1 ⴰⵥⴻⵀⵀⴻⴷ ⵏ ⴷⴰⵡⵓⴷ.

ⵉ ⵛⴻⴽ ⵓⵎⵉ ⵍⴰⵖⵉⵖ, ⴰ ⵙⵉⴷⵉ, ⴰⵇⴰ ⵛⴻⴽ ⴷ ⵜⴰⵚⴹⴰⵔⵜ ⵉⵏⵓ.

ⵡⴰⵔ ⵜⵜⴻⴳⴳ ⵛⴰ ⵉⵅⴻⴼ ⵏⵏⴻⴽ ⵡⴰⵔ ⵖⴰⵔⵉ ⵜⵜⴻⵙⵍⵉⴷ,

ⴰⵍⴰⵎⵉ, ⵙ ⵡⴻⵙⵇⴰⵔ ⵏⵏⴻⴽ, ⵡⴰⵔ ⵜⵜⴰⵔⴻⴽⴽⵡⵉⵙⴻⵖ ⴰⴽ-ⴷ ⵢⴻⵏⵏⵉ ⴷⴷ-ⵉⵀⴻⴽⴽⵡⴰⵏ ⴷⴻⴳ ⵡⴻⵏⴹⴻⵍ. ^■  

2 ⵙⴻⵍ ⵉ ⵜⵎⵉⵊⵊⴰ ⵏ ⵓⵃⴻⵛⵛⴻⵎ ⵉⵏⵓ,

ⵅⵎⵉ ⵅⴰⴽ ⵜⵜⵍⴰⵖⵉⵖ,

ⵅⵎⵉ ⴽⴻⵙⵙⵉⵖ ⵉⴼⴰⵙⵙⴻⵏ ⵉⵏⵓ ⵖⴰⵔ ⵡⴻⵅⵅⴰⵎ ⵏ ⴷⴰⵅⴻⵍ ⵏ ⵣⵥⴰⵡⴻⵛⵜ ⵏⵏⴻⴽ ⵉⵇⴻⴷⴷⵙⴻⵏ.

3 ⵡⴰⵔ ⴷ ⴰⵢⵉ ⵜⵜⵊⴰⵔⵔⵉ ⴰⴽ-ⴷ ⵉⵄⴻⴼⴼⴰⵏⴻⵏ,

ⴰⴽ-ⴷ ⵢⴻⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ,

ⵉⵏⵏⵉ ⵉⵙⵙⴰⵡⴰⵍⴻⵏ ⵅ ⵍⴻⵀⵏⴰ ⴰⴽ-ⴷ ⵉⵎⵇⴰⵔⵔⴰⴱⴻⵏ ⵏⵙⴻⵏ,

ⴰⵎ ⵖⴰⵔⵙⴻⵏ ⵉⴵⴰ ⵍⵖⴰⵔ ⴷⴻⴳ ⵡⵓⵍ ⵏⵙⴻⵏ. ^■  

4 ⵅⴻⴵⴻⵚ ⴰⵙⴻⵏ ⵄⵍⴰⵃⵙⴰⴱ ⵎⵉⵏ ⵜⵜⴻⴳⴳⴻⵏ ⵏⵉⵜⵏⵉ, ⵄⵍⴰⵃⵙⴰⴱ ⵜⵓⵄⴻⴼⴼⵏⴰ ⵏ ⵜⵎⴻⴳⴳⴰ ⵏⵙⴻⵏ.

ⵅⴻⴵⴻⵚ ⴰⵙⴻⵏ ⵄⵍⴰⵃⵙⴰⴱ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵙⴻⵏ,

ⴻⵡⵛ ⴰⵙⴻⵏ ⵍⵎⵓⵏⴻⵜ ⵏⵙⴻⵏ ⵉ ⵉⵙⴷⴰⵀⴻⴵⴻⵏ,

5 ⵎⵉⵏⵥⵉ ⵏⵉⵜⵏⵉ ⵡⴰⵔ ⵅⴻⵥⵥⴰⵔⴻⵏ ⵖⴰⵔ ⵍⴻⴼⵄⴰⵢⴻⵍ ⵏ ⵙⵉⴷⵉ,

ⵓⵍⴰ ⵖⴰⵔ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ.

ⵏⴻⵜⵜⴰ ⴰⴷ ⵜⴻⵏ ⵉⵖⴹⴻⵍ, ⵡⴰⵔ ⵜⴻⵏ ⵉⴱⴻⵏⵏⵉ ⵛⴰ.

6 ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ,

ⵎⴰⵖⴰⵔ ⵏⴻⵜⵜⴰ ⵉⵙⵍⴰ ⵉ ⵜⵎⵉⵊⵊⴰ ⵏ ⵓⵃⴻⵛⵛⴻⵎ ⵉⵏⵓ.

7 ⵙⵉⴷⵉ ⴷ ⵍⵄⴻⵥⵥ ⵉⵏⵓ ⴷ ⵜⴰⵙⴻⴷⴷⴰⵔⵜ ⵉⵏⵓ ⵏ ⵓⵙⴻⵍⵇⵉ,

ⵓⵍ ⵉⵏⵓ ⵉⵜⵜⵛⴻⵍ ⵅⴰⵙ ⵓⵛⴰ ⵜⵜⵡⴰⵄⴰⵡⵏⴻⵖ.

ⵓⵍ ⵉⵏⵓ ⵉⵏⴻⴳⴳⴻⵥ ⵙ ⵍⴻⴼⵔⴰⵃⴻⵜ, ⵙ ⵢⴻⵥⵍⵉ ⵉⵏⵓ ⴰⴷ ⵜ ⵇⴰⴷⵉⵖ.

8 ⵙⵉⴷⵉ ⴷ ⵊⵊⴻⵀⴷ ⵏⵙⴻⵏ,

ⵏⴻⵜⵜⴰ ⴷ ⵍⴱⵓⵔⵊ ⵉⵊⴻⵀⴷⴻⵏ ⵏ ⵉⵙⴻⵏⵊⵉⵎⴻⵏ ⵉ ⵓⵎⴻⴷⵀⵓⵏ ⵏⵏⴻⵙ.

9 ⵙⴻⵏⵊⴻⵎ ⵍⴳⴻⵏⵙ ⵏⵏⴻⴽ ⵓ ⴱⴰⵔⴻⴽ ⵜⴰⵙⵖⴰⵔⵜ ⵏⵏⴻⴽ ⵏ ⵍⵡⴰⵔⵜ,

ⴰⵔⵡⴻⵙ ⵉ-ⵜⴻⵏ ⵓ ⴰⵔⴱⵓ ⵜⴻⵏ ⵉ ⵍⴻⴱⴷⴰ ⵇⴰⵄ.