25
1 ⴰⵥⴻⵀⵀⴻⴷ ⵏ ⴷⴰⵡⵓⴷ. ⴰⵍⵉⴼ. ⴰ ⵙⵉⴷⵉ, ⵖⴰⵔⴻⴽ ⵉ ⴷⴷ-ⵙⵙⴳⴻⵄⵄⴰⴷⴻⵖ ⵍⴻⵄⵎⴰⵔ ⵉⵏⵓ.
2 ⴱⵉⵜ. ⴰ ⴰⵔⴻⴱⴱⵉ ⵉⵏⵓ, ⵏⴻⵛⵛ ⵜⵜⴻⵛⵍⴻⵖ ⵅⴰⴽ.
ⴻⵊⵊ ⴰⵢⵉ ⵡⴰⵔ ⵜⵜⵙⴻⴹⵃⵉⵖ,
ⴻⵊⵊ ⵍⵄⴻⴷⵢⴰⵏ ⵉⵏⵓ ⵡⴰⵔ ⵅⴰⴼⵉ ⵜⵜⴻⵙⵍⵉⵡⵍⵉⵡⴻⵏ ⵙ ⵍⴻⴼⵔⴰⵃⴻⵜ. ■
3 ⴳⵉⵎⴻⵍ. ⵡⴰⵀ, ⵎⴰⵔⵔⴰ ⵉⵏⵏⵉ ⵛⴻⴽ ⵉⵜⵜⵔⴰⵊⴰⵏ
ⵡⴰⵔ ⵜⵜⵙⴻⴹⵃⵉⵏ.
ⵉⵏⵏⵉ ⵉⴳⴳⵉⵏ ⵙ ⵍⴻⵖⴷⴰⵔ ⴱⵍⴰ ⵙⵙⵉⴱⴱⴻⵜ,
ⴰⴷ ⵙⴻⴹⵃⴻⵏ. ■
4 ⴷⴰⵍⵉⵜ. ⴰ ⵙⵉⴷⵉ, ⵙⵙⵛⴻⵏ ⴰⵢⵉ ⵉⴱⵔⵉⴷⴻⵏ ⵏⵏⴻⴽ,
ⵙⵖⴰⵔ ⴰⵢⵉ ⵉⵎⴻⵙⵔⴰⵇ ⵏⵏⴻⴽ. ■
5 ⵀⵉ. ⵏⴷⴻⵀ ⴰⵢⵉ ⴷⵉ ⵜⵉⴷⴻⵜⵜ ⵏⵏⴻⴽ ⵓ ⵙⵖⴰⵔ ⴰⵢⵉ,
ⵎⵉⵏⵥⵉ ⵛⴻⴽ ⴷ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ,
ⵏⴻⵛⵛ ⵙⵙⵉⵜⵉⵎⴻⵖ ⵅⴰⴽ ⴰⵙⵙ ⵎⴰⵔⵔⴰ.
6 ⵣⴰⵢⵉⵏ. ⵄⵇⴻⵍ, ⴰ ⵙⵉⴷⵉ, ⵅ ⴰⵔⵔⴻⵃⵎⴻⵜ ⵏⵏⴻⴽ,
ⵓ ⵅ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,
ⵎⴰⵖⴰⵔ ⴰⵇⴰ ⴰⵜⴻⵏⵜ ⴵⴰⵏⵜ ⵥⵉ ⵍⴻⴱⴷⴰ. ■
7 ⵅⵉⵜ. ⵡⴰⵔ ⵜⵜⵉⴷⴰⵔ ⵛⴰ ⴷⴷⵏⵓⴱ ⵏ ⵜⴻⵎⵥⵉ ⵉⵏⵓ
ⵓⵍⴰ ⴷ ⵉⵅⴻⵟⵟⴰⵏ ⵉⵏⵓ.
