1 ⴰⵡⴰⵍⴻⵏ ⵏ ⵏⴰⵃⴰⵎⵢⴰ, ⵎⵎⵉⵙ ⵏ ⵃⴰⴽⴰⵍⵢⴰ. ⵉⵎⵙⴰⵔ ⴷⴻⴳ ⵓⵢⵓⵔ ⵏ ⴽⵉⵙⵍⵓⵡ, ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵄⵉⵛⵔⵉⵏ, ⵓⵎⵉ ⴷ ⴰⵢⵉ ⵜⵓⵖⴰ ⴷⵉ ⵍⴻⵇⵚⴰⵔ ⴷⵉ ⵛⵓⵛⴰⵏ, 2 ⴰⵇⴰ ⵢⵓⵙⴰ-ⴷⴷ ⵃⴰⵏⴰⵏⵉ, ⵉⵊⵊⴻⵏ ⵥⴻⴳ ⴰⵢⵜⵎⴰ, ⵊⵎⵉⵄ ⴰⴽ-ⴷ ⵛⴰ ⵏ ⵢⴻⵔⵢⴰⵥⴻⵏ ⵥⵉ ⵢⴰⵀⵓⴷⴰ, ⵓⵛⴰ ⵙⵙⴻⵇⵙⵉⵖ ⵜⴻⵏ ⵅ ⵡⵓⴷⴰⵢⴻⵏ ⵏⵏⵉ ⵉⵏⵏⴻⵊⵎⴻⵏ, ⵉⵏⵏⵉ ⵉⵇⵇⵉⵎⴻⵏ ⵥⵉ ⵜⵎⴻⵃⴱⴰⵙⵜ, ⵓ ⵅ ⵓⵔⵛⴰⵍⵉⵎ. 3 ⵏⵉⵜⵏⵉ ⵏⵏⴰⵏ ⴰⵢⵉ: “ⵉⵏⵏⵉ ⵉⵇⵇⵉⵎⴻⵏ, ⵉⵏⵏⵉ ⴷⵉⵏ ⵉⵇⵇⵉⵎⴻⵏ ⴷⵉ ⵍⵄⴰⵎⴰⵍⴰ ⵥⵉ ⵜⵎⴻⵃⴱⴰⵙⵜ, ⴰⵇⴰ ⴰⵜⴻⵏ ⴷⵉ ⵍⴻⵖⴱⴻⵏ ⴷ ⴰⵎⴻⵇⵇⵔⴰⵏ ⵓ ⴷⵉ ⵍⴻⴼⴹⵉⵃⴻⵜ ⵓ ⵍⵃⵉⴹ ⵏ ⵓⵔⵛⴰⵍⵉⵎ ⵉⵜⵜⵡⴰⵔⵥ ⵓ ⵜⵉⵡⵡⵓⵔⴰ ⵏⵏⴻⵙ ⵜⵜⵡⴰⵙⵛⴻⵎⴹⴻⵏⵜ.”

