1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵣⴻⴳ ⴰⵢⵜ ⵏ ⵇⵓⵔⴰⵃ.

ⵙ ⵍⵀⴰⵔⴱⴰⵜ ⵉⵜⵜⵡⴰⵔⵔⵉⴳⵍⴰⵏ ⵖⴰⵔ ⵙⴻⵏⵏⴻⵊ. ⵉⵥⵍⵉ.

2 ⴰⵔⴻⴱⴱⵉ ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ ⴷ ⵊⵊⴻⵀⴷ ⵉ ⵏⴻⵛⵛⵉⵏ.

ⴰⵇⴰ ⵉⴱⴰⵏ-ⴷⴷ ⵉⵜⵜⵉⵛ ⴰⴼⵓⵙ ⴰⵟⵟⴰⵙ ⴷⵉ ⵍⴻⵃⵚⴰⵔⴰⵜ.

3 ⵙ ⵓⵢⴻⵏⵏⵉ ⵡⴰⵔ ⵏⴻⵜⵜⴻⴳⴳⵯⴻⴷ ⵛⴰ,

ⵡⴰⵅⵅⴰ ⴰⴷ ⵜⴱⴻⴷⴷⴻⵍ ⵜⴰⵎⵎⵓⵔⵜ,

ⴰⴷ ⵏⵀⴻⵥⵥⴰⵏ ⵉⴷⵓⵔⴰⵔ ⴷⴻⴳ ⵡⵓⵍ ⵏ ⵍⴻⴱⵃⵓⵔ,

4 ⴰⴷ ⵀⴰⵊⴰⵏⵜ ⵍⵃⴻⵎⵍⴰⵜ ⵏⵏⴻⵙ, ⴰⴷ ⴳⴳⴻⵏⵜ ⴰⴽⵓⴼⴼⵓ,

ⴰⴷ ⵏⵀⴻⵥⵥⴻⵏ ⵉⴷⵓⵔⴰⵔ ⵙ ⵓⵏⵏⴻⵇⵍⴻⴱ ⵏⵏⴻⵙ! ⵙⵉⵍⴰⵀ.

5 ⵜⵉⵖⵥⴰⵔⵉⵏ ⵏ ⵢⴻⵖⵥⴰⵔ ⴰⴷ ⵙⵙⴼⴰⵔⵔⵃⴻⵏⵜ ⵜⴰⵏⴷⵉⵏⵜ ⵏ ⴰⵔⴻⴱⴱⵉ,

ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵏ ⵜⵥⴻⴷⴷⵉⵖⵉⵏ ⵏ ⵓⵎⵄⵓⴵⵉ ⵅ ⴽⵓⵍⵛⵉ.

6 ⴰⵔⴻⴱⴱⵉ ⴰⵇⴰ-ⵜ ⴷⵉ ⵍⵡⴻⵙⵜ ⵏⵏⴻⵙ, ⵡⴰⵔ ⵜᵉⵜⵜⴻⵏⵀⴻⵥⵥⴰ,

ⴰⵔⴻⴱⴱⵉ ⴰⴷ ⴰⵙ ⵉⵡⵛ ⴰⴼⵓⵙ ⵅⵎⵉ ⴷⴷ ⵖⴰ ⵜⴻⵙⵙⵉⵊ ⵜⵓⴼⴼⵓⵜ.

7 ⵍⴻⴳⵏⵓⵙ ⵎⵓⵥⵥⴰⵔⴻⵏ, ⵜⵉⴳⴻⵍⴷⵉⵡⵉⵏ ⵏⵀⴻⵥⵥⴻⵏⵜ.

ⵏⴻⵜⵜⴰ ⵉⴳⴳⴰ ⵜⵎⵉⵊⵊⴰ ⵏⵏⴻⵙ ⴰⴷ ⵜᵉⵜⵜⵡⴰⵙⴻⵍ, ⵜⴰⵎⵎⵓⵔⵜ ⴰⵇⴰ ⵜⴻⴼⵙⵉ.

8 ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⵇⴰ-ⵜ ⴰⴽⵉⴷⵏⴻⵖ,

ⴰⵔⴻⴱⴱⵉ ⵏ ⵢⴰⵄⵇⵓⴱ ⴷ ⵍⴱⵓⵔⵊ ⵏⵏⴻⵖ ⵢⵓⵄⵍⴰⵏ. ⵙⵉⵍⴰⵀ.

9 ⴰⵙⴻⵎ-ⴷⴷ, ⵅⵥⴰⵔⴻⵎ ⵜⵉⵎⴻⴳⴳⴰ ⵏ ⵙⵉⴷⵉ,

ⵏⴻⵜⵜⴰ ⵉ ⵉⴳⴳⵉⵏ ⵜⵉⵎⴻⵙⵍⴰⵢⵉⵏ ⵉⵙⵙⴰⴳⴳⵯⴰⴷⴻⵏ ⵅ ⵜⴻⵎⵎⵓⵔⵜ.

10 ⵏⴻⵜⵜⴰ ⵉⵙⵙⴱⴻⴷⴷⴰ ⵉⵎⴻⵏⵖⴰⵏ ⵖⴰⵔⴻⵙ ⴰⵍ ⴰⵏⴻⴳⴳⴰⵔ ⵏ ⵜⴻⵎⵎⵓⵔⵜ,

ⵏⴻⵜⵜⴰ ⴰⴷ ⵢⴰⵔⵥ ⵍⵇⴻⵡⵙ ⵓ ⵉⵛⵛⴰⵜ ⵍⴰⵏⵙⴰ ⴷⵉ ⵉⵡⴻⵜⵡⵉⵜⴻⵏ,

ⵉⴽⴰⵔⵔⵓⵜⴻⵏ ⵉⵙⵙⴻⵛⵎⴰⴹ ⵉ-ⵜⴻⵏ ⵙ ⵜⵎⴻⵙⵙⵉ.

11 ⵙⴱⴻⴷⴷ, ⵙⵏⴻⵎ ⵉⵍⵍⴰ ⴰⵇⴰ ⵏⴻⵛⵛ ⴷ ⴰⵔⴻⴱⴱⵉ.

ⵏⴻⵛⵛ ⴰⴷ ⵜⵜⵡⴰⵙⴳⴻⵄⵄⴷⴻⵖ ⵊⴰⵔ ⵍⴻⴳⵏⵓⵙ,

ⵏⴻⵛⵛ ⴰⴷ ⵜⵜⵡⴰⵙⴳⴻⵄⵄⴷⴻⵖ ⵅ ⵜⴻⵎⵎⵓⵔⵜ.

12 ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴰⵇⴰ-ⵜ ⴰⴽⵉⴷⵏⴻⵖ,

ⴰⵔⴻⴱⴱⵉ ⵏ ⵢⴰⵄⵇⵓⴱ ⴷ ⵍⴱⵓⵔⵊ ⵢⵓⵄⵍⴰⵏ ⵉ ⵏⴻⵛⵛⵉⵏ. ⵙⵉⵍⴰⵀ.