9
1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ‘ⵍⵎⴻⵡⵜ ⵏ ⵎⴻⵎⵎⵉ’. ⴰⵥⴻⵀⵀⴻⴷ ⵏ ⴷⴰⵡⵓⴷ. 2 ⴰⴷ ⵇⴰⴷⵉⵖ ⵙⵉⴷⵉ ⵙ ⵎⴰⵔⵔⴰ ⵓⵍ ⵉⵏⵓ,
ⴰⴷ ⴱⴰⵔⵔⵃⴻⵖ ⵎⴰⵔⵔⴰ ⵍⵎⵓⵄⵊⵉⵥⴰⵜ ⵏⵏⴻⴽ.
3 ⴰⴷ ⵥⵥⴰⵢⴻⴽ ⴼⴰⵔⵃⴻⵖ ⴰⴷ ⵥⵥⴰⵢⴻⴽ ⵙⵍⵉⵡⵍⵉⵡⴻⵖ.
ⵏⴻⵛⵛ ⴰⴷ ⵥⴻⵀⵀⴷⴻⵖ ⵉ ⵢⵉⵙⴻⵎ ⵏⵏⴻⴽ,
ⴰ ⵛⴻⴽ, ⴰⵎⵄⵓⴵⵉ ⵅ ⴽⵓⵍⵛⵉ!
4 ⵓⵎⵉ ⵍⵄⴻⴷⵢⴰⵏ ⵉⵏⵓ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ,
ⵡⴹⴰⵏ ⵓ ⵖⴻⵍⵢⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ.
5 ⵎⴰⵖⴰⵔ ⵛⴻⴽ ⵜⵡⴻⵏⵏⵉⴷ ⴰⵢⵉ ⵜⴰⵙⵖⴰⵔⵜ ⵉⵏⵓ ⵓ ⵜⴱⴻⵍⵍⵄⴻⴷ ⴷⴷⴻⵄⵡⴻⵜ ⵉⵏⵓ,
ⵜⴻⵇⵇⵉⵎⴻⴷ ⵅ ⵍⵄⴰⵔⵛ, ⴰ ⵛⴻⴽ, ⴷ ⵍⵇⴰⴹⵉ ⴷ ⴰⵎⵙⴻⴳⴳⴻⴷ.
6 ⵛⴻⴽ ⵜⵡⴻⴱⴱⵅⴻⴷ ⵍⴻⴳⵏⵓⵙ, ⵜⵀⴻⵍⵍⴽⴻⴷ ⴰⵄⴻⴼⴼⴰⵏ,
ⵜⴻⵎⵃⵉⴷ ⵉⵙⴻⵎ ⵏⵙⴻⵏ ⵉ ⵍⴻⴱⴷⴰ ⵇⴰⵄ.
7 ⵍⴻⵄⴷⵓ, ⴰⵇⴰ ⵏⵉⵜⵏⵉ ⵜⵜⵡⴰⵇⴹⴰⵏ, ⴰⵇⴰ ⴰⵜⴻⵏ ⴷ ⵍⵅⵉⵔⴱⴰⵜ ⵉ ⵍⴻⴱⴷⴰ.
ⵜⵖⴻⴹⵍⴻⴷ ⵜⵉⵏⴻⴷⴷⴰⵎ ⵏⵙⴻⵏ, ⵍⵉⴷⴰⵔⴻⵜ ⵏⵙⴻⵏ ⵜⴻⴼⵏⴰ.
8 ⵙⵉⴷⵉ ⵉⵜⵜⵖⵉⵎⴰ ⵉ ⵍⴻⴱⴷⴰ.
ⴰⵇⴰ ⵉⵙⵙⴱⴻⴷⴷ ⵍⵄⴰⵔⵛ ⵏⵏⴻⵙ ⵉ ⵍⴻⵃⴽⴰⵎ.
9 ⵏⴻⵜⵜⴰ ⴰⴷ ⵉⵛⴰⵔⵔⴻⵄ ⴷⴷⵓⵏⴻⵛⵜ ⵙ ⵜⵙⴻⴳⴷⴰ,
ⴰⴷ ⵉⵃⴽⴻⵎ ⵛⵛⵓⵄⵓⴱ ⵙ ⵍⵃⴻⵇⵇ. ■
10 ⵙⵉⴷⵉ ⴷ ⵍⴱⵓⵔⵊ ⵢⵓⵄⵍⴰⵏ ⵉ ⵡⴻⵏⵏⵉ ⵉⵎⵎⴻⵏⴹⴰⵔⴻⵏ,
ⵉⵊⵊ ⵏ ⵍⴱⵓⵔⵊ ⵢⵓⵄⵍⴰⵏ ⴷⴻⴳ ⵡⴰⴽⵓⴷⴻⵏ ⵏ ⵍⴻⵃⵚⴰⵔⴻⵜ. ■
11 ⵉⵏⵏⵉ ⵉⵙⵙⵏⴻⵏ ⵉⵙⴻⵎ ⵏⵏⴻⴽ, ⴰⴷ ⵅⴰⴽ ⵜⵜⴻⵛⵍⴻⵏ,
ⵎⴰⵖⴰⵔ ⵉⵏⵏⵉ ⵅⴰⴽ ⵢⴰⵔⴻⵥⵥⵓⵏ, ⵡⴰⵔ ⴷⴰⵢⵙⴻⵏ ⵜⵙⴻⵎⵎⵃⴻⴷ, ⴰ ⵙⵉⴷⵉ.