4 ⵓⵎⵉ ⵙⵍⵉⵖ ⴰⵡⴰⵍⴻⵏ-ⴰ, ⵉⵎⵙⴰⵔ, ⴰⵇⴰ ⵇⵇⵉⵎⴻⵖ ⵖⴰⵔ ⵜⴻⵎⵎⵓⵔⵜ, ⵔⵓⵖ ⵓ ⵛⴻⴹⵏⴻⵖ ⵛⴰ ⵏ ⵡⵓⵙⵙⴰⵏ, ⵥⵓⵎⵎⴻⵖ ⵓ ⵥⵓⴵⴻⵖ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ ⵏ ⵉⵊⴻⵏⵡⴰⵏ. 5 ⵏⵏⵉⵖ: “ⴰ ⵙⵉⴷⵉ, ⴰⵔⴻⴱⴱⵉ ⵏ ⵉⵊⴻⵏⵡⴰⵏ, ⵛⴻⴽ ⴷ ⴰⵔⴻⴱⴱⵉ ⴷ ⴰⵎⴻⵇⵇⵔⴰⵏ ⵉⵙⵙⴰⴳⴳⵯⴰⴷⴻⵏ, ⵡⴻⵏⵏⵉ ⵉⵟⵟⴼⴻⵏ ⴷⵉ ⵍⵄⴰⵀⴷ ⴷ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⴷⵉ ⵟⵟⵡⴻⵄ ⵏ ⵢⵉⵏⵏⵉ ⵛⴻⴽ ⵉⵜⵜⴻⵅⵙⴻⵏ ⵓ ⵏ ⵢⵉⵏⵏⵉ ⵉⵟⵟⴼⴻⵏ ⴷⵉ ⵜⵡⴻⵚⵚⴰ ⵏⵏⴻⴽ, ^■   6 ⴻⵊⵊ ⴰⴷ ⵢⵉⵍⵉ ⵓⵎⴻⵥⵥⵓⵖ ⵏⵏⴻⴽ ⵉⴼⵜⴻⵏ ⵓ ⵜⵉⵟⵟⴰⵡⵉⵏ ⵏⵏⴻⴽ ⴰⵔⵥⵎⴻⵏⵜ ⵃⵉⵎⴰ ⴰⴷ ⵜⴻⵙⵍⴻⴷ ⵉ ⵜⵥⴰⴵⵉⵜ ⵏ ⵓⵎⵙⴻⵅⵅⴰⵔ ⵏⵏⴻⴽ ⵏⵏⵉ ⵥⵓⴵⴻⵖ ⴰⵙⵙ-ⴰ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ, ⴰⵙⵙ ⴷ ⴵⵉⵍⴻⵜ, ⴷⵉ ⵟⵟⵡⴻⵄ ⵏ ⴰⵢⵜ ⵏ ⵉⵙⵔⴰⵉⵍ, ⵉⵎⵙⴻⵅⵅⴰⵔⴻⵏ ⵏⵏⴻⴽ. ⵏⴻⵄⵎⴻⵖ ⵄⴰⵡⴻⴷ ⵙ ⴷⴷⵏⵓⴱ ⵏ ⴰⵢⵜ ⵏ ⵉⵙⵔⴰⵉⵍ ⵉ ⵥⵉ ⵅⴰⴽ ⵅⴹⴰⵏ. ⵏⴻⵛⵛ ⴷ ⵜⴰⴷⴷⴰⵔⵜ ⵏ ⴱⴰⴱⴰ, ⴰⵇⴰ ⵏⴻⵅⴹⴰ ⴰⴽⵉⴷⴻⴽ. 