1 ⴰ ⵙⵉⴷⵉ, ⵎⴰⵢⴻⵎⵎⵉ ⵜⴻⵇⵇⵉⵎⴻⴷ ⵜⵉⴳⴳⵯⴻⵊⴻⴷ ⴰⵎⵎⵓ?

ⵎⴰⵢⴻⵎⵎⵉ ⵜⴻⵙⵙⵏⵓⴼⴼⴰⵔⴻⴷ ⵉⵅⴻⴼ ⵏⵏⴻⴽ ⴷⴻⴳ ⵡⴰⴽⵓⴷⴻⵏ ⵏ ⵍⴻⵃⵚⴰⵔⴻⵜ?

2 ⵙ ⵏⵏⴼⴰⵅⴻⵜ ⵉⴹⴻⴼⴼⴰⵔ ⵓⵄⴻⴼⴼⴰⵏ ⵍⵎⴻⵙⴽⵉⵏ.

ⴰⴷ ⵜⵜⵡⴰⵟⵟⴼⴻⵏ ⴷⵉ ⵜⵎⴻⵄⵎⴰⵞ ⵉ ⴷⵉ ⵜⵜⵅⴰⵔⵔⵚⴻⵏ. ^■  

3 ⵎⴰⵖⴰⵔ ⴰⵄⴻⴼⴼⴰⵏ ⵉⵙⵙⵄⵓⴵⴰ ⵉⵅⴻⴼ ⵏⵏⴻⵙ ⵖⴰⵔ ⵎⴻⵥⵔⵉ ⵏ ⵍⴻⵄⵎⴰⵔ ⵏⵏⴻⵙ,

ⵉⵜⵜⴱⴰⵔⴻⴽ ⴰⴹⴻⵎⵎⴰⵄ, ⵉⵜⵜⵛⴻⵇⵇⴰⴼ ⴷⵉ ⵙⵉⴷⵉ.

4 ⴰⵄⴻⴼⴼⴰⵏ ⴰⵎⴻⵛⵏⴰⵡ ⵡⴻⵏⵏⵉ ⵉⵙⵙⴳⴻⵄⵄⴰⴷⴻⵏ ⵜⵉⵏⵥⴰⵔⵜ ⵏⵏⴻⵙ ⵖⴰⵔ ⵓⵊⴻⵏⵏⴰ,

ⵡⴰⵔ ⵉⵜⵜⴱⴻⵇⵇⴻⵛ.

“ⵡⴰⵔ ⴷⵉⵏ ⴰⵔⴻⴱⴱⵉ”, ⵎⴰⵏ ⴰⵢⴰ ⴷ ⵎⴰⵔⵔⴰ ⵎⵉⵏ ⴷⵉ ⵉⵥⴻⵎⵎⴰⵔ ⴰⴷ ⵉⵜⵜⵅⴰⵔⵔⴻⵚ. ^■  

5 ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ ⵜⵜⴻⴼⴼⵖⴻⵏ ⴰⵙ ⵎⵍⵉⵃ ⴽⵓⵍ ⵜⵡⴰⵍⴰ.

ⵍⴻⵀⴽⴰⵎⴰⵜ ⵏⵏⴻⴽ ⵜⵜⵓⵄⵍⴰⵏⵜ ⵅⴰⵙ.

ⵉⵜⵜⵥⴰⵡⴰⵔ ⵎⴰⵔⵔⴰ ⵉⵏⵏⵉ ⵜ ⵉⵃⴻⵚⵚⴰⵔⴻⵏ.

6 ⵏⴻⵜⵜⴰ ⵉⵇⵇⴰⵔ ⴷⴻⴳ ⵡⵓⵍ ⵏⵏⴻⵙ: “ⵡⴰⵔ ⵜⵜⴻⵏⵀⴻⵥⵥⵉⵖ,

ⵥⵉ ⵊⵊⵉⵍ ⴰⵍ ⵊⵊⵉⵍ ⵡⴰⵔ ⴷ ⴰⵢⵉ ⵉⵍⴻⵇⵇⴻⴼ ⵓⵍⴰ ⴷ ⵉⵊⵊ ⵏ ⵍⵖⴰⵔ.”

