59
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ‘ⵡⴰⵔ ⵜ ⵜⵜⴰⵔⴻⴷⴷⴻⴵ!’ ⵏ ⴷⴰⵡⵓⴷ. ⵜⵉⵔⴰ ⵉⵏⴻⵇⵛⴻⵏ.
ⵓⵎⵉ ⵛⴰⵡⵓⵍ ⵉⵊⵊⴰ ⴰⴷ ⵃⴹⴰⵏ ⵜⴰⴷⴷⴰⵔⵜ ⵏ ⴷⴰⵡⵓⴷ ⵃⵉⵎⴰ ⴰⴷ ⵜ ⵏⵖⴻⵏ. ■
2 ⴼⴻⴽⴽ ⴰⵢⵉ ⵥⵉ ⵍⵄⴻⴷⵢⴰⵏ ⵉⵏⵓ, ⴰ ⴰⵔⴻⴱⴱⵉ,
ⵙⴳⴻⵄⵄⴻⴷ ⴰⵢⵉ ⵙⴻⵏⵏⴻⵊ ⵖⴰⵔ ⵓⵃⴻⵟⵟⵓ ⵥⴻⴳ ⵉⵏⵏⵉ ⵅⴰⴼⵉ ⵉⵜⵜⴻⴽⴽⴰⵔⴻⵏ.
3 ⴼⴻⴽⴽ ⴰⵢⵉ ⵥⴻⴳ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ,
ⵙⴻⵏⵊⴻⵎ ⴰⵢⵉ ⵥⴻⴳ ⵉⵔⵢⴰⵥⴻⵏ ⵏ ⵉⴷⴰⵎⵎⴻⵏ.
4 ⴰⵇⴰ, ⵅⵥⴰⵔ, ⵏⵉⵜⵏⵉ ⴳⴳⵉⵏ ⵉⵛⵜ ⵏ ⵜⴻⵅⵛⴻⴼⵜ ⵉ ⵍⴻⵄⵎⴰⵔ ⵉⵏⵓ,
ⵏⵉⵜⵏⵉ ⵎⵓⵏⴻⵏ ⵅⴰⴼⵉ.
ⵡⴰⵔ ⴷⵉⵏ ⴰⵅⴻⵟⵟⵓ ⵓⵍⴰ ⴷ ⴷⴷⴻⵏⴱ ⵖⴰⵔⵉ, ⴰ ⵙⵉⴷⵉ!
5 ⵡⴰⵅⵅⴰ ⵡⴰⵔ ⴳⴳⵉⵖ ⵍⵊⴰⵔⵉⵎⴰ,
ⴰⵇⴰ ⵏⵉⵜⵏⵉ ⵥⴻⵄⵎⴰ ⵓⵙⵉⵏ-ⴷⴷ ⵜⵜⴰⵥⵥⵍⴻⵏ-ⴷⴷ ⵖⴰⵔⵉ ⵓ ⵙⵙⵡⴻⵊⵊⴰⴷⴻⵏ ⵉⵅⴻⴼ ⵏⵙⴻⵏ.
ⴼⴰⵇ, ⴰⵙ-ⴷⴷ ⵖⴰⵔ ⵓⵎⵙⴰⴳⴰⵔ ⴰⴽⵉⴷⵉ ⵓ ⵅⵥⴰⵔ.
6 ⵛⴻⴽ, ⴰ ⵙⵉⴷⵉ, ⴰⵔⴻⴱⴱⵉ ⵏ ⵍⵄⴻⵙⴽⴰⵔⴰⵜ, ⴰⵔⴻⴱⴱⵉ ⵏ ⵉⵙⵔⴰⵉⵍ,
ⴼⴰⵇ ⵃⵉⵎⴰ ⴰⴷ ⵜⵍⴻⵇⴼⴻⴷ ⵎⴰⵔⵔⴰ ⵍⴻⴳⵏⵓⵙ.
