏⴻⴽ ⵜⵓⵖⴰ ⵜⵥⴻⴷⴷⴻⵖ ⴷⴰⵢⴻⵙ.
ⵙ ⵜⵛⵓⵏⵉ ⵏⵏⴻⴽ ⵜⴻⵙⵙⵡⴻⵊⴷⴻⴷ ⵜⵜ ⵉ ⵍⵎⴻⵙⴽⵉⵏ, ⴰⵢⴰ, ⴰⵔⴻⴱⴱⵉ! □
12 ⵙⵉⴷⵉ ⵉⵏⵓ ⵉⵡⵛⴰ ⴰⵡⴰⵍ.
ⵜⵉⵎⵖⴰⵔⵉⵏ ⵏⵏⵉ ⴷⴷ-ⵉⵜⵜⴰⵡⵢⴻⵏ ⵍⴻⵅⴱⴰⵔ ⴰⵚⴻⴱⵃⴰⵏ ⵜⵜⴽⴻⵡⵡⵏⴻⵏⵜ ⵉⵊⵊ ⵏ ⵓⴱⴰⵔⵔⵓ ⴰⵎⴻⵇⵇⵔⴰⵏ ⵏ ⵜⵔⴻⵇⵇⴰⵙⵉⵏ.
13 ⵉⵊⴻⴵⵉⴷⴻⵏ ⵏ ⵍⵄⴻⵙⴽⴰⵔⴰⵜ ⵜⵜⵔⴰⴽⴽⵡⴰⵍⴻⵏ, ⴰⵇⴰ ⵜⵜⵔⴰⴽⴽⵡⴰⵍⴻⵏ,
ⵓ ⵜⴻⵏⵏⵉ ⵉⵇⵇⵉⵎⴻⵏ ⴷⵉ ⵜⴰⴷⴷⴰⵔⵜ, ⵜⴱⴻⵟⵟⴰ ⵜⴰⴽⴻⵛⵛⴰⴹⵜ. □
14 ⵅⴻⵏⵏⵉ ⴰⴷ ⵜⴱⵓⵥⵥⵍⴻⵎ ⵊⴰⵔ ⵜⵏⴰⵢⴻⵏ ⵏ ⵉⴼⵔⴰⵢⴻⵏ,
ⴰⵎ ⵡⴻⴷⴱⵉⵔ ⵙ ⵡⴰⴼⵔⵉⵡⴻⵏ ⵜⵜⵡⴰⵍⴻⵃⵃⴼⴻⵏ ⵙ ⵏⵏⵓⵇⴰⵔⵜ,
ⵓ ⴰⵔⵔⵉⵛ ⵏⵏⴻⵙ ⵙ ⵡⵓⵔⴻⵖ ⴰⵥⵉⵥⴰ ⵉⵜⵜⵉⵙⵙⵉⵇⴻⵏ.
15 ⵍⴰⵎⵉ ⴰⵎⵥⴻⵎⵎⴰⵔ ⵅ ⴽⵓⵍⵛⵉ ⵉⵙⵙⴰⵔⴻⵢⵢⴻⵛ ⵉⵊⴻⴵⵉⴷⴻⵏ ⴷⵉ ⵜⴻⵎⵎⵓⵔⵜ,
ⵉⵛⵛⴰⵜ ⵡⴻⴷⴼⴻⵍ ⵅ ⵚⴰⵍⵎⵓⵏ. □
16 ⴰⴷⵔⴰⵔ ⵏ ⴰⵔⴻⴱⴱⵉ, ⴰⴷⵔⴰⵔ ⵏ ⴱⴰⵛⴰⵏ.
