1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ.

2 ⵙⵙⴻⵄⴷ ⵏ ⵡⴻⵏⵏⵉ ⵉⴼⴻⵀⵀⵎⴻⵏ ⵉ ⵓⵎⴰⵔⵅⵓ.

ⵙⵉⴷⵉ ⴰⴷ ⵜ ⵉⴼⴻⴽⴽ ⴷⴻⴳ ⵡⴰⵙⵙ ⵏ ⵍⵖⴰⵔ.

3 ⵙⵉⴷⵉ ⴳⴳⵓⵔ ⴰⴷ ⵜ ⵉⵃⴹⴰ ⵓ ⴰⴷ ⵜ ⵢⴻⵊⵊ ⴰⴷ ⵉⴷⴷⴰⵔ,

ⵓⵛⴰ ⵏⴻⵜⵜⴰ ⴰⴷ ⵢⴰⵔⵔ ⵎⴻⵥⵔⵉ ⴷⵉ ⵜⴻⵎⵎⵓⵔⵜ.

ⵡⴰⵔ ⵜ ⵜⵜⵙⴻⵍⵍⴰⵎ ⵛⴰ ⵖⴰⵔ ⵎⵉⵏ ⴷⵉⵏ ⵉⴵⴰⵏ ⴷⵉ ⵍⴻⵄⵎⴰⵔ ⵏ ⵍⵄⴻⴷⵢⴰⵏ ⵏⵏⴻⵙ.

4 ⵙⵉⴷⵉ ⴰⴷ ⴽⵉⴷⴻⵙ ⵉⴱⴻⴷⴷ ⴷⵉ ⵜⴰⵙⵙⵓⵜ ⵏ ⵍⴻⵀⵍⴰⵛ.

ⵛⴻⴽ ⵜᵉⵜⵜⴱⴻⴷⴷⵍⴻⴷ ⵎⴰⵔⵔⴰ ⵔⴻⵛⵜⵓ ⵏⵏⴻⵙ ⵓⵎⵉ ⵉⵀⴻⴵⴻⵛ.

5 ⵏⴻⵛⵛ ⵏⵏⵉⵖ: “ⴰ ⵙⵉⴷⵉ, ⵃⵉⵏⵏ ⵅⴰⴼⵉ, ⵙⴳⴻⵏⴼⴰ ⵍⴻⵄⵎⴰⵔ ⵉⵏⵓ,

ⵎⴰⵖⴰⵔ ⵅⴹⵉⵖ ⴰⴽⵉⵛ.”

6 ⵍⵄⴻⴷⵢⴰⵏ ⵉⵏⵓ ⵙⵙⴰⵡⴰⵍⴻⵏ ⵅⴰⴼⵉ ⵙ ⵍⵖⴰⵔ:

“ⵎⴻⵍⵎⵉ ⵉ ⵖⴰ ⵉⵎⵎⴻⵜ ⵓ ⴰⴷ ⵉⵜⵜⵡⴰⴽⴽⴻⵙ ⵉⵙⴻⵎ ⵏⵏⴻⵙ?”

7 ⵎⴰⵍⴰ ⵢⵓⵙⴰ-ⴷⴷ ⵃⴻⴷ ⵎⴰⵃⴻⵏⴷ ⴰⴷ ⵉⵥⴰⵔ, ⵉⵙⵙⴰⵡⴰⵍ ⴷⵉ ⵍⴱⴰⵟⴻⵍ.

ⵓⵍ ⵏⵏⴻⵙ ⵉⵙⵙⵎⵓⵏ ⵖⴰⵔⴻⵙ ⵍⵖⴻⵛⵛ,

ⵅⴻⵏⵏⵉ ⵉⵜⵜⴻⴼⴼⴻⵖ ⵖⴰⵔ ⴱⴰⵔⵔⴰ, ⵉⵙⵙⴰⵡⴰⵍ.

8 ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⵜⴻⵎⵜⴰⵎⵏⴻⵏ ⵅⴰⴼⵉ ⵊⵎⵉⵄ,

ⴰⵇⴰ-ⵜⴻⵏ ⵜⵜⵅⴰⵔⵔⵉⵚⴻⵏ ⴷⴰⵢⵉ ⵎⴰⵃⴻⵏⴷ ⴰⴷ ⴰⵢⵉ ⴳⴳⴻⵏ ⵍⵖⴰⵔ.

9 ⵉⵍⵇⴻⴼ ⵉ-ⵜ ⴰⵛⵜⴰⴱ ⴰⴱⴰⵔⵛⴰⵏ,

ⵓ ⵡⴻⵏⵏⵉ ⴷⴷ-ⵉⵡⴹⴰⵏ ⴰⵎⵎⵓ, ⵡⴰⵔ ⴷⴷ-ⵉⵜⵜⴻⴽⴽⴰⵔ ⵄⴰⴷ.

10 ⵓⵍⴰ ⴷ ⴰⵔⵢⴰⵥ ⵏⵏⵉ ⵡⵉ ⴰⴽ-ⴷ ⴷⴷⴰⵔⴻⵖ ⴷⵉ ⵍⴻⵀⵏⴰ,

ⵡⴻⵏⵏⵉ ⴷⵉ ⵜⵜⵉⵇⵇⵉⵖ, ⵡⴻⵏⵏⵉ ⵉⵛⵛⴻⵏ ⴰⵖⵔⵓⵎ ⵉⵏⵓ,

ⴰⵇⴰ ⵉⵙⵙⴻⵎⵖⴰⵔ ⵅⴰⴼⵉ ⴰⵏⵉⵔⵥ ⵏⵏⴻⵙ. ^■  

11 ⵛⴻⴽ ⵎⴰⵛⴰ, ⴰ ⵙⵉⴷⵉ, ⵃⵉⵏⵏ ⵅⴰⴼⵉ ⵓ ⵙⵏⴻⴽⴽⴰⵔ ⴰⵢⵉ-ⴷⴷ,

ⵅⴻⵏⵏⵉ ⵏⴻⵛⵛ ⴰⴷ ⵜⴻⵏ ⵅⴻⴵⵚⴻⵖ.

12 ⵙ ⵎⴰⵏ ⴰⵢⴰ ⴰⴷ ⵙⵙⵏⴻⵖ ⴰⵇⴰ ⵓⵙⵉⵖ ⴰⵛ-ⴷⴷ ⵉ ⵛⴻⴽ ⵅ ⵍⵅⴰⴹⴰⵔ,

ⵎⴰⵃⴻⵏⴷ ⵍⴻⵄⴷⵓ ⵉⵏⵓ ⵡⴰⵔ ⵥⵥⴰⵢⵉ ⵉⴼⴰⵔⵔⴻⵃ ⵙ ⵓⵙⵍⵉⵡⵍⴻⵡ.

13 ⵓ ⵅⴰⴼⵉ, ⴰⵇⴰ ⵛⴻⴽ ⵜⵜⵉⵛⴻⴷ ⴰⵢⵉ ⴰⴼⵓⵙ ⴷⵉ ⵙⵙⵉⴱⴱⴻⵜ ⵏ ⵍⴻⴽⵎⴰⵔⴻⵜ ⵉⵏⵓ,

ⵜⴻⵙⵙⴱⴻⴷⴷⴻⴷ ⴰⵢⵉ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⵉ ⵍⴻⴱⴷⴰ.

14 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ,

ⵥⵉ ⵍⴻⴱⴷⴰ ⴰⵍ ⵉ ⵍⴻⴱⴷⴰ! ⴰⵎⵉⵏ, ⵡⴰⵀ ⴰⵎⵉⵏ!