ⵡⴰⵔ ⵜⵜⵃⵉⵏⵏⵉ ⵅ ⵓⵍⴰ ⴷ ⵉⵊⵊ ⵥⵉ ⵎⴰⵔⵔⴰ ⵉⵖⴻⴷⴷⴰⵔⴻⵏ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ. ⵙⵉⵍⴰⵀ.
7 ⴰⵇⴰ ⵜⵜⵄⴻⵇⴱⴻⵏ ⵖⴰⵔ ⵜⵎⴻⴷⴷⵉⵜ,
ⵜⵜⵥⵓⵏ ⴰⵎⴻⵛⵏⴰⵡ ⴰⵇⵥⵉⵏ,
ⵓ ⵜⵜⴻⵏⵏⴹⴻⵏ ⵉ ⵜⴻⵏⴷⵉⵏⵜ.
8 ⵅⵥⴰⵔ, ⵙ ⵓⵇⴻⵎⵎⵓⵎ ⵏⵙⴻⵏ ⵙⵙⵓⵙⵓⴼⴻⵏ ⵇⴰⵄ,
ⵍⴻⵙⵢⵓⴼ ⵏⵙⴻⵏ ⴰⵇⴰ ⴰⵜⴻⵏ ⵅ ⵉⵢⴻⵏⵛⵉⵛⴻⵏ ⵏⵙⴻⵏ,
ⵎⵉⵏⵥⵉ ⵎⴰⵏ ⵡⴻⵏ ⵉ ⵖⴰ ⵉⵙⵍⴻⵏ? ■
9 ⵛⴻⴽ ⵎⴰⵛⴰ, ⴰ ⵙⵉⴷⵉ, ⴰⴷ ⵅⴰⵙⴻⵏ ⵜⴹⴻⵃⵛⴻⴷ,
ⵛⴻⴽ ⴰⴷ ⵜⵃⴻⵛⵛⴻⴷ ⵅ ⵎⴰⵔⵔⴰ ⵍⴻⴳⵏⵓⵙ. ■
10 ⴰ ⵊⵊⴻⵀⴷ ⵏⵏⴻⵙ, ⵏⴻⵛⵛ ⴰⴷ ⵜ ⵔⴰⵊⵉⵖ,
ⵎⴰⵖⴰⵔ ⴰⵔⴻⴱⴱⵉ ⴷ ⵍⴱⵓⵔⵊ ⵉⵏⵓ ⵢⵓⵄⵍⴰⵏ.
11 ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⴰⵔⴻⴱⴱⵉ ⵉⵏⵓ ⴰⴷ ⴰⵢⵉ ⵜⵉⵥⵡⴰⵔ,
ⴰⵔⴻⴱⴱⵉ ⴰⴷ ⴰⵢⵉ ⵢⴰⵔⵔ ⴰⴷ ⵥⴰⵔⴻⵖ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ.
12 ⵡⴰⵔ ⵜⴻⵏ ⵏⴻⵇⵇ ⵛⴰ, ⵎⴰⵃⴻⵏⴷ ⵍⴳⴻⵏⵙ ⵉⵏⵓ ⵡⴰⵔ ⵜ ⵉⵜⵜⴻⵜⵜⵓ.
ⴻⵊⵊ ⵉ-ⵜⴻⵏ ⴰⴷ ⵡⴻⴷⴷⴰⵔⴻⵏ ⵥⵉ ⵜⵥⴻⵎⵎⴰⵔ ⵏⵏⴻⴽ
ⵎⴻⵏⴹⴰⵔ ⵉ-ⵜⴻⵏ ⵙⵡⴰⴷⴷⴰⵢ, ⵎⴰⵖⴰⵔ ⵛⴻⴽ ⴷ ⵜⴰⵙⴻⴷⴷⴰⵔⵜ ⵏⵏⴻⵖ ⵉ ⵓⵙⴻⵍⵇⵉ, ⴰ ⵙⵉⴷⵉ ⵉⵏⵓ.
