38
1 ⴰⵥⴻⵀⵀⴻⴷ ⵏ ⴷⴰⵡⵓⴷ. ⵉ ⵍⵉⴷⴰⵔⴻⵜ. 2 ⴰ ⵙⵉⴷⵉ, ⵡⴰⵔ ⴷ ⴰⵢⵉ ⵜⵜⵄⴰⵇⴰⴱ ⴷⴻⴳ ⵓⴷⵓⵇⵇⴻⵥ ⵏ ⵡⴻⵖⴹⴰⴱ ⵏⵏⴻⴽ,
ⵡⴰⵔ ⴷ ⴰⵢⵉ ⵜⵜⵡⴻⴷⴷⴰⴱ ⵙ ⵡⴻⵙⵄⴰⵔ ⵏⵏⴻⴽ. ■
3 ⵎⴰⵖⴰⵔ ⴼⵍⵉⵜⵛⴰⵜ ⵏ ⵍⵇⴻⵡⵙ ⵏⵏⴻⴽ ⵓⴷⴼⴻⵏⵜ ⴷⴰⵢⵉ,
ⴰⴼⵓⵙ ⵏⵏⴻⴽ ⵉⵜⵜⵥⴻⵢⵢⴰⵔ ⵅⴰⴼⵉ.
4 ⵡⴰⵔ ⴷⵉⵏ ⵉⵇⵇⵉⵎ ⵎⵉⵏ ⵉⴵⴰⵏ ⵉⴽⴻⵎⵎⵍⴻⵏ ⴷⵉ ⴰⵔⵔⵉⵎⴻⵜ ⵉⵏⵓ ⵥⴻⴳ ⵡⴻⵙⵅⴻⴹ ⵏⵏⴻⴽ,
ⵡⴰⵔ ⵉⵇⵇⵉⵎ ⵎⵉⵏ ⵉⵚⴻⵃⵃⴻⵏ ⴷⴻⴳ ⵉⵅⵙⴰⵏ ⵉⵏⵓ ⵥⵉ ⵙⵙⵉⴱⴱⴻⵜ ⵏ ⴷⴷⴻⵏⴱ ⵉⵏⵓ. □
5 ⵎⴰⵖⴰⵔ ⵍⵎⵓⵄⵚⵉⵢⵢⴰⵜ ⵉⵏⵓ ⴳⴻⵄⵄⴷⴻⵏⵜ ⴰⵢⵉ ⵖⴰⵔ ⵓⵥⴻⴵⵉⴼ ⵉⵏⵓ,
ⴷⴻⵇⵇⵍⴻⵏⵜ ⵅⴰⴼⵉ ⴰⵎ ⵉⵊⵊ ⵏ ⴷⴷⵇⴻⵍ ⵉⵎⵖⴰⵔ ⴰⵟⵟⴰⵙ.
6 ⵉⵢⴻⵥⵥⵉⵎⴻⵏ ⵉⵏⵓ ⴷⴰⵢⵙⴻⵏ ⴰⵔⵔⵉⵃⴻⵜ ⵓ ⴳⴻⵢⵢⵃⴻⵏ ⵙ ⵜⵓⴱⴱⵓⵀⴻⵍⵢⴰ ⵉⵏⵓ.
7 ⴷⴻⵡⵍⴻⵖ ⵇⴻⵡⵙⴻⵖ, ⴷⴻⵡⵍⴻⵖ ⵖⴻⵏⵙⴻⵖ ⴰⵍ ⵟⵟⴰⵔⴼ.
ⴰⵙⵙ ⵎⴰⵔⵔⴰ ⴳⴳⵓⵔⴻⵖ ⴷⴻⴳ ⵡⴰⵔⵔⵓⴹ ⵏ ⵡⴻⵛⴹⴰⵏ ⴷ ⴰⴱⴰⵔⵛⴰⵏ.
8 ⵎⴰⵖⴰⵔ ⵜⵜⴰⵛⵉⵖ ⵜⵉⵊⵄⵉⵏⵏⴰⵜⵉⵏ ⵉⵏⵓ ⴰⵔⵖⵉⵏⵜ ⵙ ⵜⵎⴻⵙⵙⵉ ⵎⴰⵔⵔⴰ,
ⵡⴰⵔ ⴷⵉⵏ ⵉⵇⵇⵉⵎ ⵎⵉⵏ ⵉⴵⴰⵏ ⵉⴽⴻⵎⵎⵍⴻⵏ ⴷⵉ ⴰⵔⵔⵉⵎⴻⵜ ⵉⵏⵓ.
