33
1 ⵙⵍⵉⵡⴻⵍⵡⴻⵎ ⵉ ⵙⵉⴷⵉ, ⴰ ⵉⵎⵙⴻⴳⴳⴰⴷⴻⵏ, ⴰⵚⴻⴱⴱⴰⵃ ⴷ ⵉⵛⵜ ⵏ ⵜⴻⵍⵡⵉⵥⵜ ⵉ ⵢⴻⵏⵏⵉ ⵉⵙⴻⴳⴳⵎⴻⵏ. ■
2 ⵇⴰⴷⴰⵎ ⵙⵉⴷⵉ ⵙ ⵍⴳⴰⵎⴱⵔⵉ,
ⵥⴻⵀⵀⴷⴻⵎ ⴰⵙ ⵙ ⵍⵀⴰⵔⴱⴰ ⵓ ⵙ ⵍⵄⵓⴷ ⵏ ⵄⴻⵛⵔⴰ ⵏ ⵉⴼⵉⵍⴰⵏ.
3 ⵖⴻⵏⵏⵊⴻⵎ ⴰⵙ ⵙ ⵢⵉⵊⵊ ⵏ ⵢⴻⵥⵍⵉ ⴰⵎⴰⵢⵏⵓ,
ⵉⵔⴰⵔⴻⵎ ⵎⵍⵉⵃ ⵙ ⵓⵚⵓⴹⵉ ⴷⵉ ⵍⴱⵓⵇ. ■
4 ⵎⵉⵏⵥⵉ ⴰⵡⴰⵍ ⵏ ⵙⵉⴷⵉ ⵉⵙⴻⴳⴳⴻⵎ,
ⵎⴰⵔⵔⴰ ⵎⵉⵏ ⵉⵜⵜⴻⴳⴳ, ⵉⵜⵜⴻⴳⴳ ⵉ-ⵜ ⵙ ⵍⴰⵎⴰⵏ.
5 ⵏⴻⵜⵜⴰ ⵉⵜⵜⴻⵅⵙ ⵜⴰⵙⴻⴳⴷⴰ ⴷ ⵍⵃⴻⵇⵇ.
ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⵙⵉⴷⵉ. ■
6 ⵣⴻⴳ ⵡⴰⵡⴰⵍ ⵏ ⵙⵉⴷⵉ ⵜⵜⵡⴰⴳⴳⴻⵏ ⵉⵊⴻⵏⵡⴰⵏ,
ⵥⵉ ⴰⵔⵔⵓⵃ ⵏ ⵓⵇⴻⵎⵎⵓⵎ ⵏⵏⴻⵙ ⵜⵜⵡⴰⴳⴳⴻⵏⵜ ⵎⴰⵔⵔⴰ ⵍⵄⴻⵙⴽⴰⵔⴰⵜ ⵏⵙⴻⵏ. ■
7 ⵏⴻⵜⵜⴰ ⵉⵙⵙⵎⵓⵏ ⴰⵎⴰⵏ ⵏ ⵍⴻⴱⵃⴰⵔ ⴰⵎⴻⵛⵏⴰⵡ ⵉⵊⵊ ⵏ ⵡⴻⵖⴱⴰⵔ.
ⵏⴻⵜⵜⴰ ⵉⵅⴻⵎⵎⴻⵍ ⴰⵎⴰⵏ ⵢⵓⴵⵖⴻⵏ ⴷⴻⴳ ⵉⵅⵅⴰⵎⴻⵏ ⵏ ⵍⴻⵅⵥⴻⵏ.
8 ⴰⴷ ⵜⴻⴳⴳⵯⴻⴷ ⵎⴰⵔⵔⴰ ⵜⴰⵎⵎⵓⵔⵜ ⵥⵉ ⵙⵉⴷⵉ,
ⴰⴷ ⵥⵥⴰⵢⴻⵙ ⴳⴳⵯⴻⴷⴻⵏ ⵎⴰⵔⵔⴰ ⵉⵎⴻⵥⴷⴰⵖ ⵏ ⴷⴷⵓⵏⴻⵛⵜ.
9 ⵎⴰⵖⴰⵔ ⵏⴻⵜⵜⴰ ⵉⵙⵙⴰⵡⴰⵍ ⵓⵛⴰ ⴰⵇⴰ-ⵜ ⴷⵉⵏ,
ⵏⴻⵜⵜⴰ ⵉⵜⵜⴰⵎⴰⵔ ⵓⵛⴰ ⴰⴷ ⵢⵉⵍⵉ ⵉⴱⴻⴷⴷ ⴷⵉⵏ.
10 ⵙⵉⴷⵉ ⵉⵜⵜⴰⵔⴻⵥⵥⴰ ⵛⵛⵡⴰⵔ ⵏ ⵍⴻⴳⵏⵓⵙ,
ⵉⵙⵙⴻⴱⴹⴻⵍ ⵉⵅⴰⵔⵔⵉⵚⴻⵏ ⵏ ⵍⴻⴳⵏⵓⵙ. ■
11 ⵛⵛⵡⴰⵔ ⵏ ⵙⵉⴷⵉ ⴰⴷ ⵉⵇⵇⵉⵎ ⵉⴱⴻⴷⴷ ⵉ ⵍⴻⴱⴷⴰ,
ⵉⵅⴰⵔⵔⵉⵚⴻⵏ ⵏ ⵡⵓⵍ ⵏⵏⴻⵙ ⵥⵉ ⵊⵊⵉⵍ ⵖⴰⵔ ⵊⵊⵉⵍ. ■
12 ⵙⵙⴻⵄⴷ ⵏ ⵍⴳⴻⵏⵙ ⵉ ⵖⴰⵔ ⵉⴵⴰ ⴰⵔⴻⴱⴱⵉ ⵏⵏⴻⵙ ⴷ ⵙⵉⴷⵉ,
ⵍⴳⴻⵏⵙ ⵏⵏⵉ ⵉⵅⴹⴰⵔ ⵉ-ⵜ ⵏⴻⵜⵜⴰ ⴷ ⵜⴰⵙⵖⴰⵔⵜ ⵉ ⵢⵉⵅⴻⴼ ⵏⵏⴻⵙ.■
13 ⵙⵉⴷⵉ ⵉⵅⴻⵥⵥⴰⵔ-ⴷⴷ ⵥⴻⴳ ⵓⵊⴻⵏⵏⴰ,
ⵉⵜⵜⵡⴰⵍⴰ ⵎⴰⵔⵔⴰ ⵜⴰⵔⵡⴰ ⵏ ⴱⵏⴰⴷⴻⵎ.
