1 ⴰⵥⴻⵀⵀⴻⴷ ⵏ ⴷⴰⵡⵓⴷ, ⴰⵍⴰⵎⵉ ⵜ ⵜⵓⵖⴰ ⴷⵉ ⵍⴻⵅⵍⴰ ⵏ ⵢⴰⵀⵓⴷⴰ. ^■  

2 ⴰ ⴰⵔⴻⴱⴱⵉ, ⵛⴻⴽ ⴷ ⴰⵔⴻⴱⴱⵉ ⵉⵏⵓ! ⵖⴰⵔ ⵜⵓⴼⴼⵓⵜ ⴰⵔⴻⵥⵥⵓⵖ ⵅⴰⴽ,

ⵍⴻⵄⵎⴰⵔ ⵉⵏⵓ ⵉⵜⵜⴼⴰⴷⴰ-ⴷⴷ ⵖⴰⵔⴻⴽ, ⴰⵢⵙⵓⵎ ⵉⵏⵓ ⵉⵜⵜⵎⴻⵥⵔⵉ ⴷⴰⵢⴻⴽ,

ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵢⵓⵥⵖⴻⵏ ⵉⵜⵜⴼⴰⴷⴰⵏ ⴱⵍⴰ ⴰⵎⴰⵏ. ^□  

3 ⴰⵎⵎⵓ ⵉ ⴷⴰⵢⴻⴽ ⵅⴻⵥⵥⴰⵔⴻⵖ ⴷⵉ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ,

ⵃⵉⵎⴰ ⴰⴷ ⵥⴰⵔⴻⵖ ⵊⵊⴻⵀⴷ ⵏⵏⴻⴽ ⴷ ⵓⵄⵓⴵⵉ ⵏⵏⴻⴽ.

4 ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⵜⴻⵃⵍⴰ ⵅ ⵜⵓⴷⴰⵔⵜ,

ⵙ ⵓⵢⴻⵏⵏⵉ ⴰⴷ ⵛⴻⴽ ⵚⴻⴱⴱⵃⴻⵏ ⵉⵢⴻⵏⵛⵉⵛⴻⵏ ⵉⵏⵓ.

5 ⴰⵎⵎⵓ ⵉ ⴷ ⴰⵛ ⵖⴰ ⴱⴰⵔⴽⴻⵖ ⴷⵉ ⵜⵓⴷⴰⵔⵜ ⵉⵏⵓ,

ⴰⴷ ⵙⵙⴳⴻⵄⵄⴷⴻⵖ ⵉⴼⴰⵙⵙⴻⵏ ⵉⵏⵓ ⴷⴻⴳ ⵢⵉⵙⴻⵎ ⵏⵏⴻⴽ.

6 ⵍⴻⵄⵎⴰⵔ ⵉⵏⵓ ⴰⴷ ⵉⵊⵊⵉⵡⴻⵏ ⴰⵎⴻⵛⵏⴰⵡ ⵜⵢⴰⵡⴰⵏⵜ ⵥⵉ ⵜⵔⵓⵙⵙⵉ ⴷ ⵜⴰⴷⵓⵏⵜ,

ⵙ ⵉⵢⴻⵏⵛⵉⵛⴻⵏ ⵉⵙⵍⵉⵡⵍⴻⵡⴻⵏ ⴰⴷ ⵛⴻⴽ ⵉⵚⴻⴱⴱⴻⵃ ⵓⵇⴻⵎⵎⵓⵎ ⵉⵏⵓ,

7 ⵎⴰⵍⴰ ⵜⵜⵅⴰⵔⵔⵚⴻⵖ ⴷⴰⵢⴻⴽ ⴷⵉ ⵜⴰⵙⵙⵓⵜ,

ⵜⵜⵅⴻⵎⵎⴰⵎⴻⵖ ⴷⴰⵢⴻⴽ ⵖⴰⵔ ⵓⴹⵓⴼⴻⵏ ⵏ ⵡⴻⵛⴱⴰⵔ ⵏ ⴵⵉⵍⴻⵜ.

8 ⵎⵉⵏⵥⵉ ⵜⵓⵖⴰ ⵛⴻⴽ ⴷ ⴰⵎⵄⴰⵡⴻⵏ ⵉⵏⵓ,

ⴷⵉ ⵜⵉⵍⵉ ⵏ ⵡⴰⴼⵔⵉⵡⴻⵏ ⵏⵏⴻⴽ ⴰⴷ ⵙⵍⵉⵡⵍⴻⵡⴻⵖ.

9 ⵍⴻⵄⵎⴰⵍ ⵉⵏⵓ ⵉⵍⴻⵚⵚⴻⵇ ⴷⴰⵢⴻⴽ ⴰⵡⴰⵔⵏⵉ ⴰⵛ,

ⴰⴼⵓⵙ ⵏⵏⴻⴽ ⴰⴼⵓⵙⵉ ⵉⵜⵜᵉⵟⵟⴻⴼ ⴷⴰⵢⵉ.

10 ⵉⵏⵏⵉ ⵉⵜⵜⴻⵅⵙⴻⵏ ⴰⴷ ⴰⵔⴻⴷⴷⴵⴻⵏ ⵍⴻⵄⵎⴰⵔ ⵉⵏⵓ,

ⴰⴷ ⵉⵡⴹⴻⵏ ⵖⴰⵔ ⵉⵎⵓⵛⴰⵏ ⵢⵓⴵⵖⴻⵏ ⵇⴰⵄ ⵙⴰⴷⵓ ⵜⴻⵎⵎⵓⵔⵜ.

11 ⵏⵉⵜⵏⵉ ⴰⴷ ⵜⵜⵡⴰⵙⴻⵍⵍⵎⴻⵏ ⵉ ⵜⵥⴻⵎⵎⴰⵔ ⵏ ⵙⵙⵉⴼ,

ⴰⴷ ⴷⴻⵡⵍⴻⵏ ⴷ ⵜⴰⴽⴻⵛⵛⴰⴹⵜ ⵉ ⵉⵛⴻⵄⴱⴰⵡⴻⵏ.

12 ⵎⴰⵛⴰ ⴰⵊⴻⴵⵉⴷ ⴰⴷ ⵉⴼⴰⵔⵃ ⵥⵉ ⴰⵔⴻⴱⴱⵉ.

ⴽⵓⵍ ⵉⵊⵊ ⵥⴻⴳ ⵉⵏⵏⵉ ⵉ ⵖⴰⵔⴻⵙ ⵉ ⵖⴰ ⵉⵜⵜⵊⴰⴵⴰⵏ ⴰⴷ ⵉⴼⴻⵢⵢⴻⵛ,

ⵎⵉⵏⵥⵉ ⴰⵇⴻⵎⵎⵓⵎ ⵏ ⵢⵉⵏⵏⵉ ⵉⵙⵙⴰⵡⴰⵍⴻⵏ ⵙ ⵉⵅⴰⵔⵔⵉⵇⴻⵏ ⴰⴷ ⵉⵜⵜⵡⴰⴱⴻⵍⵍⴻⵄ.