34
1 ⵏ ⴷⴰⵡⵓⴷ, ⵓⵎⵉ ⵉⵙⵙⵏⵉⵄⵎⵉⵍ, ⵉⴳⴳⴰ ⵉⵅⴻⴼ ⵏⵏⴻⵙ ⴷ ⴰⴱⵓⵀⴰⵍⵉ ⵥⵥⴰⵜ ⵉ ⵡⵓⴷⴻⵎ ⵏ ⴰⴱⵉⵎⵉⵍⵉⴽ, ⵡⴻⵏⵏⵉ ⵉ ⵅⴰⵙ ⵢⵓⵥⵥⵍⴻⵏ ⴰⵍⴰⵎⵉ ⵢⵓⵢⵓⵔ ⵏⴻⵜⵜⴰ. ■
2 ⴰⵍⵉⴼ. ⵏⴻⵛⵛ ⵅⵙⴻⵖ ⴰⴷ ⴱⴰⵔⴽⴻⵖ ⵉ ⵙⵉⴷⵉ ⵍⴻⴱⴷⴰ,
ⴰⵚⴻⴱⴱⵉⵃ ⵏⵏⴻⵙ ⴰⴷ ⵢⵉⵍⵉ ⴷⴻⴳ ⵓⵇⴻⵎⵎⵓⵎ ⵉⵏⵓ ⴱⵍⴰ ⵇⴻⵟⵟⵓ.
3 ⴱⵉⵜ. ⵍⴻⵄⵎⴰⵔ ⵉⵏⵓ ⴰⴷ ⵉⵚⴻⴱⴱⴻⵃ ⵉ ⵙⵉⴷⵉ.
ⵉⵎⵀⵉⵏⴻⵏ ⴰⴷ ⴰⵙ ⵙⵍⴻⵏ ⵓ ⴰⴷ ⴼⴰⵔⵃⴻⵏ.
4 ⴳⵉⵎⴻⵍ. ⵙⴻⵎⵖⴰⵔⴻⵎ ⴰⴽⵉⴷⵉ ⵙⵉⴷⵉ,
ⴻⵊⵊ ⴰⵏⴻⵖ ⴰⴷ ⵏⴻⵙⵙⵓⵄⵍⴰ ⵉⵙⴻⵎ ⵏⵏⴻⵙ ⵊⵎⵉⵄ.
5 ⴷⴰⵍⵉⵜ. ⵏⴻⵛⵛ ⴰⵔⵥⵓⵖ ⵅ ⵙⵉⴷⵉ ⵓ ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⴼⵉ,
ⵉⴼⴻⴽⴽ ⴰⵢⵉ ⵥⵉ ⵎⴰⵔⵔⴰ ⵜⵉⴳⴳⵯⵓⴷⵉ ⵉⵏⵓ.
6 ⵀⵉ. ⵏⵉⵜⵏⵉ ⵅⴻⵥⵥⴰⵔⴻⵏ ⵖⴰⵔⴻⵙ ⵓⵛⴰ ⵛⴻⵄⵛⴻⵄⴻⵏ,
ⵉⵖⴻⵎⴱⴰⴱ ⵏⵙⴻⵏ ⵡⴰⵔ ⵜⴻⵏ ⵜⵜⵍⴻⵃⵃⴰⴼⴻⵏ ⵄⴻⵎⵎⴰⵔⵚ.
7 ⵣⴰⵢⵉⵏ. ⵍⵎⴻⵙⴽⵉⵏ-ⴰ ⴷⴰⵏⵉⵜⴰ ⵉⵍⴰⵖⴰ ⵓ ⵙⵉⴷⵉ ⵉⵙⵍⴰ ⵖⴰⵔⴻⵙ,
ⵉⴼⴻⴽⴽ ⵉ-ⵜ ⵥⵉ ⵎⴰⵔⵔⴰ ⵍⴻⵃⵚⴰⵔⴰⵜ ⵏⵏⴻⵙ.
8 ⵅⵉⵜ. ⵍⵎⴰⵍⴰⴽ ⵏ ⵙⵉⴷⵉ ⵉⵇⵓⵡⵡⴰⵔ ⵙ ⵍⵎⴰⵔⴳⴻⵃ ⵏⵏⴻⵙ ⵅ ⵢⴻⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ,
ⵏⴻⵜⵜⴰ ⵉⴼⴻⴽⴽ ⵉ-ⵜⴻⵏ.
