1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ‘ⵉⵛⵜ ⵏ ⵜⴻⴷⴱⵉⵔⵜ ⵉⴱⴻⴽⴽⵎⴻⵎ ⴷⴻⴳ ⵉⵎⵓⵛⴰⵏ ⵉⴳⴳⵯⴻⵊⴻⵏ’. ⵏ ⴷⴰⵡⵓⴷ. ⵜⵉⵔⴰ ⵉⵏⴻⵇⵛⴻⵏ. ⵍⴰⵎⵉ ⵜ ⵟⵟⴼⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⵉ ⵊⴰⵜ. ^■  

2 ⵃⵉⵏⵏ ⵅⴰⴼⵉ, ⴰ ⴰⵔⴻⴱⴱⵉ, ⵎⴰⵖⴰⵔ ⵉⵊⵊ ⵏ ⴱⵏⴰⴷⴻⵎ ⵢⴰⵔⴻⵥⵥⵓ ⴰⴷ ⴰⵢⵉ ⵉⵚⴰⵔⴹ,

ⵉⵃⴻⵚⵚⴰⵔ ⴰⵢⵉ ⵉⵊⵊ ⵏ ⵓⵎⵊⴰⵀⴻⴷ ⴰⵙⵙ ⵎⴰⵔⵔⴰ.

3 ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⵅⵙⴻⵏ ⴰⴷ ⴰⵢⵉ ⵚⴰⵔⴹⴻⵏ ⴰⵙⵙ ⵎⴰⵔⵔⴰ,

ⵎⴰⵖⴰⵔ ⵉⵏⵏⵉ ⴽⵉⴷⵉ ⵉⵜⵜⵎⴻⵏⵖⴰⵏ ⴰⵇⴰ ⴰⵜⴻⵏ ⴷⴻⴳ ⵡⴰⵟⵟⴰⵙ, ⴰ ⴰⵎⵄⵓⴵⵉ ⵅ ⴽⵓⵍⵛⵉ!

4 ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⴳⴳⵯⴻⴷⴻⵖ,

ⴰⴷ ⵅⴰⴽ ⵜⵜⴻⵛⵍⴻⵖ.

5 ⵅ ⴰⵔⴻⴱⴱⵉ, ⵡⴻⵏⵏⵉ ⵓⵎⵉ ⵖⴰ ⵚⴻⴱⵃⴻⵖ ⴰⵡⴰⵍ ⵏⵏⴻⵙ,

ⵅ ⴰⵔⴻⴱⴱⵉ ⵉ ⵜⵜⴻⵛⵍⴻⵖ, ⵡⴰⵔ ⵜⵜⴻⴳⴳⵯⵉⴷⴻⵖ ⵛⴰ,

ⵎⴰⵖⴰⵔ ⵎⵉⵏ ⵥⴻⵎⵎⴰⵔⴻⵏ ⴰⴷ ⴰⵢⵉ ⴳⴳⴻⵏ ⵎⵉⴷⴷⴻⵏ? ^□  

6 ⵏⵉⵜⵏⵉ ⵇⴻⴵⴱⴻⵏ ⴰⵡⴰⵍⴻⵏ ⵉⵏⵓ ⴰⵙⵙ ⵉⴽⵎⴻⵍ,

ⵎⴰⵔⵔⴰ ⵜⵏⴰⵡⵉ ⵏⵙⴻⵏ ⴰⵇⴰ ⴰⵜⴻⵏ ⵅⴰⴼⵉ ⴷ ⵍⵖⴰⵔ.

7 ⵏⵉⵜⵏⵉ ⵎⵓⵏⴻⵏ, ⵏⵓⴼⴼⴰⵔⴻⵏ,

ⵏⵉⵜⵏⵉ ⵃⴻⵟⵟⴰⵏ ⵉⵏⴰⵔⵥⵉⵡⴻⵏ ⵉⵏⵓ,

ⵅⵎⵉ ⴰⵔⴻⵥⵥⵓⵏ ⴰⴷ ⵏⵖⴻⵏ ⵍⴻⵄⵎⴰⵔ ⵉⵏⵓ.

8 ⵎⴰ ⵥⴻⵎⵎⴰⵔⴻⵏ ⴰⴷ ⴰⵔⴻⵡⵍⴻⵏ ⵡⴰⵅⵅⴰ ⴳⴳⵉⵏ ⵍⵖⴻⵛⵛ?

