31
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ. 2 ⵏⴻⵛⵛ ⵜⵜⴻⵛⵍⴻⵖ ⵅⴰⴽ, ⴰ ⵙⵉⴷⵉ,
ⵡⴰⵔ ⵜⵜⴻⵊⵊⵉ ⴰⴷ ⵙⴻⴹⵃⵉⵖ ⵉ ⵍⴻⴱⴷⴰ,
ⴼⴻⴽⴽ ⴰⵢⵉ ⵙ ⵜⵙⴻⴳⴷⴰ ⵏⵏⴻⴽ. ■
3 ⴻⵡⵛ ⴰⵢⵉ ⴰⵎⴻⵥⵥⵓⵖ ⵏⵏⴻⴽ, ⴼⴻⴽⴽ ⴰⵢⵉ ⴷⴻⵖⵢⴰ.
ⵉⵍⵉ ⴷ ⵜⴰⵚⴹⴰⵔⵜ ⵉⵊⴻⵀⴷⴻⵏ ⵉ ⵏⴻⵛⵛ,
ⵉⵊⵊ ⵏ ⵍⴱⵓⵔⵊ ⵃⵉⵎⴰ ⴰⴷ ⴰⵢⵉ ⵜⴻⵙⵙⵏⴻⵊⵎⴻⴷ.
4 ⵎⴰⵖⴰⵔ ⵛⴻⴽ ⴷ ⵜⴰⵚⴹⴰⵔⵜ ⵉⵏⵓ ⴷ ⵍⴱⵓⵔⵊ ⵉⵏⵓ.
ⵏⴷⴻⵀ ⴰⵢⵉ, ⵜⵀⵉⵍⵍⴰ ⴷⴰⵢⵉ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⴽ.
5 ⴼⴻⴽⴽ ⴰⵢⵉ ⵥⵉ ⵜⵔⴰⵛⵛⴰ ⵏⵏⵉ ⵅⴰⴼⵉ ⴳⴳⵉⵏ ⵙ ⵜⵏⵓⴼⴼⵔⴰ,
ⵎⴰⵖⴰⵔ ⵛⴻⴽ ⴷ ⵊⵊⴻⵀⴷ ⵉⵏⵓ.
6 ⴷⴻⴳ ⵓⴼⵓⵙ ⵏⵏⴻⴽ ⵉ ⴳⴳⵉⵖ ⴱⵓⵃⴱⴻⵍ ⵉⵏⵓ.
ⵛⴻⴽ ⵜⴻⴼⴷⵉⴷ ⴰⵢⵉ, ⴰ ⵙⵉⴷⵉ, ⴰⵔⴻⴱⴱⵉ ⴷ ⴰⵎⵜⵉⵇⵇⵉ ⵛⴻⴽ. ■
7 ⵏⴻⵛⵛ ⵛⴰⵔⵔⵀⴻⵖ ⵉⵏⵏⵉ ⵉⵜⵜⵛⴻⵖⵍⴻⵏ ⵉⵅⴻⴼ ⵏⵙⴻⵏ ⵙ ⵍⴻⵅⵢⴰⵍⴰⵜ ⵉⴱⴻⵟⵟⵉⵍⴻⵏ.
ⵏⴻⵛⵛ ⵜⵜⴻⵛⵍⴻⵖ ⵅ ⵙⵉⴷⵉ.