7 ⴰⵇⴻⵎⵎⵓⵎ ⵏⵏⴻⵙ ⵉⵛⵛⵓⵔ ⵙ ⵏⵏⴻⵄⵍⴻⵜ ⴷ ⵉⵅⴰⵔⵔⵉⵇⴻⵏ ⴷ ⴷⴷⴻⴵ.

ⵙⴰⴷⵓ ⵢⵉⵍⴻⵙ ⵏⵏⴻⵙ ⴰⵇⴰ ⴷⵉⵏ ⵜⴰⵎⴰⵔⴰ ⴷ ⵍⵎⵓⵄⵚⵉⵢⵢⴻⵜ. ^■  

8 ⵏⴻⵜⵜⴰ ⵉⵜⵜⵖⵉⵎⴰ ⵖⴰⵔ ⵡⴻⵛⴱⴰⵔ ⴷⵉ ⴷⵛⵓⵔⴰⵜ,

ⴷⴻⴳ ⵉⵎⵓⵛⴰⵏ ⵉⵏⵏⵓⴼⴼⴰⵔⴻⵏ ⵉⵏⴻⵇⵇ ⵉⵏⵏⵉ ⵡⴰⵔ ⵉⴳⴳⵉⵏ ⵙ ⵛⴰ.

ⵜⵉⵟⵟⴰⵡⵉⵏ ⵏⵏⴻⵙ ⵎⵎⴻⵏⴹⴰⵔⴻⵏⵜ ⵅ ⵍⵎⴻⵙⴽⵉⵏ.

9 ⵉⵍⴱⴻⵜ ⴷⴻⴳ ⵡⴻⵎⵛⴰⵏ ⵉⵏⵏⵓⴼⴰⵔⴻⵏ,

ⴰⵎ ⵡⴻⵢⵔⴰⴷ ⴷⴻⴳ ⵓⴷⵓⵔⵔⵉ ⵏ ⵓⵄⵉⵛⵛⵓ ⵏⵏⴻⵙ.

ⵏⴻⵜⵜⴰ ⵉⵜⵜⵃⴻⴽⴽⴰⵔ ⵃⵉⵎⴰ ⴰⴷ ⵢⴰⵛⴰⵔ ⵍⵎⴻⵙⴽⵉⵏ.

ⵉⵜⵜⴰⵛⴰⵔ ⵍⵎⴻⵙⴽⵉⵏ ⵓⵎⵉ ⵜ ⵉⵊⴻⴱⴱⴻⴷ ⴷⵉ ⵜⵔⴰⵛⵛⴰ ⵏⵏⴻⵙ.

10 ⵏⴻⵜⵜⴰ ⵉⵀⴻⴽⴽⵡⴰ-ⴷⴷ ⵖⴰⵔ ⵡⴰⴷⴷⴰⵢ, ⵉⵜⵜⴰⴹⴰⵔ,

ⵓ ⵍⵎⴻⵙⴽⵉⵏ ⵉⵡⴻⵟⵟⴰ ⵊⴰⵔ ⵡⴰⵛⵛⴰⵔⴻⵏ ⵏⵏⴻⵙ ⵉⵊⴻⵀⴷⴻⵏ.

11 ⵉⵇⵇⴰⵔ ⴷⴻⴳ ⵡⵓⵍ ⵏⵏⴻⵙ: “ⴰⵔⴻⴱⴱⵉ ⵉⵜⵜⵓ,

ⵏⴻⵜⵜⴰ ⵉⵙⵙⵏⵓⴼⴼⴰⵔ ⵓⴷⴻⵎ ⵏⵏⴻⵙ,

ⵄⴻⵎⵎⴰⵔⵚ ⴰⴷ ⵜ ⵉⵥⴰⵔ.” ^■  

12 ⴽⴽⴰⵔ, ⴰ ⵙⵉⴷⵉ, ⴰⵔⴻⴱⴱⵉ, ⵙⴳⴻⵄⵄⴻⴷ ⴰⴼⵓⵙ ⵏⵏⴻⴽ,

ⵡⴰⵔ ⵜⵜᵉⵜⵜⵓ ⵍⵎⵓⵙⴰⴽⵉⵏ.

