40
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵏ ⴷⴰⵡⵓⴷ. ⴰⵥⴻⵀⵀⴻⴷ. 2 ⵙⵙⵉⵜⵉⵎⴻⵖ ⵇⴰⵄ ⵅ ⵙⵉⴷⵉ.
ⵏⴻⵜⵜⴰ ⵢⴰⵔⵔⴰ-ⴷⴷ ⵖⴰⵔⵉ ⵙ ⵓⵥⴻⴵⵉⴼ,
ⵉⵙⵙⵃⴻⵙⵙ ⵖⴰⵔ ⵓⵖⵓⵢⵢⵉ ⵉⵏⵓ.
3 ⵏⴻⵜⵜⴰ ⵉⵙⵙⴳⴻⵄⵄⴻⴷ ⴰⵢⵉ-ⴷⴷ ⵥⴻⴳ ⵉⵊⵊ ⵏ ⵡⴰⵏⵓ ⵉⵏⴻⵇⵇⴻⵏ,
ⵥⴻⴳ ⵓⴱⴻⴵⴰⵄ ⴷ ⵓⴱⴰⵔⵢⵓⴹ,
ⵏⴻⵜⵜⴰ ⵉⵙⵙⴰⵔⵙ ⵉⴹⴰⵔⴻⵏ ⵉⵏⵓ ⵅ ⵜⴻⵚⴹⴰⵔⵜ,
ⵉⵙⵙⴻⵎⵜⴻⵏ ⵉⵚⵓⵔⴰⴼ ⵉⵏⵓ.
4 ⵏⴻⵜⵜⴰ ⵉⴳⴳⴰ ⴰⵢⵉ ⵉⵊⵊ ⵏ ⵢⴻⵥⵍⵉ ⴷ ⴰⵎⴰⵢⵏⵓ ⴷⴻⴳ ⵓⵇⴻⵎⵎⵓⵎ ⵉⵏⵓ,
ⵉⵊⵊ ⵏ ⵉⵥⵍⵉ ⵏ ⵓⵚⴻⴱⴱⴻⵃ ⵉ ⴰⵔⴻⴱⴱⵉ.
ⴰⵟⵟⴰⵙ ⴰⴷ ⵜ ⵥⴰⵔⴻⵏ, ⴰⴷ ⵜⴻⵛⵍⴻⵏ ⵅ ⵙⵉⴷⵉ.
5 ⵙⵙⴻⵄⴷ ⵏ ⵡⴻⵔⵢⴰⵥ ⵉⵊⴻⵀⴷⴻⵏ ⵡⴻⵏⵏⵉ ⵉⵜⵜⴻⵛⵍⴻⵏ ⵅ ⵙⵉⴷⵉ,
ⵡⴻⵏⵏⵉ ⵡⴰⵔ ⵉⵜⵜⵎⴻⵢⵢⵍⴻⵏ ⵖⴰⵔ ⴰⵢⵜ ⵏ ⴱⵓ-ⵏⵏⴼⴰⵅⴻⵜ,
ⵓⵍⴰ ⵖⴰⵔ ⵢⴻⵏⵏⵉ ⵉⵡⴻⴷⴷⴰⵔⴻⵏ ⵖⴰⵔ ⵓⵅⴰⵔⵔⵉⵇ.
6 ⴰⵟⵟⴰⵙ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⴷ ⵍⵎⵓⵄⵊⵉⵥⴰⵜ ⵏⵏⵉ ⵜⴻⴳⴳⵉⴷ,
ⵓⵍⴰ ⴷ ⵎⵉⵏ ⵜⴻⵏⵡⵉⴷ ⵅⴰⵏⴻⵖ.
ⵓⵍⴰ ⴷ ⵉⵊⵊ ⵉⵥⴻⵎⵎⴰⵔ ⴰⴷ ⵉⵄⴱⴰⵔ ⵉⵅⴻⴼ ⵏⵏⴻⵙ ⴰⴽⵉⴷⴻⴽ.
ⵏⴻⵛⵛ ⴰⴷ ⵜⴻⵏⵜ ⵀⴰⵊⵉⵖ, ⴰⴷ ⵥⵥⴰⵢⵙⴻⵏⵜ ⵙⵙⵉⵡⵍⴻⵖ.
ⴰⵇⴰ ⵏⵉⵜⴻⵏⵜⵉ ⴷⴻⴳ ⵡⴰⵟⵟⴰⵙ ⵡⴰⵔ ⵥⴻⵎⵎⴰⵔⴻⵏ ⴰⴷ ⵜⵜⵡⴰⵃⴻⵙⴱⴻⵏ.
