1 ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ, ⴰⴽ-ⴷ ⵜⴻⵎⵊⴰ. ⴰⵥⴻⵀⵀⴻⴷ ⵏ ⴷⴰⵡⵓⴷ.

2 ⴰ ⵙⵉⴷⵉ, ⵙⴻⵍ-ⴷⴷ ⵉ ⵎⵉⵏ ⵖⴰ ⵉⵏⵉⵖ,

ⴼⴻⵀⵎⴻⵜ ⵉ ⵓⵏⵉⵅⵙⴻⵙ ⵉⵏⵓ.

3 ⵃⴻⴽⴽⴰⵔ ⵉ ⵜⵎⵉⵊⵊⴰ ⵏ ⵓⵥⴰⵡⴻⴳ ⵉⵏⵓ,

ⴰ ⴰⵊⴻⴵⵉⴷ ⵉⵏⵓ ⴷ ⴰⵔⴻⴱⴱⵉ ⵉⵏⵓ,

ⴰⵇⴰ ⵉ ⵛⴻⴽ ⵓⵎⵉ ⵜⵜⵥⴰⴵⵉⵖ.

4 ⵖⴰⵔ ⵜⵓⴼⴼⵓⵜ, ⴰ ⵙⵉⴷⵉ, ⵜⴻⵙⵍⵉⴷ ⵛⴻⴽ ⵉ ⵜⵎⵉⵊⵊⴰ ⵉⵏⵓ,

ⵖⴰⵔ ⵜⵓⴼⴼⵓⵜ ⵏⵏⵇⴻⵍⴱⴻⵖ-ⴷⴷ ⵖⴰⵔⴻⴽ,

ⵓⵛⴰ ⵇⵇⵉⵎⴻⵖ ⵜⵜⵔⴰⵊⵉⵖ ⵛⴻⴽ.

5 ⵛⴻⴽ ⵡⴰⵔ ⵜⴻⴵⵉⴷ ⵛⴰ ⴷ ⴰⵔⴻⴱⴱⵉ ⵏⵏⵉ ⵉⵜⵜⴻⵅⵙⴻⵏ ⵜⵓⵄⴻⴼⴼⵏⴰ,

ⴱⵏⴰⴷⴻⵎ ⴰⵄⴻⴼⴼⴰⵏ ⵡⴰⵔ ⵖⴰⵔⴻⴽ ⵉⵜⵜⵉⴼⴼ ⴰⵖⵉⵎⵉ.

6 ⵉⴱⵓⵃⴰⵍⵉⵢⵢⴻⵏ ⵡⴰⵔ ⵜⵜⵖⵉⵎⵉⵏ ⵜⵜⴱⴻⴷⴷⴰⵏ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⴽ,

ⵛⴻⴽ ⵜⵛⴰⵔⵔⵀⴻⴷ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ.

7 ⴰⴷ ⵜⵀⴻⵍⵍⴽⴻⴷ ⴰⵢⵜ ⵏ ⴱⵓ-ⵉⵅⴰⵔⵔⵉⵇⴻⵏ,

ⵙⵉⴷⵉ ⵉⵜⵜⵄⵉⴼⴼⴰ ⴰⵔⵢⴰⵥ ⵏ ⵉⴷⴰⵎⵎⴻⵏ ⴷ ⵍⵖⴻⵛⵛ.

8 ⵎⴰⵛⴰ ⵙ ⵍⴻⵎⵖⴰⵔⴻⵜ ⵏ ⵜⵎⴻⵅⵙⵉⵡⵜ ⵏⵏⴻⴽ ⵉⵛⴻⵡⵡⴰⵔⴻⵏ ⴰⴷ ⴰⴷⴼⴻⵖ ⵖⴰⵔ ⵜⴰⴷⴷⴰⵔⵜ ⵏⵏⴻⴽ,

ⴰⴷ ⴰⴹⴰⵔⴻⵖ ⵖⴰⵔ ⵣⵥⴰⵡⴻⵛⵜ ⵏⵏⴻⴽ ⵜⴰⵎⴻⵇⵇⵔⴰⵏⵜ ⵙ ⵜⵉⴳⴳⵯⵓⴷⵉ ⵥⵥⴰⵢⴻⴽ.