8 ⵏⴻⵛⵛ ⴰⴷ ⴰⵔⴻⵛⵇⴻⵖ ⵓ ⴰⴷ ⴼⴰⵔⵃⴻⵖ ⵥⵉ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,
ⵎⵉⵏⵥⵉ ⵛⴻⴽ ⵜᵉⵜⵜⵡⴰⵍⵉⴷ ⵍⴻⵖⴱⴻⵏ ⵉⵏⵓ ⵓ ⵜⴰⵔⴻⴳⴳⴱⴻⴷ ⵅ ⵍⴻⵃⵚⴰⵔⴰⵜ ⵉⵏⵓ,
9 ⵎⵉⵏⵥⵉ ⵡⴰⵔ ⴷ ⴰⵢⵉ ⵜⴰⵔⵔⵉⴷ ⵖⴰⵔ ⵓⴼⵓⵙ ⵏ ⵍⴻⵄⴷⵓ ⵉⵏⵓ,
ⵎⴰⵛⴰ ⵜⴻⴳⴳⵉⴷ ⴰⵢⵉ ⵜⵜⴰⵙⵉⵄ ⵖⴰⵔ ⵉⴹⴰⵔⴻⵏ ⵉⵏⵓ.
10 ⵃⵉⵏⵏ ⵅⴰⴼⵉ, ⴰ ⵙⵉⴷⵉ, ⵎⴰⵖⴰⵔ ⵜⵜⵡⴰⵃⴻⵚⵚⴰⵔⴻⵖ,
ⵜⵉⵟⵟ ⵉⵏⵓ ⴷ ⵍⴻⵄⵎⴰⵔ ⵉⵏⵓ ⴷ ⵓⵄⴻⴷⴷⵉⵙ ⵉⵏⵓ ⴰⵇⴰ ⴼⴻⵛⵍⴻⵏ.
11 ⵎⴰⵖⴰⵔ ⵜⵓⴷⴰⵔⵜ ⵉⵏⵓ ⵜⴽⴻⵎⵎⴻⵍ ⵙ ⵡⴻⵛⴹⴰⵏ,
ⵉⵙⴻⴳⴳⵯⵓⵙⴰ ⵉⵏⵓ ⵙ ⵓⵥⴻⵀⵀⴰⵔ.
ⵊⵊⵀⴻⴷ ⵉⵏⵓ ⵉⵀⴻⵢⵢⴻⴼ ⵥⵉ ⵍⵎⵓⵄⵚⵉⵢⵢⴻⵜ ⵉⵏⵓ,
ⵉⵅⵙⴰⵏ ⵉⵏⵓ ⴰⵇⴰ ⴰⵔⵛⴰⵏ.
12 ⵉ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⴷⴻⵡⵍⴻⵖ ⴷ ⴰⵙⵜⴻⵀⵥⵉ,
ⵉ ⵊⵊⵉⵔⴰⵏ ⵉⵏⵓ ⵇⴰⵄ ⴰⵟⵟⴰⵙ,
ⵉ ⵉⵎⵇⴰⵔⵔⴰⴱⴻⵏ ⵉⵏⵓ ⴷⴻⵡⵍⴻⵖ ⴷ ⵉⵊⵊⴻⵏ ⵉ ⵉⵙⵙⵏⴻⵅⵍⵉⵄⴻⵏ.
ⵉⵏⵏⵉ ⴷ ⴰⵢⵉ ⵉⵜⵜⵡⴰⵍⵉⵏ ⴷⴻⴳ ⵡⴻⴱⵔⵉⴷ, ⵜⵜⵔⴰⴽⴽⵡⴰⵍⴻⵏ ⵥⵥⴰⵢⵉ. ■
13 ⵜⵜⵓⵏ ⴰⵢⵉ ⵙ ⵡⵓⵍ ⴰⵎ ⵢⵉⵊⵊ ⵏ ⵓⵎⴻⵜⵜⵉⵏ,
ⴷⴻⵡⵍⴻⵖ ⴰⵎⴻⵛⵏⴰⵡ ⵉⵛⴻⵇⴼⴰⵏ ⵏ ⵡⴻⵇⴷⵉⵃ,
14 ⵎⴰⵖⴰⵔ ⵙⵍⵉⵖ ⴰⵇⴰ ⴰⵟⵟⴰⵙ ⵛⴻⵇⵇⴼⴻⵏ ⴷⴰⵢⴻⴽ,
ⴰⵙⵙⵉⴳⴳⵯⴻⴷ ⵜⵓⵖⴰ ⵉⵜⴻⵏⵏⴻⴹ ⴰⵢⵉ-ⴷⴷ ⵓⵎⵉ ⵅⴰⴼⵉ ⴳⴳⵉⵏ ⵜⴰⵎⴻⵄⵎⵓⵞ.
