1 ⵓⵎⵉ ⴷⴷ-ⵢⵉⵡⴻⴹ ⵓⵊⴻⴵⵉⴷ ⴰⴽ-ⴷ ⵀⴰⵎⴰⵏ ⵃⵉⵎⴰ ⴰⴷ ⵙⵡⴻⵏ ⴰⴽ-ⴷ ⵉⵙⵜⵉⵔ, 2 ⵉⵏⵏⴰ ⵓⵊⴻⴵⵉⴷ, ⵄⴰⵡⴻⴷ ⴷⴻⴳ ⵡⴰⵙⵙ ⵡⵉⵙⵙ ⵜⵏⴰⵢⴻⵏ, ⴰⴽ-ⴷ ⵜⵉⵙⵙⵉⵜ ⵏ ⴱⵉⵏⵓ ⵉ ⵉⵙⵜⵉⵔ: “ⵎⵉⵏ ⴷⴰⵢⴻⵎ ⵉⴵⴰⵏ ⴷ ⵎⴻⵥⵔⵉ, ⴰ ⵜⴰⵊⴻⴵⵉⴷⵜ ⵉⵙⵜⵉⵔ! ⴰⴷ ⴰⵎ ⵉⵎⵎⴻⵡⵛ. ⴷ ⵎⵉⵏ ⵉⴵⴰⵏ ⴷ ⵜⵓⵜⵔⴰ ⵏⵏⴻⵎ? ⴰⴷ ⵖⴰⵔⴻⵎ ⵜⵉⵍⵉ ⵡⴰⵅⵅⴰ ⴷ ⴰⵥⵢⴻⵏ ⵏ ⵜⴳⴻⵍⴷⵉⵜ.” 3 ⵅⴻⵏⵏⵉ ⵜⴰⵔⵔⴰ-ⴷⴷ ⵅⴰⵙ ⵜⵊⴻⴵⵉⴷⵜ ⵉⵙⵜⵉⵔ, ⵜⴻⵏⵏⴰ: “ⵎⴰⵍⴰ ⵅⴻⵏⵏⵉ ⵓⴼⵉⵖ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏⵏⴻⴽ, ⴰ ⴰⵊⴻⴵⵉⴷ, ⵓ ⵎⴰⵍⴰ ⵜⵓⵙⴰ ⴰⵙ-ⴷⴷ ⵉ ⵓⵊⴻⴵⵉⴷ ⵙ ⵍⵅⴰⴹⴰⵔ, ⴻⵊⵊ ⴰⴷ ⴰⵢⵉ ⵡⵛⴻⵏ ⵜⵓⴷⴰⵔⵜ ⵉⵏⵓ ⵅ ⵎⴻⵥⵔⵉ ⵉⵏⵓ ⵓ ⵍⴳⴻⵏⵙ ⵉⵏⵓ ⵅ ⵜⵓⵜⵔⴰ ⵉⵏⵓ. 4 ⵎⴰⵖⴰⵔ ⵏⴻⵛⵛⵉⵏ ⵏⴻⵎⵎⴻⵏⵥ, ⵏⴻⵛⵛ ⴷ ⵍⴳⴻⵏⵙ ⵉⵏⵓ, ⵎⴰⵃⴻⵏⴷ ⴰⴷ ⵏⴻⵜⵜⵡⴰⵔⴻⴷⴷⴻⴵ ⵓ ⴰⴷ ⵏⴻⵜⵜⵡⴰⵜⴻⵃⵃⴰ. ⵎⴰⵍⴰ ⵏⴻⵎⵎⴻⵏⵥ ⴰⵎ ⵉⵙⴻⵎⵖⴰⵏ ⴷ ⵜⵙⴻⵎⵖⵉⵏ, ⵏⴻⵛⵛ ⴰⴷ ⵙⵙⵓⵙⵎⴻⵖ, ⵎⵉⵏⵥⵉ ⵅ ⵓⵢⴰ ⵍⴻⵃⵚⴰⵔⴻⵜ ⵡⴰⵔ ⵜᵉⵜⵜⵉⵍⵉ ⴰⵏⴻⵛⵜ ⴰⵍⴰⵎⵉ ⵉⵛⵓⵡⵡⴰⵔ ⴰⴷ ⵚⴻⴷⴷⵄⴻⵖ ⴰⵊⴻⴵⵉⴷ.” 5 ⵅⴻⵏⵏⵉ ⵉⵙⵙⵉⵡⴻⵍ ⵓⵊⴻⴵⵉⴷ ⴰⵃⴰⵛⵡⵉⵔⵓⵛ, ⵉⵏⵏⴰ ⵉ ⵜⵊⴻⴵⵉⴷⵜ ⵉⵙⵜⵉⵔ: “ⵎⵉⵏ ⵉⵄⵏⴰ ⵏⴻⵜⵜⴰ ⵓ ⵎⴰⵏⵉ ⵉⴵⴰ ⵡⴻⵏⵏⵉ ⵖⴰⵔ ⵉⴵⴰ ⵡⵓⵍ ⵉⵛⵛⵓⵔ ⵎⴰⵃⴻⵏⴷ ⴰⴷ ⵉⴳⴳ ⴰⵎⵎⵓ?” 6 ⵜⴻⵏⵏⴰ ⴰⵙ ⵉⵙⵜⵉⵔ: “ⴰⵔⵢⴰⵥ ⵏⵏⵉ ⵉ ⴷ ⴰⵏⴻⵖ ⵉⵃⵚⴰⵔⴻⵏ ⴷ ⵍⴻⵄⴷⵓ ⵏⵏⴻⵖ, ⴰⵇⴰ ⴷ ⵡⴰ ⴷ ⵀⴰⵎⴰⵏ ⴰⵄⴻⴼⴼⴰⵏ!” ⵅⴻⵏⵏⵉ ⵉⵏⵏⴻⵅⵍⴻⵄ ⵀⴰⵎⴰⵏ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⴷ ⵜⵊⴻⴵⵉⴷⵜ.