14 ⵣⴻⴳ ⵡⴻⵎⵛⴰⵏ ⵏ ⵜⵥⴻⴷⴷⵉⵖⵜ ⵏⵏⴻⵙ ⵉⵅⴻⵥⵥⴰⵔ
ⵖⴰⵔ ⵎⴰⵔⵔⴰ ⵉⵎⴻⵥⴷⴰⵖ ⵏ ⵜⴻⵎⵎⵓⵔⵜ.
15 ⵏⴻⵜⵜⴰ ⵡⴻⵃⵃⴷⴻⵙ ⴷ ⵡⴻⵏⵏⵉ ⵉⴽⴻⵡⵡⵏⴻⵏ ⵓⵍ ⵏⵙⴻⵏ,
ⵏⴻⵜⵜⴰ ⵉⵃⴻⴽⴽⴰⵔ ⵉ ⵎⴰⵔⵔⴰ ⵜⵉⵎⴻⴳⴳⴰ ⵏⵙⴻⵏ.
16 ⴰⵊⴻⴵⵉⴷ ⵡⴰⵔ ⵉⵜⵜⵡⴰⵙⵙⴻⵏⵊⴰⵎ ⵙ ⵢⵉⵊⵊ ⵏ ⵍⵄⴻⵙⴽⴰⵔ ⴷ ⴰⵎⴻⵇⵇⵔⴰⵏ,
ⴱⵓ-ⵜⴻⵖⵔⵓⴹⵜ ⵡⴰⵔ ⵉⵜⵜⵡⴰⴼⴻⴽⴽⵉ ⵙ ⵊⵊⴻⵀⴷ ⴰⵟⵟⴰⵙ.
17 ⴰⵇⴰ ⴷ ⴰⵅⴰⵔⵔⵉⵇ ⴱⴻⵍⵍⵉ ⴰⵢⵉⵙ ⴰⴷ ⴷⴷ-ⵢⴰⵡⵉ ⴰⵙⴻⵏⵊⴻⵎ,
ⵄⴰⴷ ⵙ ⵊⵊⴻⵀⴷ ⵏⵏⴻⵙ ⴰⵎⴻⵇⵇⵔⴰⵏ ⵡⴰⵔ ⴷⴷ-ⵉⵜⵜⴻⵏⴼⴻⴽⴽⵉ.
18 ⵅⵥⴰⵔ, ⵜⵉⵟⵟ ⵏ ⵙⵉⴷⵉ ⵅ ⵢⴻⵏⵏⵉ ⵥⵥⴰⵢⴻⵙ ⵉⵜⵜⴻⴳⴳⵯⴻⴷⴻⵏ,
ⵅ ⵢⴻⵏⵏⵉ ⵉⵜⵜⵔⴰⵊⴰⵏ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ, ■
19 ⵃⵉⵎⴰ ⴰⴷ ⵉⴼⴻⴽⴽ ⵍⴻⵄⵎⴰⵔ ⵏⵙⴻⵏ ⵥⵉ ⵍⵎⴻⵡⵜ,
ⵃⵉⵎⴰ ⴰⴷ ⵜⴻⵏ ⵢⴻⵊⵊ ⵇⵇⵉⵎⴻⵏ ⴷⴷⴰⵔⴻⵏ ⴷⵉ ⵍⴰⵥ.
20 ⵍⴻⵄⵎⴰⵔ ⵏⵏⴻⵖ ⵉⵜⵜⵔⴰⵊⴰ ⵙⵉⴷⵉ,
ⴰⵇⴰ ⵏⴻⵜⵜⴰ ⴷ ⴰⵄⴰⵡⴻⵏ ⵏⵏⴻⵖ ⴷ ⵜⴰⵙⴻⴷⴷⴰⵔⵜ ⵏⵏⴻⵖ ⵉ ⵓⵙⴻⵍⵇⵉ.
21 ⵎⴰⵖⴰⵔ ⵥⵥⴰⵢⴻⵙ ⵉⴼⴰⵔⵔⴻⵃ ⵡⵓⵍ ⵏⵏⴻⵖ,
ⵎⵉⵏⵥⵉ ⵏⴻⵜⵜⵛⴰⵍ ⵅ ⵢⵉⵙⴻⵎ ⵏⵏⴻⵙ ⵉⵇⴻⴷⴷⵙⴻⵏ.
22 ⴰⴷ ⵅⴰⵏⴻⵖ ⵜⴰⵔⵙⴰ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ, ⴰ ⵙⵉⴷⵉ,
ⵄⵍⴰⵃⵙⴰⴱ ⵎⴰⵎⵎⴻⵛ ⵉ ⵛⴻⴽ ⵏⴻⵜⵜⵔⴰⵊⴰ.