ⵎⵉⵏ ⵉⴳⴳⴰ ⵓⵊⴻⴵⵉⴷ ⴷⵉ ⵟⵟⵡⴻⵄ ⵏ ⵡⵓⴷⴰⵢⴻⵏ
8
1 ⴷⴻⴳ ⵡⴰⵙⵙ ⵏⵏⵉ ⴰⵊⴻⴵⵉⴷ ⵉⵡⵛⴰ ⴰⵙ ⵉ ⵜⵊⴻⴵⵉⴷⵜ ⵉⵙⵜⵉⵔ ⵜⴰⴷⴷⴰⵔⵜ ⵏ ⵀⴰⵎⴰⵏ, ⵍⴻⵄⴷⵓ ⵏ ⵡⵓⴷⴰⵢⴻⵏ, ⵓⵛⴰ ⵢⵓⵙⴰ-ⴷⴷ ⵎⵓⵔⴷⴰⵅⴰⵢ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ, ⵎⵉⵏⵥⵉ ⵉⵙⵜⵉⵔ ⵜⵅⴻⴱⴱⴰⵔ ⵙ ⵎⵉⵏⵥⵉ ⴷ ⴰⵙ ⴷⴷ-ⵉⵜⵜⴰⵙ ⵉ ⵏⴻⵜⵜⴰⵜ. 2 ⵉⴽⴽⴻⵙ-ⴷⴷ ⵓⵊⴻⴵⵉⴷ ⵜⴰⵅⴰⴷⴻⵏⵜ ⵏ ⵓⵛⴻⵎⵎⵉⵄ, ⵜⴻⵏⵏⵉ ⵜⵓⵖⴰ ⴷⴷ-ⵉⴽⴽⴻⵙ ⵥⵉ ⵀⴰⵎⴰⵏ ⵓⵛⴰ ⵉⵡⵛⴰ ⴰⵙ-ⵜⵜ ⵉ ⵎⵓⵔⴷⴰⵅⴰⵢ, ⵓ ⵉⵙⵜⵉⵔ ⵜⴻⴳⴳⴰ ⵎⵓⵔⴷⴰⵅⴰⵢ ⵅ ⵜⴰⴷⴷⴰⵔⵜ ⵏ ⵀⴰⵎⴰⵏ. 3 ⵜⴻⵙⵙⵉⵡⴻⵍ ⵉⵙⵜⵉⵔ ⵜⵡⴰⵍⴰ ⵏⵏⴻⵖⵏⵉ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ, ⵜⴻⵡⴹⴰ ⴰⵙ ⵖⴰⵔ ⵉⴹⴰⵔⴻⵏ, ⵜᵉⵜⵔⵓ ⵓ ⵜⵃⴻⵛⵛⴻⵎ ⵉ-ⵜ ⵎⴰⵃⴻⵏⴷ ⴰⴷ ⵉⵙⵙⵉⴳⴳⵯⴻⵊ ⵜⴰⵄⴻⴼⴼⴰⵏⵜ ⵏ ⵀⴰⵎⴰⵏ, ⴰⵊⴰⵊⵉ, ⵓⵍⴰ ⴷ ⵜⴰⵎⴻⵄⵎⵓⵞ ⵉ ⵜⵓⵖⴰ ⵉⵅⴰⵔⵔⴻⵚ ⴹⵉⴷⴷ ⵉ ⵡⵓⴷⴰⵢⴻⵏ. 4 ⵉⵙⵙⵡⵉⵥⵥⴻⴹ ⵓⵊⴻⴵⵉⴷ ⵉ ⵉⵙⵜⵉⵔ ⵜⴰⵖⵖⴰⵔⵛⵜ ⵏⵏⴻⵙ ⵏ ⵡⵓⵔⴻⵖ. ⵅⴻⵏⵏⵉ ⵉⵙⵜⵉⵔ ⵜⴻⴽⴽⴰⵔ, ⵜⴱⴻⴷⴷ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ, 5 ⵜⴻⵏⵏⴰ: “ⵎⴰⵍⴰ ⵎⵍⵉⵃ ⵉ ⵓⵊⴻⴵⵉⴷ ⵓ ⵏⴻⵛⵛ ⵓⴼⵉⵖ ⵍⵅⴰⴹⴰⵔ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ ⵓ ⵎⴰⵍⴰ ⵜⵙⴻⴳⴳⴻⵎ ⵜⵎⴻⵙⵍⴰⵛⵜ-ⴰ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⵓ ⵏⴻⵛⵛ ⵓⴷⴼⴻⵖ ⴰⵙ ⴷⵉ ⵍⵅⴰⴹⴰⵔ ⴷⵉ ⵜⵉⵟⵟⴰⵡⵉⵏ ⵏⵏⴻⵙ, ⴻⵊⵊ ⴰⴷ ⴰⵔⵉⵏ ⵛⴰ ⵃⵉⵎⴰ ⴰⴷ ⵜⵜⵡⴰⴱⴻⴹⵍⴻⵏⵜ ⵜⴻⴱⵔⴰⵜⵉⵏ ⵏⵏⵉ ⴷⵉ ⵜⴻⴵⴰ ⵜⵎⴻⵄⵎⵓⵞ ⵏ ⵀⴰⵎⴰⵏ, ⵎⵎⵉⵙ ⵏ ⵀⴰⵎⵎⴰⴷⴰⵜⴰ, ⴰⵊⴰⵊⵉ, ⵜⵉⵏⵏⵉ ⵉ ⵢⵓⵔⴰ ⵉ ⵓⵀⴻⵍⵍⴻⴽ ⵏ ⵡⵓⴷⴰⵢⴻⵏ ⴷⵉ ⵎⴰⵔⵔⴰ ⵍⵄⴰⵎⴰⵍⴰⵜ ⵏ ⵓⵊⴻⴵⵉⴷ. 6 ⵎⴰⵖⴰⵔ ⵎⴰⵎⵎⴻⵛ ⵥⴻⵎⵎⴰⵔⴻⵢ ⴰⴷ ⵅⵥⴰⵔⴻⵖ ⵍⵖⴰⵔ ⵉ ⵖⴰ ⵉⵍⴻⵇⴼⴻⵏ ⵍⴳⴻⵏⵙ ⵉⵏⵓ? ⵓ ⵎⴰⵎⵎⴻⵛ ⵥⴻⵎⵎⴰⵔⴻⵖ ⴰⴷ ⵅⵥⴰⵔⴻⵖ ⴰⵀⴻⵍⵍⴻⴽ ⵏ ⵊⵊⴰⴷⵉⵔⴰ ⵉⵏⵓ?” 7 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ ⵉ ⵜⵊⴻⴵⵉⴷⵜ ⵉⵙⵜⵉⵔ ⵓ ⵉ ⵡⵓⴷⴰⵢ ⵎⵓⵔⴷⴰⵅⴰⵢ: “ⵅⵥⴰⵔ, ⵡⵛⵉⵖ ⵜⴰⴷⴷⴰⵔⵜ ⵏ ⵀⴰⵎⴰⵏ ⵉ ⵉⵙⵜⵉⵔ ⵓ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵓⵢⵍⴻⵖ ⵜ ⵖⴰⵔ ⵜⵃⴻⵏⴰⵛⵜ, ⵎⵉⵏⵥⵉ ⵉⵙⵙⵡⵉⵥⵥⴻⴷ ⴰⴼⵓⵙ ⵏⵏⴻⵙ ⵖⴰⵔ ⵡⵓⴷⴰⵢⴻⵏ. 8 ⴰⴷ ⵜⴰⵔⵉⵎ ⴽⴻⵏⵏⵉⵡ ⵙⵉⵎⴰⵏⵜ ⵏⵡⴻⵎ ⵙ ⵢⵉⵙⴻⵎ ⵏ ⵓⵊⴻⴵⵉⴷ ⵎⵉⵏ ⵉⴵⴰⵏ ⵉⵛⵏⴰ ⴷⵉ ⵜⵉⵟⵟⴰⵡⵉⵏ ⵏⵡⴻⵎ ⴷⵉ ⵟⵟⵡⴻⵄ ⵏ ⵡⵓⴷⴰⵢⴻⵏ. ⵛⴻⵎⵎⵄⴻⵎ ⵜ ⵙ ⵜⵅⴰⴷⴻⵏⵜ ⵏ ⵓⵊⴻⴵⵉⴷ, ⵎⵉⵏⵥⵉ ⵜⵉⵔⴰ ⵉ ⵢⵓⵔⴰⵏ ⵙ ⵢⵉⵙⴻⵎ ⵏ ⵓⵊⴻⴵⵉⴷ ⵓ ⵉⵜⵜⵡⴰⵛⴻⵎⵎⵄⴻⵏ ⵙ ⵜⵅⴰⴷⴻⵏⵜ ⵏ ⵓⵛⴻⵎⵎⵉⵄ ⵏ ⵓⵊⴻⴵⵉⴷ, ⵡⴰⵔ ⵉⵥⴻⵎⵎⴰⵔ ⵃⴻⴷ ⴰⴷ ⵜⴻⵏⵜ ⵉⴱⴹⴻⵍ.” 