37
1 ⵏ ⴷⴰⵡⵓⴷ. ⴰⵍⵉⴼ. ⵡⴰⵔ ⵜᵉⵜⵜⵡⴰⵔⴻⵇⵇ ⵜⴻⴼⵇⴻⵃⵜ ⵏⵏⴻⴽ ⵅ ⵉⵄⴻⴼⴼⴰⵏⴻⵏ,
ⵡⴰⵔ ⵜⵜⴰⵙⴻⵎ ⵅ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵖⴻⵛⵛ. ■
2 ⵎⴰⵖⴰⵔ ⴰⴷ ⵡⴹⴰⵏ ⴷⴻⵖⵢⴰ ⴰⵎ ⴰⵔⵔⴱⵉⵄ,
ⵓ ⴰⵎ ⴰⵔⵔⴱⵉⵄ ⴰⵥⵉⵥⴰ ⴰⴷ ⵙⵍⴰⵡⴻⵏ.
3 ⴱⵉⵜ. ⵜⵜⵛⴻⵍ ⵅ ⵙⵉⴷⵉ ⵓ ⴻⴳⴳ ⵍⵅⴰⵔ,
ⵥⴷⴻⵖ ⴷⵉ ⵜⴻⵎⵎⵓⵔⵜ ⵓ ⵉⵍⵉ ⴷ ⴰⵎⵜⵉⵇⵇⵉ.
4 ⴰⵔⵔ ⵎⴻⵥⵔⵉ ⴷⵉ ⵙⵉⴷⵉ,
ⵓ ⵏⴻⵜⵜⴰ ⴰⴷ ⵛⴻⴽ ⵉⵡⵛ ⵎⵉⵏ ⴷⵉ ⵉⵜⵜⵎⴻⵥⵔⵉ ⵡⵓⵍ ⵏⵏⴻⴽ.
5 ⴳⵉⵎⴻⵍ. ⴰⵔⵔ ⵜⵉⵛⵍⵉ ⵏⵏⴻⴽ ⵖⴰⵔ ⵙⵉⴷⵉ,
ⵜⵜⵛⴰⵍ ⵅⴰⵙ ⵓ ⵏⴻⵜⵜⴰ ⴰⴷ ⵜⵜ ⵉⴳⴳ. ■
6 ⵏⴻⵜⵜⴰ ⴰⴷ ⵉⵙⵙⴻⴹⵀⴰⵔ ⵜⴰⵙⴻⴳⴷⴰ ⵏⵏⴻⴽ ⴰⵎ ⵜⴼⴰⵡⵜ,
ⵍⵃⴻⵇⵇ ⵏⵏⴻⴽ ⴰⵎ ⵉⵛⴻⵄⵛⵉⵄⴻⵏ ⵏ ⵜⴼⵓⵛⵜ ⴷⵉ ⵟⵟⵃⴰ ⵏ ⵓⵥⵉⵍ.
7 ⴷⴰⵍⵉⵜ. ⵙⵓⵙⴻⵎ ⵥⵥⴰⵜ ⵉ ⵙⵉⴷⵉ ⵓ ⵔⴰⵊⴰ ⵜ.
ⵡⴰⵔ ⵜⵜⴻⵊⵊⵉ ⵜⴰⴼⵇⴻⵃⵜ ⵏⵏⴻⴽ ⴰⴷ ⵜⴰⵙⴻⵎ
ⵅ ⵡⴻⵏⵏⵉ ⵉⴼⴻⵍⵀⴻⵏ ⴷⴻⴳ ⵡⴻⴱⵔⵉⴷ ⵏⵏⴻⵙ,
ⵅ ⵡⴻⵔⵢⴰⵥ ⵏⵏⵉ ⵉⵜⵜⴻⴳⴳⴻⵏ ⵜⴰⵃⵔⴰⵢⵎⴻⵛⵜ.
8 ⵀⵉ. ⴻⵊⵊ ⴰⵖⴹⴰⴱ ⵏⵏⴻⴽ ⴰⴷ ⵢⴰⵔⵙ ⵓ ⴻⵊⵊ ⴰⵙⵄⴰⵔ ⵏⵏⴻⴽ ⴰⴷ ⵉⵔⴰⵃ.
ⵡⴰⵔ ⵜⵜⴻⵊⵊⵉ ⵜⴰⴼⵇⴻⵃⵜ ⵏⵏⴻⴽ ⴰⴷ ⵜⴰⵙⵎⴻⴷ.