9 ⵜⵉⵜ. ⵇⴰⵙⴻⵎ ⴷ ⵜⵅⴻⵥⵥⴰⵔⴻⵎ, ⴰⵇⴰ ⵙⵉⴷⵉ ⵉⵛⵏⴰ.
ⵙⵙⴻⵄⴷ ⵏ ⵡⴻⵔⵢⴰⵥ ⵉⵊⴻⵀⴷⴻⵏ ⵡⴻⵏⵏⵉ ⵅⴰⵙ ⵉⵜⵜⵛⴰⵍⴰⵏ.
10 ⵢⵓⴷ. ⴳⴳⵯⴻⴷⴻⵎ ⵙⵉⴷⵉ, ⴰ ⴽⴻⵏⵏⵉⵡ, ⵉⵎⵇⴻⴷⴷⴰⵙⴻⵏ ⵏⵏⴻⵙ,
ⵎⴰⵖⴰⵔ ⵉⵏⵏⵉ ⵜ ⵉⵜⵜⴻⴳⴳⵯⴻⴷⴻⵏ ⵡⴰⵔ ⵜⴻⵏ ⵉⵜⵜⵅⴻⵚⵚⵉ ⵡⴰⵍⵓ.
11 ⴽⴰⴼ. ⵉⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵜⵜⴻⵃⵡⴰⵊⴻⵏ ⵓ ⴷⴰⵢⵙⴻⵏ ⵍⴰⵥ,
ⵎⴰⵛⴰ ⵉⵏⵏⵉ ⵢⴰⵔⴻⵥⵥⵓⵏ ⵅ ⵙⵉⴷⵉ, ⵡⴰⵔ ⵜⴻⵏ ⵉⵜⵜⵅⴻⵚⵚⵉ ⵡⴰⵍⵓ ⵥⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷ ⵍⵅⴰⵔ. ■
12 ⵍⴰⵎⵉⴷ. ⴰⵙⴻⵎ-ⴷⴷ, ⴽⴻⵏⵏⵉⵡ ⵉⵃⴻⵏⵊⵉⵔⴻⵏ, ⵙⵍⴻⵎ-ⴷⴷ ⵖⴰⵔⵉ!
ⵏⴻⵛⵛ ⴰⴷ ⴰⵡⴻⵎ ⵙⵙⵍⴻⵎⴷⴻⵖ ⵜⵉⴳⴳⵯⵓⴷⵉ ⵏ ⵙⵉⴷⵉ.
13 ⵎⵉⵎ. ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵔⵢⴰⵥ ⵡⴻⵏⵏⵉ ⴷⵉ ⵉⴵⴰ ⵎⴻⵥⵔⵉ ⴷⵉ ⵜⵓⴷⴰⵔⵜ,
ⵡⴻⵏⵏⵉ ⵉⵜⵜⴻⵅⵙⴻⵏ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⵃⵉⵎⴰ ⴰⴷ ⵉⵥⴰⵔ ⵍⵅⴰⵔ? ■
14 ⵏⵓⵏ. ⵎⵏⴻⵄ ⵉⵍⴻⵙ ⵏⵏⴻⴽ ⵥⵉ ⵍⵖⴰⵔ,
ⵓⵍⴰ ⴷ ⵉⵢⴻⵏⵛⵉⵛⴻⵏ ⵏⵏⴻⴽ ⵥⴻⴳ ⵡⴰⵡⴰⵍ ⵏ ⵍⵖⴻⵛⵛ.
15 ⵙⴰⵎⵉⵅ. ⵃⴻⵢⵢⴻⴷ ⵅ ⵜⵓⵄⴻⴼⴼⵏⴰ ⵓ ⴻⴳⴳ ⵍⵅⴰⵔ.
ⴰⵔⵥⵓ ⵅ ⵍⴻⵀⵏⴰ ⵓ ⴹⴼⴰⵔ ⵉ-ⵜ.