ⴰⴷⵔⴰⵔ ⵏ ⴱⴰⵛⴰⵏ ⴷ ⵉⵊⵊ ⵏ ⵡⴻⴷⵔⴰⵔ ⵙ ⵜⵇⵉⵛⵛⵉⵜⵉⵏ ⴰⵟⵟⴰⵙ. □
ⵉⴷⵓⵔⴰⵔ ⴷ ⵜⴻⵖⵣⵓⵔⵉⵏ ⵏ ⵉⵙⵔⴰⵉⵍ (ⵉⵣⵀⴷ. 68:16)
17 ⵎⴰⵢⴻⵎⵎⵉ ⵜⵅⴻⵥⵥⴰⵔⴻⵎ ⴰⵎⵎⵓ ⵙ ⵡⴰⵙⴰⵎ,
ⴽⴻⵏⵏⵉⵡ ⴰ ⵉⴷⵓⵔⴰⵔ ⵙ ⵎⴰⵔⵔⴰ ⵜⵉⵇⵉⵛⵛⵉⵜⵉⵏ ⵏⵡⴻⵎ,
ⵖⴰⵔ ⵡⴻⴷⵔⴰⵔ ⵉ ⵉⵎⴻⵥⵔⵉ ⵉ-ⵜ ⴰⵔⴻⴱⴱⵉ ⴷ ⵜⴰⵥⴻⴷⴷⵉⵖⵜ ⵉ ⵢⵉⵅⴻⴼ ⵏⵏⴻⵙ?
ⵡⴰⵀ, ⵏⵉⵛⴰⵏ ⵙⵉⴷⵉ ⴰⴷ ⴷⵉⵏ ⵉⵥⴷⴻⵖ ⵉ ⵍⴻⴱⴷⴰ. ■
18 ⵉⴽⴰⵔⵔⵓⵜⴻⵏ ⵏ ⴰⵔⴻⴱⴱⵉ ⴰⵇⴰ ⴰⵜⴻⵏ ⴷ ⵄⴻⵛⵔⴰⵢⴰⵜ ⵏ ⵍⵓⵍⵓⴼ ⴷ ⵄⴻⵛⵔⴰⵢⴰⵜ ⵏ ⵍⵓⵍⵓⴼ,
ⵓⵍⴰ ⴷ ⴰⵍⴻⴼ ⵓ ⵄⴰⵡⴻⴷ ⴰⵍⴻⴼ.
ⵙⵉⴷⵉ ⵉⵏⵓ ⴰⵇⴰ-ⵜ ⵊⴰⵔ ⴰⵙⴻⵏ, ⴰⴷⵔⴰⵔ ⵏ ⵙⵉⵏⴰ ⴰⵇⴰ ⵉⵜⵜⵡⴰⵍⴻⵃⵃⴻⴼ ⵙ ⵜⵇⴻⴷⴷⴰⵙⵜ. ■
19 ⵛⴻⴽ ⵜⵓⵍⵢⴻⴷ ⵖⴰⵔ ⵙⴻⵏⵏⴻⵊ, ⵜⵏⴻⴷⵀⴻⴷ ⴷⵉ ⵜⵎⴻⵃⴱⴰⵙⵜ,
ⵛⴻⴽ ⵜⵎⴻⵏⵄⴻⴷ ⵜⴰⵔⵥⵉⴼⵉⵏ ⵥⴻⴳ ⵉⵡⴷⴰⵏ, ⵉⵡⴰ ⵄⴰⴷ ⵥⴻⴳ ⵉⵎⵖⴻⵡⵡⵖⴻⵏ,
ⵃⵉⵎⴰ ⵙⵉⴷⵉ, ⴰⵔⴻⴱⴱⵉ, ⴰⴷ ⵉⵥⴷⴻⵖ ⴷⵉⵏⵏⵉ. ■
20 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵉⵏⵓ. ⴰⵙⵙ ⵅ ⵡⴰⵙⵙ ⵢⴰⵔⴻⴱⴱⵓ ⵉ ⵏⴻⵛⵛⵉⵏ ⴷⴷⵇⵓⵍⴰⵜ.
