1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵉ ⵢⴰⴷⵓⵜⵓⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ.

2 ⵏⵏⵉⵖ: “ⵏⴻⵛⵛ ⴰⴷ ⴽⴽⴰⵔⴻⵖ ⴰⴷ ⵃⴹⵉⵖ ⵉⴱⵔⵉⴷⴻⵏ ⵉⵏⵓ ⵥⵉ ⴷⴷⴻⵏⴱ ⵏ ⵢⵉⵍⴻⵙ ⵉⵏⵓ,

ⴰⴷ ⵟⵟⴼⴻⵖ ⴰⵃⴻⵟⵟⵓ ⵖⴰⵔ ⵓⵇⴻⵎⵎⵓⵎ ⵉⵏⵓ ⵙ ⵉⵛⵜ ⵏ ⵜⴻⵛⵎⴰⵏⵜ,

ⵎⵉⵏ ⵖⴰ ⵢⴻⴽⴽ ⵓⵄⴻⴼⴼⴰⵏ ⵥⵥⴰⵜⵉ.”

3 ⵏⴻⵛⵛ ⴷⴻⵡⵍⴻⵖ ⴰⵎ ⵡⴻⵢⵏⴰⵡ ⵓ ⵍⴻⵃⵃⴼⴻⵖ ⵉⵅⴻⴼ ⵉⵏⵓ ⵙ ⵓⵙⴻⵖⴷ,

ⴱⴻⴽⵎⴻⵖ ⵓⵍⴰ ⵅ ⵍⵅⴰⵔ,

ⵎⴰⵛⴰ ⵍⴻⵃⵔⵉⵇ ⵉⵏⵓ ⵜⵓⵖⴰ ⵢⴰⵔⴻⵏⵏⵉ.

4 ⵓⵍ ⵉⵏⵓ ⵉⴷⵡⴻⵍ ⵉⵃⴻⵎⵎⴰ ⴷⵉ ⴷⴰⵅⴻⵍ ⵉⵏⵓ,

ⵜᵉⵜⵜⵡⴰⵙⴰⵔⴻⵖ ⵉⵛⵜ ⵏ ⵜⵎⴻⵙⵙⵉ ⵖⴰⵔ ⵓⵏⵉⵅⵙⴻⵙ ⵉⵏⵓ.

ⵅⴻⵏⵏⵉ ⵙⵙⵉⵡⵍⴻⵖ ⵙ ⵢⵉⵍⴻⵙ ⵉⵏⵓ:

5 “ⴰ ⵙⵉⴷⵉ, ⵙⵛⴻⵏ ⴰⵢⵉ ⴰⵏⴻⴳⴳⴰⵔ ⵉⵏⵓ,

ⵎⴰⵏ ⵉⴵⴰ ⵍⵇⴻⴷⴷ ⵏ ⵡⵓⵙⵙⴰⵏ ⵉⵏⵓ,

ⵃⵉⵎⴰ ⴰⴷ ⵙⵙⵏⴻⵖ ⵎⴰⵎⵎⴻⵛ ⴰⵔⵅⴼⴻⵖ.

6 ⵅⵥⴰⵔ, ⵛⴻⴽ ⵜⴰⵔⵔⵉⴷ ⵓⵙⵙⴰⵏ ⵉⵏⵓ ⴰⵎ ⵉⵛⴱⴰⵔⴻⵏ ⵏ ⵓⴼⵓⵙ,

ⵜⴰⵥⵥⵓⴳⴳⴰⵔⵜ ⵏ ⵜⵓⴷⴰⵔⵜ ⵉⵏⵓ ⵥⵥⴰⵜ ⵉ ⵛⴻⴽ ⴰⵅⵎⵉ ⴷ ⵡⴰⵍⵓ.

ⴽⵓⵍ ⴱⵏⴰⴷⴻⵎ, ⵎⴰⵎⵎⴻⵛ ⵎⴰ ⵉⴱⴻⴷⴷ ⵉⵎⵜⴻⵏ,

ⵏⵉⵛⴰⵏ ⴰⵎ ⵉⵛⵜ ⵏ ⵜⴰⵢⵢⵓⵜ.” ⵙⵉⵍⴰⵀ. ^■  

7 ⵉⵡⴰ, ⴱⵏⴰⴷⴻⵎ ⵉⴳⴳⵓⵔ ⴰⵎ ⵉⵊⵊ ⵏ ⵍⴻⵅⵢⴰⵍ,

ⵡⴰⵀ, ⴰⵎ ⵉⵛⵜ ⵏ ⵜⴰⵢⵢⵓⵜ ⴰⵎⵎⵓ ⵉ ⵉⵜⵜⵔⴰⵃ ⵉⵜⵜⴰⵙ-ⴷⴷ.

