1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ.

2 ⵉⵊⴻⵏⵡⴰⵏ ⴱⴰⵔⵔⵃⴻⵏ ⵙ ⵓⵄⵓⴵⵉ ⵏ ⴰⵔⴻⴱⴱⵉ,

ⵍⵇⵓⴱⴱⴻⵜ ⵜⴻⵙⵙⵉⵡⴻⵍ ⵅ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ.

3 ⴰⵙⵙ ⵉⵙⵙⴰⵥⵥⴰⵍ ⴰⵡⴰⵍⴻⵏ ⵉ ⵡⴰⵙⵙ,

ⴵⵉⵍⴻⵜ ⵜⴻⵙⵙⵛⴰⵏ ⵜⵓⵙⵙⵏⴰ ⵖⴰⵔ ⴵⵉⵍⴻⵜ.

4 ⵡⴰⵔ ⵉⴵⵉ ⴷ ⵍⵀⴰⵔⴷ ⵓ ⵡⴰⵔ ⴵⵉⵏ ⵛⴰ ⴷ ⴰⵡⴰⵍⴻⵏ,

ⵜⵎⵉⵊⵊⴰ ⵏⵙⴻⵏ ⵡⴰⵔ ⴷ ⴰⵙ ⵉⵜⵜⴻⵙⵍⵉ ⵃⴻⴷ.

5 ⵍⵓⵎⵓⵔ ⵏⵙⴻⵏ ⵉⴼⴼⴻⵖ ⵅ ⵜⴻⵎⵎⵓⵔⵜ ⵎⴰⵔⵔⴰ,

ⴰⵡⴰⵍⴻⵏ ⵏⵙⴻⵏ ⴼⴼⵖⴻⵏ ⵖⴰⵔⴻⵙ ⴰⵍ ⵟⵟⴰⵔⴼ ⵏ ⴷⴷⵓⵏⴻⵛⵜ.

ⵏⴻⵜⵜⴰ ⵉⴳⴳⴰ ⴷⵉⵀⴰ ⵉⵊⵊ ⵏ ⵓⵇⵉⴹⵓⵏ ⵉ ⵜⴼⵓⵛⵜ, ^■  

6 ⴰⵎⴻⵛⵏⴰⵡ ⵎⵓⵍⴰⵢ ⵏⵏⵉ ⴷⴷ-ⵉⵙⵙⵉⵊⵊⴻⵏ ⵥⴻⴳ ⵡⴻⵅⵅⴰⵎ ⵏ ⵍⴻⵎⵍⴰⵛ,

ⵉⵙⵍⵉⵡⵍⴻⵡ ⴰⵎ ⵉⵊⵊ ⵏ ⴱⵓ-ⵜⴻⵔⵢⴰⵙⵜ ⵃⵉⵎⴰ ⴰⴷ ⵉⴽⵙⵉ ⴷⵉ ⵜⵉⵛⵍⵉ ⵏⵏⴻⵙ. ^■  

7 ⵉⴼⴼⴻⵖ-ⴷⴷ ⵥⴻⴳ ⵉⵊⵊ ⵏ ⵟⵟⴰⵔⴼ ⵏ ⵓⵊⴻⵏⵏⴰ,

ⵓⵛⴰ ⵢⵓⵢⵓⵔ ⴰⵍ ⵟⵟⴰⵔⴼ ⵏⵏⴻⵙ ⵏⵏⴻⵖⵏⵉ,

ⵡⴰⵔ ⵜⴻⵏⵏⵓⴼⴼⴰⵔ ⵓⵍⴰ ⴷ ⵉⵛⵜ ⵏ ⵍⵃⴰⵊⴻⵜ ⵉ ⵍⵃⴰⴷⵓⵇ ⵏⵏⴻⵙ.

8 ⴰⵇⴰ ⵜⴻⴽⵎⴻⵍ ⵛⵛⴰⵔⵉⵄⴰ ⵏ ⵙⵉⴷⵉ,

ⵜⵉⵡⵉ-ⴷⴷ ⴰⴳⴻⵏⴼⵓ ⵉ ⴱⵓⵃⴱⴻⵍ.

ⵛⵛⵀⴰⴷⴰⵜ ⵏ ⵙⵉⴷⵉ ⴷⴰⵢⵙⴻⵏⵜ ⵍⴰⵎⴰⵏ,

ⵜⵜⵉⵛⵛⴻⵏⵜ ⵜⵉⵖⵉⵜ ⵉ ⵓⵃⴰⴼⵉ. ^■  

9 ⵍⵓⵎⵓⵔⴰⵜ ⵏ ⵙⵉⴷⵉ ⵙⴻⴳⴳⴷⴻⵏ,

ⵙⵙⴼⴰⵔⵔⵃⴻⵏ ⵓⵍ.