9 ⵅⴻⵏⵏⵉ ⵜⵜⵡⴰⵍⴰⵖⴰⵏ ⵉⵎⴰⵔⵉⵔⴻⵏ ⵏ ⵓⵊⴻⴵⵉⴷ, ⴷⴻⴳ ⵡⴰⵙⵙ ⵏⵏⵉ, ⴷⴻⴳ ⵓⵢⵓⵔ ⵡⵉⵙⵙ ⵜⵍⴰⵜⴰ, ⵡⴻⵏⵏⵉ ⵓⵎⵉ ⵇⵇⴰⵔⴻⵏ ⴰⵙ ⴰⵢⵓⵔ ⵏ ⵙⵉⵡⴰⵏ, ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⵓ-ⵄⵉⵛⵔⵉⵏ ⵥⵥⴰⵢⴻⵙ, ⵓⵛⴰ ⵓⵔⴰⵏ ⴰⵎ ⵎⴰⵎⵎⴻⵛ ⵎⴰⵔⵔⴰ ⵎⵉⵏ ⵢⵓⵎⵓⵔ ⵎⵓⵔⴷⴰⵅⴰⵢ, ⴰⵇⴰ ⵓⵔⴰⵏ ⵜ ⵉ ⵡⵓⴷⴰⵢⴻⵏ, ⵉⵊⴻⴵⵉⴷⴻⵏ ⵉ ⵉⴵⴰⵏ ⵙⴰⴷⵓ ⵉ ⵓⵊⴻⴵⵉⴷ ⵓ ⵉ ⵍⵡⵓⵍⴰⵜ ⵓ ⵉ ⵍⵃⵓⴽⴽⴰⵎ ⵏ ⵍⵄⴰⵎⴰⵍⴰⵜ, ⵥⵉ ⵍⵀⴻⵏⴷ ⴰⵍ ⴽⵓⵛ, ⵎⵢⴰ ⵓ-ⵙⴻⴱⵄⴰ ⵓ-ⵄⵉⵛⵔⵉⵏ ⵏ ⵍⵄⴰⵎⴰⵍⴰⵜ, ⵉ ⴽⵓⵍ ⵍⵄⴰⵎⴰⵍⴰ ⵙ ⵜⵉⵔⴰ ⵏⵏⴻⵙ ⵓ ⵉ ⴽⵓⵍ ⵍⴳⴻⵏⵙ ⵙ ⵢⵉⵍⴻⵙ ⵏⵏⴻⵙ ⵓ ⵄⴰⵡⴻⴷ ⵉ ⵡⵓⴷⴰⵢⴻⵏ ⵙ ⵜⵉⵔⴰ ⵏⵙⴻⵏ ⵓ ⵙ ⵢⵉⵍⴻⵙ ⵏⵙⴻⵏ.
10 ⵉⵜⵜⵡⴰⵔⵉ ⵙ ⵢⵉⵙⴻⵎ ⵏ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ ⵓ ⵜⵜⵡⴰⵛⴻⵎⵎⴻⵄ ⵜⴰⴱⵔⴰⵜ ⵙ ⵜⵅⴰⴷⴻⵏⵜ ⵏ ⵓⵛⴻⵎⵎⵉⵄ ⵏ ⵓⵊⴻⴵⵉⴷ ⵓⵛⴰ ⵙⵙⴻⴽⴽⴻⵏ ⵜⵉⴱⵔⴰⵜⵉⵏ ⵏⵏⵉ ⴰⴽ-ⴷ ⵉⵔⴻⵇⵇⴰⵙⴻⵏ ⵉⵜⵜⴰⵥⵥⵍⴻⵏ ⵅ ⵢⴻⵢⵙⴰⵏ, ⵏⵢⵉⵏ ⵅ ⵢⴻⵢⵙⴰⵏ ⵏ ⵜⴰⵥⵍⴰ ⵉⴳⴻⵍⵍⴷⴻⵏ ⵏ ⵊⵊⴰⴷⵉⵔⴰ ⵉⵛⵏⴰⵏ ⵇⴰⵄ.