ⴰⵔⴻⴱⴱⵉ ⵏⵏⵉ ⴷ ⴰⵙⴻⵏⵊⴻⵎ ⵏⵏⴻⵖ. ⵙⵉⵍⴰⵀ. □
21 ⴰⵔⴻⴱⴱⵉ ⵏⵏⵉ ⴷ ⵉⵊⵊ ⵏ ⴰⵔⴻⴱⴱⵉ ⵏ ⵉⵙⴻⵏⵊⴰⵎⴻⵏ ⵉ ⵏⴻⵛⵛⵉⵏ,
ⴰⵇⴰ ⴷⵉⵏ ⵉⴼⴻⴽⴽⵉⵜⴻⵏ ⵥⵉ ⵍⵎⴻⵡⵜ ⵖⴰⵔ ⵙⵉⴷⵉ, ⵙⵉⴷⵉ ⵉⵏⵓ.
22 ⵙ ⵜⵉⴷⴻⵜⵜ, ⴰⵔⴻⴱⴱⵉ, ⴰⴷ ⵉⵍⴱⴻⵥ ⴰⵥⴻⴵⵉⴼ ⵏ ⵍⵄⴻⴷⵢⴰⵏ ⵏⵏⴻⵙ,
ⴰⵛⴻⵇⵇⵓⴼ ⵙ ⵓⵛⴻⵡⵡⴰⴼ ⵏ ⵡⴻⵏⵏⵉ ⵉⵇⵇⵉⵎⴻⵏ ⵉⵜⵜⴻⵏⵏⴻⴹ ⵙ ⵉⵎⴻⵔⵡⵓⵙⴰ ⵏ ⴷⴷⵏⵓⴱ ⵏⵏⴻⵙ.
23 ⵙⵉⴷⵉ ⵉⵏⵓ ⵉⵏⵏⴰ: “ⵏⴻⵛⵛ ⴰⴷ ⴽⴻⵏⵏⵉⵡ ⴷⴷ-ⴰⵔⵔⴻⵖ ⵥⵉ ⴱⴰⵛⴰⵏ,
ⴰⴷ ⴽⴻⵏⵏⵉⵡ ⴷⴷ-ⴰⵔⵔⴻⵖ ⵥⵉ ⵍⴰⴵⴰⵖ ⵏ ⵍⴻⴱⵃⴰⵔ, ■
24 ⵃⵉⵎⴰ ⴰⴷ ⵜⵃⴰⵔⵔⵛⴻⴷ ⵙ ⵓⴹⴰⵔ ⵏⵏⴻⴽ ⴷⴻⴳ ⵉⴷⴰⵎⵎⴻⵏ,
ⵓⵛⴰ ⵓⵍⴰ ⴷ ⵉⵍⴻⵙ ⵏ ⵢⵉⵟⴰⵏ ⵏⵏⴻⴽ ⴰⴷ ⵉⵟⵟⴻⴼ ⵜⴰⵙⵖⴰⵔⵜ ⵏⵏⴻⵙ ⵥⵉ ⵍⵄⴻⴷⵢⴰⵏ.”
25 ⵏⵉⵜⵏⵉ ⵥⵔⵉⵏ ⵉⴱⵔⵉⴷⴻⵏ ⵏⵏⴻⴽ ⵎⴰⵎⵎⴻⵛ ⵜⴻⵏ ⵜⵓⵢⵓⵔⴻⴷ, ⴰ ⴰⵔⴻⴱⴱⵉ,
ⵉⴱⵔⵉⴷⴻⵏ ⵏ ⴰⵔⴻⴱⴱⵉ ⵉⵏⵓ, ⴰⵊⴻⴵⵉⴷ ⵉⵏⵓ ⵉⵍⴻⵃⵃⴼⴻⵏ ⴷⵉ ⵜⵇⴻⴷⴷⴰⵙⵜ.