16 ⵄⴰⵢⵉⵏ. ⵜⵉⵟⵟⴰⵡⵉⵏ ⵏ ⵙⵉⴷⵉ ⵅ ⵉⵎⵙⴻⴳⴳⴰⴷⴻⵏ,
ⵉⵎⴻⵥⵥⵓⵖⴻⵏ ⵏⵏⴻⵙ ⵎⴻⵢⵢⵍⴻⵏ ⵖⴰⵔ ⵉⵖⵓⵢⵢⴰⵏ ⵏⵙⴻⵏ. ■
17 ⴱⵉ. ⵓⴷⴻⵎ ⵏ ⵙⵉⴷⵉ ⴹⵉⴷⴷ ⵉ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ,
ⵃⵉⵎⴰ ⴰⴷ ⵉⴽⴽⴻⵙ ⵍⵉⴷⴰⵔⴻⵜ ⴷⴰⵢⵙⴻⵏ ⵥⵉ ⵜⴻⵎⵎⵓⵔⵜ.
18 ⵜⵙⴰⴷⵉ. ⵏⵉⵜⵏⵉ ⵍⴰⵖⴰⵏ ⵓ ⵙⵉⴷⵉ ⵉⵙⵍⴰ-ⴷⴷ ⵖⴰⵔⵙⴻⵏ,
ⵏⴻⵜⵜⴰ ⵉⴼⴻⴽⴽ ⵉ-ⵜⴻⵏ ⵥⵉ ⵎⴰⵔⵔⴰ ⵍⴻⵃⵚⴰⵔⴰⵜ ⵏⵙⴻⵏ.
19 ⵇⵓⴼ. ⵙⵉⴷⵉ ⵢⵓⴷⴻⵙ ⵉ ⵎⴰⵔⵔⴰ ⵉⵏⵏⵉ ⵓⵎⵉ ⵉⵜⵜⵡⴰⵔⵥ ⵡⵓⵍ ⵏⵙⴻⵏ,
ⵉⵙⵙⴻⵏⵊⴰⵎ ⵉⵏⵏⵉ ⵓⵎⵉ ⵉⵜⵜⵡⴰⵍⴱⴻⵥ ⴱⵓⵃⴱⴻⵍ ⵏⵙⴻⵏ. ■
20 ⵔⵉⵅ. ⴰⵟⵟⴰⵙ ⵉⴵⴰⵏ ⵉⴼⴻⵇⵇⵓⵙⴻⵏ ⵏ ⵉⵎⵙⴻⴳⴳⴰⴷⴻⵏ,
ⵎⴰⵛⴰ ⵙⵉⴷⵉ ⵉⴼⴻⴽⴽ ⵉ-ⵜⴻⵏ ⵥⵥⴰⵢⵙⴻⵏ ⵎⴰⵔⵔⴰ. ■
21 ⵛⵉⵏ. ⵏⴻⵜⵜⴰ ⵉⵃⴻⵟⵟⴰ ⵉⵅⵙⴰⵏ ⵏⵏⴻⵙ ⵎⴰⵔⵔⴰ,
ⵓⵍⴰ ⴷ ⵉⵊⵊ ⵥⵥⴰⵢⵙⴻⵏ ⵡⴰⵔ ⵉⵜⵜⴰⵔⴻⵥⵥⵉ. ■
22 ⵜⴰⵡ. ⴰⵇⴰ ⵍⵖⴰⵔ ⴰⴷ ⵉⵏⴻⵖ ⴰⵄⴻⴼⴼⴰⵏ,
ⵉⵏⵏⵉ ⵉⵛⴰⵔⵔⵀⴻⵏ ⴰⵎⵙⴻⴳⴳⴻⴷ ⴰⴷ ⵜⵜⵡⴰⵄⴰⵇⴱⴻⵏ.
23 ⵙⵉⴷⵉ ⴰⴷ ⵉⴼⴷⵉ ⵍⴻⵄⵎⴰⵔ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ,
ⵎⴰⵔⵔⴰ ⵉⵏⵏⵉ ⵅⴰⵙ ⵉⵜⵜⵛⴰⵍⴰⵏ, ⵡⴰⵔ ⴳⴳⵓⵔ ⴰⴷ ⵜⵜⵡⴰⵄⴰⵇⴱⴻⵏ. □