ⵜⴰⵡⵚⵉⵢⵢⴻⵜ ⵏ ⵙⵉⴷⵉ ⵜⴻⵚⴼⴰ,

ⵜⴻⵙⵙⵛⴰⵏ ⵜⴰⴼⴰⵡⵜ ⵉ ⵜⵉⵟⵟⴰⵡⵉⵏ.

10 ⵜⵉⴳⴳⵯⵓⴷⵉ ⵥⵉ ⵙⵉⴷⵉ ⵜⴻⵚⴼⴰ,

ⵜⴻⵇⵇⵉⵎ ⵜⴱⴻⴷⴷ ⵉ ⵍⴻⴱⴷⴰ.

ⵍⴻⵃⴽⴰⵎⴰⵜ ⵏ ⵙⵉⴷⵉ ⴷ ⵜⵉⴷⴻⵜⵜ,

ⴰⵇⴰ-ⵜⴻⵏⵜ ⴷ ⵍⵃⴻⵇⵇ ⵎⴰⵔⵔⴰ.

11 ⵏⵉⵜⴻⵏⵜⵉ ⵊⴻⴱⴱⴷⴻⵏⵜ ⵎⴻⵥⵔⵉ ⴽⵜⴰⵔ ⵅ ⵡⵓⵔⴻⵖ,

ⵡⴰⵀ, ⴽⵜⴰⵔ ⵥⴻⴳ ⵡⵓⵔⴻⵖ ⵉⵜⵜⵡⴰⵚⴻⴼⴼⴰⵏ,

ⴰⵇⴰ-ⵜⴻⵏⵜ ⴷ ⵜⵉⵎⵉⵥⵉⴷⵉⵏ ⵅ ⵜⴰⵎⵎⴻⵏⵜ ⵏⵉⵖ ⵅ ⵜⴰⵎⵎⴻⵏⵜ ⵏ ⵜⴻⵖⵔⴰⵚⵜ. ^■  

12 ⵓⵍⴰ ⴷ ⴰⵎⵙⴻⵅⵅⴰⵔ ⵏⵏⴻⴽ ⵉⵜⵜⵡⴰⵡⴻⴱⴱⴻⵅ ⵥⵥⴰⵢⵙⴻⵏⵜ,

ⴷⴻⴳ ⵓⵃⴻⵟⵟⵓ ⵏⵙⴻⵏⵜ ⵜⴻⵏⵏⵓⴼⴼⴰⵔ ⴷⴰⵢⴻⵙ ⵍⵎⵓⵏⴻⵜ ⵜⴰⵎⴻⵇⵇⵔⴰⵏⵜ.

13 ⴰⵡⴻⴷⴷⴰⵔ, ⵡⵉ ⵥⵥⴰⵢⴻⵙ ⵢⵓⵛⵉⵏ?

ⵙⵉⵥⴷⴻⴳ ⴰⵢⵉ ⵥⵉ ⵎⵉⵏ ⵡⴰⵔ ⵉⵜⵜⴱⵉⵏⴻⵏ.

14 ⵃⴹⴰ ⴰⵎⵙⴻⵅⵅⴰⵔ ⵏⵏⴻⴽ ⵄⴰⵡⴻⴷ ⵥⴻⴳ ⵓⵄⴻⴼⴼⴰⵔ,

ⵃⵉⵎⴰ ⵡⴰⵔ ⵅⴰⴼⵉ ⵉⵜⵜⵚⴻⴵⵉⴹ,

ⵃⵉⵎⴰ ⴰⴷ ⵉⵍⵉⵖ ⴷ ⴰⵎⴻⵥⴷⴰⴳ ⵥⴻⴳ ⵓⵅⴻⵟⵟⵓ ⵉⵎⵖⴰⵔⴻⵏ.

15 ⴰⴷ ⴷⴷ-ⴰⵙⴻⵏ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ ⴷ ⵉⵅⴰⵔⵉⵚⵚⴻⵏ ⵏ ⵡⵓⵍ ⵉⵏⵓ,

ⵅ ⵍⵅⴰⴹⴰⵔ ⵏⵏⴻⴽ, ⴰ ⵙⵉⴷⵉ, ⴰ ⵜⴰⵚⴹⴰⵔⵜ ⵉⵏⵓ ⴷ ⴰⵎⴻⴼⴷⵉ ⵉⵏⵓ!