26 ⵉⵎⴻⵖⵏⴰⵊⴻⵏ ⵜⵓⵖⴰ ⴳⴳⵓⵔⴻⵏ ⵖⴰⵔ ⵥⵥⴰⵜ, ⵉⵏⵏⵉ ⵉⵛⵛⴰⵜⴻⵏ ⵅ ⵉⴼⵉⵍⴰⵏ ⵖⴰⵔ ⴹⴻⴼⴼⴰⵔ,
ⵜⵉⵄⵥⴰⵔⵉⵢⵢⵉⵏ ⵜⵉⵏⵏⵉ ⵉⵜⵜⵉⵔⴰⵔⴻⵏ ⵅ ⵉⴱⴻⵏⴷⵉⵍⴻⵏ ⵏⵙⴻⵏⵜ ⴷⵉ ⵍⵡⴻⵙⵜ.
27 ⴱⴰⵔⴽⴻⵎ ⴰⵔⴻⴱⴱⵉ ⴷⵉ ⵜⵎⴻⵙⵎⵓⵏⵉⵏ, ⴰ ⵙⵉⴷⵉ,
ⵥⵉ ⵍⵄⵓⵏⵚⴰⵔ ⵏ ⵉⵙⵔⴰⵉⵍ.
28 ⴰⵇⴰ ⴷⵉⵏ ⴱⵉⵏⵢⴰⵎⵉⵏ ⴰⵎⴻⵥⵢⴰⵏ, ⵡⴻⵏⵏⵉ ⵅⴰⵙⴻⵏ ⵉⵜⵜⵚⴻⴵⴰⴹⴻⵏ,
ⵅⴻⵏⵏⵉ ⵍⵃⵓⴽⴽⴰⵎ ⵏ ⵢⴰⵀⵓⴷⴰ ⴰⴽ-ⴷ ⵓⴱⴰⵔⵔⵓ ⵏ ⵉⵄⵛⵉⵔⴻⵏ ⵏⵙⴻⵏ,
ⵓⵍⴰ ⴷ ⵍⵃⵓⴽⴽⴰⵎ ⵏ ⵣⴰⴱⵓⵍⵓⵏ ⴷ ⵍⵃⵓⴽⴽⴰⵎ ⵏ ⵏⴰⴼⵜⴰⵍⵉ.
29 ⴰⵔⴻⴱⴱⵉ ⵏⵏⴻⴽ ⵉⵡⴻⵚⵚⴰ ⵎⴰⵃⴻⵏⴷ ⴰⴷ ⵜᵉⵜⵜⵡⴰⵙⵊⴻⵀⴷⴻⴷ,
ⴰ, ⴰⵔⴻⴱⴱⵉ, ⵙⴻⵊⵀⴻⴷ ⵎⵉⵏ ⵜⴻⴳⴳⵉⴷ ⴷⵉ ⵟⵟⵡⴻⵄ ⵏⵏⴻⵖ,
30 ⵥⵉ ⵣⵥⴰⵡⴻⵛⵜ ⵏⵏⴻⴽ ⵜⴰⵎⴻⵇⵇⵔⴰⵏⵜ, ⵙⴻⵏⵏⴻⵊ ⵉ ⵓⵔⵛⴰⵍⵉⵎ.
ⵉⵊⴻⴵⵉⴷⴻⵏ ⴰⴷ ⴰⵛ ⵉⵡⵢⴻⵏ ⵜⴰⵔⵥⵉⴼⵉⵏ. ■
31 ⵙⵉⴳⴳⵯⴻⴷ ⵍⵡⴻⵃⵛ ⵏⵏⵉ ⵊⴰⵔ ⵓⵖⴰⵏⵉⵎ,
ⴰⴱⴰⵔⵔⵓ ⵏ ⵉⴼⵓⵏⴰⵙⴻⵏ ⵉⵊⴻⵀⴷⴻⵏ ⴰⴽ-ⴷ ⵉⵢⴻⵏⴷⵓⵥⴻⵏ ⵏ ⵍⴻⴳⵏⵓⵙ,
ⴰⵍⴰⵎⵉ ⵉⵜⵜⵡⴰⵍⴱⴻⵥ, ⵓⵛⴰ ⴰⴷ ⵉⴷⵡⴻⵍ ⵏⵏⵓⵇⴰⵔⵜ ⵉⴷⴷⴻⵥ.
