65
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ. ⵉⵥⵍⵉ. 2 ⵣⵉ ⵍⵀⵓⴷⵏⴻⵜ ⵉⵙⵙⴷⴰⵃⴻⴵ ⵉ ⵛⴻⴽ ⵓⵚⴻⴱⴱⴻⵃ, ⴰⵢⴰ, ⴰⵔⴻⴱⴱⵉ, ⴷⵉ ⵚⵉⵀⵢⵓⵏ,
ⵉⵜⵜⵅⴻⵚⵚⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵍⵡⴰⵄⴷ ⵉ ⵛⴻⴽ.
3 ⵛⴻⴽ ⵜⴻⵙⵍⵉⴷ ⵉ ⵜⵥⴰⴵⵉⵜ,
ⵎⴰⵔⵔⴰ ⴷⴷⴰⵜ ⴰⴷ ⵖⴰⵔⴻⴽ ⴷⴷ-ⵢⴰⵙ.
4 ⵍⵎⵓⵄⵚⵉⵢⵢⴻⵜ ⵜⵓⵖⴰ ⵜⴻⵊⵀⴻⴷ ⵅⴰⴼⵉ,
ⵎⴰⵛⴰ ⵛⴻⴽ ⵜᵉⵙⵙᵉⵚⴻⵍⵃⴻⴷ ⵉⵅⴻⵟⵟⴰⵏ ⵏⵏⴻⵖ.
5 ⵙⵙⴻⵄⴷ ⵏ ⵡⴻⵏⵏⵉ ⵉ ⵜⴼⴰⵔⵔⵥⴻⴷ ⵛⴻⴽ ⵓ ⵜⴻⵙⵙⵇⴰⵔⵔⴱⴻⴷ ⵜ-ⵉ-ⴷⴷ ⵖⴰⵔⴻⴽ,
ⵃⵉⵎⴰ ⴰⴷ ⵉⵥⴷⴻⵖ ⴷⵉ ⵍⴻⵎⵔⴰⵃⴰⵜ ⵏⵏⴻⴽ.
ⵏⴻⵛⵛⵉⵏ ⴰⴷ ⵏⴻⵊⵊⵉⵡⴻⵏ ⵙ ⵍⵅⴰⵔ ⵏ ⵜⴰⴷⴷⴰⵔⵜ ⵏⵏⴻⴽ,
ⵙ ⵜⵇⴻⴷⴷⴰⵙⵜ ⵏ ⵣⵥⴰⵡⴻⵛⵜ ⵏⵏⴻⴽ ⵜⴰⵎⴻⵇⵇⵔⴰⵏⵜ.
6 ⵛⴻⴽ ⴰⴷ ⵅⴰⵏⴻⵖ ⴷⴷ-ⵜⴰⵔⵔⴻⴷ ⴷⵉ ⵜⵙⴻⴳⴷⴰ ⵙ ⵜⵎⴻⴳⴳⴰ ⵉⵙⵙⴰⴳⴳⵯⴰⴷⴻⵏ,
ⴰ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵏⵏⴻⵖ.
ⴰⵇⴰ ⵛⴻⴽ ⴷ ⵍⴰⵎⴰⵏ ⵏ ⵎⴰⵔⵔⴰ ⵉⵏⵏⵉ ⵉⴵⴰⵏ ⵖⴰⵔ ⵜⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ,
ⵏ ⵢⵉⵏⵏⵉ ⵉⴵⴰⵏ ⵅ ⵊⵊⵡⴰⵢⴻⵀ ⵢⵉⴳⴳⵯⴻⵊⴻⵏ ⵅ ⵓⵊⴻⵎⵎⴰⴹⵉⵏ ⵏ ⵍⴻⴱⵃⴰⵔ.
7 ⵛⴻⴽ ⴷ ⵡⴻⵏⵏⵉ ⵉⵙⵙⵔⵓⵙⴰⵏ ⵉⴷⵓⵔⴰⵔ ⵙ ⵊⵊⵀⴻⴷ ⵏⵏⴻⵙ,
ⵛⴻⴽ ⵜⴱⴻⴽⴽⵙⴻⴷ ⵙ ⵍⴻⵎⵖⴰⵔⴻⵜ.
8 ⵛⴻⴽ ⴷ ⵡⴻⵏⵏⵉ ⵉ ⵉⵜⵜⴰⵔⵔⴰⵏ ⵍⴻⵀⵡⴻⵍ ⵏ ⵍⴻⴱⵃⵓⵔ ⵢⴰⵔⴻⵙⵙⴰ,
ⵍⴻⵀⵡⴻⵍ ⵏ ⵍⴻⵎⵡⴰⵊ
ⴷ ⵍⵀⴰⵔⴰⵊ ⵏ ⵛⵛⵓⵄⵓⴱ.
