66
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵉⵥⵍⵉ. ⴰⵥⴻⵀⵀⴻⴷ. ⵙⵍⵉⵡⵍⴻⵡⴻⵎ ⵉ ⴰⵔⴻⴱⴱⵉ, ⵎⴰⵔⵔⴰ ⵜⴰⵎⵎⵓⵔⵜ!
2 ⵣⴻⵀⵀⴷⴻⵎ ⵉ ⵓⵄⵓⴵⵉ ⵏ ⵢⵉⵙⴻⵎ ⵏⵏⴻⵙ,
ⵉⵙⵙⵄⵓⴵⴰ ⵜ ⵉ ⵓⵚⴻⴱⴱⴻⵃ ⵏⵏⴻⵙ.
3 ⵉⵏⵉⵎ ⵉ ⴰⵔⴻⴱⴱⵉ: “ⵎⴰⵎⵎⴻⵛ ⵙⵙⴰⴳⴳⵯⴰⴷⴻⵏⵜ ⵜⵎⴻⴳⴳⴰ ⵏⵏⴻⴽ!”
ⵣⵉ ⵍⴻⵎⵖⴰⵔⴻⵜ ⵏ ⵊⵊⵀⴻⴷ ⵏⵏⴻⴽ ⴰⴷ ⵅⴰⴽ ⵙⵙⵏⵉⵄⵎⵉⵍⴻⵏ ⵍⵄⴻⴷⵢⴰⵏ ⵏⵏⴻⴽ.
4 ⵎⴰⵔⵔⴰ ⵜⴰⵎⵎⵓⵔⵜ, ⵡⴰⵀ ⴰⴷ ⴰⵛ ⴰⴹⴰⵔⴻⵏ ⵓ ⴰⴷ ⵥⴻⵀⵀⴷⴻⵏ,
ⴰⴷ ⵥⴻⵀⵀⴷⴻⵏ ⵉ ⵢⵉⵙⴻⵎ ⵏⵏⴻⴽ. ⵙⵉⵍⴰⵀ.
5 ⴰⵙⴻⵎ-ⴷⴷ, ⵅⵥⴰⵔⴻⵎ ⵜⵉⵎⴻⴳⴳⴰ ⵏ ⴰⵔⴻⴱⴱⵉ.
ⵎⵉⵏ ⵉⴳⴳⴰ ⵏⴻⵜⵜⴰ, ⵉⵙⵙⴰⴳⴳⵯⴰⴷ ⵜⴰⵔⵡⴰ ⵏ ⴱⵏⴰⴷⴻⵎ.
6 ⵏⴻⵜⵜⴰ ⵢⴰⵔⵔⴰ ⵍⴻⴱⵃⴰⵔ ⴷ ⵍⴱⴰⵔ.
ⵏⵉⵜⵏⵉ ⵥⵡⴰⵏ ⵉⵖⵥⴰⵔ ⵅ ⵉⴹⴰⵔⴻⵏ.
ⴷⵉⵏⵏⵉ ⵉ ⵥⵥⴰⵢⴻⵙ ⵏⴼⴰⵔⵔⴻⵃ. ■
7 ⵙ ⵊⵊⴻⵀⴷ ⵏⵏⴻⵙ ⵉⵃⴻⴽⴽⴻⵎ ⵉ ⵍⴻⴱⴷⴰ.
ⵜⵉⵟⵟⴰⵡⵉⵏ ⵏⵏⴻⵙ ⵜⵜⵄⴻⵙⵙⴻⵏⵜ ⵅ ⵍⴻⴳⵏⵓⵙ.