ⵏⴻⵜⵜⴰ ⵉⵥⴻⴵⴻⵄ ⵍⴻⴳⵏⵓⵙ ⵏⵏⵉ ⵜⵓⵖⴰ ⵜⵜⵎⴻⵥⵔⴻⵏ ⴷⴻⴳ ⵓⵎⴻⵏⵖⵉ. □
32 ⴰⴷ ⴷⴷ-ⴰⵙⴻⵏ ⵉⵎⵛⴻⵏⵏⵄⴻⵏ ⵥⵉ ⵎⵉⵚⵔⴰ,
ⴽⵓⵛ ⴰⴷ ⵉⵙⵙⵡⵉⵥⵥⴻⴹ ⵉⴼⴰⵙⵙⴻⵏ ⵏⵏⴻⵙ ⵖⴰⵔ ⴰⵔⴻⴱⴱⵉ ⵙ ⵜⴻⵥⵍⴰ.
33 ⴰ ⵜⵉⴳⴻⵍⴷⵉⵡⵉⵏ ⵏ ⵜⴻⵎⵎⵓⵔⵜ ⵖⴻⵏⵏⵊⴻⵏⵜ ⵉ ⴰⵔⴻⴱⴱⵉ,
ⵥⴻⵀⵀⴷⴻⵏⵜ ⵉ ⵙⵉⴷⵉ ⵉⵏⵓ. ⵙⵉⵍⴰⵀ.
34 ⵏⴻⵜⵜⴰ ⴷ ⵡⴻⵏⵏⵉ ⵉⵏⴻⴷⴷⵀⴻⵏ ⴷⴻⴳ ⵓⵊⴻⵏⵏⴰ ⵅ ⵎⴰⵔⵔⴰ ⵉⵊⴻⵏⵡⴰⵏ ⵥⴻⴳ ⵡⴻⵛⵃⴰⵍ ⵓⵢⴰ.
ⵅⵥⴰⵔ, ⴰⵇⴰ ⵏⴻⵜⵜⴰ ⵉⴳⴳⴰ ⵉⵊⵊ ⵏ ⵍⵃⴻⵙⵙ ⵉⵊⴻⵀⴷⴻⵏ ⵙ ⵜⵎⵉⵊⵊⴰ ⵏⵏⴻⵙ.
35 ⵡⵛⴻⵎ ⵊⵊⴻⵀⴷ ⵉ ⴰⵔⴻⴱⴱⵉ!
ⵍⵄⴰⴹⴰⵎⴰ ⵏⵏⴻⵙ ⴰⵇⴰ-ⵜⵜ ⵜⵉⵡⴰ ⵉ ⵉⵙⵔⴰⵉⵍ ⵓ ⵊⵊⴻⵀⴷ ⵏⵏⴻⵙ ⴰⵇⴰ-ⵜ ⴷⴻⴳ ⵉⵙⴻⵢⵏⵓⵜⴻⵏ.
36 ⴰ, ⴰⵔⴻⴱⴱⵉ, ⵎⴰⵎⵎⴻⵛ ⵜⴻⵙⵙⵉⴳⴳⵯⴻⴷⴻⴷ ⵥⵉ ⵜⵉⵥⴰⵡⵉⵢⵢⵉⵏ ⵏⵏⴻⴽ ⵉⵇⴻⴷⴷⵙⴻⵏ,
ⴰ ⴰⵔⴻⴱⴱⵉ ⵏ ⵉⵙⵔⴰⵉⵍ, ⵛⴻⴽ ⴷ ⵡⴻⵏⵏⵉ ⵉⵜⵜⵉⵛⴻⵏ ⵊⵊⴻⵀⴷ ⴷ ⵜⵥⴻⵎⵎⴰⵔ ⵉ ⵍⴳⴻⵏⵙ.
ⴰⴷ ⵉⵜⵜⵡⴰⴱⴰⵔⴻⴽ ⴰⵔⴻⴱⴱⵉ.