1 ⴰⵥⴻⵀⵀⴻⴷ ⵏ ⴷⴰⵡⵓⴷ.

ⵙⵉⴷⵉ ⴷ ⵜⴰⴼⴰⵡⵜ ⵉⵏⵓ ⴷ ⵓⵙⴻⵏⵊⴻⵎ ⵉⵏⵓ,

ⵡⵉ ⵥⵉ ⵖⴰ ⴳⴳⵯⴻⴷⴻⵖ?

ⵙⵉⴷⵉ ⴷ ⵍⵇⴻⵍⵄⴰ ⵉⵊⴻⵀⴷⴻⵏ ⵉ ⵜⵓⴷⴰⵔⵜ ⵉⵏⵓ,

ⵡⵉ ⵥⵉ ⵖⴰ ⵏⵏⵅⴻⵍⵄⴻⵖ ⵄⴰⴷ? ^■  

2 ⵓⵎⵉ ⵖⴰⵔⵉ ⴷⴷ-ⵇⴰⵔⵔⴱⴻⵏ ⵉⵄⴻⴼⴼⴰⵏⴻⵏ ⵃⵉⵎⴰ ⴰⴷ ⵛⵛⴻⵏ ⴷⴷⴰⵜ ⵉⵏⵓ,

ⵏⵏⵇⴰⵔⴹⴻⵏ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⴷ ⵍⵄⴻⴷⵢⴰⵏ ⵉⵏⵓ ⵙⵉⵎⴰⵏⵜ ⵏⵙⴻⵏ

ⵓⵛⴰ ⵡⴹⴰⵏ ⵖⴰⵔ ⵜⴻⵎⵎⵓⵔⵜ.

3 ⵡⴰⵅⵅⴰ ⴰⴷ ⵅⴰⴼⵉ ⵉⵃⵊⴻⵎ ⵉⵊⵊ ⵏ ⵍⵄⴻⵙⴽⴰⵔ,

ⵓⵍ ⵉⵏⵓ ⵡⴰⵔ ⵉⵜⵜⴻⴳⴳⵯⴰⴷ ⵛⴰ.

ⵡⴰⵅⵅⴰ ⴰⴷ ⵅⴰⴼⵉ ⵉⴽⴽⴰⵔ ⵓⵎⴻⵏⵖⵉ, ⵄⴰⴷ ⵏⴻⵛⵛ ⵜⵜⵖⵉⵎⵉⵖ ⵜⵜⴻⵛⵍⴻⵖ.

4 ⵉⵛⵜ ⵏ ⵍⵃⴰⵊⵊⴻⵜ ⵜⵜⴰⵔⴻⵖ ⵥⵉ ⵙⵉⴷⵉ, ⵜⴰ ⴰⴷ ⵅⴰⵙ ⴰⵔⵥⵓⵖ:

ⵎⵉⵏ ⵖⴰ ⴽⴽⴻⵖ ⴷⴷⴰⵔⴻⵖ ⴰⴷ ⵇⵇⵉⵎⴻⵖ ⴰⴷ ⵥⴻⴷⵖⴻⵖ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ,

ⵃⵉⵎⴰ ⴰⴷ ⵥⴰⵔⴻⵖ ⵍⴻⴹⵔⴰⴼⴻⵜ ⵏ ⵙⵉⴷⵉ,

ⵓ ⵃⵉⵎⴰ ⴰⴷ ⴱⴻⵇⵛⴻⵖ ⴷⵉ ⵣⵥⴰⵡⴻⵛⵜ ⵏⵏⴻⵙ ⵜⴰⵎⴻⵇⵇⵔⴰⵏⵜ.

5 ⵎⴰⵖⴰⵔ ⵏⴻⵜⵜⴰ ⵉⵙⵙⴷⵓⵍⵓⵢ ⴰⵢⵉ ⴷⴻⴳ ⵓⴷⵓⵔⵔⵉ ⵏⵏⴻⵙ ⴷⴻⴳ ⵡⴰⵙⵙ ⵏ ⵍⵖⴰⵔ.

ⵏⴻⵜⵜⴰ ⵉⵙⵙⵍⴻⵇⵇⴰ ⴰⵢⵉ ⴷⴻⴳ ⵓⵙⴻⵍⵇⵉ ⵏ ⵓⵇⵉⴹⵓⵏ ⵏⵏⴻⵙ,

ⵏⴻⵜⵜⴰ ⵉⵙⵙⴳⴻⵄⵄⴰⴷ ⴰⵢⵉ ⵅ ⵉⵛⵜ ⵏ ⵜⴻⵚⴹⴰⵔⵜ.