ⵎⴰⵏ ⴰⵢⴰ ⴰⴷ ⵢⴰⵡⵉ ⵎⵖⵉⵔ ⵜⵓⵄⴻⴼⴼⵏⴰ ⵡⴰⵀⴰ.
9 ⵎⴰⵖⴰⵔ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵜⴻⵃⵃⴰⵏ,
ⵎⴰⵛⴰ ⵉⵏⵏⵉ ⵉⵙⵙⵉⵜⵉⵎⴻⵏ ⵅ ⵙⵉⴷⵉ ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ.
10 ⵡⴰⵡ. ⵎⵖⵉⵔ ⵛⵡⴰⵢⵜ ⵡⴰⵀⴰ ⵓⵛⴰ ⴰⵄⴻⴼⴼⴰⵏ ⵡⴰⵔ ⵉⵜⵜⵖⵉⵎⵉ ⵄⴰⴷ.
ⴰⴷ ⵜⵃⴻⴽⴽⴰⵔⴻⴷ ⵎⵍⵉⵃ ⵡⴻⵎⵛⴰⵏ ⵏⵏⴻⵙ,
ⵎⴰⵛⴰ ⵡⴰⵔ ⴷⵉⵏ ⵉⵜⵜⵉⵍⵉ ⵄⴰⴷ.
11 ⵉⵎⵀⵉⵏⴻⵏ ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ,
ⴰⴷ ⴰⵔⵔⴻⵏ ⵎⴻⵥⵔⵉ ⴷⵉ ⵍⴻⵀⵏⴰ ⴰⵎⴻⵇⵇⵔⴰⵏ. ■
12 ⵣⴰⵢⵉⵏ. ⴰⵄⴻⴼⴼⴰⵏ ⵉⵜⵜⵅⴰⵔⵔⴻⵚ ⴷⵉ ⵜⵎⴻⵄⵎⴰⵞ ⵜⵉⵃⵔⴰⵢⵎⵉⵢⵢⵉⵏ ⴹⵉⴷⴷ ⵉ ⵓⵎⵙⴻⴳⴳⴻⴷ,
ⵉⵜⵜⵖⴻⵥⵥ ⵅⴰⵙ ⵜⵉⵖⵎⴰⵙ.
13 ⵙⵉⴷⵉ ⵉⵏⵓ ⵉⴹⴻⵃⵃⴻⵛ ⵅⴰⵙ,
ⵎⴰⵖⴰⵔ ⵉⵜⵜⵡⴰⵍⴰ ⴰⵇⴰ ⴰⵙⵙ ⵏⵏⴻⵙ ⴰⴷ ⴷⴷ-ⵢⴰⵙ.
14 ⵅⵉⵜ. ⵉⵄⴻⴼⴼⴰⵏⴻⵏ ⵊⴻⴱⴷⴻⵏ-ⴷⴷ ⵙⵙⵉⴼ ⵓ ⵎⴻⵃⴹⴻⵏ ⵍⵇⴻⵡⵙ,
ⵃⵉⵎⴰ ⴰⴷ ⵖⴻⴹⵍⴻⵏ ⵍⵎⴻⵙⴽⵉⵏ ⴷ ⵓⵎⴻⵥⵍⵓⴹ,
ⵃⵉⵎⴰ ⴰⴷ ⵖⴰⵔⵚⴻⵏ ⵉ ⵢⴻⵏⵏⵉ ⵉⴳⴳⵓⵔⴻⵏ ⴷⴻⴳ ⵡⴻⴱⵔⵉⴷ ⵏⵙⴻⵏ ⵏⵉⵛⴰⵏ.
15 ⵙⵙⵉⴼ ⵏⵙⴻⵏ ⴰⴷ ⵜⴻⵏ ⵉⵍⵇⴻⴼ ⴷⴻⴳ ⵡⵓⵍ ⵏⵙⴻⵏ,
ⵍⴻⵇⵡⴰⵙ ⵏⵙⴻⵏ ⴰⴷ ⵜⵜⵡⴰⵔⵥⴻⵏ.
16 ⵜⵉⵜ. ⴷⵔⵓⵙ ⵉ ⵖⴰⵔⴻⵙ ⵖⴰⵔ ⵓⵎⵙⴻⴳⴳⴻⴷ,
ⵃⵙⴻⵏ ⵥⴻⴳ ⵓⴼⴻⵢⵢⴻⴹ ⵏ ⵡⴰⵟⵟⴰⵙ ⵏ ⵉⵄⴻⴼⴼⴰⵏⴻⵏ.
