1 ⵉⵊⵊ ⵏ ⵢⴻⵥⵍⵉ ⵏ ⴷⴰⵡⵓⴷ ⴷⴻⴳ ⵡⴰⵟⵟⴰⵙ ⵏ ⵜⵎⵉⵊⵊⵉⵡⵉⵏ, ⵉⵥⵍⵉ ⵏⵏⵉ ⵉⵖⴻⵏⵏⴻⵊ ⵉ ⵙⵉⴷⵉ ⴷⵉ ⵙⵙⵉⴱⴱⴻⵜ ⵏ ⵡⴰⵡⴰⵍⴻⵏ ⵏ ⴽⵓⵛ, ⵥⴻⴳ ⴰⵢⵜ ⵏ ⴱⵉⵏⵢⴰⵎⵉⵏ.

2 ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⴰⵇⴰ ⵅⴰⴽ ⵉ ⵜⵜⴻⵛⵍⴻⵖ!

ⵙⴻⵏⵊⴻⵎ ⴰⵢⵉ ⵥⵉ ⵎⴰⵔⵔⴰ ⵉⵏⵏⵉ ⵅⴰⴼⵉ ⵉⵜⵜⴰⵥⵥⵍⴻⵏ ⵓⵛⴰ ⴼⴻⴽⴽ ⴰⵢⵉ,

3 ⵎⴰⵃⴻⵏⴷ ⵏⴻⵜⵜⴰ ⵡⴰⵔ ⴷ ⴰⵢⵉ ⵉⵥⴻⵄⵄⴻⴼ ⴰⵎ ⵡⴻⵢⵔⴰⴷ, ⴰⴷ ⴰⵢⵉ ⵉⵎⴻⵥⵥⴻⵇ,

ⵍⴰⵎⵉ ⵡⴰⵔ ⴷⵉⵏ ⵡⵉ ⵉ ⵖⴰ ⵉⴼⴻⴽⴽⴻⵏ!

4 ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵎⴰⵍⴰ ⵏⴻⵛⵛ ⴳⴳⵉⵖ ⵎⴰⵏ ⴰⵢⴰ,

ⵎⴰⵍⴰ ⴷⵉⵏ ⵛⴰ ⵏ ⵍⵖⴻⵛⵛ ⵉⵍⵚⴻⵇ ⴷⴻⴳ ⵉⴼⴰⵙⵙⴻⵏ ⵉⵏⵓ,

5 ⵎⴰⵍⴰ ⵏⴻⵛⵛ ⵅⴻⵍⴼⴻⵖ ⵡⴻⵏⵏⵉ ⴰⴽⵉⴷⵉ ⵉⴷⴷⴰⵔⴻⵏ ⴷⵉ ⵍⴻⵀⵏⴰ ⵙ ⵍⵖⴰⵔ,

- ⵎⴰⵛⴰ ⵡⴻⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⵅ ⵡⴰⵍⵓ, ⵊⵊⵉⵖ ⵜ ⴰⴷ ⵢⵓⵢⵓⵔ - ,

6 ⴻⵊⵊ ⵅⴻⵏⵏⵉ ⴰⴷ ⵢⴰⵥⵥⴻⵍ ⵍⴻⵄⴷⵓ ⵅ ⵍⴻⵄⵎⴰⵔ ⵉⵏⵓ, ⴰⴷ ⴰⵢⵉ ⵉⵄⴷⵓ,

ⴰⴷ ⵉⵄⴼⴻⵙ ⵅ ⵜⵓⴷⴰⵔⵜ ⵉⵏⵓ ⴷⵉ ⵜⴻⵎⵎⵓⵔⵜ,

ⴻⵊⵊ ⵉ-ⵜ ⴰⴷ ⵉⵙⵙⴻⵥⴷⴻⵖ ⴰⵄⵓⴵⵉ ⵉⵏⵓ ⴷⵉ ⵜⵄⴻⵊⵊⴰⵊⵜ! ⵙⵉⵍⴰⵀ.

7 ⴽⴽⴰⵔ-ⴷⴷ, ⴰ ⵙⵉⴷⵉ, ⴷⴻⴳ ⵡⴻⵖⴹⴰⴱ ⵏⵏⴻⴽ,

ⵙⵓⵄⵍⴰ ⵉⵅⴻⴼ ⵏⵏⴻⴽ ⵅ ⵡⴻⵀⵊⴰⵎ ⵏ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ,

ⴼⴰⵇ ⴷⵉ ⵟⵟⵡⴻⵄ ⵉⵏⵓ,

ⴰⵇⴰ ⵜⴻⴳⴳⵉⴷ ⵜⵓⵎⵓⵔⴻⴷ ⵍⵃⴻⵇⵇ.

8 ⵉⵊⵊ ⵏ ⵓⴱⴰⵔⵔⵓ ⵏ ⵍⴻⴳⵏⵓⵙ ⴰⴷ ⴰⵛ ⴷⴷ-ⵏⵏⴹⴻⵏ,

ⵅⴻⵏⵏⵉ ⴷⵡⴻⵍ ⵜⵉⵡⴰ ⵏⵙⴻⵏ ⵖⴰⵔ ⵙⴻⵏⵏⴻⵊ.

9 ⵙⵉⴷⵉ ⴰⴷ ⵉⵃⴰⴽⴻⵎ ⵍⴻⴳⵏⵓⵙ.