ⵅⴻⵎⵎ ⵎⴰⵛⴰ ⵖⴰⵔⵉ ⴷⵉ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,
ⴷⵉ ⵟⵟⵡⴻⵄ ⵏ ⵜⵛⵓⵏⵉ ⵏⵏⴻⴽ, ⴰ ⵙⵉⴷⵉ.
8 ⵜⵉⵜ. ⵙⵉⴷⵉ ⵉⵚⴱⴻⵃ, ⵉⵛⵏⴰ,
ⵙ ⵓⵢⴻⵏⵏⵉ ⴰⴷ ⵉⵙⵙⵖⴰⵔ ⴰⴱⵔⵉⴷ ⵉ ⵉⵎⴻⴷⵏⴰⴱ.
9 ⵢⵓⴷ. ⵏⴻⵜⵜⴰ ⴰⴷ ⵉⴳⴻⵡⵡⴻⴷ ⵉⵎⵀⵉⵏⴻⵏ ⵙ ⵍⵃⴻⵇⵇ,
ⵏⴻⵜⵜⴰ ⴰⴷ ⵉⵙⵙⴻⵍⵎⴻⴷ ⴰⴱⵔⵉⴷ ⵏⵏⴻⵙ ⵉ ⵉⵎⵀⵉⵏⴻⵏ.
10 ⴽⴰⴼ. ⵎⴰⵔⵔⴰ ⵉⵎⴻⵙⵔⴰⵇ ⵏ ⵙⵉⴷⵉ ⴰⵇⴰ ⴰⵜⴻⵏ ⴷ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷ ⵍⴰⵎⴰⵏ,
ⵉ ⵢⴻⵏⵏⵉ ⵉⵃⴻⵟⵟⴰⵏ ⵍⵄⴰⵀⴷ ⵏⵏⴻⵙ ⴷ ⵛⵛⴰⵀⴰⴷⴰⵜ ⵏⵏⴻⵙ.
11 ⵍⴰⵎⵉⴷ. ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⴽ, ⴰ ⵙⵉⴷⵉ,
ⵖⴼⴰⵔ ⵍⵎⵓⵄⵚⵉⵢⵢⴻⵜ ⵉⵏⵓ, ⵎⴰⵖⴰⵔ ⴰⵇⴰ-ⵜⵜ ⴷ ⴰⵟⵟⴰⵙ.
12 ⵎⵉⵎ. ⵎⴰⵏ ⵡⴻⵏ ⴷ ⴰⵔⵢⴰⵥ ⵉ ⵉⵜⵜⴻⴳⴳⵯⴻⴷⴻⵏ ⵙⵉⴷⵉ?
ⵏⴻⵜⵜⴰ ⴰⴷ ⴰⵙ ⵉⵙⵙⴻⵍⵎⴻⴷ ⴰⴱⵔⵉⴷ ⵉ ⵉⵜⵜⵅⴻⵚⵚⴰ ⴰⴷ ⵉⵅⴹⴰⵔ.
13 ⵏⵓⵏ. ⵍⴻⵄⵎⴰⵔ ⵏⵏⴻⵙ ⴰⴷ ⵉⵙⵙⴻⵏⵙ ⴷⵉ ⵍⵅⵉⵔ,
ⵥⵥⴰⵔⵉⵄⴻⵜ ⵏⵏⴻⵙ ⴰⴷ ⵡⴰⵔⵜⴻⵏ ⵜⴰⵎⵎⵓⵔⵜ.
14 ⵙⴰⵎⵉⵅ. ⵍⴰⵎⴰⵏ ⵉ ⴷⵉⵏ ⵏ ⵙⵉⴷⵉ ⵉ ⵢⴻⵏⵏⵉ ⵥⵥⴰⵢⴻⵙ ⵉⵜⵜⴻⴳⴳⵯⴷⴻⵏ,
ⵓ ⵍⵄⴰⵀⴷ ⵏⵏⴻⵙ ⵎⴰⵃⴻⵏⴷ ⴰⴷ ⴰⵙⴻⵏ ⵜ ⵉⵙⵙⴰⵔⴳⴻⴱ.