ⵜⵓⵖⴰ ⴰⵔⴻⵥⵥⵓⵏ ⴰⴷ ⴽⴽⵙⴻⵏ ⵜⵓⴷⴰⵔⵜ ⵉⵏⵓ.
15 ⵎⴰⵛⴰ ⵏⴻⵛⵛ ⵜⵜⴻⵛⵍⴻⵖ ⵅⴰⴽ, ⴰ ⵙⵉⴷⵉ,
ⵇⵇⴰⵔⴻⵖ: ‘ⵛⴻⴽ ⴷ ⴰⵔⴻⴱⴱⵉ ⵉⵏⵓ!’
16 ⵉⴽⵓⴷⴻⵏ ⵉⵏⵓ ⴰⵇⴰ ⴰⵜⴻⵏ ⴷⴻⴳ ⵓⴼⵓⵙ ⵏⵏⴻⴽ.
ⵙⴻⵏⵊⴻⵎ ⴰⵢⵉ ⵥⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵉⵏⵓ ⵓ ⵥⴻⴳ ⵉⵏⵏⵉ ⴷ ⴰⵢⵉ ⵉⴹⴻⴼⴼⴰⵔⴻⵏ,
17 ⴻⵊⵊ ⵓⴷⴻⵎ ⵏⵏⴻⴽ ⴰⴷ ⵢⴻⴳⴳ ⵜⴰⴼⴰⵡⵜ ⵅ ⵉⵎⵙⴻⵅⵅⴰⵔⴻⵏ ⵏⵏⴻⴽ,
ⵙⴻⵏⵊⴻⵎ ⴰⵢⵉ ⵙ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ.
18 ⴰ ⵙⵉⴷⵉ, ⵡⴰⵔ ⵜⵜⴻⵊⵊⵉ ⴰⴷ ⴷⴻⵡⵍⴻⵖ ⵜⵜⵙⴻⴹⵃⵉⵖ,
ⵎⴰⵖⴰⵔ ⵅⴰⴽ ⵉ ⵜⵜⵍⴰⵖⵉⵖ.
ⴰⵔⵔ ⵉⵄⴻⴼⴼⴰⵏⴻⵏ ⴰⴷ ⴷⴻⵡⵍⴻⵏ ⵜⵜⵙⴻⴹⵃⴰⵏ,
ⴰⵔⵔ ⵉ-ⵜⴻⵏ ⴰⴷ ⵙⵙⵓⵙⵎⴻⵏ ⴷⵉ ⵍⴰⵅⴰⵔⵜ.
19 ⴻⵊⵊ ⴰⴷ ⵙⵇⴰⵔⴻⵏ ⵉⵢⴻⵏⵛⵉⵛⴻⵏ ⵉⵙⵙⵅⴰⵔⵔⵉⵇⴻⵏ,
ⵉⵏⵏⵉ ⵉⵙⵙⴰⵡⴰⵍⴻⵏ ⵙ ⵏⵏⴼⴰⵅⴻⵜ ⴹⵉⴷⴷ ⵉ ⵓⵎⵙⴻⴳⴳⴻⴷ,
ⵙ ⵓⵄⴻⴼⴼⴰⵔ ⴷ ⵓⵙⴻⵃⵇⴰⵔ.