11 ⴷⵉ ⵜⴻⴱⵔⴰⵜⵉⵏ ⵏⵏⵉ ⵉⵡⵛⴰ ⵓⵊⴻⴵⵉⴷ ⵜⵜⴻⵙⵔⵉⵃ ⵉ ⵡⵓⴷⴰⵢⴻⵏ ⵎⴰⵃⴻⵏⴷ ⴰⴷ ⵎⵓⵏⴻⵏ ⴷⵉ ⴽⵓⵍ ⵜⴰⵏⴷⵉⵏⵜ ⵉ ⴷⵉ ⴵⴰⵏ, ⴰⴷ ⴽⴽⴰⵔⴻⵏ ⴷⵉ ⵟⵟⵡⴻⵄ ⵏ ⵜⵓⴷⴰⵔⵜ ⵏⵙⴻⵏ, ⵃⵉⵎⴰ ⴰⴷ ⴰⵔⴻⴷⴷⴵⴻⵏ, ⴰⴷ ⵏⵖⴻⵏ ⵓ ⴰⴷ ⵜⴻⵃⵃⴰⵏ ⴽⵓⵍ ⵍⵄⴻⵙⴽⴰⵔ ⵥⵉ ⵍⴳⴻⵏⵙ ⴷ ⵍⵄⴰⵎⴰⵍⴰ ⵏⵏⵉ ⵜⴻⵏ ⵉ ⵖⴰ ⵉⵃⵚⴰⵔⴻⵏ, ⵓⵍⴰ ⴷ ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⴷ ⵜⴻⵎⵖⴰⵔⵉⵏ, ⵓ ⵃⵉⵎⴰ ⴰⴷ ⴽⴻⵛⵛⴹⴻⵏ ⵎⵉⵏ ⵥⵥⴰⵢⵙⴻⵏ ⵟⵟⴼⴻⵏ
12 ⴷ ⵎⴰⵏ ⴰⵢⴰ ⴷⴻⴳ ⵡⴰⵙⵙ ⴷ ⵉⵊⵊⴻⵏ ⴷⵉ ⵎⴰⵔⵔⴰ ⵍⵄⴰⵎⴰⵍⴰⵜ ⵏ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ, ⴷⴻⴳ ⵡⴰⵙⵙ ⵡⵉⵙⵙ ⵜⵍⴻⵟⵟⴰⵛ ⵏ ⵓⵢⵓⵔ ⵡⵉⵙⵙ ⵜⴻⵏⵄⴰⵛ, ⴰⵇⴰ-ⵜ ⴷ ⴰⵢⵓⵔ ⵏ ⴰⴷⴰⵔ.
13 ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵜᵉⵜⵜⵡⴰⵙⵓⴼⴼⴻⵖ ⵉⵛⵜ ⵏ ⵜⵉⵍⴻⵎⵜ ⵏ ⵜⵉⵔⴰ ⴰⵢⴰ ⴰⵎ ⵓⵥⴻⵔⴼ ⴷⵉ ⵎⴰⵔⵔⴰ ⵍⵄⴰⵎⴰⵍⴰⵜ ⵎⴰⵃⴻⵏⴷ ⴰⴷ ⵉⵜⵜⵡⴰⵙⵙⴰⵔⴳⴻⴱ ⵉ ⵎⴰⵔⵔⴰ ⵍⴻⴳⵏⵓⵙ, ⴰⵇⴰ ⵓⴷⴰⵢⴻⵏ ⴰⴷ ⵉⵍⵉⵏ ⵃⴻⵥⵥⵎⴻⵏ ⴷⴻⴳ ⵡⴰⵙⵙ ⵏⵏⵉ ⵃⵉⵎⴰ ⴰⴷ ⵏⵜⴰⵇⵎⴻⵏ ⵥⵉ ⵍⵄⴻⴷⵢⴰⵏ ⵏⵙⴻⵏ.