17 ⵎⴰⵖⴰⵍ ⵉⵖⴰⴵⴻⵏ ⵏ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵔⵥⴻⵏ,
ⵎⴰⵛⴰ ⵙⵉⴷⵉ ⴰⴷ ⵉⵙⴻⵏⵏⴻⴷ ⵉⵎⵙⴻⴳⴳⴰⴷⴻⵏ.
18 ⵢⵓⴷ. ⵙⵉⴷⵉ ⵉⵙⵙⴻⵏ ⵓⵙⵙⴰⵏ ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ,
ⵜⴰⵙⵖⴰⵔⵜ ⵏⵙⴻⵏ ⴰⴷ ⵜⴻⵇⵇⵉⵎ ⵉ ⵍⴻⴱⴷⴰ.
19 ⵡⴰⵔ ⵜⵜⵡⴰⵇⴻⵎⵎⵉⵃⴻⵏ ⴷⵉ ⵍⵡⴻⵇⵜ ⵜⴰⵄⴻⴼⴼⴰⵏⵜ,
ⴷⴻⴳ ⵡⵓⵙⵙⴰⵏ ⵏ ⵍⴰⵥ ⴰⴷ ⵜⵜⵡⴰⵙⵊⵉⵡⵏⴻⵏ.
20 ⴽⴰⴼ. ⵎⴰⵖⴰⵔ ⵉⵄⴻⴼⴼⴰⵏⴻⵏ ⴰⴷ ⴼⵏⴰⵏ,
ⵍⵄⴻⴷⵢⴰⵏ ⵏ ⵙⵉⴷⵉ ⴰⴷ ⵡⴻⴷⴷⴰⵔⴻⵏ,
ⴰⴷ ⵜⵜⵡⴰⵇⴹⴰⵏ ⴰⵎⴻⵛⵏⴰⵡ ⵡⴻⵏⵏⵉ ⵉⴵⴰⵏ ⵉⵖⵍⴰⵏ ⵇⴰⵄ ⵥⴻⴳ ⵉⵥⵎⴰⵔⴻⵏ ⵉⵇⴻⴱⴱⵓⵥⴻⵏ,
ⴰⴷ ⴹⵡⴻⵏ ⴷⵉ ⵜⴰⵢⵢⵓⵜ.
21 ⵍⴰⵎⴻⴷ. ⴰⵄⴻⴼⴼⴰⵏ ⵢⴰⵔⴻⵟⵟⴻⵍ, ⵡⴰⵔ ⵉⵜⵜⴰⵔⵔⵉ ⴰⵎⴰⵔⵡⴰⵙ,
ⵎⴰⵛⴰ ⴰⵎⵙⴻⴳⴳⴻⴷ ⵉⵜⵜⵃⵉⵏⵏ, ⵉⵜⵜⵉⵛ.
22 ⵎⴰⵖⴰⵔ ⵉⵏⵏⵉ ⵥⵥⴰⵢⴻⵙ ⵉⵜⵜⵡⴰⴱⴰⵔⴽⴻⵏ ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ,
ⵎⴰⵛⴰ ⵉⵏⵏⵉ ⵥⵥⴰⵢⴻⵙ ⵉⵜⵜⵡⴰⵏⴻⵄⵍⴻⵏ, ⴰⴷ ⵜⵜⵡⴰⵜⴻⵃⵃⴰⵏ.
23 ⵎⵉⵎ. ⵉⵚⵓⵔⴰⴼ ⵏ ⵡⴻⵔⵢⴰⵥ ⵉⵊⴻⵀⴷⴻⵏ ⵜⵜⵡⴰⵙⵎⴻⵜⵜⵏⴻⵏ ⵥⵉ ⵙⵉⴷⵉ,
ⵏⴻⵜⵜⴰ ⵢⴰⵔⴻⵟⵟⴰ ⵅ ⵡⴻⴱⵔⵉⴷ ⵏⵏⴻⵙ.
24 ⵎⴰⵍⴰ ⵉⵡⴹⴰ, ⵡⴰⵔ ⵉⵜⵜⵎⴻⵏⴹⴰⵔ,
ⵎⴰⵖⴰⵔ ⵙⵉⴷⵉ ⵉⵡⵛⴰ ⴰⵙ ⴰⴼⵓⵙ ⵏⵏⴻⵙ.