ⵏⴻⵜⵜⴰ ⵉⵙⵙⵎⵓⵏ, ⵡⴰⵔ ⵉⵙⵙⵉⵏ ⵎⴰⵏ ⵡⴻⵏ ⵜ ⵉ ⵖⴰ ⵉⴽⵙⵉⵏ ⵖⴰⵔⴻⵙ.

8 ⵓ ⵍⴻⵅⵅⵓ ⵎⵉⵏ ⵖⴰ ⵙⵙⵉⵜⵎⴻⵖ, ⴰ ⵙⵉⴷⵉ ⵉⵏⵓ?

ⴰⵇⴰ ⵏⴻⵛⵛ ⵜⵜⵔⴰⵊⵉⵖ ⵛⴻⴽ!

9 ⴼⴻⴽⴽ ⴰⵢⵉ ⵥⵉ ⵎⴰⵔⵔⴰ ⵉⵅⴻⵟⵟⴰⵏ ⵉⵏⵓ,

ⵡⴰⵔ ⴷ ⴰⵢⵉ ⵜⵜⴻⴳⴳ ⵛⴰ ⴷ ⵜⵉⵙⴻⴹⵃⴰⵛ ⵉ ⵓⴱⵓⵃⴰⵍⵉ.

10 ⵏⴻⵛⵛ ⴷⴻⵡⵍⴻⵖ ⴰⵎ ⵡⴻⵢⵏⴰⵡ, ⵡⴰⵔ ⴰⵔⴻⵥⵥⵎⴻⵖ ⴰⵇⴻⵎⵎⵓⵎ ⵉⵏⵓ,

ⵎⴰⵖⴰⵔ ⴷ ⵛⴻⴽ ⵉ ⵉⴳⴳⵉⵏ ⴰⵢⴰ.

11 ⴽⵙⵉ ⵥⵥⴰⵢⵉ ⵊⵊⵔⵉⵃⴻⵛⵜ ⵏⵏⴻⴽ,

ⴰⵇⴰ ⴼⴻⵏⵏⵉⵖ ⵙ ⵓⵟⴻⴼⴼⵓ ⵉⵃⴻⵚⵚⴰⵔⴻⵏ ⵏ ⵓⴼⵓⵙ ⵏⵏⴻⴽ.

12 ⵎⴰⵍⴰ ⵜⵙⴻⴳⴳⴷⴻⴷ ⵛⴰ ⵏ ⵡⴻⵔⵢⴰⵥ ⵙ ⵜⵉⵢⵢⵉⵜⴰ ⴷⵉ ⵙⵙⵉⴱⴱⴻⵜ ⵏ ⵍⵎⵓⵄⵚⵉⵢⵢⴻⵜ ⵏⵏⴻⵙ,

ⵅⴻⵏⵏⵉ ⵜⴻⵙⵙⴼⴻⵙⵢⴻⴷ ⴰⵛⴻⵡⵡⴰⵔ ⵏ ⵡⴰⴷⴷⵓⴷ ⵏⵏⴻⵙ ⴰⵎ ⵜⵛⵉⵏⴷⴰ.

ⵉⵡⴰ ⴽⵓⵍ ⴱⵏⴰⴷⴻⵎ ⴰⴷ ⵉⴼⵏⴰ ⴰⵎ ⵉⵛⵜ ⵏ ⵜⴰⵢⵢⵓⵜ. ⵙⵉⵍⴰⵀ.

13 ⵙⴻⵍ ⵉ ⵜⵥⴰⴵⵉⵜ ⵉⵏⵓ, ⴰ ⵙⵉⴷⵉ, ⵓ ⵙⵃⴻⵙⵙ ⵉ ⵓⵖⵓⵢⵢⵉ ⵉⵏⵓ.

ⵡⴰⵔ ⵜⵜⴻⴱⴽⵉⵎ ⵖⴰⵔ ⵉⵎⴻⵟⵟⴰⵡⴻⵏ ⵉⵏⵓ,

ⵎⴰⵖⴰⵔ ⴰⵇⴰ ⴰⵢⵉ ⴷ ⴰⴱⴰⵔⵔⴰⵏⵉ, ⴷ ⴰⵎⵄⴻⵥⵥⴻⴱ ⵖⴰⵔⴻⴽ, ⴰⵎ ⵎⴰⵔⵔⴰ ⵍⴻⵊⴷⵓⴷ ⵉⵏⵓ. ^■  

14 ⵙⵃⴻⵢⵢⴻⴷ ⵅⴰⴼⵉ ⵎⴰⵃⴻⵏⴷ ⴰⴷ ⵛⴻⵄⵛⴻⵄⴻⵖ ⵄⴰⴷ ⵙ ⵍⴻⴼⵔⴰⵃⴻⵜ,

ⵇⴱⴻⵍ ⴰⴷ ⵔⴰⵃⴻⵖ ⵓ ⵡⴰⵔ ⴷⴰ ⵜⵜⵉⵍⵉⵖ ⵄⴰⴷ.