30
1 ⴰⵥⴻⵀⵀⴻⴷ, ⵉⵥⵍⵉ ⵏ ⵓⴷⴻⵛⵛⴻⵏ ⵏ ⵜⴰⴷⴷⴰⵔⵜ ⵏ ⴷⴰⵡⵓⴷ. 2 ⵏⴻⵛⵛ ⴰⴷ ⵛⴻⴽ ⵙⵙⵓⵄⵍⵉⵖ, ⴰ ⵙⵉⴷⵉ,
ⵎⴰⵖⴰⵔ ⵛⴻⴽ ⵜⴻⵙⵙⴳⴻⵄⵄⴷⴻⴷ ⴰⵢⵉ,
ⵡⴰⵔ ⵜⴻⵊⵊⵉⴷ ⵛⴰ ⵍⵄⴻⴷⵢⴰⵏ ⵉⵏⵓ ⴰⴷ ⴼⴰⵔⵃⴻⵏ ⵅ ⵡⴻⵄⵔⵓⵔ ⵉⵏⵓ.
3 ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵏⴻⵛⵛ ⵍⴰⵖⵉⵖ ⴰⵛ,
ⵓⵛⴰ ⵛⴻⴽ ⵜⴻⵙⵙⴳⴻⵏⴼⵉⴷ ⴰⵢⵉ.
4 ⴰ ⵙⵉⴷⵉ, ⵛⴻⴽ ⵜⴻⵙⵙⵓⵄⵍⵉⴷ ⵍⴻⵄⵎⴰⵔ ⵉⵏⵓ ⵥⵉ ⵍⴰⵅⴰⵔⵜ,
ⵜⴰⵔⵔⵉⴷ ⴰⵢⵉ-ⴷⴷ ⵖⴰⵔ ⵜⵓⴷⴰⵔⵜ ⵊⴰⵔ ⵢⴻⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⴻⴳ ⵡⴻⵃⴼⵓⵔ.
5 ⵣⴻⵀⵀⴷⴻⵎ ⵉ ⵙⵉⴷⵉ, ⴰ ⴽⴻⵏⵏⵉⵡ, ⵉⵎⵜⵉⵇⵇⴰⵏ ⵏⵏⴻⵙ,
ⵇⴰⴷⴰⵎ ⵎⴰⵃⴻⵏⴷ ⴰⴷ ⵜⵄⴻⵇⵍⴻⵎ ⵅ ⵜⵇⴻⴷⴷⴰⵙⵜ ⵏⵏⴻⵙ. ■
6 ⵎⴰⵖⴰⵔ ⴰⵖⴹⴰⴱ ⵏⵏⴻⵙ ⵉⵜⵜⴻⴽⴽ ⴷⵔⵓⵙ ⵡⴰⵀⴰ,
ⵎⴰⵛⴰ ⴰⵔⴹⴰ ⵏⵏⴻⵙ ⵉⵜⵜⵖⵉⵎⴰ ⵎⴰⵔⵔⴰ ⵜⵓⴷⴰⵔⵜ.
ⴷⵉ ⵜⵎⴻⴷⴷⵉⵜ ⴰⵇⴰ ⴷⵉⵏ ⵉⵎⴻⵟⵟⴰⵡⴻⵏ ⴰⵍ ⴵⵉⵍⴻⵜ,
ⵎⴰⵛⴰ ⵖⴰⵔ ⵜⵓⴼⴼⵓⵜ ⴰⵇⴰ ⴷⵉⵏ ⴰⵙⵍⵉⵡⵍⴻⵡ.
7 ⴷⴻⴳ ⵓⴼⵍⴰⵃ ⵉⵏⵓ ⵏⵏⵉⵖ:
“ⵡⴰⵔ ⵜⵜⴻⴼⴰⵔⵉⵖⴻⵖ ⵛⴰ ⵉ ⵍⴻⴱⴷⴰ!”
8 ⴰ ⵙⵉⴷⵉ, ⴷⵉ ⵍⵅⴰⴹⴰⵔ ⵏⵏⴻⴽ ⵜⴻⵙⵙⵎⴻⵜⵏⴻⴷ ⴰⴷⵔⴰⵔ ⵉⵏⵓ ⵙ ⵓⵎⴻⵜⵜⴻⵏ ⵉⵊⴻⵀⴷⴻⵏ,
ⵎⴰⵛⴰ ⵓⵎⵉ ⵜⵍⴻⵃⵃⴼⴻⴷ ⵓⴷⴻⵎ ⵏⵏⴻⴽ, ⴷⴻⵡⵍⴻⵖ ⵜⵜⴻⴳⴳⵯⴻⴷⴻⵖ.
9 ⵏⴻⵛⵛ ⵍⴰⵖⵉⵖ ⴰⵛ-ⴷⴷ, ⴰ ⵙⵉⴷⵉ,
ⵜⵜⴰⵔⴻⵖ ⴰⵔⴹⴰ ⵥⵉ ⵙⵉⴷⵉ ⵉⵏⵓ.
10 ⵎⴰⵏ ⵍⴻⴼⴹⴻⵍ ⵏ ⵉⴷⴰⵎⵎⴻⵏ ⵉⵏⵓ, ⵏ ⵓⵀⴻⴽⴽⵯⵓ ⵉⵏⵓ ⴷⴻⴳ ⵡⴻⵏⴹⴻⵍ?
ⵎⴰ ⴰⴷ ⵛⴻⴽ ⵜⵇⴰⴷⴰ ⵜⵄⴻⵊⵊⴰⵊⵜ?
ⵎⴰ ⴰⴷ ⵜⴱⴰⵔⵔⴻⵃ ⵙ ⵍⴰⵎⴰⵏ ⵏⵏⴻⴽ?
11 ⵙⴻⵍ-ⴷⴷ ⵖⴰⵔⵉ, ⴰ ⵙⵉⴷⵉ, ⵓ ⵃⵉⵏⵏ ⵅⴰⴼⵉ,
ⴰ ⵙⵉⴷⵉ, ⵉⵍⵉ ⴷ ⴰⵎⵄⴰⵡⴻⵏ ⵉⵏⵓ.
12 ⵛⴻⴽ ⴰⵇⴰ ⵜⴰⵔⵔⵉⴷ ⵜⵖⵓⵢⵢⵉⵜ ⵉⵏⵓ ⵏ ⵡⴻⵛⴹⴰⵏ ⴷ ⵛⵛⴹⵉⵃ ⵙ ⵏⵏⵓⴱⵜⴰⵜ,
ⵜⴻⵙⵙⴰⵔⵅⵓⴷ ⵜⵅⴰⵏⵛⴻⵜ ⵉⵏⵓ ⵏ ⵡⴻⵛⴹⴰⵏ,
ⵜⴻⵙⵙⴱⴻⵢⵙⴻⴷ ⴰⵢⵉ ⵙ ⵍⴻⴼⵔⴰⵃⴻⵜ,
13 ⵃⵉⵎⴰ ⴰⵄⵓⴵⵉ ⵉⵏⵓ ⴰⴷ ⴰⵛ ⵉⵥⴻⵀⵀⴻⴷ ⵓ ⵡⴰⵔ ⵉⵜⵜⵙⵓⵙⵓⵎ.
ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵏⴻⵛⵛ ⴰⴷ ⵛⴻⴽ ⵇⴰⴷⵉⵖ ⵉ ⵍⴻⴱⴷⴰ.