62
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙⴰⴷⵓ ⵓⴼⵓⵙ ⵏ ⵢⴰⴷⵓⵜⵓⵏ. ⵏ ⴷⴰⵡⵓⴷ. 2 ⵍⴻⵄⵎⴰⵔ ⵉⵏⵓ ⵢⴰⵔⴻⵙⵙⴰ, ⵉⵜⵜⵔⴰⵊⴰ ⴰⵔⴻⴱⴱⵉ ⵡⴰⵀⴰ,
ⴰⵇⴰ ⵥⵥⴰⵢⴻⵙ ⴷⴷ-ⵉⵜⵜⴰⵙ ⵓⵙⴻⵏⵊⴻⵎ ⵉⵏⵓ.
3 ⴰⵇⴰ-ⵜⵜ ⴷ ⵜⴰⵚⴹⴰⵔⵜ ⵉⵏⵓ ⴷ ⵓⵙⴻⵏⵊⴻⵎ ⵉⵏⵓ,
ⵍⴱⵓⵔⵊ ⵉⵏⵓ ⵢⵓⵄⵍⴰⵏ, ⵡⴰⵔ ⵜⵜⴻⴼⵔⵉⵖⴻⵖ ⴰⵟⵟⴰⵙ.
4 ⵎⴻⵛⵃⴰⵍ ⵄⴰⴷ ⵉ ⵖⴰ ⵜⴻⴽⴽⴻⵎ ⵜⵀⴻⵊⵊⵎⴻⵎ ⵅ ⵡⴻⵔⵢⴰⵥ,
ⵎⴰ ⴰⵇⴰ ⵜⴻⵍⵀⴰⵎ ⵜⵖⴻⵟⵟⵍⴻⵎ ⵜ,
ⴰⵎ ⵉⵊⵊ ⵏ ⵍⵃⵉⴹ ⵉⵡⴻⵟⵟⴰ, ⴰⵎ ⵉⵊⵊ ⵏ ⵡⴻⵖⴱⴰⵔ ⵉⵜⵜⵡⴰⵖⴹⴻⵍ.
5 ⵏⵉⵜⵏⵉ ⵜⵜⴻⵎⵛⴰⵡⴰⵔⴻⵏ ⵡⴰⵀⴰ ⵃⵉⵎⴰ ⴰⴷ ⵜ-ⵉ-ⴷⴷ ⵖⴻⴹⵍⴻⵏ ⵥⴻⴳ ⵡⴻⵎⵛⴰⵏ ⵏⵏⴻⵙ ⵢⵓⵄⵍⴰⵏ.
ⵏⵉⵜⵏⵉ ⴰⵔⴻⵟⵟⴰⵏ ⵙ ⵉⵅⴰⵔⵔⵉⵇⴻⵏ.
ⵜⵜⴱⴰⵔⴽⴻⵏ ⵙ ⵓⵇⴻⵎⵎⵓⵎ ⵏⵙⴻⵏ,
ⵎⴰⵛⴰ ⴷⴻⴳ ⵡⵓⵍ ⵏⵙⴻⵏ ⵏⴻⵄⵄⵍⴻⵏ. ⵙⵉⵍⴰⵀ. □
6 ⵔⴰⵊⴰ ⵉ ⴰⵔⴻⴱⴱⵉ ⵡⴰⵀⴰ, ⴰ ⵍⴻⵄⵎⴰⵔ ⵉⵏⵓ,
ⵎⵉⵏⵥⵉ ⵥⵥⴰⵢⴻⵙ ⵍⴰⵢⴰⵙ ⵉⵏⵓ.
7 ⴰⵇⴰ-ⵜⵜ ⴷ ⵜⴰⵚⴹⴰⵔⵜ ⵉⵏⵓ ⴷ ⵓⵙⴻⵏⵊⴻⵎ ⵉⵏⵓ,
ⵍⴱⵓⵔⵊ ⵉⵏⵓ ⵢⵓⵄⵍⴰⵏ, ⵡⴰⵔ ⵜⵜⴻⴼⵔⵉⵖⴻⵖ ⵛⴰ.