ⵙⴻⵀⵡⴰ ⵍⴻⴳⵏⵓⵙ ⴷⴻⴳ ⵡⴻⵖⴹⴰⴱ ⵏⵏⴻⴽ, ⴰ ⴰⵔⴻⴱⴱⵉ!

9 ⵛⴻⴽ ⵜⵃⴻⵙⵙⴱⴻⴷ ⵓⵙⵙⴰⵏ ⵏ ⵡⴻⵟⵍⴰⵄ ⵉⵏⵓ.

ⴻⴳⴳ ⵉⵎⴻⵟⵟⴰⵡⴻⵏ ⵉⵏⵓ ⴷⵉ ⵜⵥⴻⵢⵢⴰⵜ ⵏ ⵡⴰⵎⴰⵏ ⵏⵏⴻⴽ,

ⵎⴰ ⵡⴰⵔ ⴵⵉⵏⵜ ⴷⴻⴳ ⵡⴻⴷⵍⵉⵙ ⵏⵏⴻⴽ?

10 ⵅⴻⵏⵏⵉ ⴰⴷ ⴷⴻⵡⵍⴻⵏ ⵍⵄⴻⴷⵢⴰⵏ ⵉⵏⵓ ⵖⴰⵔ ⴹⴻⴼⴼⴰⵔ,

ⴷⴻⴳ ⵡⴰⵙⵙ ⵓⵎⵉ ⵖⴰ ⵍⴰⵖⵉⵖ.

ⵏⴻⵛⵛ ⵙⵙⵏⴻⵖ ⴰⵢⴰ: ⴰⵔⴻⴱⴱⵉ ⴰⵇⴰ-ⵜ ⴰⴽⵉⴷⵉ.

11 ⵅ ⴰⵔⴻⴱⴱⵉ, ⵡⴻⵏⵏⵉ ⵓⵎⵉ ⵖⴰ ⵙⵙⴻⵎⵖⴰⵔⴻⵖ ⴰⵡⴰⵍ ⵏⵏⴻⵙ,

ⵅ ⵙⵉⴷⵉ, ⵡⴻⵏⵏⵉ ⵓⵎⵉ ⵖⴰ ⵙⵙⴻⵎⵖⴰⵔⴻⵖ ⴰⵡⴰⵍ ⵏⵏⴻⵙ,

12 ⵅ ⴰⵔⴻⴱⴱⵉ ⵉ ⵅⴻⴼ ⵜⵜⴻⵛⵍⴻⵖ, ⵡⴰⵔ ⵜⵜⴻⴳⴳⵯⵉⴷⴻⵖ ⵛⴰ,

ⵎⴰⵖⴰⵔ ⵎⵉⵏ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⴰⵢⵉ ⵢⴻⴳⴳ? ^■  

13 ⵅⴰⴼⵉ, ⴰ ⴰⵔⴻⴱⴱⵉ, ⴰⵔⵙⵉⵏ ⵍⵡⵓⵄⵓⴷ ⵉ ⵛⴻⴽ ⵉⵜⵜⵡⴰⴳⴳⴻⵏ.

ⴰⴷ ⵜⴻⵏ ⴽⴻⵎⵎⵍⴻⵖ ⵉ ⵛⴻⴽ ⵙ ⵓⵇⴰⴷⵉ.

14 ⵎⴰⵖⴰⵔ ⵛⴻⴽ ⵜⴻⵙⵙⵏⴻⵊⵎⴻⴷ ⵍⴻⵄⵎⴰⵔ ⵉⵏⵓ ⵥⵉ ⵍⵎⴻⵡⵜ,

ⵓ ⵎⴰ ⵡⴰⵔ ⵜⴻⵃⴹⵉⴷ ⵓⵍⴰ ⴷ ⵉⴹⴰⵔⴻⵏ ⵉⵏⵓ ⵥⴻⴳ ⵓⵏⴻⵇⵔⴰⴹ,

ⵃⵉⵎⴰ ⴰⴷ ⵓⵢⵓⵔⴻⵖ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ ⴷⵉ ⵜⴼⴰⵡⵜ ⵏ ⵢⵉⵏⵏⵉ ⵉⴷⴷⴰⵔⴻⵏ?