15 ⵄⴰⵢⵉⵏ. ⵜⵉⵟⵟⴰⵡⵉⵏ ⵉⵏⵓ ⵍⴻⴱⴷⴰ ⴷⵉ ⵙⵉⴷⵉ,
ⵎⵉⵏⵥⵉ ⵏⴻⵜⵜⴰ ⴰⴷ ⵉⴼⴻⴽⴽ ⵉⴹⴰⵔⴻⵏ ⵉⵏⵓ ⵥⵉ ⵜⵔⴰⵛⵛⴰ.
16 ⴱⵉ. ⴰⵔⵔ-ⴷⴷ ⵖⴰⵔⵉ ⵙ ⵡⵓⴷⴻⵎ ⵓ ⵃⵉⵏⵏ ⵅⴰⴼⵉ,
ⵎⴰⵖⴰⵔ ⵏⴻⵛⵛ ⴰⵇⴰ ⴰⵢⵉ ⵡⴻⵃⵃⴷⵉ ⵓ ⴷⵉ ⵍⴻⵖⴱⴻⵏ.
17 ⵜⵙⴰⴷⵉ. ⵍⴻⵃⵚⴰⵔⴰⵜ ⵏ ⵡⵓⵍ ⵉⵏⵓ ⴰⵇⴰ ⵎⵎⴰⵔⵏⵉⵏⵜ.
ⵙⵓⴼⴼⴻⵖ ⴰⵢⵉ ⵥⵉ ⴷⴷⵉⵇⴰⵜ ⵉ ⴷ ⴰⵢⵉ.
18 ⵔⵉⵅ. ⵅⵥⴰⵔ-ⴷⴷ ⵖⴰⵔ ⵍⴻⵖⴱⴻⵏ ⵉⵏⵓ ⴷ ⵡⴰⵔⴱⴻⵔ ⵉⵏⵓ,
ⴽⵙⵉ ⵅⴰⴼⵉ ⵎⴰⵔⵔⴰ ⴷⴷⵏⵓⴱ ⵉⵏⵓ.
19 ⵔⵉⵅ. ⵅⵥⴰⵔ ⵖⴰⵔ ⵍⵄⴻⴷⵢⴰⵏ ⵉⵏⵓ, ⵎⵉⵏⵥⵉ ⵜⵜⵡⴰⴽⵜⴰⵔⴻⵏ,
ⵏⵉⵜⵏⵉ ⵛⴰⵔⵔⵀⴻⵏ ⴰⵢⵉ ⵙ ⵢⵉⵊⵊ ⵏ ⵡⴻⵛⵔⴰⵀ ⵉⵇⴻⵙⵃⴻⵏ.
20 ⵛⵉⵏ. ⵃⴹⴰ ⵅ ⵍⴻⵄⵎⴰⵔ ⵉⵏⵓ ⵓ ⴼⴻⴽⴽ ⴰⵢⵉ!
ⵡⴰⵔ ⴷ ⴰⵢⵉ ⵜⴻⵊⵊⵉ ⵛⴰ ⴰⴷ ⵙⴻⴹⵃⵉⵖ, ⵎⵉⵏⵥⵉ ⵅⴰⴽ ⵉ ⵜⵜⴻⵛⵍⴻⵖ.
21 ⵜⴰⵡ. ⴰⴷ ⵜⴻⵃⴷⴰ ⴰⵢⵉ ⵍⴻⴽⵎⴰⵔⴻⵜ ⴷ ⵍⴻⵚⴼⴰⵢⴻⵜ,
ⵎⴰⵖⴰⵔ ⵙⵙⵉⵜⵉⵎⴻⵖ ⴷⴰⵢⴻⴽ.
22 ⴰ ⴰⵔⴻⴱⴱⵉ, ⴼⴷⵉ ⵉⵙⵔⴰⵉⵍ ⵥⵉ ⵎⴰⵔⵔⴰ ⵍⴻⵃⵚⴰⵔⴰⵜ ⵏⵏⴻⵙ.