14 ⵉⵔⴻⵇⵇⴰⵙⴻⵏ ⵉⵜⵜⴰⵥⵥⵍⴻⵏ, ⵉⵏⵏⵉ ⵢⴻⵏⵢⵉⵏ ⵅ ⵢⴻⵢⵙⴰⵏ ⵏ ⵜⴰⵥⵍⴰ ⵉⴳⴻⵍⵍⴷⴻⵏ, ⴼⴼⵖⴻⵏ ⴷⴻⵖⵢⴰ, ⵜⵜⵡⴰⵛⴻⵊⵊⵄⴻⵏ ⵙ ⵓⵥⴻⵢⵢⴰⵔ ⵙ ⵡⴰⵡⴰⵍ ⵏ ⵓⵊⴻⴵⵉⴷ. ⵉⵜⵜⵡⴰⵙⵙⵓⴼⴼⴻⵖ ⵓⵥⴻⵔⴼ ⵄⴰⵡⴻⴷ ⴷⵉ ⵍⵇⴻⵍⵄⴰ ⵏ ⵛⵓⵛⴰⵏ.
15 ⵅⴰⵙ ⵓⵛⴰ ⵉⴼⴼⴻⵖ-ⴷⴷ ⵎⵓⵔⴷⴰⵅⴰⵢ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⴷⴻⴳ ⵓⵙⴻⵍⵀⴰⵎ ⵉⴳⴻⵍⵍⴷⴻⵏ ⵏ ⵓⴼⵉⵍⵓ ⴰⴷⴻⵀⵎⴰⵏⵉ ⴷ ⵓⵛⴻⵎⵍⴰⵍ ⵓ ⵙ ⵉⵊⵊ ⵏ ⵜⵜⴰⵊ ⴷ ⴰⵎⴻⵇⵇⵔⴰⵏ ⵏ ⵡⵓⵔⴻⵖ ⴷ ⵓⵙⴻⵍⵀⴰⵎ ⵏ ⵍⴻⵇⵟⴻⵏ ⴰⵥⴷⴰⴷ ⴷ ⵓⴼⵉⵍⵓ ⴰⵔⵊⵓⵡⴰⵏⵉ, ⵓⵛⴰ ⵜⴰⵏⴷⵉⵏⵜ ⵏ ⵛⵓⵛⴰⵏ ⵏⴻⴳⵥⴻⵏ ⴷⴰⵢⴻⵙ ⵉⵡⴷⴰⵏ ⵙ ⵍⴻⴼⵔⴰⵃⴻⵜ.
16 ⵓⴷⴰⵢⴻⵏ ⵜⵓⵖⴰ ⵖⴰⵔⵙⴻⵏ ⵜⴼⴰⵡⵜ ⴷ ⵍⴻⴼⵔⴰⵃⴻⵜ, ⴷ ⵡⴰⵔⵛⵓⵇ ⴷ ⵛⵛⴰⵏ.
17 ⴷⵉ ⴽⵓⵍ ⵍⵄⴰⵎⴰⵍⴰ ⵓ ⴷⵉ ⴽⵓⵍ ⵜⴰⵏⴷⵉⵏⵜ ⵎⴰⵏⵉ ⵎⴰ ⴷⴷ-ⵢⵉⵡⴻⴹ ⵡⴰⵡⴰⵍ ⵏ ⵓⵊⴻⴵⵉⴷ ⴷ ⵓⵥⴻⵔⴼ ⵏⵏⴻⵙ, ⵜⵓⵖⴰ ⴷⵉⵏ ⵍⴻⴼⵔⴰⵃⴻⵜ ⴷ ⵡⴰⵔⵛⵓⵇ ⵊⴰⵔ ⵡⵓⴷⴰⵢⴻⵏ ⴷ ⵥⵥⵔⵓⴷ ⴷ ⵡⵓⵙⵙⴰⵏ ⵉⵚⴻⴱⵃⴻⵏ ⵓ ⵡⴰⵟⵟⴰⵙ ⵥⵉ ⵍⴻⴳⵏⵓⵙ ⵏ ⵜⴻⵎⵎⵓⵔⵜ ⴷⴻⵡⵍⴻⵏ ⴷ ⵓⴷⴰⵢⴻⵏ, ⵎⵉⵏⵥⵉ ⵜⴻⵡⴹⴰ-ⴷⴷ ⵅⴰⵙⴻⵏ ⵜⵉⴳⴳⵯⵓⴷⵉ ⵥⴻⴳ ⵡⵓⴷⴰⵢⴻⵏ.