6 ⵍⴻⵅⵅⵓ ⴰⴷ ⵉⵜⵜⵡⴰⵙⴳⴻⵄⵄⴻⴷ ⵓⵥⴻⴵⵉⴼ ⵉⵏⵓ ⵅ ⵍⵄⴻⴷⵢⴰⵏ ⵉⵏⵓ ⵉⵏⵏⵉ ⴷ ⴰⵢⵉ ⴷⴷ-ⵉⵏⵏⴹⴻⵏ,

ⵓ ⵙ ⵓⵚⵓⴹⵉ ⵙ ⵡⴻⵙⵔⵓⴷⴷⴻⵃ ⴷⵉ ⵍⴱⵓⵇ ⴰⴷ ⴰⵡⵢⴻⵖ ⵜⵉⵖⴰⵔⵚⴰ ⵖⴰⵔ ⵓⵇⵉⴹⵓⵏ ⵏⵏⴻⵙ,

ⴰⴷ ⵖⴻⵏⵏⵊⴻⵖ, ⵡⴰⵀ ⴰⴷ ⵥⴻⵀⵀⴷⴻⵖ ⵉ ⵙⵉⴷⵉ.

7 ⵙⴻⵍ ⵖⴰⵔ ⵜⵎⵉⵊⵊⴰ ⵉⵏⵓ, ⴰ ⵙⵉⴷⵉ, ⵅⵎⵉ ⵉ ⵖⴰ ⵍⴰⵖⵉⵖ,

ⵃⵉⵏⵏ ⵅⴰⴼⵉ ⵓ ⴰⵔⵔ-ⴷⴷ ⵅⴰⴼⵉ.

8 ⵣⵥⴰⵢⴻⴽ ⵉ ⵉⵙⵙⴰⵡⴰⵍ ⵡⵓⵍ ⵉⵏⵓ: “ⴰⵔⵥⵓ ⵅ ⵡⵓⴷⴻⵎ ⵉⵏⵓ!”

ⵏⴻⵛⵛ ⴰⵔⴻⵥⵥⵓⵖ ⵅ ⵡⵓⴷⴻⵎ ⵏⵏⴻⴽ, ⴰ ⵙⵉⴷⵉ.

9 ⵡⴰⵔ ⵥⵥⴰⵢⵉ ⵜⵜⴻⴼⴼⴰⵔ ⵓⴷⴻⵎ ⵏⵏⴻⴽ,

ⵡⴰⵔ ⵜⵜⵅⵉⵢⵢⴰⴱ ⴰⵎⵙⴻⵅⵅⴰⵔ ⵏⵏⴻⴽ ⴷⴻⴳ ⵡⴻⵖⴹⴰⴱ.

ⵜⵓⵖⴰ ⵛⴻⴽ ⴷ ⴰⵎⵄⴰⵡⴻⵏ ⵉⵏⵓ.

ⵡⴰⵔ ⴷ ⴰⵢⵉ ⵜⵜⵙⴻⵎⵃⴻⴷ ⵓ ⵡⴰⵔ ⴷ ⴰⵢⵉ ⵜⵜⴻⵊⵊⵉ, ⴰ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ.

10 ⵎⴰⵖⴰⵔ ⴱⴰⴱⴰ ⴷ ⵢⴻⵎⵎⴰ ⴰⵇⴰ ⵙⴻⵎⵃⴻⵏ ⴷⴰⵢⵉ,

ⵎⴰⵛⴰ ⵙⵉⴷⵉ ⴰⴷ ⴰⵢⵉ ⵉⴽⵙⵉ ⵖⴰⵔⴻⵙ.

11 ⵙⵛⴻⵏ ⴰⵢⵉ ⴰⴱⵔⵉⴷ ⵏⵏⴻⴽ, ⴰ ⵙⵉⴷⵉ,

ⵏⴷⴻⵀ ⴰⵢⵉ ⵖⴰⵔ ⵡⴻⴱⵔⵉⴷ ⵉⵙⴻⴳⴳⵎⴻⵏ,

ⴷⵉ ⵙⵙⵉⴱⴱⴻⵜ ⵏ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ. ^■  

12 ⵡⴰⵔ ⴷ ⴰⵢⵉ ⵜⵜⵙⴻⵍⵍⴻⵎ ⵖⴰⵔ ⵎⴻⵥⵔⵉ ⴷⴻⴳ ⵍⴻⵄⵎⴰⵔ ⵏ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ,

ⵎⴰⵖⴰⵔ ⵍⴻⵛⵀⵓⴷ ⵏ ⵥⵓⵔ ⴽⴽⴰⵔⴻⵏ ⵅⴰⴼⵉ,

ⵉⵏⵏⵉ ⵉ ⵅⴰⴼⵉ ⵉⵜⵜⵚⵓⴹⴻⵏ ⵙ ⵍⴻⵅⵛⵓⵏⴻⵛⵜ.

13 ⵓⵀ, ⵎⴰⵍⴰ ⵏⴻⵛⵛ ⵥⴻⵄⵎⴰ ⵡⴰⵔ ⵓⵎⵉⵏⴻⵖ ⴰⴷ ⵥⴰⵔⴻⵖ ⵍⵅⴰⵔ ⵏ ⵙⵉⴷⵉ,

ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ ...!

14 ⵔⴰⵊⴰ ⵙⵉⴷⵉ, ⵉⵍⵉ ⴷ ⴰⵔⵢⴰⵥ,

ⵏⴻⵜⵜⴰ ⴰⴷ ⴷⴰⵢⴻⴽ ⵢⴻⴳⴳ ⵓⵍ,

ⵡⴰⵀ ⵔⴰⵊⴰ ⵙⵉⴷⵉ. ^■