7 ⵏⴻⴳⴳⴰ ⴰⴽⵉⴷⴻⴽ ⴰⵟⵟⴰⵙ ⵏ ⵍⵄⵉⴱ ⵓ ⵡⴰⵔ ⵏⴻⵟⵟⵉⴼ ⵛⴰ ⴷⵉ ⵍⵓⵎⵓⵔⴰⵜ ⴷ ⵜⵡⴻⵚⵚⴰ ⴷ ⵍⴼⴰⵔⴰⵢⵉⴹ ⵉ ⵥⵉ ⵜⵓⵎⵓⵔⴻⴷ ⵉ ⵓⵎⵙⴻⵅⵅⴰⵔ ⵏⵏⴻⴽ ⵎⵓⵙⴰ. 8 ⵉⴷⴰⵔ ⴰⵡⴰⵍ ⵉ ⵜⵓⵎⵓⵔⴻⴷ ⵉ ⵓⵎⵙⴻⵅⵅⴰⵔ ⵏⵏⴻⴽ ⵎⵓⵙⴰ ⵓⵎⵉ ⵜⴻⵏⵏⵉⴷ: “ⵎⴰⵍⴰ ⴽⴻⵏⵏⵉⵡ ⴷ ⵉⵖⴻⴷⴷⴰⵔⴻⵏ, ⴰⵇⴰ ⴰⴷ ⴽⴻⵏⵏⵉⵡ ⵙⵙⵥⴻⴵⵄⴻⵖ ⵊⴰⵔ ⵍⴻⴳⵏⵓⵙ, ^■   9 ⵎⴰⵛⴰ ⵎⴰⵍⴰ ⵜⴷⴻⵡⵍⴻⵎ-ⴷⴷ ⵖⴰⵔⵉ, ⴰⴷ ⵟⵟⴼⴻⵎ ⴷⵉ ⵍⵓⵎⵓⵔⴰⵜ ⵉⵏⵓ ⵓ ⴰⴷ ⵜⴻⵏⵜ ⵜⴻⴳⴳⴻⵎ, ⵡⴰⵅⵅⴰ ⴷⵉⵏ ⵥⵥⴰⵢⵡⴻⵎ ⵉⵏⵏⵉ ⵅ ⵢⵓⵥⵥⵍⴻⵏ ⵖⴰⵔ ⵟⵟⴰⵔⴼ ⴰⵏⴻⴳⴳⴰⵔ ⵏ ⵓⵊⴻⵏⵏⴰ, ⵏⴻⵛⵛ ⴰⴷ ⵜⴻⵏ ⴷⴷ-ⵙⵙⵎⵓⵏⴻⵖ ⵙⵙⴻⵏⵏⵉ, ⴰⴷ ⵜⴻⵏ ⴰⵡⵢⴻⵖ ⵖⴰⵔ ⵡⴻⵎⵛⴰⵏ ⵉ ⵉⵅⴹⴰⵔⴻⵖ ⵏⴻⵛⵛ ⵃⵉⵎⴰ ⴰⴷ ⴷⵉⵏⵏⵉ ⵙⵙⴻⵥⴷⵖⴻⵖ ⵉⵙⴻⵎ ⵉⵏⵓ.

10 ⵏⵉⵜⵏⵉ ⵡⴰⵀ ⴷ ⵉⵎⵙⴻⵅⵅⴰⵔⴻⵏ ⵏⵏⴻⴽ ⴷ ⵍⴳⴻⵏⵙ ⵏⵏⴻⴽ ⵏⵏⵉ ⵜⴼⴻⴽⴽⴻⴷ ⵙ ⵊⵊⴻⵀⴷ ⵏⵏⴻⴽ ⴰⵎⴻⵇⵇⵔⴰⵏ ⵓ ⵙ ⵓⴼⵓⵙ ⵏⵏⴻⴽ ⵉⵊⴻⵀⴷⴻⵏ.

11 ⴰ, ⵙⵉⴷⵉ ⵉⵏⵓ, ⵉⵍⵉ ⴰⴷ ⵉⴼⵜⴻⵏ ⵓⵎⴻⵥⵥⵓⵖ ⵏⵏⴻⴽ ⵖⴰⵔ ⵜⵥⴰⴵⵉⵜ ⵏ ⵓⵎⵙⴻⵅⵅⴰⵔ ⵏⵏⴻⴽ ⵓ ⵖⴰⵔ ⵜⵥⴰⴵⵉⵜ ⵏ ⵉⵎⵙⴻⵅⵅⴰⵔⴻⵏ ⵏⵏⵉ ⵉⵜⵜⴻⵅⵙⴻⵏ ⴰⴷ ⵜⵜⴻⴳⴳⵯⴻⴷⴻⵏ ⵥⴻⴳ ⵢⵉⵙⴻⵎ ⵏⵏⴻⴽ. ⴻⵊⵊ ⴰⵎⵙⴻⵅⵅⴰⵔ ⵏⵏⴻⴽ ⴰⴷ ⵢⴰⵡⴻⴹ ⴰⵙⵙ-ⴰ ⵓ ⴻⵡⵛ ⴰⵙ ⴰⵔⵔⴻⵃⵎⴻⵜ ⵥⵥⴰⵜ ⵉ ⵡⵓⴷⴻⵎ ⵏ ⵡⴻⵔⵢⴰⵥ-ⴰ.” ⵏⴻⵛⵛ ⵜⵓⵖⴰ ⴰⵢⵉ ⴷ ⴰⵡⴰⵔⵔⴰⴷ ⵏ ⵓⵊⴻⴵⵉⴷ.