9 ⵏⴻⵛⵛ ⵊⴻⵎⵎⴷⴻⵖ ⵓ ⵜⵜⵡⴰⵖⴻⴹⵍⴻⵖ ⵇⴰⵄ,
ⵙⵖⵓⵢⵢⵓⵖ ⵙ ⵥⵥⵀⵉⵔ ⵏ ⵡⵓⵍ ⵉⵏⵓ.
10 ⴰ ⵙⵉⴷⵉ ⵉⵏⵓ, ⵎⴰⵔⵔⴰ ⵎⵉⵏ ⴷⵉ ⵖⴰⵔⵉ ⵎⴻⵥⵔⵉ ⴰⵇⴰ-ⵜ ⵥⵥⴰⵜⴻⴽ,
ⴰⵙⵇⵉⵏⴼⵉ ⵉⵏⵓ ⵡⴰⵔ ⵥⵥⴰⵢⴻⴽ ⵉⵜⵜⵏⵓⴼⴼⴰⵔ.
11 ⵓⵍ ⵉⵏⵓ ⵉⴷⴷⴻⵏⴷⵓⵏ, ⵎⴰⵔⵔⴰ ⵊⵊⴻⵀⴷ ⵉⴼⴼⴻⵖ ⴰⵢⵉ,
ⵓⵍⴰ ⴷ ⵜⴰⴼⴰⵡⵜ ⵜⴻⴼⴼⴻⵖ ⵥⵉ ⵜⵉⵟⵟⴰⵡⵉⵏ ⵉⵏⵓ,
ⵡⴰⵀ ⵓⵍⴰ ⴷ ⵏⵉⵜⴻⵏⵜⵉ ⵡⴰⵔ ⵖⴰⵔⵉ ⴱⴻⴷⴷⴻⵏⵜ ⵄⴰⴷ.
12 ⵉⵎⵄⵉⵥⵥⴻⵏ ⵉⵏⵓ ⴷ ⵉⵎⴻⴷⴷⵓⴽⴽⴰⵍ ⵉⵏⵓ ⴱⴻⴷⴷⴻⵏ ⴰⵔⴻⵏⴷⴰⴷ ⵉⵏⵓ ⵖⴰⵔ ⵊⵊⵔⵉⵃⴻⵛⵜ ⵉⵏⵓ,
ⵓⵍⴰ ⴷ ⵉⵏⵏⵉ ⵉ ⴷⴷ ⴰⵢⵉ ⵢⵓⴷⵙⴻⵏ ⵜⵜⴰⴳⴳⵯⴻⵊⴻⵏ ⵅⴰⴼⵉ.
13 ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴽⴽⵙⴻⵏ ⵜⵓⴷⴰⵔⵜ ⵉⵏⵓ,
ⵏⴻⴷⵢⴻⵏ ⴰⵢⵉ ⵜⵉⵅⴻⵛⴼⵉⵏ,
ⵉⵏⵏⵉ ⵢⴰⵔⴻⵥⵥⵓⵏ ⴰⴷ ⴰⵢⵉ ⴳⴳⴻⵏ ⵍⵖⴰⵔ,
ⵙⵙⴰⵡⴰⵍⴻⵏ ⴰⵎ ⵎⵎⴻⵥⵔⴻⵏ ⴰⴷ ⴰⵔⴻⴷⴷⴵⴻⵏ,
ⵏⵉⵜⵏⵉ ⵛⴻⵍⵖⴻⵏ ⵙ ⵍⵖⴻⵛⵛ ⴰⵙⵙ ⵎⴰⵔⵔⴰ.
14 ⵏⴻⵛⵛ ⵎⴰⵛⴰ ⵜⵜⴻⴳⴳⴻⵖ ⵉⵅⴻⴼ ⵉⵏⵓ ⴰⵅⵎⵉ ⴷ ⴰⴷⴻⵀⵛⵓⵔ,
ⴰⵎ ⵡⴻⵢⵏⴰⵡ ⵏⵏⵉ ⵡⴰⵔ ⵢⴰⵔⴻⵥⵥⵎⴻⵏ ⴰⵇⴻⵎⵎⵓⵎ ⵏⵏⴻⵙ.