ⴰⵖ ⴰⵢⵉ ⵜⴰⵙⵖⴰⵔⵜ, ⴰ ⵙⵉⴷⵉ, ⵄⵍⴰⵃⵙⴰⴱ ⵜⴰⵙⴻⴳⴷⴰ ⵉⵏⵓ,

ⵄⵍⴰⵃⵙⴰⴱ ⵍⴻⴽⵎⴰⵔⴻⵜ ⵉ ⴷⴰⵢⵉ.

10 ⵙⴱⴻⴷⴷ ⵜⵓⵄⴻⴼⴼⵏⴰ ⵏ ⵉⵄⴻⴼⴼⴰⵏⴻⵏ, ⵙⴻⵎⵜⴻⵏ ⴰⵎⵙⴻⴳⴳⴻⴷ,

ⵛⴻⴽ, ⵡⴻⵏⵏⵉ ⵉⵇⴻⴵⴱⴻⵏ ⵓⵍⴰⵡⴻⵏ ⴷ ⵜⵉⵥⵥⴰⵍ, ⴰ ⴰⵔⴻⴱⴱⵉ ⵉⵙⴻⴳⴳⴷⴻⵏ! ^□  ■  

11 ⵜⴰⵙⴻⴷⴷⴰⵔⵜ ⵉⵏⵓ ⵉ ⵓⵙⴻⵍⵇⵉ ⵖⴰⵔ ⴰⵔⴻⴱⴱⵉ,

ⴰⵎⵙⴻⵏⵊⴻⵎ ⵏ ⵉⵎⵙⴻⴳⴳⵎⴻⵏ ⵏ ⵡⵓⵍⴰⵡⴻⵏ.

12 ⴰⵔⴻⴱⴱⵉ ⴷ ⵉⵊⵊ ⵏ ⵍⵇⴰⴹⵉ ⵉⵙⴻⴳⴳⴷⴻⵏ,

ⵉⵊⵊ ⵏ ⴰⵔⴻⴱⴱⵉ ⵏⵏⵉ ⵉⵙⴻⵅⵅⴹⴻⵏ ⴽⵓⵍ ⴰⵙⵙ.

13 ⵎⴰⵍⴰ ⵏⴻⵜⵜⴰ ⵡⴰⵔ ⴷⴷ-ⵉⵄⵇⵉⴱ, ⴰⴷ ⵉⵙⵙⴻⵇⴹⴻⵄ ⵏⴻⵜⵜⴰ ⵙⵙⵉⴼ ⵏⵏⴻⵙ,

ⴰⴷ ⵉⵎⵃⴻⴹ ⵍⵇⴻⵡⵙ ⵏⵏⴻⵙ ⵓⵛⴰ ⴰⴷ ⵅⴰⵙ ⵉⵏⴻⵢⵢⴻⵛ.

14 ⵉⴳⴳⴰ ⵅⴰⵙ ⵍⴻⵙⵏⴰⵃ ⵉⵏⴻⵇⵇⴻⵏ,

ⴰⴷ ⵢⴰⵔⵔ ⴼⵍⵉⵜⵛⴰⵜ ⵏⵏⴻⵙ ⴷ ⵉⵚⴻⴼⴹⴰⵡⴻⵏ ⵢⴰⵔⴻⵇⵇⴻⵏ.

15 ⵅⵥⴰⵔ, ⴰⵇⴰ ⵡⴹⴰⵏ-ⴷⴷ ⵅⴰⵙ ⵍⴻⵡⵊⴻⵄ ⵏ ⵜⴰⵔⵓⵜ ⵏ ⵍⵎⵓⵄⵚⵉⵢⵢⴻⵜ,

ⵉⴽⵙⵉ ⴷⴷⴻⵢⵙⴻⵜ ⵏ ⵜⴰⵎⴰⵔⴰ,

ⵓⵛⴰ ⴰⴷ ⵢⴰⵔⵓ ⵉⵅⴰⵔⵔⵉⵇⴻⵏ. ^■  

16 ⵉⵇⵇⴰⵥ ⵉⵊⵊ ⵏ ⵡⴻⵃⴼⵓⵔ ⵓⵛⴰ ⵉⵙⵙⵓⴵⴻⵖ ⵉ-ⵜ,

ⵎⴰⵛⴰ ⴷ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵉ ⵉⵡⴹⴰⵏ ⴷⴻⴳ ⵡⴻⵃⴼⵓⵔ ⵏⵏⵉ ⵉⴳⴳⴰ. ^■  

17 ⴰⵔⴱⴻⵔ ⵏⵏⴻⵙ ⴰⴷ ⵖⴰⵔⴻⵙ ⴷⴷ-ⵉⴷⵡⴻⵍ ⴰⵍ ⴰⵥⴻⴵⵉⴼ ⵏⵏⴻⵙ,

ⵍⴻⵅⵛⵓⵏⴻⵜ ⵏⵏⴻⵙ ⴰⴷ ⴷⴷ-ⵜⴻⵀⵡⴰ ⵅ ⵓⵛⴻⵇⵇⵓⴼ ⵏⵏⴻⵙ.

18 ⴰⴷ ⵇⴰⴷⵉⵖ ⵙⵉⴷⵉ ⵅ ⵜⵙⴻⴳⴷⴰ ⵏⵏⴻⵙ,

ⴰⴷ ⵥⴻⵀⵀⴷⴻⵖ ⵉ ⵢⵉⵙⴻⵎ ⵏ ⵙⵉⴷⵉ, ⴰⵎⵄⵓⴵⵉ ⵅ ⴽⵓⵍⵛⵉ.