9 ⵉⵏⵏⵉ ⵉⵥⴻⴷⴷⵖⴻⵏ ⵖⴰⵔ ⵜⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ
ⵜⵜⴻⴳⴳⵯⴻⴷⴻⵏ ⵥⵉ ⵍⴻⵄⵍⴰⵎⴰⵜ ⵏⵏⴻⴽ,
ⴰⵇⴰ ⵛⴻⴽ ⵜᵉⵜⵜⴰⵔⵔⵉⴷ ⵍⴻⴼⵊⴰⵔ ⵏ ⵜⵓⴼⴼⵓⵜ ⵓⵍⴰ ⴷ ⵡⴻⵟⵟⵓ ⵏ ⵜⵎⴻⴷⴷⵉⵜ ⴰⴷ ⵙⵍⵉⵡⴻⵍⵡⴻⵏ.
10 ⵛⴻⴽ ⵜⴰⵔⴻⵥⵥⴼⴻⴷ ⵜⴰⵎⵎⵓⵔⵜ ⵓ ⵜᵉⵜⵜⴰⵔⵔⵉⴷ ⵉⵖⴻⵥⵔⴰⵏ ⴰⴷ ⵜⵜ ⵛⵓⵇⵇⴻⵏ,
ⴰⵇⴰ ⵛⴻⴽ ⵜᵉⵜⵜⴰⵔⵔⵉⴷ ⵜⵜ-ⵉ-ⴷⴷ ⵙ ⵍⵅⵉⵔ ⴰⵟⵟⴰⵙ.
ⵉⵖⵥⴰⵔ ⵏ ⴰⵔⴻⴱⴱⵉ ⵏⵏⵉ ⵜⵜ ⵉⵜⵜⵛⵓⵇⵇ ⴰⵇⴰ ⵉⵜⵜⵛⵛⵓⵔ ⵙ ⵡⴰⵎⴰⵏ.
ⵛⴻⴽ ⵜⴻⵙⵙⴻⵡⵊⴰⴷⴻⴷ ⵉⵎⴻⵏⴷⵉ ⵏⵙⴻⵏ,
ⵎⴰⵖⴰⵔ ⵉ ⵓⵢⴰ ⵉ ⵜⴻⵙⵙⵡⴻⵊⴷⴻⴷ ⵜⴰⵎⵎⵓⵔⵜ.
11 ⵛⴻⴽ ⵜᵉⵜⵜⴻⵙⴰⵡⴻⴷ ⵎⵙⴻⵇⵇⴻⵎ ⵍⴰⵜⴰⵔⴰⵜ ⵏ ⵡⴻⵛⵔⴰⵥ,
ⵜⴻⵙⵙⵀⴻⴽⴽⵯⵉⴷ ⵉⴱⵓⴷⴰ ⵏⵏⴻⵙ.
ⵜⴻⵙⵙⴰⵔⴹⴰⴱⴻⴷ ⵜⴰⵎⵎⵓⵔⵜ ⵙ ⵉⵏⴻⵛⵏⴰⵛⴻⵏ,
ⵜᵉⵜⵜⴱⴰⵔⴽⴻⴷ ⴰⵖⴻⵎⵎⵓⵢ ⵏⵏⴻⵙ.
12 ⵛⴻⴽ ⵜᵉⵜⵜⴻⴳⴳⴻⴷ ⵜⵜⴰⵊ ⵉ ⵓⵙⴻⴳⴳⵯⴰⵙ ⵏ ⵍⵅⴰⵔ ⵏⵏⴻⴽ,
ⵍⴰⵜⴰⵔⴰⵜ ⵏ ⵉⵚⵓⵔⴰⴼ ⵏⵏⴻⴽ ⵜⵜⵓⴷⵓⵎⴻⵏ ⵙ ⵜⴰⴷⵓⵏⵜ.
13 ⴰⵇⴰ ⵜⵜⵓⴷⵓⵎⴻⵏ ⵅ ⴷⴷⵎⴰⵏⵉ ⵏ ⵍⴻⵅⵍⴰ,
ⵜⵉⵡⵔⵉⵔⵉⵏ ⴱⴻⴽⴽⵙⴻⵏⵜ ⵙ ⵍⴻⴼⵔⴰⵃⴻⵜ.
14 ⴷⴷⵎⴰⵏⵉ ⵏ ⵜⴰⵔⴻⵡⵙⴰ ⵙⵙⵓⵏ ⵙ ⵡⵓⴵⵉ,
ⵓⵍⴰ ⴷ ⵜⵉⵖⵥⵓⵔⵉⵏ ⴷⵍⵉⵏⵜ ⵙ ⵉⵎⴻⵏⴷⵉ.
ⵏⵉⵜⵏⵉ ⴷⴷⵓⵇⵇⵓⵥⴻⵏ ⵙ ⵓⵙⵍⵉⵡⵍⴻⵡ, ⵡⴰⵀ, ⵜⵜⵖⴻⵏⵏⴰⵊⴻⵏ.