1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ.

2 ⴰ ⵙⵉⴷⵉ, ⴰⵊⴻⴵⵉⴷ ⵉⴼⴰⵔⵃ ⵙ ⵊⵊⴻⵀⴷ ⵏⵏⴻⴽ,

ⵓ ⵎⴻⵛⵃⴰⵍ ⵉⴼⴰⵔⵃ ⵙ ⵓⵙⴻⵏⵊⴻⵎ ⵏⵏⴻⴽ!

3 ⵜⴻⵡⵛⵉⴷ ⴰⵙ ⵎⴻⵥⵔⵉ ⵏ ⵡⵓⵍ ⵏⵏⴻⵙ,

ⵛⴻⴽ ⵡⴰⵔ ⵜⵓⴳⵉⴷ ⵛⴰ ⴰⵥⴰⵡⴻⴳ ⵏ ⵉⵢⴻⵏⵛⵉⵛⴻⵏ ⵏⵏⴻⵙ. ⵙⵉⵍⴰⵀ.

4 ⵎⴰⵖⴰⵔ ⵛⴻⴽ ⵜⵓⵙⵉⴷ-ⴷⴷ ⵉ ⵓⵎⵙⴰⴳⴰⵔ ⴰⴽⵉⴷⴻⵙ ⵙ ⵍⴱⴰⵔⴰⴽⴰⵜ ⵛⵛⵓⵔⴻⵏⵜ ⵙ ⵍⵅⴰⵔ,

ⵜⴻⵇⵇⵏⴻⴷ ⴰⵙ ⵜⵜⴰⵊ ⵏ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ ⵅ ⵓⵥⴻⴵⵉⴼ ⵏⵏⴻⵙ.

5 ⵉⵜⵜⴰⵔ ⴰⵛ ⵜⵓⴷⴰⵔⵜ,

ⵜⴻⵡⵛⵉⴷ ⴰⵙ ⵜⵜ,

ⵜⵓⵥⵥⴻⴳⴳⴰⵔⵜ ⵏ ⵡⵓⵙⵙⴰⵏ ⵉ ⵍⴻⴱⴷⴰ ⵇⴰⵄ.

6 ⵉⵎⵖⴰⵔ ⵓⵄⵓⴵⵉ ⵏⵏⴻⵙ ⵙ ⵓⵙⴻⵏⵊⴻⵎ ⵏⵏⴻⴽ,

ⵜⴻⵎⵎⴰⵔⵙⴻⴷ ⵅⴰⵙ ⵜⵉⵙⵙⵉⵇⵜ ⴷ ⵍⵄⴻⵥⵥ. ^□  

7 ⵎⵉⵏⵥⵉ ⵛⴻⴽ ⵜⴰⵔⵔⵉⴷ ⵜ ⴷ ⵍⴱⴰⵔⴰⴽⴰ ⵜⴰⵎⴻⵇⵇⵔⴰⵏⵜ ⵉ ⵍⴻⴱⴷⴰ,

ⵛⴻⴽ ⵜⴻⵛⵛⵓⵔⴻⴷ ⵜ ⵙ ⵍⴻⴼⵔⴰⵃⴻⵜ ⵖⴰⵔ ⵡⵓⴷⴻⵎ ⵏⵏⴻⴽ.

8 ⵎⴰⵖⴰⵔ ⴰⵊⴻⴵⵉⴷ ⵉⵜⵜⵛⴰⵍ ⵅ ⵙⵉⴷⵉ,

ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵏ ⵓⵎⵄⵓⴵⵉ ⵅ ⴽⵓⵍⵛⵉ ⵡⴰⵔ ⵉⵜⵜⴻⴼⵔⵉⵖ.

9 ⴰⴼⵓⵙ ⵏⵏⴻⴽ ⴰⴷ ⵢⴰⴼ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⴽ,

ⴰⴼⵓⵙ ⴰⴼⵓⵙⵉ ⵏⵏⴻⴽ ⴰⴷ ⵢⴰⴼ ⵎⴰⵔⵔⴰ ⵉⵏⵏⵉ ⵛⴻⴽ ⵉⵛⴰⵔⵔⵀⴻⵏ.

10 ⵛⴻⴽ ⴰⴷ ⵜⴻⵏ ⵜⴰⵔⵔⵉⴷ ⴰⵎⴻⵛⵏⴰⵡ ⵜⴰⴼⵇⵓⵏⵜ ⵉⵛⴻⵎⵎⴹⴻⵏ ⴷⵉ ⵍⵡⴻⵇⵜ ⵏ ⵡⴻⴹⵃⴰⵔ ⵏⵏⴻⴽ,

ⵙⵉⴷⵉ ⴰⴷ ⵜⴻⵏ ⵉⵚⴰⵔⴹ ⵙ ⵡⴻⵖⴹⴰⴱ ⵏⵏⴻⵙ,

ⵜⵉⵎⴻⵙⵙⵉ ⴰⴷ ⵜⴻⵏ ⵜⴻⵛⵛ.

11 ⴰⴷ ⵜⴻⵎⵃⵉⴷ ⵍⵖⵉⴵⴻⵜ ⵏⵙⴻⵏ ⵥⵉ ⵜⴻⵎⵎⵓⵔⵜ,

ⵥⵥⴰⵔⵉⵄⴻⵜ ⵏⵙⴻⵏ ⵊⴰⵔ ⵜⴰⵔⵡⴰ ⵏ ⴱⵏⴰⴷⴻⵎ.

12 ⵎⴰⵖⴰⵔ ⵏⵉⵜⵏⵉ ⵏⴻⴷⵢⴻⵏ ⴰⵛ ⵍⵖⴰⵔ, ⴳⴳⵉⵏ ⵉⵛⵜ ⵏ ⵜⵎⴻⵄⵎⵓⵞ,

ⵎⴰⵛⴰ ⵡⴰⵔ ⵥⴻⵎⵎⴰⵔⴻⵏ ⵡⴰⵍⵓ.

13 ⵎⴰⵖⴰⵔ ⵛⴻⴽ ⴰⴷ ⵜⴻⵏ ⵜⴻⴳⴳⴻⴷ ⵊⴰⵔ ⵜⵉⵟⵟⴰⵡⵉⵏ,

ⵙ ⵉⴼⵉⵍⴰⵏ ⵏ ⵍⵇⴻⵡⵙ ⵏⵏⴻⴽ ⴰⴷ ⵜⵏⴻⵢⵢⵛⴻⴷ ⵅ ⵡⵓⴷⵎⴰⵡⴻⵏ ⵏⵙⴻⵏ.

14 ⵙⴳⴻⵄⵄⴻⴷ ⵉⵅⴻⴼ ⵏⵏⴻⴽ, ⴰ ⵙⵉⴷⵉ, ⵙ ⵊⵊⵀⴻⴷ ⵏⵏⴻⴽ!

ⴻⵊⵊ ⴰⵏⴻⵖ ⴰⴷ ⵏⵖⴻⵏⵏⴻⵊ ⵓ ⴰⴷ ⵏⵥⴻⵀⵀⴻⴷ ⵉ ⵜⵥⴻⵎⵎⴰⵔ ⵏⵏⴻⴽ.