8 ⴰⵙⴻⵏⵊⴻⵎ ⵉⵏⵓ ⴷ ⵓⵄⵓⴵⵉ ⵉⵏⵓ ⴰⵇⴰ ⴰⵜⴻⵏ ⴷⵉ ⴰⵔⴻⴱⴱⵉ,
ⵏⴻⵜⵜⴰ ⴷ ⵜⴰⵚⴹⴰⵔⵜ ⵉⵏⵓ ⵉⵊⴻⵀⴷⴻⵏ, ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ ⴰⵇⴰ-ⵜ ⴷⵉ ⴰⵔⴻⴱⴱⵉ.
9 ⵜⵉⵇⵇⴻⵎ ⵍⴻⴱⴷⴰ ⴷⴰⵢⴻⵙ, ⴰ ⵍⴳⴻⵏⵙ!
ⵣⴻⴵⵄⴻⵎ ⵓⵍ ⵏⵡⴻⵎ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ.
ⴰⵔⴻⴱⴱⵉ ⴷ ⴰⵎⵛⴰⵏ ⵏⵏⴻⵖ ⵏ ⵜⴰⵔⴻⵡⵍⴰ. ⵙⵉⵍⴰⵀ.
10 ⵜⴰⵔⵡⴰ ⵏ ⴰⴷⴰⵎ ⴰⵇⴰ ⴰⵜⴻⵏ ⴱⴰⵟⴻⵍ,
ⵜⴰⵔⵡⴰ ⵏ ⵡⴻⵔⵢⴰⵥ ⴰⵇⴰ ⴷⴰⵢⵙⴻⵏ ⵍⵖⴻⵛⵛ.
ⴰⴷ ⴳⴻⵄⵄⴷⴻⵏ ⴷⵉ ⵍⵎⵉⵥⴰⵏ ⵙ ⵜⵏⴰⵢⴻⵏ ⵏ ⵟⵟⴰⵡⵢⴰⵜ,
ⴰⵇⴰ ⴰⵜⴻⵏ ⵊⵎⵉⵄ ⴼⴼⵖⴻⵏ-ⴷⴷ ⵥⵉ ⵍⴱⴰⵟⴻⵍ.
11 ⵡⴰⵔ ⵜⵜⴻⵛⵍⴻⵎ ⵅ ⴷⴷⴻⴵ,
ⵡⴰⵔ ⵜⵜⵓⴼⴼⴻⵎ ⴰⴽ-ⴷ ⵜⵓⴽⴽⴰⵔⴹⴰ.
ⵎⴰⵍⴰ ⴰⴳⵍⴰ ⵉⵎⴻⵇⵇⴰⵔ,
ⵡⴰⵔ ⵅⴰⵙ ⵙⵙⵔⵓⵙⴰⵎ ⵓⵍ ⵏⵡⴻⵎ.
12 ⴰⵔⴻⴱⴱⵉ ⵉⵙⵙⵉⵡⴻⵍ ⵉⵛⵜ ⵏ ⵜⵡⴰⵍⴰ, ⵏⴻⵛⵛ ⵙⵍⵉⵖ ⵜⵜ ⵜⵏⴰⵢⴻⵏ ⵏ ⵜⵡⴰⵍⴰⵡⵉⵏ,
ⴰⵇⴰ: “ⵊⵊⴻⵀⴷ ⵥⵉ ⴰⵔⴻⴱⴱⵉ”.
13 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵉ ⵛⴻⴽ, ⴰ ⵙⵉⴷⵉ ⵉⵏⵓ!
ⵎⵉⵏⵥⵉ ⵛⴻⴽ ⴰⴷ ⵜⵅⴻⴵⵚⴻⴷ ⴽⵓⵍ ⵉⵊⵊ ⵄⵍⴰⵃⵙⴰⴱ ⵎⵉⵏ ⵉⴳⴳⴰ. ■