25 ⵏⵓⵏ. ⵏⴻⵛⵛ ⵜⵓⵖⴰ ⴰⵢⵉ ⴷ ⴰⵎⴻⵥⵢⴰⵏ, ⵍⴻⵅⵅⵓ ⵡⵙⴰⵔⴻⵖ,
ⵎⴰⵛⴰ ⵄⴻⵎⵎⴰⵔⵚ ⵡⴰⵔ ⵥⵔⵉⵖ ⴰⵎⵙⴻⴳⴳⴻⴷ ⵉⵜⵜⵡⴰⵊⵊ,
ⵏⵉⵖ ⵜⴰⵔⵡⴰ ⵏⵏⴻⵙ ⴰⵔⴻⵥⵥⵓⵏ ⵅ ⵡⴻⵖⵔⵓⵎ.
26 ⴰⵙⵙ ⵉⴽⵎⴻⵍ ⵉⵜⵜⵃⵉⵏⵏⴰ ⵓ ⵢⴰⵍⴻⵟⵟⴻⵍ ⵉ ⵉⵎⴻⵥⵍⴰⴹ,
ⵥⵥⴰⵔⵉⵄⴻⵜ ⵏⵏⴻⵙ ⴰⴷ ⵜⵉⵍⵉ ⵉ ⵍⴱⴰⵔⴰⴽⴰ.
27 ⵙⴰⵎⵉⵅ. ⵃⴻⵢⵢⴻⴷ ⵅ ⵍⵖⴰⵔ ⵓ ⴻⴳⴳ ⵍⵅⴰⵔ,
ⵓⵛⴰ ⴰⴷ ⵖⴰⵔⴻⴽ ⵜⵉⵍⵉ ⵜⵥⴻⴷⴷⵉⵖⵜ ⵉ ⵍⴻⴱⴷⴰ ⵇⴰⵄ.
28 ⵎⴰⵖⴰⵔ ⵙⵉⴷⵉ ⵉⵜⵜⴻⵅⵙ ⵍⵃⴻⵇⵇ,
ⵡⴰⵔ ⵉⵙⴻⵎⵎⴻⵃ ⴷⴻⴳ ⵉⵎⵜⵉⵇⵇⴰⵏ ⵏⵏⴻⵙ.
ⴰⴷ ⵜⵜⵡⴰⵃⴹⴰⵏ ⵉ ⵍⴻⴱⴷⴰ ⵇⴰⵄ,
ⵎⴰⵛⴰ ⵥⵥⴰⵔⵉⵄⴻⵜ ⵏ ⵉⵄⴻⴼⴼⴰⵏⴻⵏ ⴰⴷ ⵜᵉⵜⵜⵡⴰⵜⴻⵃⵃⴰ.
29 ⵉⵎⵙⴻⴳⴳⴰⴷⴻⵏ ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ,
ⴰⴷ ⴷⴰⵢⴻⵙ ⵥⴻⴷⵖⴻⵏ ⵉ ⵍⴻⴱⴷⴰ.
30 ⴱⵉ. ⴰⵇⴻⵎⵎⵓⵎ ⵏ ⵓⵎⵙⴻⴳⴳⴻⴷ ⵉⵜⵜⴱⴰⵔⵔⴻⵃ ⵙ ⵜⵉⵖⵉⵜ,
ⵉⵍⴻⵙ ⵏⵏⴻⵙ ⵉⵙⵙⴰⵡⴰⵍ ⵙ ⵍⵃⴻⵇⵇ.
31 ⵛⵛⴰⵔⵉⵄⴰ ⵏ ⴰⵔⴻⴱⴱⵉ ⵏⵏⴻⵙ ⴷⴻⴳ ⵡⵓⵍ ⵏⵏⴻⵙ,
ⵉⵚⵓⵔⴰⴼ ⵏⵏⴻⵙ ⵡⴰⵔ ⵜⵜⴻⴼⵔⵉⵖⴻⵏ. ■
32 ⵜⵙⴰⴷⵉ. ⴰⵄⴻⴼⴼⴰⵏ ⵉⵍⴻⴱⴱⴻⵜ ⵉ ⵓⵎⵙⴻⴳⴳⴻⴷ,
ⵢⴰⵔⴻⵥⵥⵓ ⴰⴷ ⵜ ⵉⵏⴻⵖ,
33 ⵎⴰⵛⴰ ⵙⵉⴷⵉ ⵡⴰⵔ ⵥⵥⴰⵢⴻⵙ ⵢⴰⵔⴻⵅⵅⵓ ⴰⴼⵓⵙ ⵏⵏⴻⵙ,
ⵡⴰⵔ ⵅⴰⵙ ⵉⵃⴽⴻⵎ ⵅⵎⵉ ⵜ ⵖⴰ ⵉⵃⴰⴽⴻⵎ.
34 ⵇⵓⴼ. ⵙⵉⵜⵉⵎ ⵅ ⵙⵉⴷⵉ ⵓ ⵟⵟⴻⴼ ⴷⴻⴳ ⵡⴻⴱⵔⵉⴷ ⵏⵏⴻⵙ.
ⵏⴻⵜⵜⴰ ⴰⴷ ⵛⴻⴽ ⵉⵙⵙⴳⴻⵄⵄⴻⴷ ⵃⵉⵎⴰ ⴰⴷ ⵜⵡⴰⵔⵜⴻⴷ ⵜⴰⵎⵎⵓⵔⵜ.
ⴰⴷ ⵜⵥⴰⵔⴻⴷ ⴰⵇⴰ ⵉⵄⴻⴼⴼⴰⵏⴻⵏ ⴰⴷ ⵜⵜⵡⴰⵜⴻⵃⵃⴰⵏ.
35 ⵔⵉⵅ. ⵏⴻⵛⵛ ⵥⵔⵉⵖ ⵉⵊⵊ ⵏ ⵓⵄⴻⴼⴼⴰⵏ ⴷ ⴱⵓ-ⵍⴻⵅⵛⵓⵏⴻⵜ,
ⵉⵎⴻⵇⵇⴰⵔ ⴰⵎⴻⵛⵏⴰⵡ ⵜⴰⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ ⵜⴰⵥⵉⵥⴰⵡⵜ. □
36 ⴰⵇⴰ ⵉⵄⴷⵓ, ⵓⵛⴰ ⵅⵥⴰⵔ, ⵡⴰⵔ ⵜ ⵜⵓⵖⵉ ⵛⴰ ⵄⴰⴷ ⴷⵉⵏ.
ⴰⵔⵥⵓⵖ ⵅⴰⵙ, ⵎⴰⵛⴰ ⵉⴷⵡⴻⵍ ⵡⴰⵔ ⵉⴵⵉ ⵄⴰⴷ.
37 ⵛⵉⵏ. ⵃⴹⴰ ⵅ ⵡⴻⵏⵏⵉ ⵉⴵⴰⵏ ⵉⴽⵎⴻⵍ ⵓ ⵅⴻⵥⵥⴰⵔ ⵖⴰⵔ ⵡⴻⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ,
ⵎⴰⵖⴰⵔ ⴰⵏⴻⴳⴳⴰⵔ ⵏ ⵡⴻⵔⵢⴰⵥ ⵏⵏⵉ ⴰⴷ ⵢⵉⵍⵉ ⴷ ⵍⴻⵀⵏⴰ.
38 ⵉⵏⵏⵉ ⵉⵜⵜⵄⴻⴷⴷⴰⵏ ⴳⴳⵓⵔ ⴰⴷ ⵜⵜⵡⴰⵔⴻⴷⴷⴵⴻⵏ ⵊⵎⵉⵄ,
ⵎⵉⵏ ⵉⵇⵇⵉⵎⴻⵏ ⵏ ⵉⵄⴻⴼⴼⴰⵏⴻⵏ ⴰⴷ ⵉⵜⵜⵡⴰⵜⴻⵃⵃⴰ.
39 ⵜⴰⵡ. ⴰⵙⴻⵏⵊⴻⵎ ⵏ ⵉⵎⵙⴻⴳⴳⴰⴷⴻⵏ ⴰⴷ ⴷⴷ-ⵢⴰⵙ ⵥⵉ ⵙⵉⴷⵉ,
ⴰⵇⴰ ⵏⴻⵜⵜⴰ ⴷ ⵊⵊⴻⵀⴷ ⵏⵙⴻⵏ ⴷⵉ ⵍⵡⴻⵇⵜ ⵏ ⵍⴻⵃⵚⴰⵔⴻⵜ.
40 ⵙⵉⴷⵉ ⴰⴷ ⴰⵙⴻⵏ ⵉⵡⵛ ⴰⴼⵓⵙ ⵓ ⴰⴷ ⵜⴻⵏ ⵉⴼⴻⴽⴽ.
ⵏⴻⵜⵜⴰ ⴰⴷ ⵜⴻⵏ ⵉⴼⴻⴽⴽ ⵥⴻⴳ ⵉⵄⴻⴼⴼⴰⵏⴻⵏ ⵓ ⴰⴷ ⵜⴻⵏ ⵉⵙⵙⴻⵏⵊⴻⵎ,
ⵎⴰⵖⴰⵔ ⵏⵉⵜⵏⵉ ⵜⵜⵉⵇⵇⴰⵏ ⴷⴰⵢⴻⵙ.