7 ⵡⴰⵔ ⵜⴻⵅⵙⴻⴷ ⵜⴰⵖⴰⵔⵚⵜ ⴷ ⵜⴻⵡⵀⵉⴱⵜ ⵏ ⵍⵖⵉⴵⴻⵜ.
ⵛⴻⴽ ⵜⴰⵔⵥⵎⴻⴷ ⵉⵎⴻⵥⵥⵓⵖⴻⵏ ⵉⵏⵓ.
ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⴷ ⵜⵖⴰⵔⵚⵜ ⵏ ⴷⴷⴻⵏⴱ ⵡⴰⵔ ⵜⴻⵏⵜ ⵜᵉⵜⵜⴰⵔⴻⴷ. ■
8 ⵅⴻⵏⵏⵉ ⵏⵏⵉⵖ: “ⵅⵥⴰⵔ, ⵏⴻⵛⵛ ⴰⴷ ⴷⴷ-ⴰⵙⴻⵖ,
ⴷⴻⴳ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵢⵓⵔⴰ ⵅⴰⴼⵉ.
9 ⵏⴻⵛⵛ ⵖⴰⵔⵉ ⵎⴻⵥⵔⵉ, ⴰ ⴰⵔⴻⴱⴱⵉ, ⵃⵉⵎⴰ ⴰⴷ ⴳⴳⴻⵖ ⵎⵉⵏ ⵜⴻⵅⵙⴻⴷ ⵛⴻⴽ.
ⵛⵛⴰⵔⵉⵄⴰ ⵏⵏⴻⴽ ⴰⵇⴰ-ⵜⵜ ⴷⵉ ⴷⴰⵅⴻⵍ ⵏ ⵉⵏⵓ.” ■
10 ⵏⴻⵛⵛ ⵜⵜⴱⴰⵔⵔⵃⴻⵖ ⵍⴻⵅⴱⴰⵔ ⴰⵚⴻⴱⵃⴰⵏ ⵏ ⵜⵙⴻⴳⴷⴰ ⵏⵏⴻⴽ
ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ ⴰⵎⴻⵇⵇⵔⴰⵏ.
ⵅⵥⴰⵔ, ⵡⴰⵔ ⵜⵜⴻⵇⵇⵏⴻⵖ ⵉⵢⴻⵏⵛⵉⵛⴻⵏ ⵉⵏⵓ, ⴰ ⵙⵉⴷⵉ, ⵛⴻⴽ ⵜⴻⵙⵙⵏⴻⴷ ⵜ. ■
11 ⵡⴰⵔ ⵜⵜⵅⴻⵎⵎⵍⴻⵖ ⵜⴰⵙⴻⴳⴷⴰ ⵏⵏⴻⴽ ⴷⴰⵅⴻⵍ ⴷⴻⴳ ⵡⵓⵍ ⵉⵏⵓ,
ⵙⵙⴰⵡⴰⵍⴻⵖ ⵅ ⵜⵉⴷⴻⵜⵜ ⵏⵏⴻⴽ ⵓ ⵅ ⵓⵙⴻⵏⵊⴻⵎ ⵏⵏⴻⴽ.
ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵉ ⴷⴰⵢⴻⴽ
ⵡⴰⵔ ⵜⴻⵏ ⵙⵙⵏⵓⴼⴼⴰⵔⴻⵖ ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ ⴰⵎⴻⵇⵇⵔⴰⵏ.
12 ⵛⴻⴽ, ⴰ ⵙⵉⴷⵉ, ⵡⴰⵔ ⵅⴰⴼⵉ ⵜⴻⵙⵙⴱⴻⴷⴷⵉⴷ ⴰⵔⵔⴻⵃⵎⴻⵜ ⵏⵏⴻⴽ.
ⴻⵊⵊ ⵜⴰⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ ⵉ ⴷⴰⵢⴻⴽ ⴰⴷ ⴰⵢⵉ ⵃⴹⴰⵏⵜ ⵍⴻⴱⴷⴰ.
13 ⵎⴰⵖⴰⵔ ⵡⴰⵔ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵃⴻⵚⵚⴻⴱ ⵍⵖⴰⵔ ⵉ ⴷ ⴰⵢⵉ ⵉⵇⵓⵡⵡⴰⵔⴻⵏ,
ⵍⵎⵓⵄⵚⵉⵢⵢⴰⵜ ⵉⵏⵓ ⵜⵜⵎⴻⵏⵄⴻⵏ ⴰⵢⵉ-ⴷⴷ,
ⴷⴻⵡⵍⴻⵖ ⵡⴰⵔ ⵜⵜⵡⵉⵍⵉⵖ ⵄⴰⴷ ⵙ ⵎⴰⵏ ⴰⵢⴰ.