9 ⴰ ⵙⵉⴷⵉ, ⵙⵓⵢⵓⵔ ⴰⵢⵉ ⵅ ⵡⴻⴱⵔⵉⴷ ⵏ ⵜⵙⴻⴳⴷⴰ ⵏⵏⴻⴽ,

ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵉ ⴷ ⴰⵢⵉ ⵉⵍⴻⴱⴱⵜⴻⵏ,

ⵙⴻⴳⴳⴻⵎ ⴰⴱⵔⵉⴷ ⵏⵏⴻⴽ ⵥⵥⴰⵜ ⵉ ⵡⵓⴷⴻⵎ ⵉⵏⵓ.

10 ⵎⵉⵏⵥⵉ ⴷⴻⴳ ⵓⵇⴻⵎⵎⵓⵎ ⵏⵙⴻⵏ ⵡⴰⵔ ⴷⵉⵏ ⴱⵓ ⵍⴰⵎⴰⵏ,

ⵊⵊⵓⴼ ⵏⵙⴻⵏ ⴷ ⴰⵅⴻⵢⵢⴻⴱ,

ⵜⵎⵉⵊⵊⴰ ⵏⵙⴻⵏ ⴷ ⴰⵏⴹⴻⵍ ⵢⴰⵔⴻⵥⵎⴻⵏ,

ⴰⵔⴻⴱⴱⵓⵏ ⵜⵅⴰⵏⵛⴻⵜ ⵙ ⵢⵉⵍⴻⵙ ⵏⵙⴻⵏ. ^■  

11 ⴷⵄⴰ ⵜⴻⵏ, ⴰ ⴰⵔⴻⴱⴱⵉ,

ⴻⵊⵊ ⵉ-ⵜⴻⵏ ⴰⴷ ⵡⴹⴰⵏ ⵙ ⵍⴻⵛⵡⴰⵔ ⵏⵙⴻⵏ,

ⴰⵥⵥⴻⵍ ⵅⴰⵙⴻⵏ ⴷⵉ ⵙⵙⵉⴱⴱⴻⵜ ⵏ ⵡⴰⵟⵟⴰⵙ ⵏ ⵉⵅⴻⵟⵟⴰⵏ ⵏⵙⴻⵏ,

ⵎⵉⵏⵥⵉ ⵏⵉⵜⵏⵉ ⵖⴻⵡⵡⵖⴻⵏ ⵅⴰⴽ.

12 ⵊⵊⴻⵎ ⵎⴰⵔⵔⴰ ⵉⵏⵏⵉ ⵅⴰⴽ ⵉⵜⵜⴻⵛⵍⴻⵏ ⴰⴷ ⴼⴰⵔⵃⴻⵏ,

ⴻⵊⵊ ⵉ-ⵜⴻⵏ ⴰⴷ ⵙⵍⵉⵡⴻⵍⵡⴻⵏ ⵉ ⵍⴻⴱⴷⴰ.

ⵛⴻⴽ ⵜⴼⴰⵔⵢⴻⴷ ⵅⴰⵙⴻⵏ,

ⴰⵇⴰ ⵉⵏⵏⵉ ⵉⵜⵜⴻⵅⵙⴻⵏ ⵉⵙⴻⵎ ⵏⵏⴻⴽ ⴰⴷ ⵏⴻⴳⵥⴻⵏ ⵙ ⵍⴻⴼⵔⴰⵃⴻⵜ ⵉ ⵖⴰⵔⵙⴻⵏ ⴷⴰⵢⴻⴽ.

13 ⵎⵉⵏⵥⵉ ⵛⴻⴽ, ⴰ ⵙⵉⴷⵉ, ⴰⴷ ⵜⴱⴰⵔⴽⴻⴷ ⴰⵎⵙⴻⴳⴳⴰⴷ,

ⴰⴷ ⴰⵙ ⵜⵇⵓⵡⵡⴰⵔⴻⴷ ⵙ ⵓⵃⵉⵏⵏⵉ ⴰⵎ ⵙ ⵜⵙⴻⴷⴷⴰⵔⵜ ⵏ ⵓⵙⴻⵍⵇⵉ ⵜⴰⵎⴻⵇⵇⵔⴰⵏⵜ.