20 ⵎⴻⵛⵃⴰⵍ ⵉⵎⴻⵇⵇⴰⵔ ⵍⵅⴰⵔ ⵏⵏⴻⴽ ⵉ ⵜⵅⴻⵎⵎⵍⴻⴷ ⵉ ⵢⴻⵏⵏⵉ ⵛⴻⴽ ⵉⵜⵜⴻⴳⴳⵯⴻⴷⴻⵏ,
ⵡⴻⵏⵏⵉ ⵜⴻⵙⵙⵡⴻⵊⴷⴻⴷ ⵉ ⵢⴻⵏⵏⵉ ⵖⴰⵔⴻⴽ ⴷⴷ-ⵢⴰⵔⴻⴽⴽⵡⴰⵍⴻⵏ ⵥⵉ ⵜⴰⵔⵡⴰ ⵏ ⴱⵏⴰⴷⴻⵎ! ■
21 ⵛⴻⴽ ⵜⴻⵙⵙⴷⴷⵓⵔⵢⴻⴷ ⵉ-ⵜⴻⵏ ⵙ ⵓⵍⴻⵃⵃⴰⴼ ⵏ ⵡⵓⴷⴻⵎ ⵏⵏⴻⴽ,
ⵥⵉ ⵏⵏⴼⴰⵅⴻⵜ ⵏ ⴱⵏⴰⴷⴻⵎ.
ⵛⴻⴽ ⵜⴻⵙⵙⵏⵓⴼⴼⴰⵔⴻⴷ ⵉ-ⵜⴻⵏ ⴷⵉ ⵜⴻⵅⵥⴰⵏⵜ,
ⵥⴻⴳ ⵓⵎⵛⵓⴱⴱⴻⵛ ⵏ ⵉⵢⴻⵏⵛⵉⵛⴻⵏ.
22 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ,
ⵎⴰⵖⴰⵔ ⵏⴻⵜⵜⴰ ⵢⴰⵔⵔⴰ ⴰⵢⵉ-ⴷⴷ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⴷ ⵍⴻⵄⵊⴻⴱ,
ⴷⴻⴳ ⵉⵛⵜ ⵏ ⵜⴻⵏⴷⵉⵏⵜ ⵉⴼⴰⵔⵢⴻⵏ.
23 ⵏⴻⵛⵛ ⴷⴻⵖⵢⴰ ⵏⵏⵉⵖ: “ⵏⴻⵛⵛ ⵜⵜⵡⴰⵇⴻⵙⵙⴻⵖ ⵥⵉ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⴽ!’
ⵎⴰⵛⴰ ⵄⴰⴷ ⵛⴻⴽ ⵜⴻⵙⵍⵉⴷ ⵉ ⵜⵎⵉⵊⵊⴰ ⵏ ⵓⵃⴻⵛⵛⴻⵎ ⵉⵏⵓ ⵓⵎⵉ ⴷⴷ ⵅⴰⴽ ⵍⴰⵖⵉⵖ.
24 ⵙⵄⵉⵥⵥⴻⵎ ⵙⵉⴷⵉ, ⵎⴰⵔⵔⴰ ⵉⵎⵜⵉⵇⵇⴰⵏ ⵏⵏⴻⵙ,
ⵎⴰⵖⴰⵔ ⵙⵉⴷⵉ ⵉⵃⴻⵟⵟⴰ ⵅ ⵢⴻⵏⵏⵉ ⵉⵜⵜⴰⵎⵏⴻⵏ,
ⵓ ⵡⴻⵏⵏⵉ ⵉⵜⵜⴻⴳⴳⴻⵏ ⵙ ⵏⵏⴼⴰⵅⴻⵜ, ⵉⵜⵜⵅⴻⴵⴻⵚ ⵉ-ⵜ ⵙ ⵓⴼⴻⵢⵢⴻⴹ.
25 ⵉⵍⵉⵎ ⴷ ⵉⵔⵢⴰⵥⴻⵏ ⵓ ⵏⴻⵜⵜⴰ ⴰⴷ ⴷⴰⵢⵡⴻⵎ ⵢⴻⴳⴳ ⵓⵍ,
ⵡⴰⵀ, ⵎⴰⵔⵔⴰ ⵉⵏⵏⵉ ⵉⵜⵜⵔⴰⵊⴰⵏ ⵙⵉⴷⵉ. ■