ⴰⵇⴰ-ⵜⴻⵏⵜ ⴷ ⴰⵟⵟⴰⵙ ⵅ ⵓⵛⴻⵡⵡⴰⴼ ⵏ ⵓⵥⴻⴵⵉⴼ ⵉⵏⵓ,
ⵓⵍ ⵉⵏⵓ ⵉⵜⵜⴻⴼⵛⵉⵍ.
14 ⴰ ⵙⵉⴷⵉ, ⴰⴷ ⴰⵛ ⵢⴰⵔⴹⴰ ⵃⵉⵎⴰ ⴰⴷ ⴰⵢⵉ ⵜⴻⵙⵙⵏⴻⵊⵎⴻⴷ,
ⴰ ⵙⵉⴷⵉ, ⴷⴻⵖⵢⴰⵜ ⵃⵉⵎⴰ ⴰⴷ ⴰⵢⵉ ⵜⴻⵡⵛⴻⴷ ⴰⴼⵓⵙ.
15 ⴻⵊⵊ ⵉⵏⵏⵉ ⵢⴰⵔⴻⵥⵥⵓⵏ ⵍⴻⵄⵎⴰⵔ ⵉⵏⵓ ⵃⵉⵎⴰ ⴰⴷ ⵜ ⵜⴻⵃⵃⴰⵏ,
ⴰⴷ ⵜⵜⵡⴰⵅⴰⵔⵡⴻⴹⴻⵏ, ⴰⴷ ⵙⵙⵏⵓⴼⴰⵔⴻⵏ ⵉⵅⴻⴼ ⵏⵙⴻⵏ ⵊⵎⵉⵄ,
ⴻⵊⵊ ⵉⵏⵏⵉ ⵉⴼⴰⵔⵔⵃⴻⵏ ⴷⴻⴳ ⵓⵄⴻⴷⴷⴻⴱ ⵉⵏⵓ
ⴰⴷ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ ⵓ ⴰⴷ ⵜⵜⵡⴰⵙⴱⴻⵀⴷⵍⴻⵏ. ■
16 ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵔⴻⴷⴷⴵⴻⵏ ⴰⵎ ⵓⵅⴻⴵⴻⵚ ⵉ ⵍⴻⴼⴹⵉⵃⴻⵜ ⵏⵙⴻⵏ ⵉ ⵉⴳⴳⵉⵏ,
ⵉⵏⵏⵉ ⴷⵉⵏ ⵉⵇⵇⴰⵔⴻⵏ: “ⵀⴰ, ⵀⴰ!”
17 ⴻⵊⵊ ⵎⴰⵔⵔⴰ ⵉⵏⵏⵉ ⵅⴰⴽ ⵢⴰⵔⴻⵥⵥⵓⵏ ⴰⴷ ⴰⵔⵔⴻⵏ ⵎⴻⵥⵔⵉ, ⴰⴷ ⵥⵥⴰⵢⴻⴽ ⴼⴰⵔⵃⴻⵏ.
ⴻⵊⵊ ⵉⵏⵏⵉ ⵉⵜⵜⴻⵅⵙⴻⵏ ⴰⵙⴻⵏⵊⴻⵎ ⵏⵏⴻⴽ ⴰⴷ ⵉⵏⵉⵏ ⵍⴻⴱⴷⴰ: “ⵙⵉⴷⵉ ⴷ ⴰⵎⴻⵇⵇⵔⴰⵏ!”
18 ⵏⴻⵛⵛ ⴷⵉ ⵍⴻⵖⴱⴻⵏ ⵓ ⵥⴻⵍⴹⴻⵖ, ⵎⴰⵛⴰ ⵙⵉⴷⵉ ⵉⵏⵓ ⵉⵄⵇⴻⵍ ⵅⴰⴼⵉ.
ⵛⴻⴽ ⴷ ⵡⴻⵏⵏⵉ ⴷ ⴰⵢⵉ ⵉⵡⵛⵉⵏ ⴰⴼⵓⵙ ⴷ ⵡⴻⵏⵏⵉ ⴷ ⴰⵢⵉ ⵉⵙⵙⵏⴻⵊⵎⴻⵏ.
ⴰ ⴰⵔⴻⴱⴱⵉ ⵉⵏⵓ, ⵡⴰⵔ ⵜⵜⵄⴻⵟⵟⴰⵍ ⵛⴰ.