18
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵥⴻⵀⵀⴻⴷ ⵏ ⴷⴰⵡⵓⴷ, ⴰⵎⵙⴻⵅⵅⴰⵔ ⵏ ⵙⵉⴷⵉ, ⵡⴻⵏⵏⵉ ⵉⵙⵙⵉⵡⵍⴻⵏ ⴰⵡⴰⵍⴻⵏ ⵏ ⵢⴻⵥⵍⵉ ⴰⵢⴰ ⵉ ⵙⵉⴷⵉ,
ⴷⴻⴳ ⵡⴰⵙⵙ ⵓⵎⵉ ⵜ ⵉⴼⴻⴽⴽ ⵙⵉⴷⵉ,
ⵥⴻⴳ ⵓⴼⵓⵙ ⵏ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ, ⵓ ⵥⴻⴳ ⵓⴼⵓⵙ ⵏ ⵛⴰⵡⵓⵍ. □
2 ⵏⴻⵜⵜⴰ ⵉⵏⵏⴰ:
“ⵏⴻⵛⵛ ⵜⵜⴻⵅⵙⴻⵖ ⵛⴻⴽ, ⴰ ⵙⵉⴷⵉ, ⵊⵊⴻⵀⴷ ⵉⵏⵓ ⴷ ⵛⴻⴽ.
3 ⵙⵉⴷⵉ ⴷ ⵊⵊⴰⵔⴼ ⵉⵏⵓ ⴷ ⵍⴱⵓⵔⵊ ⵉⵏⵓ ⴷ ⴰⵎⴼⴻⴽⴽⵉ ⵉⵏⵓ,
ⴰⵔⴻⴱⴱⵉ ⵉⵏⵓ, ⵜⴰⵚⴹⴰⵔⵜ ⵉⵏⵓ, ⵏⴻⵛⵛ ⵖⴰⵔⴻⵙ ⵉ ⵖⴰ ⴰⵔⴻⵡⵍⴻⵖ.
ⵛⴻⴽ ⴷ ⵜⴰⵙⴻⴷⴷⴰⵔⵜ ⵉⵏⵓ ⵏ ⵓⵙⴻⵍⵇⵉ ⴷ ⵢⵉⵛⵛ ⵏ ⵓⵙⴻⵏⵊⴻⵎ ⵉⵏⵓ,
ⵍⴱⵓⵔⵊ ⵉⵏⵓ ⵢⵓⵄⵍⴰⵏ.
4 ⵏⴻⵛⵛ ⵍⴰⵖⵉⵖ-ⴷⴷ ⵅ ⵙⵉⴷⵉ, ⵡⴻⵏⵏⵉ ⵉⵙⴷⴰⵃⴻⴵⴻⵏ ⴰⵙⴻⵎⵖⴰⵔ,
ⵓ ⵏⴻⵛⵛ ⴰⵇⴰ ⵜⵜⵡⴰⵙⵏⴻⵊⵎⴻⵖ ⵥⵉ ⵍⵄⴻⴷⵢⴰⵏ ⵉⵏⵓ.
5 ⵉⵙⴻⵖⵡⴰⵏ ⵏ ⵍⵎⴻⵡⵜ ⵏⵏⴹⴻⵏ ⴰⵢⵉ-ⴷⴷ,
ⵙⵙⵉⴳⴳⵯⴻⴷⴻⵏⵜ ⴰⵢⵉ ⵍⵃⴻⵎⵍⴰⵜ ⵏ ⵡⴰⵎⴰⵏ ⵉⵀⴰⵊⴻⵏ.
6 ⵉⵙⴻⵖⵡⴰⵏ ⵏ ⵍⴰⵅⴰⵔⵜ ⵛⴰⵔⴼⴻⵏ ⴰⵢⵉ,
ⵜⵉⵅⴻⵛⴼⵉⵏ ⵏ ⵍⵎⴻⵡⵜ ⵃⵚⴰⵔⴻⵏⵜ ⴰⵢⵉ.
7 ⴷⵉ ⵍⴻⵃⵚⴰⵔⴻⵜ ⵉⵏⵓ ⵍⴰⵖⵉⵖ-ⴷⴷ ⵅ ⵙⵉⴷⵉ,
ⵅ ⴰⵔⴻⴱⴱⵉ ⵉⵏⵓ ⵉ ⵅ ⴷⴷ-ⵍⴰⵖⵉⵖ.