ⵖⴰⵔⵡⴻⵎ ⴰⴷ ⵜⴻⵊⵊⴻⵎ ⴰⴷ ⵎⵎⵄⴰⵍⴰⵏ ⵉⵏⵏⵉ ⵉⵜⵜⵖⴻⵡⵡⵖⴻⵏ. ⵙⵉⵍⴰⵀ. ■
8 ⴱⴰⵔⴽⴻⵎ ⴰⵔⴻⴱⴱⵉ ⵏⵏⴻⵖ, ⴽⴻⵏⵏⵉⵡ ⴰ ⵍⴻⴳⵏⵓⵙ,
ⴳⴳⴻⵎ ⴰⴷ ⵉⵜⵜⵡⴰⵙⴻⵍ ⵍⵃⴻⵙⵙ ⵏ ⵓⵚⴻⴱⴱⴻⵃ ⵏⵏⴻⵙ.
9 ⵏⴻⵜⵜⴰ ⴷ ⵡⴻⵏⵏⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ,
ⵓ ⵡⴰⵔ ⵉⵊⵊⵉ ⴰⴹⴰⵔ ⵏⵏⴻⵖ ⴰⴷ ⵉⴼⴰⵔⵖ.
10 ⵎⵉⵏⵥⵉ ⵛⴻⴽ, ⴰ ⴰⵔⴻⴱⴱⵉ, ⵜⵇⴻⴵⴱⴻⴷ ⴰⵏⴻⵖ,
ⵛⴻⴽ ⵜⴻⵙⵙⵉⵥⴻⴷⴳⴻⴷ ⴰⵏⴻⵖ ⴰⵎⴻⵛⵏⴰⵡ ⵅⵎⵉ ⵙⵙⵉⵥⴷⴰⴳⴻⵏ ⵏⵏⵓⵇⴰⵔⵜ.
11 ⵛⴻⴽ ⵜⵏⴻⴷⵀⴻⴷ ⴰⵏⴻⵖ ⴷⵉ ⵜⵔⴰⵛⵛⴰ ⵏ ⵍⴼⴻⵅ.
ⵜⴻⵙⵙⴰⵔⵙⴻⴷ ⵅⴰⵏⴻⵖ ⵉⵊⵊ ⵏ ⴷⴷⵇⴻⵍ ⵅ ⵜⴻⵄⵊⵉⵏⵏⴰ ⵏⵏⴻⵖ.
12 ⵛⴻⴽ ⵜⴻⵊⵊⵉⴷ ⵉⵡⴷⴰⵏ ⴰⴷ ⵏⵢⴻⵏ ⵅ ⵉⵥⴻⴵⵉⴼⴻⵏ ⵏⵏⴻⵖ,
ⴰⵇⴰ ⵏⴻⴷⵡⴻⵍ ⵖⴰⵔ ⵜⵎⴻⵙⵙⵉ ⴷ ⵡⴰⵎⴰⵏ,
ⵎⴰⵛⴰ ⵛⴻⴽ ⵜⴻⵙⵙⵓⴼⴼⵖⴻⴷ ⴰⵏⴻⵖ ⵙ ⵉⵊⵊ ⵏ ⵍⵇⴻⴷⴷ ⵉⴼⴻⵢⵢⴻⴹ.
13 ⵏⴻⵛⵛ ⴰⴷ ⴷⴷ-ⴰⴷⴼⴻⵖ ⵖⴰⵔ ⵜⴰⴷⴷⴰⵔⵜ ⵏⵏⴻⴽ ⵙ ⵜⵖⴰⵔⵚⴰ ⵏ ⵡⴻⵛⵎⴰⴹ,
ⴰⴷ ⴰⵛ ⵅⴻⴵⵚⴻⵖ ⵍⵡⵓⵄⵓⴷ ⵉⵏⵓ,
14 ⵍⵡⵓⵄⵓⴷ ⵏⵏⵉ ⵥⵥⴰⵢⵙⴻⵏ ⵏⴻⵟⵇⴻⵏ ⵉⵢⴻⵏⵛⵉⵛⴻⵏ ⵉⵏⵓ,
ⵏⵏⵉ ⵥⵥⴰⵢⵙⴻⵏ ⵉⵙⵙⵉⵡⴻⵍ ⵓⵇⴻⵎⵎⵓⵎ ⵉⵏⵓ,
ⵍⴰⵎⵉ ⵜⵓⵖⴰ ⴰⵢⵉ ⴷⵉ ⵍⴻⵃⵚⴰⵔⴻⵜ.