13 ⵎⴰⵢⴻⵎⵎⵉ ⵉⵜⵜⵛⴻⵇⵇⴰⴼ ⵓⵄⴻⴼⴼⴰⵏ ⴷⵉ ⴰⵔⴻⴱⴱⵉ,

ⵎⴰⵢⴻⵎⵎⵉ ⵉⵇⵇⴰⵔ ⴷⴻⴳ ⵡⵓⵍ ⵏⵏⴻⵙ:

“ⵛⴻⴽ ⵡⴰⵔ ⵜᵉⵜⵜⴱⴻⵇⵇⴰⵛⴻⴷ!”?

14 ⴰⵇⴰ ⵛⴻⴽ ⵜⴻⵥⵔⵉⴷ, ⵎⵉⵏⵥⵉ ⵜᵉⵜⵜⵡⴰⵍⵉⴷ ⵜⴰⵎⴰⵔⴰ ⴷ ⵡⴻⵛⴹⴰⵏ,

ⵎⴰⵃⴻⵏⴷ ⴰⴷ ⵜⴻⵏ ⵜⴻⵙⵙⴰⵔⵙⴻⴷ ⴷⴻⴳ ⵓⴼⵓⵙ ⵏⵏⴻⴽ.

ⵍⵎⴻⵙⴽⵉⵏ ⵉⵜⵜⴰⵔⵔ-ⴷⴷ ⵖⴰⵔⴻⴽ ⵙ ⵓⵥⴻⴵⵉⴼ.

ⵛⴻⴽ ⴷ ⴰⵎⵄⴰⵡⴻⵏ ⵏ ⵓⵢⵓⵊⵉⵍ. ^□  

15 ⴰⵔⵥ ⴰⵖⵉⵍ ⵏ ⵓⵄⴻⴼⴼⴰⵏ,

ⵅⵍⴻⴼ ⵍⵖⴰⵔ ⵥⴻⴳ ⵡⴻⵏⵏⵉ ⵉⵜⵜⴻⴳⴳⴻⵏ ⵜⵓⵄⴻⴼⴼⵏⴰ,

ⴰⵍ ⵡⴰⵔ ⵜᵉⵜⵜⵉⴼⴻⴷ ⵡⴰⵍⵓ ⵄⴰⴷ.

16 ⵙⵉⴷⵉ ⴷ ⴰⵊⴻⴵⵉⴷ ⵉ ⵍⴻⴱⴷⴰ ⵇⴰⵄ.

ⵜⵜⵡⴰⵜⴻⵃⵃⴰⵏ ⵍⴻⴳⵏⵓⵙ ⵥⵉ ⵜⴻⵎⵎⵓⵔⵜ ⵏⵏⴻⵙ. ^■  

17 ⴰ ⵙⵉⴷⵉ, ⵛⴻⴽ ⵜⴻⵙⵍⵉⴷ ⵉ ⵎⴻⵥⵔⵉ ⵏ ⵉⵎⵡⴰⴹⵄⴻⵏ,

ⴰⴷ ⵜⴻⵙⵙⵊⴻⵀⴷⴻⴷ ⵓⵍⴰⵡⴻⵏ ⵏⵙⴻⵏ,

ⴰⴷ ⵖⴰⵔⵙⴻⵏ ⵜⵎⴻⵢⵢⵍⴻⴷ ⴰⵎⴻⵥⵥⵓⵖ ⵏⵏⴻⴽ,

18 ⵃⵉⵎⴰ ⴰⴷ ⵜⴰⵖⴻⴷ ⵜⴰⵙⵖⴰⵔⵜ ⵉ ⵓⵢⵓⵊⵉⵍ ⵓ ⵉ ⵡⴻⵏⵏⵉ ⵉⵜⵜⵡⴰⵃⴻⵚⵚⴰⵔⴻⵏ,

ⵎⴰⵃⴻⵏⴷ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵅ ⵜⴻⵎⵎⵓⵔⵜ ⵡⴰⵔ ⵉⵜⵜⵖⵉⵎⵉ ⵉⵙⵙⴰⴳⴳⵯⴰⴷ ⵄⴰⴷ ⵓⵍⴰ ⴷ ⵉⵊⵊ.