ⵣⵉ ⵣⵥⴰⵡⴻⵛⵜ ⵏⵏⴻⵙ ⵜⴰⵎⴻⵇⵇⵔⴰⵏⵜ ⵉⵙⵍⴰ ⵏⴻⵜⵜⴰ ⵉ ⵜⵎⵉⵊⵊⴰ ⵉⵏⵓ,
ⵉⵖⵓⵢⵢⴰⵏ ⵉⵏⵓ ⵓⴷⴼⴻⵏ ⵖⴰⵔ ⵉⵎⴻⵥⵥⵓⵖⴻⵏ ⵏⵏⴻⵙ.
8 ⵅⴻⵏⵏⵉ ⵜⴻⵏⵀⴻⵥⵥ ⵓ ⵜⴰⵔⵊⵉⵊ ⵜⴻⵎⵎⵓⵔⵜ,
ⴷⵙⵓⵙⴰ ⵏ ⵉⴷⵓⵔⴰⵔ ⵜⵜⵔⴰⵃⴻⵏ-ⴷⴷ ⵜⵜⴰⵙⴻⵏ-ⴷⴷ ⵓ ⵏⵀⴻⵥⵥⴻⵏ,
ⵎⴰⵖⴰⵔ ⵉⵜⵜⵡⴰⵙⴰⵔⵖ ⵡⴻⵖⴹⴰⴱ ⵏⵏⴻⵙ.
9 ⵉⴳⴻⵄⵄⴻⴷ-ⴷⴷ ⴷⴷⴻⵅⵅⴰⵏ ⵥⴻⴳ ⵡⴻⵏⵥⴰⵔⴻⵏ ⵏⵏⴻⵙ
ⵓ ⵜⵉⵎⴻⵙⵙⵉ ⵥⴻⴳ ⵓⵇⴻⵎⵎⵓⵎ ⵏⵏⴻⵙ ⵜⵚⴰⵔⴹ,
ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⵉⵜⵜⵡⴰⵙⴰⵔⵖ ⵥⵥⴰⵢⴻⵙ.
10 ⵏⴻⵜⵜⴰ ⵉⵊⵊⴰ ⴰⵊⴻⵏⵏⴰ ⴰⴷ ⵢⴰⴹⴰⵔ ⵓⵛⴰ ⵅⴻⵏⵏⵉ ⵉⵀⵡⴰ-ⴷⴷ ⵏⴻⵜⵜⴰ,
ⴰⵇⴰ ⴷⵉⵏ ⵉⵊⵊ ⵏ ⵓⵙⴻⵢⵏⵓ ⵉⴱⴱⵓⵎⴱⴻⵙ ⵙⴰⴷⵓ ⵉⴹⴰⵔⴻⵏ ⵏⵏⴻⵙ.
11 ⵉⵏⴷⴻⵀ ⵅ ⵉⵊⵊ ⵏ ⵓⴽⵉⵔⵓⴱ, ⵡⴰⵀ ⵉⴹⵡⴰ,
ⵓⵛⴰ ⵉⵃⴻⵡⵡⴻⵎ ⵅ ⵡⴰⴼⵔⵉⵡⴻⵏ ⵏ ⵓⵚⴻⵎⵎⵉⴹ. □
12 ⵏⴻⵜⵜⴰ ⵉⴳⴳⴰ ⵜⴰⴵⴻⵙⵜ ⴰⵎ ⵉⵊⵊ ⵏ ⵓⴷⵓⵔⵔⵉ ⵅ ⵢⵉⵅⴻⴼ ⵏⵏⴻⵙ, ⴰⵎ ⵓⵄⵉⵛⵛⵓ ⵏⵏⴻⵙ,
ⵉⵊⵊ ⵏ ⵡⴻⴳⵔⴰⵡ ⵏ ⵡⴰⵎⴰⵏ, ⵉⵙⴻⵢⵏⵓⵜⴻⵏ ⵉⵇⴻⵍⵍⵊⴻⵏ ⵉⴱⴱⴰⵔⴻⵛⵏⴻⵏ.
13 ⵙ ⵜⵉⵙⵙⵉⵇⵜ ⵇⵉⴱⴰⵞ ⵏⵏⴻⵙ ⵜⵜⵡⴰⵙⴰⵔⵖⴻⵏ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ.
14 ⵙⵉⴷⵉ ⵉⴳⴳⴰ ⴰⵊⵊⴰⵊ ⴰⴷ ⵉⴷⴷⵓⵇⵇⴻⵥ ⴷⴻⴳ ⵉⵊⴻⵏⵡⴰⵏ,
ⴰⵎⵄⵓⴵⵉ ⵅ ⴽⵓⵍⵛⵉ ⵉⴳⴳⴰ ⵜⵎⵉⵊⵊⴰ ⵏⵏⴻⵙ ⵜⵜⵏⴻⴼⵔⴰⵔⴰ.
15 ⵏⴻⵜⵜⴰ ⵉⵙⵙⴻⴽⴽ ⴼⵍⵉⵜⵛⴰⵜ ⵏ ⵍⵇⴻⵡⵙ ⵏⵏⴻⵙ ⵓⵛⴰ ⵉⴱⴻⵥⵥⴻⵄ ⵉ-ⵜⴻⵏ,
ⵉⵥⵥⴰⵔⵢⴻⴹ ⴰⵙⵙⴰⵎⴻⵏ ⵓⵛⴰ ⵉⵙⵙⵉⴳⴳⵯⴻⴷ ⵉ-ⵜⴻⵏ.
16 ⵜⵉⵙⵉⵡⵉⵏ ⵏ ⵉⵖⴻⵥⵔⴰⵏ ⴷⴻⵡⵍⴻⵏⵜ ⵜⵜⴱⴰⵏⴻⵏⵜ,
ⴷⵙⵓⵙⴰ ⵏ ⴷⴷⵓⵏⴻⵛⵜ ⴷⴻⵡⵍⴻⵏ ⵄⴰⵔⵔⴰⵏ,
ⵥⴻⴳ ⵓⵡⴻⴷⴷⴻⴱ ⵏ ⵙⵉⴷⵉ,
ⵥⴻⴳ ⵓⵚⵓⴹⵉ ⵏ ⵍⴻⵄⵡⵉⵏ ⵥⴻⴳ ⵡⴻⵏⵥⴰⵔⴻⵏ ⵏⵏⴻⵙ.
17 ⵣⵉ ⵙⴻⵏⵏⴻⵊ ⵉⵙⵙⵡⵉⵥⵥⴻⴹ-ⴷⴷ ⴰⴼⵓⵙ ⵏⵏⴻⵙ, ⵢⵉⵡⵉ ⴰⵢⵉ,
ⵉⵊⴱⴻⴷ ⴰⵢⵉ-ⴷⴷ ⵥⴻⴳ ⵡⴰⵎⴰⵏ ⵎⵖⴰⵔⴻⵏ.
18 ⵏⴻⵜⵜⴰ ⵉⴼⴻⴽⴽ ⴰⵢⵉ-ⴷⴷ ⵥⵉ ⵍⴻⵄⴷⵓ ⵉⵏⵓ ⵉⵊⴻⵀⴷⴻⵏ,
ⵥⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵎⵉⵏⵥⵉ ⵏⵉⵜⵏⵉ ⵜⵓⵖⴰ ⵊⴻⵀⵀⴷⴻⵏ ⵅⴰⴼⵉ.
19 ⵏⵉⵜⵏⵉ ⵃⵚⴰⵔⴻⵏ ⴰⵢⵉ ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ ⵉⵏⵓ,
ⵎⴰⵛⴰ ⵙⵉⴷⵉ ⵜⵓⵖⴰ ⴷ ⴰⵎⵄⴻⵎⵎⴻⴷ ⵉⵏⵓ.
20 ⵏⴻⵜⵜⴰ ⵉⵏⴷⴻⵀ ⴰⵢⵉ ⵖⴰⵔ ⵜⵜⴰⵙⵉⵄ ⵓⵛⴰ ⵉⵙⵙⴻⵏⵊⴻⵎ ⴰⵢⵉ,
ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵙⵙⵄⵉⵥⵥⴰ ⴰⵢⵉ.
21 ⵙⵉⴷⵉ ⵉⵅⵍⴻⴼ ⴰⵢⵉ ⵄⵍⴰⵃⵙⴰⴱ ⵜⴰⵙⴻⴳⴷⴰ ⵉⵏⵓ,
ⵄⵍⴰⵃⵙⴰⴱ ⵜⴰⵥⴷⵓⴳⵉ ⵏ ⵉⴼⴰⵙⵙⴻⵏ ⵉⵏⵓ ⵉⵅⴻⴵⴻⵚ ⴰⵢⵉ.
22 ⵎⴰⵖⴰⵔ ⵏⴻⵛⵛ ⵟⵟⴼⴻⵖ ⵉⴱⵔⵉⴷⴻⵏ ⵏ ⵙⵉⴷⵉ,
ⵡⴰⵔ ⵃⴻⵢⵢⴷⴻⵖ ⵛⴰ ⵅ ⴰⵔⴻⴱⴱⵉ ⵉⵏⵓ ⵙ ⵓⵅⴻⵢⵢⴻⴱ.
23 ⵎⴰⵖⴰⵔ ⵎⴰⵔⵔⴰ ⵍⵃⴻⵇⵇ ⵏⵏⴻⵙ ⵜⵓⵖⴰ ⵊⴰⵔ ⵉ ⵜⵉⵟⵟⴰⵡⵉⵏ ⵉⵏⵓ,
ⵡⴰⵔ ⵃⴻⵢⵢⴷⴻⵖ ⵛⴰ ⵅ ⵜⵡⴻⵚⵚⴰ ⵏⵏⴻⵙ.
24 ⴷⴻⵡⵍⴻⵖ ⴰⴽⵉⴷⴻⵙ ⴽⴻⵎⵍⴻⵖ,
ⵃⴹⵉⵖ ⵉⵅⴻⴼ ⵉⵏⵓ ⵥⵉ ⵍⵎⵓⵄⵚⵉⵢⵢⴻⵜ ⵉⵏⵓ.
25 ⵙⵉⴷⵉ ⵉⵅⵍⴻⴼ ⴰⵢⵉ ⴰⵏⴻⵛⵜ ⵏ ⵜⵙⴻⴳⴷⴰ ⵉⵏⵓ,
ⴰⵏⴻⵛⵜ ⵏ ⵜⴰⵥⴷⵓⴳⵉ ⵏ ⵉⴼⴰⵙⵙⴻⵏ ⵉⵏⵓ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ.
26 ⵉ ⵓⵎⴻⴷⴷⵓⴽⴽⴻⵍ ⴰⵎⵜⵉⵇⵇⵉ ⵉ ⵜⴻⴵⵉⴷ ⵛⴻⴽ ⴷ ⴰⵎⴻⴷⴷⵓⴽⴽⴻⵍ ⴰⵎⵜⵉⵇⵇⵉ,
ⵉ ⴱⵓ-ⵜⴻⵖⵔⵓⴹⵜ ⵉⴽⴻⵎⵎⵍⴻⵏ ⵉ ⵜⴻⴵⵉⴷ ⵛⴻⴽ ⵜⴽⴻⵎⵎⵍⴻⴷ.
27 ⵉ ⵡⴻⵏⵏⵉ ⵉⵜⵜⵡⴰⵙⵉⵥⴻⴷⴳⴻⵏ ⴰⵇⴰ ⵛⴻⴽ ⴷ ⴰⵎⴻⵥⴷⴰⴳ,
ⴰⴽ-ⴷ ⵡⴻⵏⵏⵉ ⵉⴼⴰⵔⵖⴻⵏ, ⴰⵇⴰ ⵜⴼⴰⵔⵖⴻⴷ.
28 ⵛⴻⴽ ⵜⴻⵙⵙⵏⴻⵊⵎⴻⴷ ⵍⴳⴻⵏⵙ ⵉⵜⵜⵡⴰⵃⵚⴰⵔⴻⵏ,
ⵎⴰⵛⴰ ⵜⵉⵟⵟⴰⵡⵉⵏ ⵄⴻⴼⴼⴰⵔⴻⵏⵜ ⴰⴷ ⵜⴻⵏⵜ ⵜⴻⵙⵙⴻⵀⵡⵉⴷ.
29 ⵎⵉⵏⵥⵉ ⵛⴻⴽ ⴷ ⵍⴻⴼⵏⴰⵔ ⵉⵏⵓ, ⴰ ⵙⵉⴷⵉ!
ⴰⵔⴻⴱⴱⵉ ⵉⵏⵓ ⵉⵜⵜⴻⴳⴳ ⵜⴰⴼⴰⵡⵜ ⴷⵉ ⵜⴰⴵⴻⵙⵜ ⵉⵏⵓ.
30 ⵎⵉⵏⵥⵉ ⴰⴽⵉⴷⴻⴽ ⴰⴷ ⴰⵥⵥⵍⴻⵖ ⵅ ⵉⵛⵜ ⵏ ⴱⴰⵏⴷⵉⵢⵢⴰ,
ⴰⴽ-ⴷ ⴰⵔⴻⴱⴱⵉ ⵉⵏⵓ ⴰⴷ ⵏⴻⴳⵥⴻⵖ ⵅ ⵉⵊⵊ ⵏ ⵍⵃⵉⴹ.
31 ⴰⴱⵔⵉⴷ ⵏ ⴰⵔⴻⴱⴱⵉ ⵉⴽⵎⴻⵍ, ⵎⵉⵏ ⵉⵇⵇⴰⵔ ⵙⵉⴷⵉ ⵉⵜⵜⵡⴰⵚⴻⴼⴼⴰ ⴷⵉ ⵜⵎⴻⵙⵙⵉ.
ⵏⴻⵜⵜⴰ ⴷ ⵜⴰⵙⴻⴷⴷⴰⵔⵜ ⵏ ⵓⵙⴻⵍⵇⵉ ⵉ ⵎⴰⵔⵔⴰ ⵉⵏⵏⵉ ⴷⴰⵢⴻⵙ ⵉⵜⵜⵉⵇⵇⴰⵏ.
32 ⵎⴰⵖⴰⵔ ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵔⴻⴱⴱⵉ, ⵎⵖⵉⵔ ⵙⵉⴷⵉ,
ⵓ ⵎⴰⵏ ⵡⴻⵏ ⵉ ⵉⴵⴰⵏ ⴷ ⵜⴰⵚⴹⴰⵔⵜ, ⵎⵖⵉⵔ ⴰⵔⴻⴱⴱⵉ ⵏⵏⴻⵖ?
33 ⴰⵔⴻⴱⴱⵉ ⵡⴻⵏⵏⵉ ⴷ ⴰⵢⵉ ⵉⵜⵜⴱⴻⵢⵙⴻⵏ ⵙ ⵊⵊⵀⴻⴷ,
ⵡⴻⵏⵏⵉ ⴷ ⴰⵢⵉ ⵉⵜⵜⵉⵛⴻⵏ ⴰⴱⵔⵉⴷ ⵉⵏⵓ ⵉⴽⵎⴻⵍ.
34 ⵏⴻⵜⵜⴰ ⵉⴳⴳⴰ ⵉⴹⴰⵔⴻⵏ ⵉⵏⵓ ⴰⵎ ⵢⴻⵏⵏⵉ ⵏ ⵜⵓⴷⴰⴷⵉⵏ,
ⵏⴻⵜⵜⴰ ⵢⴰⵔⵔⴰ ⴰⵢⵉ ⴰⴷ ⴱⴻⴷⴷⴻⵖ ⵅ ⵍⴻⴳⵄⵓⴷⵉ ⵉⵏⵓ.
35 ⵉⵙⵙⴻⵍⵎⴻⴷ ⵉⴼⴰⵙⵙⴻⵏ ⵉⵏⵓ ⵉ ⵓⵎⴻⵏⵖⵉ,
ⵉⵖⴰⴵⴻⵏ ⵉⵏⵓ ⵎⴰⵃⴻⵏⴷ ⴰⴷ ⵎⴻⵃⴹⴻⵏ ⵉⵊⵊ ⵏ ⵍⵇⴻⵡⵙ ⵏ ⵏⵏⵃⴰⵙ.
36 ⵜⴻⵡⵛⵉⴷ ⴰⵢⵉ ⵜⴰⵙⴻⴷⴷⴰⵔⵜ ⵏ ⵓⵙⴻⵍⵇⵉ ⵏ ⵓⵙⴻⵏⵊⴻⵎ ⵏⵏⴻⴽ,
ⴰⴼⵓⵙ ⵏⵏⴻⴽ ⴰⴼⵓⵙⵉ ⴷ ⴰⵙⴻⵏⵏⴻⴷ ⵉⵏⵓ,
ⵓ ⵙ ⵓⵡⴰⴹⴻⵄ ⵏⵏⴻⴽ ⵜⴻⵙⵙⴻⵎⵖⴰⵔⴻⴷ ⴰⵢⵉ.
37 ⴰⵇⴰ ⵜⴻⴳⴳⵉⴷ ⵜⵜⴰⵙⵉⵄ ⵉ ⵉⵚⵓⵔⵉⴼⴻⵏ ⵉⵏⵓ ⵙⴰⴷⵓ ⵉⵏⵓ,
ⵓⵛⴰ ⵜⵉⵛⴻⵄⴱⵉⵏ ⵉⵏⵓ ⵡⴰⵔ ⵎⴻⵢⵢⵍⴻⵏⵜ.
38 ⵏⴻⵛⵛ ⴹⴼⴰⵔⴻⵖ ⵍⵄⴻⴷⵢⴰⵏ ⵉⵏⵓ ⵓ ⵜⴻⵃⵃⵉⵖ ⵜⴻⵏ,
ⵡⴰⵔ ⴷⴷ-ⵜⵜⵄⵉⵇⵉⴱⴻⵖ ⴰⵍ ⵜⴻⵏ ⵇⴹⵉⵖ.
39 ⵏⴻⵛⵛ ⵙⵙⵏⵓⵇⵇⴱⴻⵖ ⵜⴻⵏ
ⴰⵍⴰⵎⵉ ⵡⴰⵔ ⵥⴻⵎⵎⴰⵔⴻⵏ ⴰⴷ ⴽⴽⴰⵔⴻⵏ ⵄⴰⵡⴻⴷ.
ⵏⵉⵜⵏⵉ ⵡⴹⴰⵏ-ⴷⴷ ⵙⴰⴷⵓ ⵉⴹⴰⵔⴻⵏ ⵉⵏⵓ.
40 ⵜⴱⴻⵢⵙⴻⴷ ⴰⵢⵉ ⵙ ⵊⵊⴻⵀⴷ ⵉ ⵓⵎⴻⵏⵖⵉ,
ⵜⴰⵔⵔⵉⴷ-ⴷⴷ ⵉⵏⵏⵉ ⵖⴰⵔⵉ ⴷⴷ-ⵉⴽⴽⴰⵔⴻⵏ ⴰⴷ ⴰⴹⴰⵔⴻⵏ ⵙⴰⴷⵓ ⵉⵏⵓ.
41 ⵛⴻⴽ ⵜⴻⵡⵛⵉⴷ ⴰⵢⵉ ⵉⵔⵉ ⵏ ⵍⵄⴻⴷⵢⴰⵏ ⵉⵏⵓ, ⵏ ⵢⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ,
ⵓ ⵏⴻⵛⵛ ⴰⵔⴻⴷⴷⴵⴻⵖ ⵜⴻⵏ.
42 ⵏⵉⵜⵏⵉ ⵍⴰⵖⴰⵏ, ⵎⴰⵛⴰ ⵡⴰⵔ ⴷⵉⵏ ⵜⵓⵖⵉ ⵓⵎⵙⴻⵏⵊⴻⵎ,
ⵍⴰⵖⴰⵏ ⵅ ⵙⵉⴷⵉ, ⵎⴰⵛⴰ ⵏⴻⵜⵜⴰ ⵡⴰⵔ ⵅⴰⵙⴻⵏ ⴷⴷ-ⵢⴰⵔⵔⵉ.
43 ⵏⴻⵛⵛ ⵡⴻⴷⴷⴰⵔⴻⵖ ⵜⴻⵏ ⴰⵎ ⵜⵄⴻⵊⵊⴰⵊⵜ ⵥⵥⴰⵜ ⵉ ⵓⵙⴻⵎⵎⵉⴹ,
ⴰⵎ ⵓⴱⴻⴵⴰⵄ ⵅ ⵉⴱⵔⵉⴷⴻⵏ ⴼⴰⵔⴹⴻⵖ ⵥⵥⴰⵢⵙⴻⵏ.
44 ⵛⴻⴽ ⵜⴼⴻⴽⴽⴻⴷ ⴰⵢⵉ ⵥⴻⴳ ⵉⵎⵛⵓⴱⴱⵛⴻⵏ ⵏ ⵍⴳⴻⵏⵙ,
ⵜⴻⴳⴳⵉⴷ ⴰⵢⵉ ⴷ ⴰⵥⴻⴵⵉⴼ ⵏ ⵍⴻⴳⵏⵓⵙ,
ⵉⵊⵊ ⵏ ⵡⴻⵢⴷⵓⴷ ⵡⴰⵔ ⵜ ⵙⵙⵉⵏⴻⵖ, ⴰⴷ ⴰⵢⵉ ⵉⵙⴻⵅⵅⴰⵔ.
45 ⵎⵖⵉⵔ ⵍⴰⵎⵉ ⵉⵙⵍⴰ ⵓⵎⴻⵥⵥⵓⵖ ⵡⴰⵀⴰ, ⵙⵍⵉⵏ-ⴷⴷ ⵖⴰⵔⵉ.
ⵉⴱⴰⵔⵔⴰⵏⵉⵢⵢⴻⵏ ⵙⵙⵏⵉⵄⵎⵉⵍⴻⵏ ⵙⵙⵓⴱⵓⴹⴻⵏ ⴰⵢⵉ.
46 ⴼⴻⵛⵍⴻⵏ ⵉⴱⴰⵔⵔⴰⵏⵉⵢⵢⴻⵏ,
ⴼⴼⵖⴻⵏ-ⴷⴷ ⵥⵉ ⵍⴱⴰⵔⴰⵊⴰⵜ ⵏⵙⴻⵏ, ⴰⵔⵊⵉⵊⴻⵏ.
47 ⵜⵓⴷⴰⵔⵜ ⵉ ⵙⵉⴷⵉ! ⴰⴷ ⵜᵉⵜⵜⵡⴰⴱⴰⵔⴻⴽ ⵜⴻⵚⴹⴰⵔⵜ ⵉⵏⵓ.
ⴰⴷ ⵉⵜⵜⵡⴰⵙⴳⴻⵄⵄⴻⴷ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ.
48 ⴰⵔⴻⴱⴱⵉ ⵡⴻⵏⵏⵉ ⵅⴰⴼⵉ ⵉⵜⵜⴻⵏⵜⴰⵇⴰⵎⴻⵏ
ⵡⴻⵏⵏⵉ ⴷ ⴰⵢⵉ ⵉⵜⵜⴻⴳⴳⴻⵏ ⵍⴻⴳⵏⵓⵙ ⵙⴰⴷⵓ ⵓⴼⵓⵙ ⵉⵏⵓ,
49 ⵡⴻⵏⵏⵉ ⴷ ⴰⵢⵉ ⵉⵙⵙⵓⴼⴼⵓⵖⴻⵏ ⵥⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵉⵏⵓ,
ⵡⴰⵀ, ⵛⴻⴽ ⵜⴻⵙⵙⴳⴻⵄⵄⴰⴷⴻⴷ ⴰⵢⵉ ⵜⵉⵡⴰ ⵏ ⵢⵉⵏⵏⵉ ⴷ ⴰⵢⵉ ⵉⵜⵜⴹⴰⴷⴷⴰⵏ,
ⵛⴻⴽ ⵜⴻⵙⵙⴻⵏⵊⴰⵎⴻⴷ ⴰⵢⵉ ⵥⴻⴳ ⵡⴻⵔⵢⴰⵥ ⵏ ⵍⴻⵅⵛⵓⵏⴻⵛⵜ.
50 ⵙ ⵓⵢⴻⵏⵏⵉ, ⵙⵉⴷⵉ, ⵅⵙⴻⵖ ⴰⴷ ⵛⴻⴽ ⵇⴰⴷⵉⵖ,
ⴰⴷ ⵥⴻⵀⵀⴷⴻⵖ ⵉⵙⴻⵎ ⵏⵏⴻⴽ.
51 ⵏⴻⵜⵜⴰ ⵉⴳⴳⴰ ⵉⵙⴻⵏⵊⵉⵎⴻⵏ ⵏ ⵓⵊⴻⴵⵉⴷ ⵏⵏⴻⵙ ⵎⵖⴰⵔⴻⵏ,
ⵓⵛⴰ ⵉⵙⵙⵛⴻⵏ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵉ ⵓⵎⴻⴷⵀⵓⵏ ⵏⵏⴻⵙ,
ⵉ ⴷⴰⵡⵓⴷ ⵓ ⵉ ⵥⵥⴰⵔⵉⵄⴻⵜ ⵏⵏⴻⵙ ⵉ ⵍⴻⴱⴷⴰ.