15 ⵏⴻⵛⵛ ⴰⵎ ⵡⴻⵔⵢⴰⵥ ⵡⴰⵔ ⵉⵜⵜⴻⵙⵍⵉⵏ,
ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⵜⵡⴰⵔⵔⵉⵜ ⵥⴻⴳ ⵓⵇⴻⵎⵎⵓⵎ ⵏⵏⴻⵙ.
16 ⵎⴰⵖⴰⵔ ⵜⵜⵔⴰⵊⵉⵖ ⵛⴻⴽ, ⴰ ⵙⵉⴷⵉ,
ⵛⴻⴽ ⴰⴷ ⴷⴷ-ⵜⴰⵔⵔⵉⴷ, ⴰ ⵙⵉⴷⵉ ⵉⵏⵓ, ⴰ ⴰⵔⴻⴱⴱⵉ ⵉⵏⵓ!
17 ⵎⴰⵖⴰⵔ ⵏⵏⵉⵖ: “ⴻⵊⵊ ⵉ-ⵜⴻⵏ ⵡⴰⵔ ⵅⴰⴼⵉ ⴼⴰⵔⵔⵃⴻⵏ,
ⵅⵎⵉ ⵉ ⵖⴰ ⴼⴰⵔⵖⴻⵏ ⵉⴹⴰⵔⴻⵏ ⵉⵏⵓ,
ⴻⵊⵊ ⵉ-ⵜⴻⵏ ⵡⴰⵔ ⵙⵙⴻⵎⵖⴰⵔⴰⵏ ⵉⵅⴻⴼ ⵏⵙⴻⵏ ⵅⴰⴼⵉ.
18 ⵎⴰⵖⴰⵔ ⵏⴻⵛⵛ ⴰⵇⴰ ⴳⴳⵓⵔ ⴰⴷ ⵏⵇⴰⵔⴹⴻⵖ,
ⵍⴻⵃⵔⵉⵇ ⵉⵏⵓ ⴰⵇⴰ-ⵜ ⵍⴻⴱⴷⴰ ⵥⵥⴰⵜⵉ.
19 ⵎⴰⵖⴰⵔ ⵙⵙⴰⵔⴳⴱⴻⵖ ⴰⵛ ⵍⵎⵓⵄⵚⵉⵢⵢⴻⵜ ⵉⵏⵓ,
ⴰⵇⴰ ⵜⵜⵡⴰⵃⴻⵚⵚⴰⵔⴻⵖ ⵥⵉ ⴷⴷⴻⵏⴱ ⵉⵏⵓ. ■
20 ⵍⵄⴻⴷⵢⴰⵏ ⵉⵏⵓ ⴷⴷⴰⵔⴻⵏ, ⴰⵇⴰ ⴰⵜⴻⵏ ⵙ ⵜⵥⴻⵎⵎⴰⵔ,
ⴰⵟⵟⴰⵙ ⵉⴵⴰⵏ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⴱⵍⴰ ⵙⵙⵉⴱⴱⴻⵜ.
21 ⵉⵏⵏⵉ ⵉⵜⴰⵔⵔⴰⵏ ⵍⵅⴰⵔ ⵙ ⵍⵖⴰⵔ ⵙⵙⴱⴻⴷⴷⴻⵏ ⵉⵅⴻⴼ ⵏⵙⴻⵏ ⴹⵉⴷⴷ ⵉⵏⵓ,
ⵓⵎⵉ ⵏⴻⵛⵛ ⴰⵔⴻⵥⵥⵓⵖ ⵅ ⵎⵉⵏ ⵉⵚⴻⴱⵃⴻⵏ.
22 ⵡⴰⵔ ⴷⴰⵢⵉ ⵙⴻⵎⵎⴻⵃ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ,
ⵡⴰⵔ ⵅⴰⴼⵉ ⵜⵜⴰⴳⴳⵯⴻⵊ.
23 ⴷⴻⵖⵢⴻⵜ ⵃⵉⵎⴰ ⴰⴷ ⴰⵢⵉ ⵜⴻⵡⵛⵉⴷ ⴰⴼⵓⵙ,
ⴰ ⵙⵉⴷⵉ ⵉⵏⵓ, ⴰⵙⴻⵏⵊⴻⵎ ⵉⵏⵓ.