12 ⵣⴻⵀⵀⴷⴻⵎ ⵉ ⵙⵉⴷⵉ, ⵡⴻⵏⵏⵉ ⵉⵥⴻⴷⴷⵖⴻⵏ ⵅ ⵡⴻⴷⵔⴰⵔ ⵏ ⵚⵉⵀⵢⵓⵏ,
ⴱⴰⵔⵔⵃⴻⵎ ⵙ ⵜⵎⴻⴳⴳⴰ ⵏⵏⴻⵙ ⵊⴰⵔ ⵍⴻⴳⵏⵓⵙ.
13 ⵎⵉⵏⵥⵉ ⵏⴻⵜⵜⴰ ⵢⴰⵔⴻⵥⵥⵓ ⵅ ⵓⵙⵉⵥⵥⴻⵍ ⵏ ⵉⴷⴰⵎⵎⴻⵏ, ⵉⵜⵜⵅⴰⵔⵔⴰⵚ ⴷⴰⵢⵙⴻⵏ.
ⵡⴰⵔ ⵉⵜⵜⵓ ⵛⴰ ⵉⵖⵓⵢⵢⴰⵏ ⵏ ⵢⵉⵏⵏⵉ ⵉⵜⵜⵡⴰⵃⴻⵚⵚⴰⵔⴻⵏ.
14 ⵃⵉⵏⵏ ⵅⴰⴼⵉ, ⴰ ⵙⵉⴷⵉ,
ⵅⵥⴰⵔ ⵖⴰⵔ ⵍⴻⵖⴱⴻⵏ ⵉⵏⵓ ⵉ ⴷⴷ-ⵢⵓⵙⵉⵏ ⵥⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ,
ⵛⴻⴽ ⴷ ⵡⴻⵏⵏⵉ ⴷ ⴰⵢⵉ ⵖⴰ ⵉⵙⵙⴳⴻⵄⵄⴷⴻⵏ ⵥⵉ ⵜⴻⵡⵡⵓⵔⴰ ⵏ ⵍⵎⴻⵡⵜ,
15 ⵃⵉⵎⴰ ⴰⴷ ⴱⴰⵔⵔⵃⴻⵖ ⵙ ⵎⴰⵔⵔⴰ ⵛⵛⴰⵏ ⵏⵏⴻⴽ,
ⴷⵉ ⵜⴻⵡⵡⵓⵔⴰ ⵏ ⵢⴻⴵⵉⵙ ⵏ ⵚⵉⵀⵢⵓⵏ.
ⵏⴻⵛⵛ ⴼⴰⵔⵔⵃⴻⵖ ⵅ ⵓⵙⴻⵏⵊⴻⵎ ⵏⵏⴻⴽ.
16 ⵍⴻⴳⵏⵓⵙ ⵡⴹⴰⵏ ⴷⴻⴳ ⵡⴻⵃⴼⵓⵔ ⵉ ⵉⴳⴳⵉⵏ ⵏⵉⵜⵏⵉ,
ⴰⴹⴰⵔ ⵏⵙⴻⵏ ⵉⵜⵜⵡⴰⵛⴻⴷⴷ ⴷⵉ ⵜⵔⴰⵛⵛⴰ, ⵜⴻⵏⵏⵉ ⵙⵙⵏⵓⴼⴼⴰⵔⴻⵏ ⵙⵉⵎⴰⵏⵜ ⵏⵙⴻⵏ. ■
17 ⵙⵉⴷⵉ ⵉⴷⵡⴻⵍ ⵉⵜⵜⵡⴰⵙⵙⴻⵏ.
ⵏⴻⵜⵜⴰ ⵢⵓⵖⴰ ⵜⴰⵙⵖⴰⵔⵜ,
ⴰⵄⴻⴼⴼⴰⵏ ⵉⵏⵏⵓⵖ ⴷⵉ ⵜⵎⴻⴳⴳⴰ ⵏ ⵉⴼⴰⵙⵙⴻⵏ ⵏⵏⴻⵙ.
ⴻⵊⵊ ⵉⴼⵉⵍⴰⵏ ⴰⴷ ⴷⴻⵏⴷⴷⵏⴻⵏ. ⵙⵉⵍⴰⵀ.
18 ⵉⵄⴻⴼⴼⴰⵏⴻⵏ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵍⴰⵅⴰⵔⵜ,
ⵎⴰⵔⵔⴰ ⵍⴻⴳⵏⵓⵙ ⵏⵏⵉ ⵉⵜⵜⵓⵏ ⴰⵔⴻⴱⴱⵉ.
19 ⵎⴰⵛⴰ ⴰⵎⴻⵥⵍⵓⴹ ⵡⴰⵔ ⵉⵜⵜⵡⴰⵜⵜⵓ ⵉ ⵍⴻⴱⴷⴰ,
ⵡⴰⵔ ⵉⵜⵜⵡⴰⵇⴻⵟⵟⴻⵄ ⵍⴰⵢⴰⵙ ⵏ ⵢⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⵉ ⵍⴻⴱⴷⴰ.
20 ⴽⴽⴰⵔ, ⴰ ⵙⵉⴷⵉ, ⵃⵉⵎⴰ ⵡⴰⵔ ⵉⴷⴷⵉⴽⴽⵡⵉⵍ ⴱⵏⴰⴷⴻⵎ ⵉⵊⵀⴻⴷ ⴽⵜⴰⵔ.
ⴻⵊⵊ ⵍⴻⴳⵏⵓⵙ ⴰⴷ ⵜⵜⵡⴰⵛⴰⵔⵔⵄⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ.
21 ⵙⵉⴳⴳⵯⴻⴷ ⵉ-ⵜⴻⵏ, ⴰ ⵙⵉⴷⵉ,
ⴻⵊⵊ ⵍⴻⴳⵏⵓⵙ ⴰⴷ ⵙⵙⵏⴻⵏ ⴰⵇⴰ ⴰⵜⴻⵏ ⴷ ⴱⵏⴰⴷⴻⵎ! ⵙⵉⵍⴰⵀ.