13 ⵅ ⴷⴷⵏⵓⴱ ⵏ ⵓⵇⴻⵎⵎⵓⵎ ⵏⵙⴻⵏ,
ⵅ ⵡⴰⵡⴰⵍⴻⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵥⴻⴳ ⵉⵢⴻⵏⵛⵉⵛⴻⵏ ⵏⵙⴻⵏ,
ⵅ ⵓⵢⴰ ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵃⴻⴱⴱⵙⴻⵏ ⴷⵉ ⵏⵏⴼⴰⵅⴻⵜ ⵏⵙⴻⵏ,
ⵓⵍⴰ ⵅ ⵏⵏⴻⵄⵍⴻⵜ ⵓ ⵅ ⵓⵅⴰⵔⵔⵉⵇ ⵏⵏⵉ ⵅⴻⴼ ⵜⵜⵃⴰⵔⴷⴻⵏ.
14 ⴽⴻⵃⵃⴻⴹ ⵉ-ⵜⴻⵏ ⴷⴻⴳ ⵡⴻⵙⵄⴰⵔ ⵏⵏⴻⴽ,
ⴽⴻⵃⵃⴻⴹ ⵉ-ⵜⴻⵏ ⴰⵍⴰⵎⵉ ⵡⴰⵔ ⴵⵉⵏ ⵄⴰⴷ,
ⵓ ⴰⵔⵔ ⵉ-ⵜⴻⵏ ⴰⴷ ⵙⵙⵏⴻⵏ, ⴰⵇⴰ ⴰⵔⴻⴱⴱⵉ ⴷ ⵍⵃⴰⴽⴻⵎ ⴷⵉ ⵢⴰⵄⵇⵓⴱ,
ⵖⴰⵔⴻⵙ ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ. ⵙⵉⵍⴰⵀ.
15 ⴰⵇⴰ ⴰⴷ ⵄⴻⵇⴱⴻⵏ ⵖⴰⵔ ⵜⵎⴻⴷⴷⵉⵜ,
ⵜⵜⵥⵓⵏ ⴰⵎⴻⵛⵏⴰⵡ ⴰⵇⵥⵉⵏ,
ⵓ ⵜⵜⴻⵏⵏⴹⴻⵏ ⵉ ⵜⴻⵏⴷⵉⵏⵜ.
16 ⴻⵊⵊ ⵉ-ⵜⴻⵏ ⵜⵜⴻⵎⵀⴰⴼⴰⵏ ⴷⴰ ⴷ ⴷⵉⵀⴰ ⵅ ⵎⴰⵛⵛⴰ,
ⴻⵊⵊ ⵉ-ⵜⴻⵏ ⵅⴻⵏⵏⵉ ⴰⴷ ⴷⵉⵏ ⵙⵙⴻⵏⵙⴻⵏ ⴱⴰⵔⵔⴰ, ⵎⴰⵍⴰ ⵡⴰⵔ ⵊⵊⵉⵡⵏⴻⵏ,
17 ⵏⴻⵛⵛ ⴰⴷ ⵖⴻⵏⵏⵊⴻⵖ ⵅ ⵊⵊⵀⴻⴷ ⵏⵏⴻⴽ,
ⵖⴰⵔ ⵜⴻⴼⴼⵓⵜ ⴰⴷ ⵙⵍⵉⵡⴻⵍⵡⴻⵖ ⵅ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,
ⵎⴰⵖⴰⵔ ⵜⵓⵖⴰ ⵛⴻⴽ ⴷ ⵉⵊⵊ ⵏ ⵍⴱⵓⵔⵊ ⵢⵓⵄⵍⴰⵏ ⵉ ⵏⴻⵛⵛ,
ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ ⵉⵏⵓ.
18 ⵊⵊⴻⵀⴷ ⵉⵏⵓ, ⵏⴻⵛⵛ ⴰⴷ ⵅⴰⴽ ⵥⴻⵀⵀⴷⴻⵖ,
ⵎⴰⵖⴰⵔ ⵛⴻⴽ ⴰⵔⴻⴱⴱⵉ ⴷ ⵍⴱⵓⵔⵊ ⵢⵓⵄⵍⴰⵏ ⵉⵏⵓ,
ⴰⵔⴻⴱⴱⵉ ⵏ ⵜⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ.