1 ⵜⴰⵥⴰⴵⵉⵜ ⵏ ⴷⴰⵡⵓⴷ.

ⴰ ⵙⵉⴷⵉ, ⵙⴻⵍ ⵖⴰⵔ ⵎⵉⵏ ⵉⴵⴰⵏ ⵏⵉⵛⴰⵏ, ⴳⴳⴻⵎ ⵍⴱⴰⵍ ⵉ ⵓⵖⵓⵢⵢⵉ ⵉⵏⵓ,

ⴻⵡⵛ ⴰⵎⴻⵥⵥⵓⵖ ⵅⵎⵉ ⵜⵜⵥⴰⴵⵉⵖ ⵙ ⵉⵢⴻⵏⵛⵉⵛⴻⵏ ⵡⴰⵔ ⵥⵥⴰⵢⵙⴻⵏ ⴷⴷ-ⵉⵜⵜⴻⴽⴽ ⵛⴰ ⵍⵖⴻⵛⵛ.

2 ⴻⵊⵊ ⵍⵃⴻⵇⵇ ⵉⵏⵓ ⴰⴷ ⵉⴼⴼⴻⵖ ⵥⵉ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ,

ⴻⵊⵊ ⵜⵉⵟⵟⴰⵡⵉⵏ ⵏⵏⴻⴽ ⴰⴷ ⵅⴻⵥⵥⴰⵔⴻⵏⵜ ⵖⴰⵔ ⵎⵉⵏ ⵉⴵⴰⵏ ⵉⵙⴻⴳⴳⴷⴻⵏ.

3 ⵛⴻⴽ ⵜⵇⴻⴵⴱⴻⴷ ⵓⵍ ⵉⵏⵓ, ⵜⴰⵔⵥⵓⴷ ⴷⴰⵢⴻⵙ ⵙ ⴵⵉⵍⴻⵜ.

ⵜⵊⴰⵔⵔⴱⴻⴷ ⴰⵢⵉ, ⵎⴰⵛⴰ ⵡⴰⵔ ⵜⵓⴼⵉⴷ ⵡⴰⵍⵓ.

ⵎⴰⵍⴰ ⵅⴰⵔⵔⵚⴻⵖ ⴷⵉ ⵛⴰ ⵡⴰⵔ ⵉⵃⵍⵉ, ⵡⴰⵔ ⴷⴷ-ⵜⴻⴼⴼⵉⵖ ⵛⴰ ⵥⴻⴳ ⵉⵢⴻⵏⵛⵉⴷⴻⵏ ⵉⵏⵓ.

4 ⵅ ⵎⵉⵏ ⵜⵜⴻⴳⴳⴻⵏ ⵉⵡⴷⴰⵏ,

ⴰⵇⴰ ⵃⴹⵉⵖ ⵉⵅⴻⴼ ⵉⵏⵓ ⵥⵉ ⵜⴻⴱⵔⵉⴷⵉⵏ ⵏ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ,

ⵄⵍⴰⵃⵙⴰⴱ ⴰⵡⴰⵍ ⵥⴻⴳ ⵉⵢⴻⵏⵛⵉⵛⴻⵏ ⵏⵏⴻⴽ.

5 ⴻⴳⴳ ⵉⵚⵓⵔⴰⴼ ⵉⵏⵓ ⴷⵉ ⵊⵊⵓⵔⵔⴰⵜ ⵏ ⵉⴹⴰⵔⴻⵏ ⵏⵏⴻⴽ,

ⵃⵉⵎⴰ ⵡⴰⵔ ⴼⴰⵔⵔⵖⴻⵏ ⵉⴹⴰⵔⴻⵏ ⵉⵏⵓ.

6 ⵏⴻⵛⵛ ⵍⴰⵖⵉⵖ ⵅⴰⴽ, ⵎⵉⵏⵥⵉ ⵛⴻⴽ ⴰⴷ ⵅⴰⴼⵉ ⴷⴷ-ⵜⴰⵔⵔⴻⴷ, ⴰ ⴰⵔⴻⴱⴱⵉ,

ⴻⵡⵛ ⴰⵢⵉ ⴰⵎⴻⵥⵥⵓⵖ, ⵙⴻⵍ ⵉ ⵎⵉⵏ ⵖⴰ ⵉⵏⵉⵖ.

7 ⵙⵛⴻⵏ ⵍⴻⵄⵊⴻⴱ ⵏ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ,

ⵛⴻⴽ ⴷ ⵡⴻⵏⵏⵉ ⵉⵙⵙⴻⵏⵊⴰⵎⴻⵏ ⵉⵏⵏⵉ ⵢⴰⵔⴻⵥⵥⵓⵏ ⵎⴰⵏⵉ ⵉ ⵖⴰ ⵢⴰⵔⴻⵡⵍⴻⵏ

ⵥⴻⴳ ⵓⴼⵓⵙ ⵏ ⵢⴻⵏⵏⵉ ⵉⵜⵜⵖⴻⵡⵡⵖⴻⵏ ⵅ ⵓⴼⵓⵙ ⵏⵏⴻⴽ ⴰⴼⵓⵙⵉ.

8 ⵃⴹⴰ ⴰⵢⵉ ⴰⵎ ⵎⵓⵎⵎⵓ ⵏ ⵜⵉⵟⵟ ⵏⵏⴻⴽ,

ⵙⵏⵓⴼⴼⴰⵔ ⴰⵢⵉ ⴷⵉ ⵜⵉⵍⵉ ⵏ ⵡⴰⴼⵔⵉⵡⴻⵏ ⵏⵏⴻⴽ ^□  

9 ⵥⴻⴳ ⵉⵄⴻⴼⴼⴰⵏⴻⵏ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ,

ⵉⵏⵏⵉ ⴷ ⵍⵄⴻⴷⵢⴰⵏ ⵏ ⵍⴻⵄⵎⴰⵔ ⵉⵏⵓ, ⵉⵏⵏⵉ ⴷ ⴰⵢⵉ ⵉⵜⵜⵇⵓⵡⵡⴰⵔⴻⵏ.

10 ⵏⵉⵜⵏⵉ ⴱⴻⵍⵍⵄⴻⵏ ⵉⵅⴻⴼ ⵏⵙⴻⵏ ⵙ ⵜⴷⵓⵏⵜ ⵏⵙⴻⵏ,

ⵙ ⵓⵇⴻⵎⵎⵓⵎ ⵏⵙⴻⵏ ⵙⵙⴰⵡⴰⵍⴻⵏ ⵙ ⵏⵏⴼⴰⵅⴻⵜ.

11 ⵍⴻⵅⵅⵓ ⵇⵓⵡⵡⴰⵔⴻⵏ ⵉ ⵉⵚⵓⵔⴰⴼ ⵏⵏⴻⵖ,

ⵜⵉⵟⵟⴰⵡⵉⵏ ⵏⵙⴻⵏ ⵎⵎⵓⵇⵇⵍⴻⵏⵜ ⵎⴰⵃⴻⵏⴷ ⴰⴷ ⴰⵏⴻⵖ ⵏⴹⴰⵔⴻⵏ ⵖⴰⵔ ⵜⴻⵎⵎⵓⵔⵜ.

12 ⵏⴻⵜⵜⴰ ⵢⴰⵔⵡⴻⵙ ⴷⴻⴳ ⵡⴻⵢⵔⴰⴷ ⵏⵏⵉ ⵉⵎⴻⵥⵥⵔⴻⵏ ⴰⴷ ⵉⵎⴻⵥⵥⴻⵇ ⵜⴰⵢⵎⴰⵔⵜ ⵏⵏⴻⵙ,

ⵅ ⵢⵉⵊⵊ ⵏ ⵡⴻⵢⵔⴰⴷ ⴷ ⴰⵎⴻⵥⵢⴰⵏ ⵉⵥⴻⴷⴷⵖⴻⵏ ⴷⴻⴳ ⵉⵎⵓⵛⴰⵏ ⵉⵏⵏⵓⴼⴼⴰⵔⴻⵏ.

13 ⴽⴽⴰⵔ, ⴰ ⵙⵉⴷⵉ, ⵔⵓⵃ ⵎⵙⴰⴳⴰⵔ ⴰⴽⵉⴷⴻⵙ, ⵖⴹⴻⵍ-ⵉ-ⵜ ⵖⴰⵔ ⵜⴻⵎⵎⵓⵔⵜ.

ⴼⴻⴽⴽ ⵍⴻⵄⵎⴰⵔ ⵉⵏⵓ ⵙ ⵙⵙⵉⴼ ⵏⵏⴻⴽ ⵥⴻⴳ ⵓⵄⴻⴼⴼⴰⵏ,

14 ⵙ ⵓⴼⵓⵙ ⵏⵏⴻⴽ ⵥⴻⴳ ⵉⵔⵢⴰⵥⴻⵏ, ⴰ ⵙⵉⴷⵉ,

ⵥⴻⴳ ⵉⵔⵢⴰⵥⴻⵏ ⵏⵏⵉ ⵖⴰⵔⵙⴻⵏ ⴷⴷⵓⵏⴻⵛⵜ ⴷ ⵜⴰⵙⵖⴰⵔⵜ ⵎⵉⵏ ⵜⵜⴻⴽⴽⴻⵏ ⴷⴷⴰⵔⴻⵏ,

ⵉⵏⵏⵉ ⵥⵉ ⵜᵉⵜⵜⵄⴻⵎⵎⴰⵔⴻⴷ ⴰⵄⴻⴷⴷⵉⵙ ⵏⵙⴻⵏ ⵙ ⵍⴻⴽⵏⵓⵥ ⵉⵏⵓⴼⴼⴰⵔⴻⵏ,

ⵓⵍⴰ ⴷ ⵉⵃⴻⵏⵊⵉⵔⴻⵏ ⵏⵙⴻⵏ ⵜⵜⵡⴰⵢⴰⵡⴰⵏⴻⵏ,

ⵜⵜⴻⵊⵊⴰⵏ ⵎⵉⵏ ⵉⵛⴻⵟⵟⴻⵏ ⵉ ⵜⴰⵔⵡⴰ ⵏⵙⴻⵏ.

15 ⵏⴻⵛⵛ ⴰⴷ ⵥⴰⵔⴻⵖ ⵓⴷⴻⵎ ⵏⵏⴻⴽ ⴷⵉ ⵜⵙⴻⴳⴷⴰ,

ⴰⴷ ⴷⴷ-ⴷⴻⵡⵍⴻⵖ ⵊⵊⵉⵡⵏⴻⵖ ⵙ ⵡⴰⴷⴷⵓⴷ ⵏⵏⴻⴽ ⵅⵎⵉ ⴷⴷ ⵖⴰ ⴼⴰⵇⴻⵖ.