7 ⵉⴽⴽⴰⵔ ⵓⵊⴻⴵⵉⴷ ⵙ ⵡⴻⵙⵄⴰⵔ, ⵉⵊⵊⴰ ⵥⵥⴰⵔⴷⴻⵜ ⵏ ⴱⵉⵏⵓ ⵓⵛⴰ ⵢⵓⵢⵓⵔ ⵖⴰⵔ ⵡⴻⵃⵡⵉⵛ ⵏ ⵍⴻⵇⵚⴰⵔ. ⵀⴰⵎⴰⵏ ⵉⵇⵇⵉⵎ ⵉⴱⴻⴷⴷ ⵎⴰⵃⴻⵏⴷ ⴰⴷ ⵉⵃⴻⵛⵛⴻⵎ ⵉⵙⵜⵉⵔ ⴷⵉ ⵟⵟⵡⴻⵄ ⵏ ⵜⵓⴷⴰⵔⵜ ⵏⵏⴻⵙ, ⵎⴰⵖⴰⵔ ⵢⵓⵛⴰ ⴰⴽ-ⴷ ⵓⵊⴻⴵⵉⴷ ⴰⵇⴰ ⵉⵄⴻⵡⵡⴻⵍ ⴰⴷ ⴷⴰⵢⴻⵙ ⵉⴳⴳ ⵍⵖⴰⵔ. 8 ⴰⵍⴰⵎⵉ ⴷⴷ-ⵉⴷⵡⴻⵍ ⵥⴻⴳ ⵡⴻⵃⵡⵉⵛ ⵏ ⵍⴻⵇⵚⴰⵔ ⵖⴰⵔ ⵜⴰⴷⴷⴰⵔⵜ ⵎⴰⵏⵉ ⵜⴻⴵⴰ ⵟⵟⴰⴱⵍⴰ ⵏ ⴱⵉⵏⵓ, ⵢⵓⴼⴰ ⵀⴰⵎⴰⵏ ⵉⵡⴹⴰ ⵅ ⵍⴻⵎⵟⴰⵔⴱⴰⵜ ⵉ ⵅ ⵜⵓⵖⴰ ⵜⴻⵥⵥⴻⵍ ⵜⵊⴻⴵⵉⴷⵜ ⵉⵙⵜⵉⵔ. ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ: “ⵍⴻⵅⵅⵓ ⴰⵇⴰ ⵉⵀⴻⴽⴽⵡⴻⵍ ⵓⵍⴰ ⴷ ⵜⴰⵊⴻⴵⵉⴷⵜ ⵖⴰⵔⵉ ⴷⵉ ⵜⴰⴷⴷⴰⵔⵜ!” ⵇⴰⵄ ⵡⴰⵔ ⴷⴷ-ⵉⴼⴼⵉⵖ ⵡⴰⵡⴰⵍ ⵥⴻⴳ ⵓⵇⴻⵎⵎⵓⵏ ⵏ ⵓⵊⴻⴵⵉⴷ, ⴰⵍⴰⵎⵉ ⵜⵓⵖⴰ ⵉⵎⵙⴻⵅⵅⴰⵔⴻⵏ ⵍⴻⵃⵃⴼⴻⵏ ⴰⵙ ⵉ ⵀⴰⵎⴰⵏ ⵅ ⵓⵖⴻⵎⴱⵓⴱ. 9 ⵃⴰⵔⴱⵓⵏⴰ, ⵉⵊⵊ ⵥⴻⴳ ⵉⵎⵙⴻⵅⵅⴰⵔⴻⵏ ⵉⵛⴻⵏⵄⴻⵏ, ⵉⵏⵏⵉ ⵜⵓⵖⴰ ⵉⴱⴻⴷⴷⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ, ⵉⵏⵏⴰ: “ⴰⵇⴰ ⴷⵉⵏ ⵜⴰⵃⵏⴰⵛⵜ ⵏ ⵡⴰⵢⴰⵍ, ⵜⴻⵏⵏⵉ ⵉ ⵜⵓⵖⴰ ⵉⴳⴳⴰ ⵀⴰⵎⴰⵏ ⵉ ⵎⵓⵔⴷⴰⵅⴰⵢ ⵡⴻⵏⵏⵉ ⵜⵓⵖⴰ ⵉⵙⵙⵉⵡⴻⵍ ⵎⵍⵉⵃ ⴷⴻⴳ ⵓⵊⴻⴵⵉⴷ, ⵜⴱⴻⴷⴷ ⵖⴰⵔ ⵜⴰⴷⴷⴰⵔⵜ ⵏ ⵀⴰⵎⴰⵏ ⵓ ⵍⵓⵄⵍⴰ ⵏⵏⴻⵙ ⵅⴻⵎⵙⵉⵏ ⵏ ⵉⵖⵉⵍⴻⵏ.” ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ: “ⴰⵢⵍⴻⵎ ⵖⴰⵔⴻⵙ ⵀⴰⵎⴰⵏ!”

10 ⵓⵢⵍⴻⵏ ⵀⴰⵎⴰⵏ ⵖⴰⵔ ⵜⴻⵃⵏⴰⵛⵜ ⵉ ⵜⵓⵖⴰ ⵉⴳⴳⴰ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ ⵉ ⵎⵓⵔⴷⴰⵅⴰⵢ ⵓⵛⴰ ⵢⴰⵔⵙⴰ ⵡⴻⵙⵄⴰⵔ ⵏ ⵓⵊⴻⴵⵉⴷ.