15 ⵜⵉⵖⴰⵔⵚⴰ ⵏ ⵡⴻⵛⵎⴰⴹ ⵏ ⵍⵎⴰⵔ ⵉⵚⴻⵃⵃⴻⵏ ⴰⴷ ⴰⵛ ⵜⴻⵏⵜ-ⵉ-ⴷⴷ-ⴰⵡⵢⴻⵖ
ⴰⴽ-ⴷ ⵍⴻⴱⵅⵓⵔ ⵏ ⵉⵛⴰⵔⵔⵉⵢⵢⴻⵏ.
ⵏⴻⵛⵛ ⴰⴷ ⴰⵛ ⵙⵙⵡⴻⵊⴷⴻⵖ ⵉⴼⵓⵏⴰⵙⴻⵏ ⴷ ⵉⵖⴰⵢⴹⴻⵏ. ⵙⵉⵍⴰⵀ.
16 ⵎⴰⵔⵔⴰ ⴽⴻⵏⵏⵉⵡ ⵉ ⵉⵜⵜⴻⴳⴳⵯⴷⴻⵏ ⴰⵔⴻⴱⴱⵉ, ⴰⵙⵙⴻⵜⵜⵉⵡ-ⴷⴷ, ⵙⵍⴻⵎ,
ⵏⴻⵛⵛ ⵅⵙⴻⵖ ⴰⴷ ⴰⵡⴻⵎ ⵄⴰⵡⴷⴻⵖ ⵎⵉⵏ ⵉ ⴷ ⴰⵢⵉ ⵉⴳⴳⴰ ⴷⵉ ⵍⴻⵄⵎⴰⵔ ⵉⵏⵓ.
17 ⵄⴰⴷ ⵉⵍⴰⵖⴰ ⵅⴰⵙ ⵓⵇⴻⵎⵎⵓⵎ ⵉⵏⵓ,
ⵅⴻⵏⵏⵉ ⴰⵇⴰ ⵏⴻⵜⵜⴰ ⵉⵜⵜⵡⴰⵙⵙⴻⵎⵖⴰⵔ ⵙⴰⴷⵓ ⵢⵉⵍⴻⵙ ⵉⵏⵓ.
18 ⵎⵍⵉ ⵜⵓⵖⴰ ⵏⵡⵉⵖ ⵍⵎⵓⵄⵚⵉⵢⵢⴻⵜ ⴷⴻⴳ ⵡⵓⵍ ⵉⵏⵓ,
ⵅⴻⵏⵏⵉ ⴰⵇⴰ ⵙⵉⴷⵉ ⵉⵏⵓ ⵡⴰⵔ ⴷ ⴰⵢⵉ ⵉⵜⵜⴻⵙⵍⵉ ⵛⴰ.
19 ⴰⵔⴻⴱⴱⵉ ⵎⴰⵛⴰ ⴰⵇⴰ ⵉⵙⵍⴰ ⴰⵢⵉ,
ⴰⵇⴰ ⵏⴻⵜⵜⴰ ⵉⵡⵛⴰ ⵜⴰⵢⵏⵉⵜ ⵉ ⵜⵎⵉⵊⵊⴰ ⵏ ⵜⵥⴰⴵⵉⵜ ⵉⵏⵓ.
20 ⴰⴷ ⵉⵜⵜⵡⴰⴱⴰⵔⴻⴽ ⴰⵔⴻⴱⴱⵉ ⵡⴻⵏⵏⵉ ⵡⴰⵔ ⵉⵏⴹⴰⵔⴻⵏ ⵜⴰⵥⴰⴵⵉⵜ ⵉⵏⵓ,
ⵡⴰⵔ ⴷ ⴰⵢⵉ ⵉⴽⴽⵉⵙ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ.