35
1 ⵏ ⴷⴰⵡⵓⴷ. ⵎⵛⵓⴱⴱⴻⵛ, ⴰ ⵙⵉⴷⵉ, ⴰⴽ-ⴷ ⵢⴻⵏⵏⵉ ⴰⴽⵉⴷⵉ ⵉⵜⵜⴻⵎⵛⵓⴱⴱⵓⵛⴻⵏ,
ⵎⵏⴻⵖ ⴰⴽ-ⴷ ⵢⴻⵏⵏⵉ ⴽⵉⴷⵉ ⵉⵜⵜⵎⴻⵏⵖⴰⵏ.
2 ⵟⵟⴻⴼ ⵜⴰⵙⴻⴷⴷⴰⵔⵜ ⵏ ⵓⵙⴻⵍⵇⵉ ⴷ ⵜⵙⴻⴷⴷⴰⵔⵜ ⵜⴰⵎⴻⵇⵇⵔⴰⵏⵜ,
ⵓⵛⴰ ⴽⴽⴰⵔ, ⴻⵡⵛ ⴰⵢⵉ ⴰⴼⵓⵙ.
3 ⵊⴱⴻⴷ-ⴷⴷ ⵍⴰⵏⵙⴰ ⵓⵛⴰ ⵇⵇⴻⵏ ⴰⴱⵔⵉⴷ ⵇⴱⴻⵍ ⵉ ⵓⵎⵙⴰⴳⴰⵔ ⴰⴽ-ⴷ ⵢⴻⵏⵏⵉ ⴷⴷ ⴰⵢⵉ ⵉⴹⴰⴼⴼⴰⵔⴻⵏ,
ⵉⵏⵉ ⵉ ⵍⴻⵄⵎⴰⵔ ⵉⵏⵓ: “ⴰⵙⴻⵏⵊⴻⵎ ⵏⵏⴻⴽ ⴰⵇⴰ ⴷ ⵏⴻⵛⵛ!”
4 ⴰⵔⵔ ⵉⵏⵏⵉ ⵢⴰⵔⴻⵥⵥⵓⵏ ⵅ ⵍⴻⵄⵎⴰⵔ ⵉⵏⵓ ⴰⴷ ⵜⵜⵡⴰⵅⴰⵔⴻⵡⴹⴻⵏ ⵓ ⴰⴷ ⵜⵜⵡⴰⴼⴻⴹⵃⴻⵏ,
ⴻⵊⵊ ⵉⵏⵏⵉ ⵉⵜⵜⵅⴰⵔⵔⵉⵚⴻⵏ ⴷⵉ ⵍⵖⴰⵔ ⵅⴰⴼⵉ ⴰⴷ ⵜⵜⵡⴰⵄⴰⵔⵔⵏⴻⵏ ⵖⴰⵔ ⴹⴻⴼⴼⴰⵔ,
ⴻⵊⵊ ⵉ-ⵜⴻⵏ ⴰⴷ ⴷⴻⵡⵍⴻⵏ ⵜⵜⵙⴻⴹⵃⴰⵏ. ■
5 ⴻⵊⵊ ⵉ-ⵜⴻⵏ ⴰⴷ ⴷⴻⵡⵍⴻⵏ ⴰⵎ ⵉⵛⴰⵔⴼⴰ ⴷⴻⴳ ⵓⵚⴻⵎⵎⵉⴹ,
ⴻⵊⵊ ⵍⵎⴰⵍⴰⴽ ⵏ ⵙⵉⴷⵉ ⴰⴷ ⵜⴻⵏ ⵉⵄⴰⵔⵏ. ■
6 ⴻⵊⵊ ⴰⴷ ⵉⴷⵡⴻⵍ ⵡⴻⴱⵔⵉⴷ ⵏⵙⴻⵏ ⴷ ⵜⴰⴵⴻⵙⵜ ⵓ ⴰⴷ ⵢⵉⵍⵉ ⵉⵜⵜⴻⵃⵍⵓⴵⵓⴹ,
ⴻⵊⵊ ⵍⵎⴰⵍⴰⴽ ⵏ ⵙⵉⴷⵉ ⴰⴷ ⵜⴻⵏ ⵉⴹⴼⴰⵔ.
7 ⵎⴰⵖⴰⵔ ⴱⵍⴰ ⵙⵙⵉⴱⴱⴻⵜ ⵙⵙⵏⵓⴼⴼⴰⵔⴻⵏ ⵅⴰⴼⵉ ⴰⵃⴼⵓⵔ ⵙ ⵜⵔⴰⵛⵛⴰ ⵏⵙⴻⵏ,
ⴱⵍⴰ ⵙⵙⵉⴱⴱⴻⵜ ⵖⵥⵉⵏ ⵜ ⵉ ⵍⴻⵄⵎⴰⵔ ⵉⵏⵓ.
8 ⴻⵊⵊ ⴰⵔⴻⴷⴷⴻⴵ ⴰⴷ ⵅⴰⵙ ⴷⴷ-ⵢⴰⵙ ⴱⵍⴰ ⵎⴰ ⵉⵙⵙⴻⵏ,
ⴻⵊⵊ ⵜⵔⴰⵛⵛⴰ ⵏⵏⴻⵙ ⵏⵏⵉ ⵉⵙⵙⵏⵓⴼⴼⴰⵔ ⴰⴷ ⵜ ⵜᵉⵟⵟⴻⴼ ⵙⵉⵎⴰⵏⵜ ⵏⵏⴻⵙ,
ⴻⵊⵊ ⵉ-ⵜ ⴰⴷ ⴷⴰⵢⴻⵙ ⴷⴷ-ⵉⵡⴹⴰ ⵙⵉⵎⴰⵏⵜ ⵏⵏⴻⵙ,
ⵙ ⵉⵊⵊ ⵏ ⵓⵡⴻⵟⵟⵓ ⵉ ⵜ ⵉ ⵖⴰ ⵢⴰⵔⴻⴷⴷⴵⴻⵏ.
9 ⵍⴻⵄⵎⴰⵔ ⵉⵏⵓ ⴰⴷ ⵉⴼⴰⵔⵃ ⵥⵉ ⵙⵉⴷⵉ,
ⴰⴷ ⵢⴰⵔⵛⴻⵇ ⴷⴻⴳ ⵓⵙⴻⵏⵊⴻⵎ ⵏⵏⴻⵙ.
10 ⴰⴷ ⵉⵏⵉⵏ ⵎⴰⵔⵔⴰ ⵉⵅⵙⴰⵏ ⵉⵏⵓ:
“ⴰ ⵙⵉⴷⵉ, ⵎⴰⵏ ⵡⴻⵏ ⵉⴵⴰⵏ ⴰⵎ ⵛⴻⴽ!
ⵛⴻⴽ ⴷ ⵡⴻⵏⵏⵉ ⵉⵙⵙⴻⵏⵊⴰⵎⴻⵏ ⵍⵎⴻⵙⴽⵉⵏ ⵥⴻⴳ ⵡⴻⵏⵏⵉ ⵅⴰⵙ ⵉⵊⴻⵀⵀⴷⴻⵏ,
ⵍⵎⴻⵙⴽⵉⵏ ⴷ ⵓⵎⴻⵥⵍⵓⴹ ⵥⴻⴳ ⵉⵏⵏⵉ ⴷ ⴰⵙⴻⵏ ⵉⴽⴻⵛⵛⴹⴻⵏ.
11 ⵉⵛⴻⵀⵀⴰⴷⴻⵏ ⵉⵇⵟⴰⵟⵄⵉⵢⵢⴻⵏ ⴽⴽⴰⵔⴻⵏ.
ⵎⵉⵏ ⵡⴰⵔ ⵙⵙⵉⵏⴻⵖ, ⵜⵜⵙⴻⵇⵙⴰⵏ ⴰⵢⵉ.
12 ⴰⵔⵔⵉⵏ ⴰⵢⵉ-ⴷⴷ ⵍⵖⴰⵔ ⴷⵉ ⵍⵅⴰⵔ,
ⵍⴻⵄⵎⴰⵔ ⵉⵏⵓ ⵉⵜⵜⵎⴻⵃⵃⴻⵏ ⵙ ⵍⴻⵃⵡⴻⵊ.
13 ⵏⴻⵛⵛ ⵎⴰⵛⴰ ⴰⵔⴹⴻⵖ ⵜⴰⵅⴰⵏⵛⴻⵜ ⵍⴰⵎⵉ ⵜⵓⵖⴰ ⵀⴻⴵⵛⴻⵏ,
ⴳⴳⵉⵖ ⴰⴷ ⵉⵥⵓⵎⵎ ⵍⴻⵄⵎⴰⵔ ⵉⵏⵓ,
ⵓⵛⴰ ⵜⴰⵥⴰⴵⵉⵜ ⵉⵏⵓ ⵜᵉⵜⵜⵖⵉⵎⴰ ⵜⴻⴷⴷⴻⴽⴽⵡⴰⵍ-ⴷⴷ ⵖⴰⵔⵉ ⴷⵉ ⴷⴰⵅⴻⵍ ⵉⵏⵓ.
14 ⴰⵅⵎⵉ ⵜ ⵜⵓⵖⴰ ⴷ ⴰⵎⴻⴷⴷⵓⴽⴽⴻⵍ ⵉⵏⵓ ⵏⵉⵖ ⴷ ⵓⵎⴰ,
ⴰⵎⵎⵓ ⵉ ⵜⵓⵖⴰ ⴳⴳⵓⵔⴻⵖ,
ⴰⵎⴻⵛⵏⴰⵡ ⵛⴰ ⵏ ⵉⵊⵊ ⵉⵛⴻⵟⵟ ⵅ ⵢⴻⵎⵎⴰⵙ,
ⴰⵎⵎⵓ ⵜⵓⵖⴰ ⴰⵢⵉ ⴳⴳⵓⵔⴻⵖ ⵖⴻⵏⵏⵙⴻⵖ ⴷⴻⴳ ⵡⴰⵔⵔⵓⴹ ⴷ ⴰⴱⴰⵔⵛⴰⵏ.
15 ⵅⵎⵉ ⵜⵜⵇⴻⵊⴷⵉⵃⴻⵖ, ⴼⴰⵔⵔⵃⴻⵏ ⵏⵉⵜⵏⵉ ⵓ ⵜⵜⵎⵓⵏⴻⵏ ⴰⴽ-ⴷ ⵡⴰⵢⴰⵡⵢⴰ.
ⵜⵜⵎⵓⵏⴻⵏ ⴹⵉⴷⴷ ⵉⵏⵓ ⵉⵏⵏⵉ ⵏ ⵡⴰⴷⴷⴰⵢ, ⴱⵍⴰ ⵎⴰ ⴰⴷ ⵜ ⵙⵙⵏⴻⵖ.
ⵛⴻⵇⵇⴼⴻⵏ ⴷⴰⵢⵉ, ⵡⴰⵔ ⵙⵙⵓⵙⵎⴻⵏ.
16 ⴰⵎⴻⵛⵏⴰⵡ ⵉⵏⵏⵉ ⵉⵖⴻⵟⵟⵚⴻⵏ ⴱⵏⴰⴷⴻⵎ ⵉ ⵢⵉⵊⵊ ⵏ ⵓⵍⴻⵇⵇⵓⵥ ⵏ ⵡⴻⵖⵔⵓⵎ,
ⴰⵎⵎⵓ ⵖⴻⵥⵥⴰⵏ-ⴷⴷ ⵖⴰⵔⵉ ⵜⵉⵖⵎⴰⵙ.
17 ⴰ ⵙⵉⴷⵉ ⵉⵏⵓ, ⴰⵍ ⵎⴻⵛⵃⴰⵍ ⵉ ⵖⴰ ⵜⴻⴽⴽⴻⴷ ⵜⵅⴻⵥⵥⴰⵔⴻⴷ ⵡⴰⵀⴰ?
ⵙⴻⵏⵊⴻⵎ ⴰⵢⵉ ⵥⴻⴳ ⵡⴰⵔⴻⴷⴷⴻⴵ ⵏⵙⴻⵏ ⵉ ⵉⴳⴳⵉⵏ,
ⴰⵢⴻⵏⵏⵉ ⵉⵏⵓ ⵥⴻⴳ ⵡⴻⵢⵔⴰⴷⴻⵏ ⵉⵎⴻⵥⵢⴰⵏⴻⵏ.
18 ⵏⴻⵛⵛ ⴰⴷ ⵛⴻⴽ ⵇⴰⴷⵉⵖ ⴷⴻⴳ ⵢⵉⵊⵊ ⵏ ⵡⴻⴳⵔⴰⵡ ⵏ ⵍⴳⴻⵏⵙ ⴷ ⴰⵎⴻⵇⵇⵔⴰⵏ,
ⴰⴷ ⵛⴻⴽ ⵚⴻⴱⴱⵃⴻⵖ ⵊⴰⵔ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ ⴰⵟⵟⴰⵙ. ■
19 ⵉⵏⵏⵉ ⵉⴵⴰⵏ ⴷ ⵍⵄⴻⴷⵢⴰⵏ ⵉⵏⵓ ⴷⵉ ⵍⴱⴰⵟⴻⵔ,
ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵅⴰⴼⵉ ⴼⴰⵔⵃⴻⵏ,
ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ,
ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵅⴰⴼⵉ ⵎⵎⵙⴻⵖⵎⴰⵥⴻⵏ ⴱⵍⴰ ⵙⵙⵉⴱⴱⴻⵜ. ■
20 ⵎⴰⵖⴰⵔ ⵏⵉⵜⵏⵉ ⵡⴰⵔ ⵙⵙⵉⵡⵉⵍⴻⵏ ⵛⴰ ⵅ ⵍⴻⵀⵏⴰ,
ⵎⴰⵛⴰ ⵜⵜⵅⴰⵔⵔⵚⴻⵏ ⴷⴻⴳ ⵡⴰⵡⴰⵍⴻⵏ ⵛⵛⵓⵔⴻⵏ ⵙ ⵍⵖⴻⵛⵛ
ⴹⵉⴷⴷ ⵉⵏⵏⵉ ⵢⴰⵔⴻⵥⵥⵓⵏ ⵍⵀⵓⴷⵏⴻⵜ ⴷⵉ ⵜⴻⵎⵎⵓⵔⵜ.
21 ⵏⵉⵜⵏⵉ ⴰⵔⴻⵥⵥⵎⴻⵏ ⴰⵇⴻⵎⵎⵓⵎ ⵏⵙⴻⵏ ⵇⴰⵄ,
ⵇⵇⴰⵔⴻⵏ: “ⵀⴰ, ⵀⴰ, ⵜⵉⵟⵟ ⵏⵏⴻⵖ ⵙⵉⵎⴰⵏⵜ ⵏⵏⴻⵙ ⵜⴻⵥⵔⴰ ⵉ-ⵜⵜ!”
22 ⴰ ⵙⵉⴷⵉ, ⵛⴻⴽ ⵜⴻⵥⵔⵉⴷ ⵜⵜ, ⵡⴰⵔ ⵜⵜⴻⵙⵇⴰⵔⴰ, ⵙⵉⴷⵉ ⵉⵏⵓ,
ⵡⴰⵔ ⵅⴰⴼⵉ ⵜⵜⴻⴳⴳⵯⵉⵊ ⵛⴰ.
23 ⴼⴰⵇ, ⴽⴽⴰⵔ ⴷⵉ ⵟⵟⵡⴻⵄ ⵏ ⵍⵃⴻⵇⵇ ⵉⵏⵓ,
ⴰ ⴰⵔⴻⴱⴱⵉ ⵉⵏⵓ ⴷ ⵙⵉⴷⵉ ⵉⵏⵓ, ⴷⵉ ⵟⵟⵡⴻⵄ ⵏ ⴷⴷⴻⵄⵡⴻⵜ ⵉⵏⵓ.
24 ⵃⴽⴻⵎ ⵅⴰⴼⵉ ⵙ ⵍⵃⴻⵇⵇ ⵄⵍⴰⵃⵙⴰⴱ ⵜⴰⵙⴻⴳⴷⴰ ⵏⵏⴻⴽ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ,
ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵅⴰⴼⵉ ⴼⴰⵔⵃⴻⵏ.
25 ⵡⴰⵔ ⵜⵜⴻⵊⵊⵉ ⴰⴷ ⵉⵏⵉⵏ ⴷⴻⴳ ⵡⵓⵍ ⵏⵙⴻⵏ: “ⵀⴰ, ⴰⵇⴰ ⴰⵏⴻⵖ ⵎⵍⵉⵃ!”,
ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵉⵏⵉⵏ: “ⴰⵇⴰ ⵏⵙⴰⵔⴹ ⵉ-ⵜ!”
26 ⴻⵊⵊ ⵉⵏⵏⵉ ⵉⴼⴰⵔⵔⵃⴻⵏ ⵅ ⴰⵔⵥⵉⵢⵢⴻⵜ ⵉⵏⵓ,
ⴰⴷ ⵜⵜⵡⴰⵅⴰⵔⴻⵡⴹⴻⵏ ⵓ ⴰⴷ ⵙⵙⵏⵓⴼⴼⴰⵔⴻⵏ ⵉⵅⴻⴼ ⵏⵙⴻⵏ ⵊⵎⵉⵄ,
ⴻⵊⵊ ⵉⵏⵏⵉ ⵉⴳⴳⵉⵏ ⵉⵅⴻⴼ ⵏⵙⴻⵏ ⵎⵖⴰⵔⴻⵏ ⵥⵥⴰⵜⵉ,
ⴰⴷ ⵢⴰⵔⴹⴻⵏ ⵙ ⵓⵙⴻⴹⵃⵉ ⴷ ⵍⴻⴼⴹⵉⵃⴻⵜ.
27 ⴻⵊⵊ ⵉⵏⵏⵉ ⵢⴰⵔⴹⴰⵏ ⴷⵉ ⵜⵙⴻⴳⴷⴰ ⴰⴷ ⵙⵍⵉⵡⴻⵍⵡⴻⵏ ⵓ ⴰⴷ ⴼⴰⵔⵃⴻⵏ,
ⴻⵊⵊ ⵉ-ⵜⴻⵏ ⴰⴷ ⵉⵏⵉⵏ:
“ⴷ ⴰⵎⴻⵇⵇⵔⴰⵏ ⵉ ⵢⴻⴵⴰ ⵙⵉⴷⵉ ⵡⴻⵏⵏⵉ ⵢⴰⵔⴹⴰⵏ ⴷⵉ ⵍⴻⵀⵏⴰ ⵏ ⵓⵎⵙⴻⵅⵅⴰⵔ ⵏⵏⴻⵙ.”
28 ⵅⴻⵏⵏⵉ ⵉⵍⴻⵙ ⵉⵏⵓ ⴰⴷ ⵉⴱⴰⵔⵔⴻⵃ ⵜⴰⵙⴻⴳⴷⴰ ⵏⵏⴻⴽ ⴷ ⵓⵚⴻⴱⴱⴻⵃ ⵏⵏⴻⴽ ⴰⵙⵙ ⵎⴰⵔⵔⴰ.